Gen 40
40
Yosefe akugopolela sagamisi sya acikayidi
1Pali papite ndaŵi, mundu jwakupelecela finyo pamo ni mundu jwakuteleka mikate ku nyumba ja Mwenye jwa ku Iguputo, ŵamlemwecesye Mwenye jwa ku Iguputojo. 2Mwenye jwa ku Iguputo ŵatumbilile mnope ŵamasengo ŵakwe ŵaŵiliŵa. 3Ni ŵaŵisile m'nyumba ja ukayidi muŵaliji Yosefe mula. Ŵaŵisile jemanjajo m'myala mwa jwamkulungwa jwa asilikali ŵakulondela nyumba ja mwenye jula. 4Jwamkulungwa jwa asilikali ŵakulondela jula ŵamsagwile Yosefe kuti ŵasamalileje ŵandu ŵaŵiliwo ni kwalonda. Ŵatemi ndaŵi jajilewu mu ukayidimo nipo Yosefe ŵaliji mkwatumicila.
5Cilo cine ŵandu ŵaŵili ŵala, jwakupelecela finyo jula ni jwakuteleka mikate, ŵasagamile jwalijose sagamisi syakwe. Kugopolela kwa sagamisi syawo kwaliji kwakulekangana 6Piŵayice Yosefe kundaŵi, ŵasiweni pa ngope syawo kuti ŵaliji ŵakudandawula. 7Ni ŵawusisye kuti, “Ligongo cici mkuwoneka ŵakudandawula lelo?”
8Wosopewo ŵajanjile kuti, “Uwe tusagamile sagamisi ciloci, nipo pangali mundu jwakutugopolela mate gakwe.” Yosefe ŵasalile kuti, “Mlungu jika ni jwakusapeleka lunda lwa kugopolela sagamisi. Musalile yimsagamile.”
9Myoyo mundu jwa kupelecela finyo jula ŵatandite kusala sagamisi syakwe, ŵatite, “Une sagamile ndili mkuciwona citela ca mpeleya, 10uli ukwete nyambi sitatu. Masamba gakwe gali nasipukape, papopo gawonece maluŵa, panyuma pakwe pawonece soni yisogosi ya mpeleya yejiwu. 11Mgawo wa Mwenye jwa ku Iguputo waliji m'myala mwangu, une naliji mkaŵa yisogosi ya mpeleyayo ni kuyiminyila mu mgawo, ni napelece kwa mgawowo kwa Mwenye jwa ku Iguputo.”
12Yosefe ni ŵatite, “Aku ni kugopolela kwakwe: nyambi sitatusyo gali masiku gatatu, 13patigamale masiku gatatu Mwenye jwa ku Iguputo tamkululucile, ni kumwucisya soni pa masengo genu. Timkapelecele mgawo myala mwa Mwenye jwa ku Iguputo mpela yimwatendaga pimwaliji jwamkulungwa jwakupelecela mgawo wakwe. 14Nambo mkangumbucile une naga yindu yikamjendele cenene, soni conde mkambecetele kwa Mwenye jwa ku Iguputo kuti mungamucisye kuti ngopoce une m'nyumba ja ukayidi muno. 15Unetu ŵatesile kunjiŵa, ni ŵayice ni une akuno kutyocela ku cilambo ca Ahebeli. Soni atamose akuno, nganindenda kandu kakulemwa ka mpaka kumbugalila nako mu ukayidi.”
16Jwamkulungwa jwakuteleka mikate jula piŵayiweni kuti gopolela kwa sagamisi sya mjawo jula kwaliji kwambone, jwalakwe nombe ŵamsalile Yosefe kuti, “Une soni sagamile ndili ndwicile mbeta sitatu sya mikate pa mtwe pangu. 17Mlupeta lwa pacanya, mwaliji mwana mikate jakulekanganalekangana ja Mwenye jwa ku Iguputo, nipo yijuni yaliji mkulya mikate jijaliji mlupeta pa mtwe pangu.”
18Yosefe ŵajanjile kuti, “Aku ni gopolela kwakwe: mbeta sitatusyo, gali masiku gatatu. 19Pitigamale masiku gatatu Mwenye jwa ku Iguputo tacimgopola ni kuwukata mtwe wenu. Cilu cenu tacicikoleka mcitela nipo yijuni tiyicilya mnowu wenu.”
20Lisiku lyatatu, lyaliji lyakukumbucila kupagwa kwa Mwenye jwa ku Iguputo. Mwenye jwa ku Iguputo ŵalinganyicisye cindimba ŵamasengo ŵakwe. Ŵagopwele acakulungwa ŵaŵili ŵala, jwakupelecela mgawo ni jwakuteleka mikate, ni ŵajigalile pameso pa ŵandu ŵakwe. 21Ni ŵamwucisye jwamkulungwa jwa jwakupelecela finyo ula pa masengo gakwe. Ŵatandite kupelecela finyo m'myala mwa Mwenye jwa ku Iguputo. 22Nambo jwamkulungwa jwakuteleka mikate ŵamkolece mcitela, yatendekwe mpela muŵaŵecetele Yosefe. 23Nambo jwamkulungwa jwakupelecela mgawo nganamkumbucila Yosefe, ŵamliŵalile.
Currently Selected:
Gen 40: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
