Mako 5

Yesu okubinga baadaimoni aha muntu wa Geraseene

1 # Luk 8:26-40; Mat 8:28-34. Kandi baahika seeri y'enyanja omu nsi y'Abageraseene. 2Ku yaarugire ati omu bwato, yaabuganwa omuntu owaabaire naaruga omu bituuro ariho daimoni. 3Omushaija ogwo akaba atuura omu bituuro, kandi tihariho muntu owaabaire naakibaasa kumuboha, nangwa n'obu yaakuba n'emihama; 4ahakuba emirundi mingi bakaba bamubohesa emirunga n'emihama; emihama agihendagura, n'emirunga agicwa; tihaine muntu owaabaire agira amaani g'okumucureeza. 5Obutwire bwona nyomushana na nyekiro akaba ayamuriza omu bituuro n'omu bibungo naayeshaza amabaare. 6Ku yaareebire Yesu akiri hare, yairuka yaamuramya; 7naayamuza n'eiraka rihango, naagira ati: Noofa ki naanye, Yesu Omwana wa Ruhanga Rukira-boona? Ninkurahiza Ruhanga, otaanyita kubi! 8Ahakuba Yesu akaba yaamuragiira ati: Murugyeho, iwe daimoni! 9Yesu yaamubuuza ati: Eiziina ryawe ori oha? Yaamugarukamu ati: Eiziina ryangye niinye #5:9 Ekigambo Legioni nikimanyisa omubaro mwingi munonga. Legioni, ahabw'okuba turi baingi. 10Yaamweshengyereza munonga, ngu atababinga omu nsi omwo. 11Kandi omu rukiizi hakaba hariiriireyo omukumbi gw'empunu nyingi; 12baadaimoni baamweshengyereza bati: Twohereze omu mpunu, tube nizo twataahamu. 13Yaabaikiriza. Baadaimoni baamurugaho, baazitaahamu; empunu ezo zikaba ziri nk'enkumi ibiri zaashuumira aha ibanga niziiruka, zaahwera omu nyanja.

14Abariisa baazo bairuka, baabigambira ab'omuri tauni n'ab'omu maka; abantu baahurura, baija kureeba ekyabaho. 15Ku baahikire ahari Yesu, baashangaho owaabaire ariho baadaimoni ashutami, ajwaire gye, aine obwengye bwe; baatiina. 16Abariisa abaabireebire baabashobororera ebyaba ahari ogwo owaabaire ariho baadaimoni hamwe n'eby'empunu. 17Baatandika kweshengyereza Yesu kubarugira omu nsi. 18Kandi ku yaabaire naagaruka omu bwato, owaabaire ariho baadaimoni yaamweshengyereza kuguma nawe. 19We yaamwangira, yaamugira ati: Irooko otaahe owaanyu omuri bagyenzi baawe, obagambire ebi Mukama akukoreire ku biri bikuru, n'oku akusaasiire. 20#Mak 7:31. Yaagyenda, yaatandika kubuzya omuri Dekapooli ebi Yesu amukoreire, ku biri bikuru; abantu boona baatangaara.

Yesu okuhimbuura omwana wa Yairo

21Yesu ku yaagarukire, yaayambukira omu bwato, yaahika seeri. Omutwe gw'abantu baingi gwateeranira ah'ari; kandi akaba ari haihi n'enyanja. 22#Luk 8:41-56; Mat 9:18-26. Haija omwe aha bakuru ba sinagogi, eiziina rye Yairo. Ku yaareebire Yesu, yaamukwata amaguru; 23yaamweshengyereza, naagira ati: Kahara kangye naatsiga niguhiriita. Ija okateho engaro, kakire, kagire amagara. 24Yaagyenda nawe. Abantu baingi baamukuratira, baagyenda bamushagatiire.

Yesu okukiza omukazi owaabaire arwaire ekyejwiso

25Kandi hakaba hariho omukazi owaabaire amazire emyaka ikumi n'ebiri arwaire ekyejwiso, 26naafa kubi munonga naaraguza omu bafumu baingi, yaamariireyo ebintu bye byona, kwonka atarikukira, kureka okweyongyera kurwara. 27Ku yaahuriire ebya Yesu, yaija enyima ye omu mutwe gw'abantu, yaakora aha kijwaro kye; 28ahakuba akahamya naagira ati: N'obu naakukora aha bijwaro bye, nkaakira. 29Ahonaaho ekyejwiso kye kyayoma; yaayehurira omu mubiri gwe ku yaakirira kimwe endwara ye. 30#Luk 6:19. Yesu, ku yaahuriire amaani gaamurugamu, ahonaaho yaahindukira omutwe gw'abantu, yaababuuza ati: N'oha owaakora aha kijwaro kyangye? 31Abeegi be baamugira bati: Nooreeba abantu baingi nibakumigisiriza, oti, Owankoraho n'oha! 32Yaababunzyamu amaisho kureeba owaakora ekyo. 33Kwonka omukazi, ahabw'okumanya eki yaakorerwa, yaija aine obwoba naatetema, yaagwa ahansi omu maisho ge, yaamugambira amazima goona. 34Yesu yaamugarukamu ati: Mwana wangye, okwikiriza kwawe nikwo kwakukiza, yegyendere n'obusingye, okirire kimwe endwara yaawe.

35KU yaabaire naakigamba, haija abaaruga omu ka y'omukuru wa sinagogi, nibagira bati: Muhara waawe yaakaba; nooruhiza ki omwegyesa? 36Kwonka Yesu tiyaata mutima aha ki baagamba, yaagambira omukuru wa sinagogi ati: Otatiina, ikiriza kwonka. 37Kandi tiyaikiriza muntu weena kugyenda nawe, kureka Petero na Yakobo na Yohaana murumuna wa Yakobo. 38Ku baahikire aha nju y'omukuru wa sinagogi, yaashangaho okucura, abantu nibarira nibaborooga. 39#Yoh 11:11. Ku yaataahiremu, yaabagira ati: N'enki ekirikubateeza orwari n'okubariza? Omwishiki tafiire, agwejegyeire. 40Baamushekyerera munonga. Kwonka ku yaaherize kubashohoza boona, yaatwara ishe w'omwishiki na nyina n'abu yaabaire aine, yaataahamu, yaahika ahu omwishiki yaabaire ari. 41#Luk 7:14. Yaamukwata aha mukono, yaamugira ati: Talisa-kuumi! amakuru gaakyo ngu Mwishiki 'we, ninkugambira nti: Imuka. 42Ahonaaho omwishiki ogwo yaimuka, yaagyenda; ahakuba akaba ahikize emyaka ikumi n'ebiri. Ahonaaho baagira okutangaara kwingi munonga. 43Yaabeehanangiriza munonga, ngu hatagira owaakimanya; yaaragiira ku bamuha eby'okurya.

Currently Selected:

Mako 5: RR64

Highlight

Copy