Lukà Yàrɨ́ bhǔkù ɔ̀ ɨ̀ nòtù ádrɔ̀drɔ̌ dhu tɨ́ dhu
Yàrɨ́ bhǔkù ɔ̀ ɨ̀ nòtù ádrɔ̀drɔ̌ dhu tɨ́ dhu
Yàrɨ́ nɨ́ Lukà tɨ́ kátɨna ádrʉ̀ngbǎ mʉ̀ngangà (Kɔ̀l 4.14) náandí Yěsù Krɨ́stɔ̀ bhà Ídzì Màkʉ̌rʉ̀. Kǎndí ka Rɔmà tɔ́ kɨgɔ̀ ɔ̀ rɔ̀, mbɛ̀mbɛ̀ azà kumì atɔ mà àrʉ̀bhʉ̀ kumì atɔ mànà nzínzì ɔ̌ Yěsù Krɨ́stɔ̀ ka kʉ́gʉ̀ dhu-dzidɔ̌. Ndɨ Lukà nɨ’ɨ̀ nzɨ̌ Yěsù bhà uvitatálɛ, pbɛ́tʉ̀ kǎtɛ̀ Yěsù nʉnda alɛ mànà ndɨ́nɨ̌ ndɨ̀ ndʉnɨ tɨ́ Yěsù bhà ípìrɔ̌nga nɨ́ɨ’ɨ̀ yà adzɨ ɔ̌ tɨ́ dhu. Ndɨrɔ̀, kʉ̌nda Yěsù bhà uvitatálɛ Pɔlɔ̀ Ídzì Màkʉ̌rʉ̀ t’ʉ́nɔta tɔ́ atdídhená kàbhà abhi ɔ̌ (Kas 16.10-17; 20.5–21.1). Ka nɨ’ɨ̀ nzɨ̌ Mʉ̀yàhudì (Kɔ̀l 4.10-14).
Lukà andí ndɨ bhǔkù Tòfilò tɨ́ kátɨna Mùgìrikì tɔ̀. Ndɨ alɛ ɨ’ɨ̀ ɔrʉ́ ngarí ɔ̌. Kɔ̌vɔ̀-otù ɔ̌, Lukà ambɛ́nà dhu ɔ̀vɔ̀ dɔ̌ yà ɨ̀nzɨ̌ nɨ́ Pbàyàhúdí-tɨdɔ̀ tɔ́ pbàkrɨ́stɔ̀ tɔ̀. Kǎzè dhu nɨ́ abádhí-dɔ ràlʉ̌ dhu Yěsù rɨra ɨ̀ nɨ́gʉ átɔ̀ atdíkpá Pbàyàhúdí mànà.
Lukà àndà nga nà atdídɔ̌ alɛ nɨ́ ɨtsɨ̀ya ɔ̀nzɨ ka karɨ́ alɛ: vèbhálɛ, nzónzo, nzɛ́rɛngatálɛ, nǎkʉ̀tálɛ, andɨtálɛ, nzɛ́rɛ-alafí ɨ́rǎ alɛ, ndɨrɔ̀ ɨ̀nzɨ̌ nɨ́ Pbàyàhúdí. Kàbhà ɔtɛ-lùkpǒ nɨ́: ɨtsɔ̀ta, Ɨ̀lɨ̌lǎ-Alafí, hirò ɔ̀nzɨ ka kɨ́ dhu, nzɛ́rɛnga t’ʉ́bàta, ndɨrɔ̀ dhu àkǎ kɔdɔ̀ alɛ ádrʉ̀ngbǎlɛ Yěsù rǐngo dhu tɔ̀ dhu.
Ungbòta-Ɔwʉ́tá ɔ̀, kǎndí ndɨ «Uvitatálɛ kàsʉ̌ tɔ́ bhǔkù.»
Bhǔkù-nyɨ̀tɨ̀ ka kóhù tɨ́ dhu
- Bhǔkù-dɔ̀kpa (1.1-4).
- Bàtizò nubhónà Yùwanɨ̀ ʉ̀gʉ ka kɨ́ dhu mà Yěsù ʉ̀gʉ ka kɨ́ dhu mànà dhu (1.5–2.52).
- Bàtizò nubhónà Yùwanɨ̀ rɨ̌ Ídzì Màkʉ̌rʉ̀ ʉ̀nɔ dhu (3.1-20).
- Yěsù rɨ̌ bàtizò àlʉ̌ dhu mà pfɔ̀mvɔ Sìtanɨ̀ rɨ̌ kà-afí ùmvǔ dhu mànà dhu (Luk 3.21–4.13).
- Gàlìlayà tɔ́ pbìrì ɔ̌ Yěsù anzɨ̀ kasʉ (4.14–9.50).
- Yèrùsàlɛmà tɔ́ kɨgɔ̀ ɔ̀ ndɨ̀ ndárà ɔ̀ná kàsʉmɨ̀ ɔ̌ Yěsù anzɨ̀ kasʉ (9.51–19.44).
- Yèrùsàlɛmà ndɨ̀ ndàrà àhʉ rɔ̀ Yěsù anzɨ̀ dhu mà kʉ̌dà ɔ̀yá dhu mànà (19.45–24.53).
Currently Selected:
Lukà Yàrɨ́ bhǔkù ɔ̀ ɨ̀ nòtù ádrɔ̀drɔ̌ dhu tɨ́ dhu: NIY
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.