Mako 11

Yesu okutaaha omuri Yerusaalemu n'ekitiinisa

1 # Luk 19:29-38; Mat 21:1-9; Yoh 12:12-16. Kandi ku bairiire haihi na Yerusaalemu, baahika Besifaage na Besania aha kibungo kya Zeituuni; yaatuma abeegi be babiri, 2yaabagira ati: Mugyende omu kirorero ekibari omumaisho; ahonaaho ku muraataahemu, nimwija kushangamu omwana gw'endogoya gutsibikire, ogutakatembwahoga muntu; mugutsibure, mugundeetere. 3Omuntu weena, ku araababuuze ati: Nimugutsiburira ki? imwe mugarukyemu muti, Mukama waitu naagwenda, kandi naija kugugarura juba. 4Batyo baagyenda, baashanga omwana gw'endogoya gutsibikire aha irembo aha rubaju rw'omuhanda; baagutsibura. 5Kandi bamwe aha baabaire beemereire aho, baababuza bati: Nimukora ki okutsibura omwana gw'endogoya? 6Baabagarukamu nk'oku Yesu yaabagambira; baabareka. 7Baareetera Yesu omwana gw'endogoya, baagutaho ebijwaro byabo; Yesu yaagutembaho. 8Baingi baayarira ebijwaro byabo omu nguuto, abandi amababi agu baihire omu misiri. 9#Zab 118:25, 26. Abamushendekyereize bamwebembeire, n'abandi bamuri enyima, baayeshongora n'eiraka rihango bati: Hosana, Orikwija omu iziina rya Mukama asiimwe! 10Obugabe oburikwija obwa tatenkuriitwe Daudi busiimwe! Hosana ahaiguru munonga!

Yesu okushemeza hekalu

11 # Luk 19:45-48; Mat 21:12-22. Yaahika omuri Yerusaalemu, yaataaha omuri hekalu; ku yaarabizemu amaisho kwetegyereza byona, yaashohora; kandi ahakuba bukaba bwaizire, yaaza Besania na bari ikumi na babiri. 12Omu kasheeshe, ku baabaire bahika omu muhanda nibaruga Besania, yaagira enjara. 13Ku yaareebire hangahari omutiini oguriho amababi, yaagyenda yaaguhikaho, ngu akaagira eki yaagushangaho. Kwonka ku yaaguhikireho, tiyaashangaho kantu kureka omubengyeyo gw'amababi, ahabw'okuba bukaba butari bunaku bw'okwana. 14Yaagugira ati: Okuruga hati okuhitsya ebiro byona hatarigira omuntu owaarya aha byana byawe. N'abeegi be baakihurira.

15 # Yoh 2:14-16. Baagumizamu, baahika Yerusaalemu. Yaataaha omuri hekalu, yaatandika kubingamu abaabaire nibatunda, n'abaabaire nibagurira omuri hekalu; yaajuumika emeeza z'abarikuhingisa empiiha, n'ebitebe bya'bo abaabaire nibatunda enkombe; 16kandi tiyaikiriza muntu weena kurabya omuri hekalu eikintu akyekoreire. 17#Isa 56:7; Yer 7:11. Yaayegyesa naabagambira ati: Timurikumanya ku kyahandiikirwe ngu, Enju yangye eryayetwa enju y'okuguma neeshabirwamu amahanga goona? Mbwenu imwe mugihindwire enyanga y'abambuzi, 18Abanyamurwa abakuru n'abahandiiki, ku baakihuriire, baacwa obwengye oku baraamwite; kwonka baamutiina, ahabw'okuba abantu boona bakaba nibatangaarira okwegyesa kwe. 19Kandi ku bwabaire bwira, aruga omu rurembo.

Okwoma kw'omuti ogu Yesu yaakyeenire

20Kandi ku baabaire nibahingura omu kasheeshe akandi, baareeba ogwo mutiini gwomire okwiha omu mizi. 21Petero yaijuka ekibaireho, yaagira Yesu ati: Rabi, reeba omutiini ogu okyeenire gwomire! 22Yesu yaabagarukamu naagira ati: Mwesigye Ruhanga! 23#Luk 17:6; Mat 17:20. Kandi buzima nimbagambira nti: Weena origira orushozi oru ati, Tsinduka, onagwe omu nyanja, atarikubanganisa mu mutima gwe, naikiriza ngu eki arikugamba nikiija kubakwo, aryakikorerwa. 24#Mat 7:7; Yoh 16:23. Nikyo ndikubagirira nti: Byona ebi murishaba omu kushaba kwanyu, mwikirize ngu mubihairwe, kandi kwo muryabiheebwa. 25Obutoosha ku muraagume mwayemerera nimushaba, mwaba mwine ekigambo aha muntu weena, mumusaasire; na Shoimwe ori omu iguru abone kubasaasira eby'okushiisha byanyu. 26#Mat 6:14, 15. Ahakuba ku muraabe mutarikusaasira, na Shoimwe ori omu iguru taribasaasira by'okushiisha byanyu.

Abanyamurwa okubuuza Yesu ahu yaihire obushoboorozi

27 # Luk 20:1-8; Mat 21:23-27. Kandi baagaruka Yerusaalemu. Ku yaabaire naagyendagyenda omuri hekalu, abanyamurwa abakuru n'abahandiiki n'abakuru b'abantu baija ah'ari, 28baamubuuza bati: Ni bushoboorozi ki oburikukukoresa ebi, nari shi n'oha owaakuhaire obushoboorozi obu kubikora? 29Yesu yaabagarukamu ati: Reka naanye mbabuuze ekigambo kimwe; haza mungarukyemu, naanye mbone kubahsobororera obushoboorozi oburikunkoresa ebi. 30Okubatiza kwa Yohaana kukaruga omu iguru nari omu bantu? Mungarukyemu. 31Baayegarukanamu nibagira bati: Ku turaagire tuti, Kukaruga omu iguru, naatugarukamu ati: Kandi shi, n'enki ekyabazibiire kumwikiriza? 32Tugire tuti, Kukaruga omu bantu? –baatiina abantu, ahakuba abantu boona bakaba nibahamya ngu Yohaana ni nabi buzima. 33Baamugarukamu bati: Titurikuhamanya. Yesu nikwo kubagira ati: Naanye tindikubagambira bushoboorozi oburikunkoresa ebi.

Currently Selected:

Mako 11: RR64

Highlight

Copy