Gen 31

Yakobo akutila kwa Labani

1Yakobo* ŵapikene kuti ŵanace ŵacalume ŵa Labani ŵaliji mkudandawula kuti, “Yakobo sambano asicile, nipo acipatile cipanje cosope kutyocela mcipanje ca baba wetu.” 2Yakobo nombe najo ŵayiweni kuti Labani nginamnonyelaga jwalakwe mpela pandanda. 3Lisiku line AMBUJE* ŵamsalile Yakobo kuti, “Ujilani kucilambo ca acinangolo ŵenu ni kwa acalongo acimjenu nipo une tilongane namwe ni kumkamucisya.”

4Myoyo Yakobo ŵatumile mundu kuja kwaŵilanga Lakelo ni Leya kuti ayice kwitinji kuŵalicisyaga yilangwa kula. 5Ali ayice jwalakwe ŵasalile kuti, “Nayiweni kuti baba ŵenu ngakunonyela mpela muŵatendelaga pandanda. Nambo Mlungu juŵamlambilaga baba ŵangu ŵaliji ni une. 6Jemanja mkumanyilila cenene kuti une nakamulile masengo baba ŵenu ni macili gangu gosope. 7Nambo baba ŵenu aŵele alimkundoŵesya, ni kugagalawusya malipilo gangu kakumi. Nambo Mlungu nganakunda kuti baba ŵenuwo andendele une cindu cakusakala. 8Ndaŵi syosope baba ŵenu piŵasalaga kuti, ‘Yilangwa ya madondomadondo tigaciŵa malipilo genu,’ yilangwa yosope yaŵelekaga ŵanace ŵa mandondomandondo. Nipo piŵatite, ‘Yilangwa ya maŵalamaŵala tiyiŵe malipilo genu,’ yilangwa yosope yaŵelekaga ŵanace ŵamaŵalamaŵala. 9Ni mwele mwajigalile Mlungu yilangwa yosope ya baba ŵenu ni kumba une.

10“Lisiku line, pa ndaŵi jakuti yilangwa yijigale maŵele, une nasagamile sagamisi, nipo nalolite kuti atonde ŵiŵaliji mkumemesya, ŵaliji ŵamaŵalamaŵala, ŵa madondomadondo, ni ŵa miselamisela. 11Nipo lilayika lya Mlungu lyambilasile une musagamisi m'momo kuti, ‘Yakobo!’ Une ni najanjile kuti, ‘Ee!’ 12Lilayika lila lyatite, ‘Mlolecesye kuti atonde wosope ŵakumemesya ali ŵamaŵalamaŵala, ŵa madondomadondo, ni ŵa miselamisela. Yeleyi junayitesile ni une ligongo nayiweni yosope yakumtendela m'mwejo Labani. 13Uneji ndili Mlungu junamwonecele m'mwejo ku Beteli, kwekula kumwalijimice liganga lya cikumbukumbu ni kulitaga mawuta, kweleko soni m'mwejo mwalumbile kwa une. Mliŵicile cile sambano, mtyoce akuno, mwujile kucilambo cimwapagwile.’ ”#Gen 28:18-22 14Lakelo ni Leya ŵamjanjile Yakobo kuti, “Pangali soni cipanje cisigele kwa baba ŵetu cakuti uwe tucipocela. 15Uwe sambano baba ŵetuŵa akutuwona mpela acalendo, ŵatulowolesye nambo mbiya syakwesyo, ŵagambile kulya jika, uwe ngatugaŵila. 16Cipanje cosope cacisumwile AMBUJE kwa baba ŵetu ni kumpa m'mwejo, cili cetu ni ŵanace ŵetu. Myoyo, ŵalakwe atende cilicose ciŵasalile Mlungu.”

17-18Myoyo Yakobo ŵaliŵicile cile kuti atyoce, kuwujila kwa baba ŵawo ku cilambo ca Kenani. Myoyo ŵakwesisye ŵanace ŵakwe na aciŵamkwakwe pa ngamila.* Yilangwa yosope ŵayilongwesye ni ŵaliji mkuyisakula, pamo ni yindu yosope yiŵayipatile ku Mesopotamiya kula. 19Lakelo mkanatyoce, ŵajiŵile milungu ja pa mlango pa baba ŵawo. Labani ndaŵi jeleji ali apite kukusisenga ngondolo manyunya. 20Yakobo ŵamloŵesye Labani pangamsalila kuti akutyoka. 21Ŵajigele yindu yakwe yosope yiŵakwete nipo ŵatyosile wakutila. Piŵajombwece Lusulo lwa Yufuleti, ŵawutandite ulendo wakwinjilila ku cilambo ca matumbi ga Giliyadi.

