Yai 5

Musa kede Aaron i Nyim Abaka me Misiri

1I cen mere Musa kede Aaron oko ot but Parao di kiko waco ne be, “Rwot Rubanga me Isirael owaco be, ‘Wek jo na yai oti, tetekeny kioti kited ebaga me wora i wi tim.’ ”

2Parao oko dwoko be, “Rwot obedo ngai kamiango awinyo kop mere di ako weko jo me Isirael oti? Ango gira likame angeo Rwot, doko da likame abino weko jo me Isirael yai ot.”

3Musa kede Aaron oko dwoko be, “Rubanga me Iburanian onyutere but wa. Yei ne wan ot sapali me ceng adek i wi tim pi ot mino Rwot Rubanga wa giayala, aso ka li, en ebino neko wa kede tuwo arabo ebino mino koneko wa kede epima.”

4Do Parao oko dwoko ne Musa kede Aaron be, “Pinyo komio itienu mino jo weko timo tic. Ipasoi go poore doki kiot timo tic! 5Gin kitieko doko tot kalamo jo me Misiri, do di doko nan wun itienu mito mino gi weko tic!”

6Cenge nono Parao oko ciko jo kame kwao ipasoi kede nyampalan me jo me Misiri be, 7“Jikunu do mino jo ocici me timo matapali, wekunu gin kikom gi en kame kicak do ot mono ocici. 8Do wel me matapali kame gin kitimo poore dong di rom aroma bala lem sek, kur idwokunu wel me matapali piny, pien gin kinyap en komio kibedo kok buta be, ‘Wek wa ooti omi Rubanga wa giayala.’ 9Miunu gi tic atek kipumere kede, en ako mino gi kibed li kede kare me winyo kope atatai me abe.”

10Jo kame kwao ipasoi kede nyampalan me ateker me Isirael oko ot di kiko waco ne jo me Isirael be, “Parao owaco be likame bobo ebino meede mino wu ocici me timo matapali. 11Ewaco be wun kikomu iotunu imounu ocici i kakame wun itwerunu udo gi iye, do likame kobino dwoko piny rom me tic kame ipoorenu timo.” 12Aso, jo me Isirael oko sarakin i Misiri lung mono ocici. 13Jo kame oudo kwao ipasoi oudo burakino gi tic di kiwaco be, “Cobunu timo tic arom aroma kede tic kame oudo itimunu buli ceng i kare kame oudo kogabo wu agaba kede ocici.” 14Jo kame Parao oketo kwano ipasoi oko donyo bungo nyampalan me jo me Isirael kame gin kiyero di kipenyo gi be, “Pinyo komio jo wu likame tie timo matapali kame wel gi rom aroma kede kame oudo ngoce kitimo buli ceng?”

15Di nyampalan me jo me Isirael oko ot but Parao di kiko penye be, “Adwong me awora, pinyo komio itie tero jotic ni kirac kamano? 16Likame kotie mino wa ocici do di kotie cwako wa be, ‘Timunu matapali!’ Nen ber kite kame kotie bungo kede jotic ni! Do jo nin en atie kede raco.”

17Parao oko dwoko be, “Wun inyapunu en komio itienu penya be aweku iotunu imiunu Rwot giayala. 18Nan dokunu iotunu timo tic; likame kobino mino wu ocici akadi acel, do buli ceng miero itimunu matapali kame wel gi rom aroma kede me lem sek.” 19Nyampalan me jo me Isirael oko ngeno be oudo kitie do i peko kakame kowaco negi kede be, “Likame miero idwokunu piny wel me matapali kame ipoorenu timo buli ceng.” 20Aso, gin kiko yai kibut Parao di kiko riamo kede Musa kede Aaron, jo are nogi oudo tie daro gi. 21Gin kiko waco ne Musa kede Aaron be, “Poore Rwot nen gikame itimunu di eko ngolo ne wu iye kop! Wun icumakinunu wan kede Parao karacel kede jotic mege. Itiekunu mino gi kacungo me neko wa do.”

22Di Musa oko lokere but Rwot di eko waco ne be, “Rwot pinyo komio itie tero jo ni kirac? Pinyo komio icwaa kan? 23Cako ango bino kan di ako ot yamo ne Parao kope nin, en eko donyo tero jo me Isirael kirac. Aso, ida likame iko timo gimoro pi lako gi!”

Currently Selected:

Yai 5: BILK13

Highlight

Copy