Ageini 28

1Isaka oko lwongo Yakobo di eko kwano ne yongayo aber, di ewaco ne be, “In likame ibino nyomo dako me Kanan. 2Ot Mesopotamia i paco ka Betuel, en papa me toto ni, di iko nyomo nyako acel kikom anyira ka neru ni Laban. 3Akwao Rubanga Won Twer emi winyo iko nywal iko nyai, tetekeny idokunu twon jo atot. 4#Ageini 17.4-8Akwae emi gikame ecikere pi mino Aburaam, in karacel kede ikwae ni, tetekeny lobo kame nan in ibedo iye bala ngakumbor dok meru, en lobo kame bin Rubanga omio Aburaam.” 5Kikano Isaka oko cwano Yakobo, di Yakobo oko ot paka Mesopotamia but Laban wot ka Betuel, dano me Aram; Laban oudo obedo omin me toto me Yakobo kede Esau.

Esau bobo Onyomo Dako Ace

6Esau oko ngeno be Isaka omio Yakobo winyo di eko cwane ot mono dako i Mesopotamia. Oudo engeo da be kakame Isaka omio kede Yakobo winyo, en ewaco ne da be kur enyom dako me Kanan. 7En eko niang da be Yakobo oko yei winyo kop ka papa mere kede toto mere, eko yai eoto Mesopotamia. 8Aso, kakame Esau oneno kede be mon me Kanan likame oyomo cuny papa mere Isaka, 9en eko ot but Isimael wot ka Aburaam di eko nyomo nyare kame nyinge Makalat, amin me Nebaiot; Makalat oko doko dako mere medo i kom mon kame oudo etie kede sek.

Lek ka Yakobo i Betel

10Yakobo oko yai ki Beereseba eko ot tetu Aran. 11En eko tuno kabedo moro di eko buto iye, pien ceng oudo odonyo. En ekwanyo kidi ki kanono eko buto piny eteno iye wie. 12#Yokana 1.51En eko leko be oudo tie madala kame kosipo i wi lobo, kame wie oudo tuno malo, di imalaikan ka Rubanga oudo tie dere kiyito kede malo kede di kiwok kede piny. 13#Ageini 13.14-15Rwot oko cungo i ngete di oko waco ne be, “Ango en Rubanga ka kwaru ni Aburaam kede Rubanga ka Isaka; lobo kame nataman itie buto iye noni ango abino mino buti karacel kede ikwae ni. 14#Ageini 12.3; 22.18Ikwae ni bino bedo tot bala asinge kame tie i wi lobo. Gin kibino nyai kiko sarakin dok tetu tim, tetu kide, tetu malo kede tetu piny; doko jo dedede me wi lobo bino udo winyo pi in kede pi ikwae ni. 15Ngei kiber be ango abino bedo tie kedi, doko abino gwoki i kabedo dedede kame in ioto iye, di ako bino dwoki i lobo noni. Ango likame abino weki tuno di atieko timo gikame acikere pi timo ni.” 16Yakobo oko cei ki wang nino di eko waco be, “Ateteni Rwot tie kane, ango oudo likame angeo!” 17Lworo oko make di eko waco be, “Kan tin obedo kabedo me lworo benyo! Manoni en ot ka Rubanga, doko en erute me malo.”

18Odiko sek di piny oru, Yakobo oko yai eko kwanyo kidi kame oudo eteno iye wie di eko sipe malo, di eko onyo mo i wie. 19En eko lwongo kabedo nono be Betel;#28.19: Betel man obedo leb Eburania kame dwong mere be Ot ka Rubanga. do i agege nying bomba kame oudo tie kanono en Lus. 20Di Yakobo oko kwongere but Rubanga be, “Ka ibedo tie keda, di iko gwoka i sapali kame nataman atie ot iye, di iko mina mugati me acama kede egoe me angapa, 21tetekeny ako dok tuno i ot ka papa na kede mulem, abino mini ibedo Rubanga na. 22Kidi me iyutun kame ango atieko sipo bino bedo kakame kowori kiye; doko ateteni abino mini acel me tomon me gi dedede kame imia.”

Currently Selected:

Ageini 28: BILK13

Highlight

Copy