Labani akumkuya Yakobo

22Pali papite masiku gatatu, Labani ŵapikene kuti Yakobo ŵatisile. 23Myoyo Labani ŵajigele acalongo acimjakwe ni ŵamkuyiye Yakobo kwa masiku msano ni gaŵili, mpaka ŵajile kumsimanila ku cilambo ca matumbi ga Giliyadi. 24Labani ŵasagamile sagamisi cilo cicoco. Mlungu ŵamyicilile ni ŵamsalile kuti, “Myitole cenene, mkasimumjogoya Yakobo mwitala lililyose.” 25Labani ŵamsimene Yakobo ali ataŵile masakasa gakwe mcilambo ca matumbi ca Giliyadi. Nombe nawo Labani piŵaŵandicile kuŵaliji Yakobo, ŵataŵile masakasa gakwe pamo ni acalongo acimjakwe ŵala ku mbali jine ja cilambo cicoco.

26Labani ŵatite kwa Yakobo, “Ligongo cici munyenjile ni kwajigala ŵanace ŵangu ŵacakongwe mpela acikapolo ŵakukamulwa ku ngondo? 27Ligongo cici m'mweji nganimusalila yakutyoka kwa ulendo wenu? Mkasalile ngati ngamkundile kutyoka mwakusangala, soni tukampecesye tuli mkwimba nyimbo ni kagoma ni yida yakwimbila ya ngonji. 28Nganimungunda kuti langane ni yisukulu yangu ni ŵanace ŵangu? Nganimtenda yindu yambone. 29Ngwete macili gakumtendela m'mwejo yindu yakusakala. Nambo Mlungu jwa baba ŵenu ambonecele une cilo cipeteci musagamisi, ni asalile kuti, ‘Myitole cenene, mkasimumjogoya Yakobo mwitala lililyose.’ 30Ngumanyilila kuti mtyosile ligongo mkusacileje mnope kumangwenu. Nambo ligongo cici mjiŵile milungu jangu?”

31Yakobo ŵajanjile kuti, “Une ndyosile ŵakutila ligongo naliji mkogopa, kuti mwine mwakwe ŵalakwe tasumule ŵanace ŵawoŵa. 32Nambo naga akumsimana jwine jwalijose apano ali ajigele milungu jawojo, jwelejo tawulajidwe. Ŵandu ŵatuli nawo apanoŵa atendele umboni ndaŵi jele ŵalakwe talolesyeje yindu yawo mkatundu josopeju. Naga akuyisimana yindu yawoyo ajigale.” Piŵaŵecetaga gele maloŵega Yakobo nganamanyililaga kuti Lakelo ni ŵiŵajiŵile milungu ja baba wawojo.

33Myoyo Labani ŵajinjile kuja kulolesya yindu yakwe mwisakasa lya Yakobo, piŵakopwece, ŵajinjile mwisakasa lya Leya. Ŵajinjile soni mu tenti ja ŵamasengo ŵacakongwe ŵaŵili ŵala, nambo nganajisimana milungu jawojo. Kaneko ŵajile kwinjila mu tenti ja Lakelo. 34Lakelo ŵajisisile milungu ja baba ŵawo jila kusi kwa sadulo jakutamila pa mgongo pa ngamila, jwalakwe ni ŵatamile pacanya pakwe Labani ŵalolesisye palipose mu tenti mula, nambo nganajisimana milungu jawo jila. 35Lakelo ŵasalile baba ŵawo ŵala kuti, “Baba mkandumbilila une, ngulepela kwima pameso penu ligongo uneji nganimba cenene mcilu mwangumu, malinga ni ulwele wetu wa cikongwewu.” Myoyo Labani ŵalepele kujipata milungu jawo jila.

36Pelepo Yakobo ŵapile mtima mnope nipo ŵaŵecete ni Labani mwa ukali, ŵatite kuti, “Ana cinalemwecesye ŵalakwe ni cici? Ana ngasile lilamusi lya mtundu uli kuti mpaka ŵalakwe anguye une? 37Ŵalakwe asosilesosile yindu yawo mkatundu mwangu mosope, nambi apatile cici cawo? Cindu cawo cacipatileco acikoposye aciŵice pakulolecela apa, kuti ŵandu ŵenu ni ŵandu ŵangu aciwone. Nipo jemanjaji ni ŵatalamule mundu jwali jwakulemwa pasikati pa ŵaŵiliŵa. 38Ndemi nawo ŵalakwe yaka 20 sambano, nipo ngondolo syawo pamo ni mbusi syakwe nganisipolosya amta jimo. Une nganindya ngondolo jajilijose ja mwicinga mwawo. 39Natiji naga ngondolo jikukamulwa ni yilombo, une nalipilaga jine ndaŵi syosope, nganiyikaga kukwatulila ŵalakwe, kulosya kuti une nganileŵa. Ŵalakwe ŵasosaga kuti une ndipileje cindu cilicose cakwiŵidwa cilo ni musi ŵakwe. 40Masiku gamajinji naliji mkulaga ni citukuta ndaŵi ja musi, cilo naliji mkulaga soni ni kusisima. Une nganinalupataga lugono. 41Amu ni muyaŵelele yindu pa yaka 20 yindemi nawo ŵalakwe. Nakamwile masengo yaka 14 ligongo lyakuti lombele ŵanace ŵenu ŵacakongwe ŵaŵiliŵa, soni nakamwile masengo yaka yine msano ni cimo kuti ŵalakwe andipile une yilangwa. Nambo ŵalakwe aŵele ali mkugacengacenga malipilo gangu kalikumi. 42Yikaŵe kuti Mlungu jwa acibaba ŵangu, Mlungu jwa Abulahamu,* ni Isaki, nganaŵa ni une, ŵalakwe akandopwesye une kalakala ndili yalayalape. Nambo Mlungu ŵayiweni yisawusyo yangu ni masengo ginatesile uneji ni yala yangu, jwalakwe ŵangamucisye. Ni ligongo lyakwe Mlungu ŵajamwice ŵalakwe cilo cipiteci, kwalosya ŵalakwe kuti ali ŵakulemwa.”

