Ageini 30

1Kakame Lakeri oneno kede be en likame enywalo ne Yakobo atin moro, nyeko oko make kede amin mere, di eko waco ne Yakobo be, “Miada aud idwe, aso ka li ango ayaro to.”

2Yakobo oko doko ger ne Lakeri di eko waco ne be, “Iparo be ango do adoko Rubanga, ngat kotwoni nywal?”

3Lakeri oko waco be, “Bilka, nyako ngakonya ine, but kede me wek enywal nada idwe.” 4Aso, en eko mino Yakobo Bilka nyako ngatic mere pi bedo dako mere; Yakobo oko buto kede Bilka. 5Bilka oko yac di eko nywalo ne Yakobo atin awobi. 6Di Lakeri oko waco be, “Rubanga otieko ngolo na kop kiber, doko da etieko winyo dwana eko mina atin awobi”; en eko cako nyinge Dan. 7Bilka doko oko yac di eko nywalo ne Yakobo atin awobi me are. 8Di Lakeri oko waco be, “Aute auta atek kede amina di ako bwone”; omio en eko cako ne nyinge be Naputali.

9Kakame Lea oneno kede be ejiko nywal, en eko kwanyo Silipa nyako ngatic mere di eko mine but Yakobo pi doko dako mere. 10Di Silipa nyako ngatic ka Lea oko nywalo ne Yakobo atin awobi. 11Lea oko waco be, “Atie kede winyo aber!” En eko cako nyinge Gad. 12Silipa ngatic ka Lea oko bobo nywalo ne Yakobo atin awobi me are. 13Lea oko waco be, “Atie kede yomcuny! Pien mon bino waco be ango atie kede yomcuny”; omio en eko cako nyinge Aser.

14I kare me nyaro engano, Ruben oko ot i poto eko udo yat kame mio mon yac i poto kuno, en eko kelo yat nono ne toto mere Lea. Lakeri oko waco ne Lea be, “Okwe miada yat ka wodi kame mio mon yac.”

15Lea oko dwoko be, “Iparo be ebedo gi atitidi me in mano cwara? Imito doko da tero yat ka woda kame mio mon yac?”

Lakeri oko waco be, “Ka imia yat ka wodi kame mio mon yac, ibino buto kede Yakobo iwor atin.”

16Kakame Yakobo odwogo kede ki poto otieno, Lea oko ot pi siramo en, di eko waco ne be, “Miero ibut keda; pien atieko wili kede yat ka woda kame mio mon yac.” Aso, Yakobo oko buto kede iwor nono.

17Rubanga oko winyo koko ka Lea, en eko yac di eko nywalo ne Yakobo awobi me kany. 18Lea oko waco be, “Rubanga otieko cula, pien ango amio cwara nyako ngatic na”; omio en eko cako nyinge Isakar. 19Lea oko yac bobo di eko nywalo ne Yakobo awobi me kanyape. 20Lea oko waco be, “Rubanga otieko mina giamia aber; nan do cwara bino wora pien ango atieko nywalo ne awobe kanyape”; omio en eko cako nyinge Sebulun. 21Ingei manono en eko nywalo atin nyako di eko cako nyinge Dina.

22Rubanga oko yutuno Lakeri, di Rubanga oko mine nywal. 23En eko yac di eko nywalo atin awobi, eko waco be, “Rubanga okwanyo lewic na. 24Akwae emia bobo awobi ace”; omio en eko cako nyinge Yosepu.

Yakobo Obaro i Wi Laban

25Kakame Lakeri onywalo kede Yosepu, Yakobo oko waco ne Laban be, “Weka do aoti, tetekeny adok turwa i piny wa. 26Miango idwe kede mon na di iko weka aoti, pien ango atieko timo nin tic pi gin bedo mega. In ingeo kiber tic kame ango abedo timo ni.”

27Laban oko waco be, “Yei na waco be: ango atieko niang di lubere kede tic me tuco kop me anyim kede komungere be, Rubanga omiango winyo pi in. 28Waca cul kame in imito di ango ako bino culi.”

29Yakobo oko dwoko ne be, “In kikomi ingeo epone kame ango atimo ni kede tic, kede epone kame leini ni onyai kede i cinga. 30Pien oudo in itie kede leini anonok di pwodi likame ango abino kan, do nan do kitieko doko tot twatwal; doko Rwot obedo mini winyo i kabedo dedede kame ango abeo iye. Do awene do kame ango abino gwoko kede jo tura da?”

31Laban oko penye be, “Imito be ami nyo?”

Yakobo oko dwoko be, “Ango likame amito cul moro; ango abino meede gwoko leini nin ka in iyei timo kaman: 32yei nango bebeo i diere me leini nin dedede tin, di ako kwakwanyo romini dedede enyanga kede esisi, kede idwe romini acuo acol dedede, kede da diegi enyanga kede esisi; magonogo en kame bino bedo cul nango. 33I kare me anyim in ibino neno ateni nango, ka in ibino pi neno cul kame in imia. Ka in iuda kede diegi kalikame obedo enyanga kede esisi, kede idwe romini acuo kalikame col, magonogo udo akwalo akwala.”

34Laban oko waco be, “Mano ber! Wek etimere bala kame in iwaco.” 35Do i ceng nono Laban oko kwanyo ikoroi ekomol kede esisi, kede diegi amon dedede anyanga kede asisi, kede apat dedede kame tie kede kakatar, kede idwe romini acuo acol dedede di eko keto gi i cing awobe mege pi daro gi. 36En eko yai eoto tenge kakabor kibut Yakobo, kakame romo sapali me ceng adek. Yakobo oko dong kwano leini ka Laban ace apat.

37Yakobo oko jako ajange me egere me yen adek, eko kikiso kagamogo ki ngei gi tetekeny kibed tie kede kakacol kede kakatar. 38En eko keto yen kame ekikiso nogo i nyim leini i atuba kame kimato kiye pii. En oudo eketo gi kanono pien leini kwarere kame kibino mato pii. 39Aso, kame leini oudo okwarere i nyim yen nogo, gin oudo kiko nywalo idwe esisi, enyanga kede ekomol.

40Yakobo oko leko tenge romini kikom diegi di eko pimo nyim gi i kom me ka Laban kobedo esisi kede acol; di en eko poko leini mege kargi ken gi, likame enyalo gi kede me ka Laban. 41Tek kame leini akingir oudo tie kwarere, Yakobo oudo pielo jang yen kame ekikiso nogo i atuba me mato pii i nyim gi tetekeny kiyac di yen nogo tie i nyim gi kanono. 42Do oudo likame eketo jang yen nogo i nyim leini agodogodo. Manono oko mino Laban obedo tie kede leini agodogodo di Yakobo oko bedo tie kede leini akom gi yot. 43Manoni oko mino Yakobo obaro twatwal di eko bedo tie kede leini atot, ipasoi kede apasoi, kede aguraguran kede pundan.

Currently Selected:

Ageini 30: BILK13

Highlight

Copy