Labani ni Yakobo akutenda cilanga

43Labani ŵamjanjile Yakobo kuti, “Leya ni Lakelo ali ŵanace ŵangu, nipo ŵanace ŵaŵeleceŵa ali yisukulu yangu. Yilangwa yosope yimkweteyi yili yangu. Kuŵeceta yakuwona cipanje cosope cimkweteci cangu. Nambo pakuŵa ngakomboleka une kwasunga ŵanace ŵangu ŵacakongweŵa pamo ni ŵanace ŵawo. 44Une ndili tayale kuŵikana cilanga* ni m'mwejo. Kwende tuwunjice liwunjili lya maganga kuti liŵe cikumbukumbu ca cilanga cetu.”

45Yakobo ŵajigele liganga lyekulungwa ni ŵalijimice kuti liŵe cikumbukumbu. 46Ŵasalile ŵandu ŵakwe kuti alokotanye maganga ni kugawunjika liwunjili limo, mwakuŵandikana ni liganga lyalikulungwa lila. Nipo Yakobo ni Labani ŵalile pamo yakulya mungulugulu liwunjili lya magangago. 47Labani ŵalipele lina liwunjili lya magangalyo lyakuti Yagala Sahaduta, nambo Yakobo ŵalipele lina lyakuti Galedi. 48Panyuma pakwe Labani ŵatite kuti, “Liwunjili lya magangali tiliŵe cikumbukumbu kwa m'mwejo ni une.” Ali ni ligongo lyakwe malo gala ŵagapele lina lyakwe Galedi. 49Labani ŵaŵecete soni kuti, “AMBUJE tatulolecesyeje uwe ndaŵi jitukulekangana.” Myoyo malo gala ŵagapele soni lina line lyakuti Misipa. 50Labani ŵapitilisye kumsalila Yakobo kuti, “Naga mkuja kwatendela ngalwe ŵanace ŵanguŵa, kapena naga mkuja kulombela acakongwe ŵane, atamose kuti une ngayimanyilila, mkakumbucile kuti Mlungu ni ŵali mboni pa cilikati ca m'mwejo ni une. 51Apano pana liwunjili lya maganga lituwunjice, soni panopano pana liganga lyekulungwa citulijimice kuti liŵe cikumbukumbu. Liwunjili lya maganga ni liganga lya cilocesyo ni yeleyi, yayili cilikati ca m'mwejo ni une. 52Liwunjili lya magangali lyeleli pamo ni liganga lya cikumbukumbuci, yosopeyi yili mboni. Une ngasinagapeleta gele magangaga kuti ndende ngondo jakulimbana ni m'mwejo. Nombe m'mwejo mkasimgapeleta gele magangaga kwika kumangwetu kuti mkatende ngondo jakulimbana ni une. 53Baba ŵangu Naholi, Abulahamu anganga ŵenu, ni acinangolo ŵawo, ŵamlambilaga Mlungu jwawo jumope, Jwelejo ni jutalolecesye kuti jwalijose jwetuwe akusunga cilanga citulanganeci.” Myoyo Yakobo ŵalumbile mu lina lya Mlungu jwele Isaki baba ŵawo ŵamjogopaga, kuti tacisunje cele cilangaci. 54Myoyo Yakobo ŵatasile mbopesi kwa Mlungu petumbi piŵaliji pala. Ŵaŵilasile ŵandu ŵakwe kuti ayice kulya najo yakulya. Ali amasile kulyako ŵagonile petumbi papopo mpaka kwacele. 55Kundaŵindaŵipe, pa kwacele, Labani ŵajimwice ni ŵalanjile ŵanace ŵawo ŵacakongwe ni yisukulu yawo yila, nipo ali ŵapele upile ŵatyosile ni kuwujila kumangwawo.

Currently Selected:

Gen 31: YAWO

Highlight

Copy