Ageini 42

Imiegu ka Yosepu Ooto Misiri pi Wilo Cam

1Kakame Yakobo ongeo kede be cam oudo tie Misiri, en eko waco ne awobe mege be, “Pinyo komio itienu nenere anena kenu kenu? 2#Tice 7.12Ango awinyo be cam tie Misiri, otunu kuno iwilunu cam pirwa, tetekeny kur otounu kec.” 3Aso, imiegu ka Yosepu tomon oko ot pi wilo cam Misiri. 4Do Yakobo likame oko cwano omin me Yosepu anyinge Benjamin kede imiegu mege, pien oudo etie kede lworo be gimoro arac twero pi timere ne. 5Awobe ka Yakobo oko upere kede jo apat da pi ot wilo cam, pien kec nono oudo otuno i lobo me Kanan da. 6Bala ngapug me lobo me Misiri, Yosepu en kame oudo tie cato cam ne jo me lobo nono. Imiegu ka Yosepu oko bino di kiko riebere piny i nyime. 7Kakame Yosepu oneno kede imiegu mege, en eko ngeno gi, do en eko tero gi bala jokumbor di eyamo kede gi dwan agwai. En epenyo gi be, “Wun iwokunu ki tuai?” Gin kiko dwoko be, “Wan owok ki lobo me Kanan, obino pi wilo cam.”

8Bed bala Yosepu oko ngeno imiegu mege, do gin likame kiko ngene. 9#Ageini 37.5-10Yosepu doko da oko yutuno lek kame eleko i kom gi. En eko waco negi be, “Wun ibedunu ibegai; wun ibinunu pi neno goro me lobo wa!”

10Gin kiko dwoko ne be, “Adwong, li; jotic ni obino pi wilo cam. 11Wan dedede obedo awobe me icuo acel; wan obedo jo kame yamo kop me ateni; cako pwodi likame jotic ni obedo ibegai.”

12Do Yosepu oko waco negi be, “Li, wun ibinunu pi neno goro me lobo wan!”

13Gin kiko waco be, “Wan jotic ni otie imiegu tomon kiwie are, obedo awobe me icuo moro me lobo me Kanan; awobi atidi odong kede papa wa, do omin wa acel oto.”

14Do Yosepu oko waco negi be, “Etie bala kame ango atieko waco ne wu; wun ibedunu ibegai! 15Epone kame kobino ngingico wu kede ine: tek di Parao tie kuo, likame ibinunu yai ki kan tuno di ominu atidi obino! 16Poore dano acel oti di eko kelo ominu, di jo apat kikomu ber kong odong i otkol, tetekeny bin ngei ateni me kope wu; aso ka li, tek di Parao tie kuo, ateteni wun ibedunu ibegai.” 17En eko keto gin dedede i otkol pi ceng adek.

18I ceng me adek, Yosepu oko waco negi be, timunu kaman di ikounu bino kuo, pien ango alworo Rubanga: 19ka wun ibedunu jo kame yamo kop me ateni, wekunu ominu acel dong kan i otkol. Do jo apat dok ter cam ne jo kame kec odio i miere wu. 20Di gin kiko bino kelo ominu atidi buta. Manono bino moko kope wu, di likame oko bino neko wu. Di gida kiko yei pi timo kamanono. 21Kiko donyo yamo ken gi ken gi be, “Okwe, kotie tidilo wa pi raco kame wan otimo ne omin wa. Wan oudo oneno can kame etie iye kakame ebako ne wa kede doge, do wan oko dagi winye. Manoni en komio can noni nataman opoto i kom wa.” 22#Ageini 37.21-22Di Ruben oko dwoko negi be, “Mam oudo ango awaco ne wu be kur itimunu ne awobi ca raco moro? Do wun ikounu dagi. Nan do wan otienu culo kwor me remo mere.” 23Gin oudo likame kingeo be Yosepu tie niang gikame kitie yamo, piento en oudo ebedo yamo kede gi di ngat apat en agonyo kop. 24Yosepu oko yai tenge kibut gi di eko donyo koko, di eko dwogo eko yamo kede gi. En eko kwanyo Simeon eko mino kotwee i nyim gi kanono.

Imiegu ka Yosepu Odok Kanan

25Yosepu oko mino cik be pong ipukoi gi kede cam, kede dwok sente me ngat acelacel i epuko mere, doko da be, mi gi cam me acama i yongayo. Oko timo negi kamanono. 26Gin kiko keto ipukoi me cam gi ingei pundan gi di kiko yai. 27Kakame ngat acel kikom gi ogonyo kede epuko mere pi mino punda mere cam i kakame oudo kibuto iye, en eko udo sente mere i dog epuko. 28En eko waco ne imiegu mege be, “Kodwoko na sente na, en ine etie i epuko na!” Gi nono oko neko kom gi di kiko donyo penyere ken gi ken gi kede mielkom be, “Nyo ine kame Rubanga otieko timo ne wa?”

29Kakame kituno kede i lobo me Kanan, gin kiko tatamo ne papa gi Yakobo gi dedede kotimere negi be, 30“Icuo kame obedo ngapug me Misiri oyamo kede wa kede dwan agwai, di eko tero be wan ooto kuno begao kop me lobo nono. 31Do wan oko waco ne be, ‘Wan obedo cuo kame li kede angalo, wan likame obedo ibegai. 32Wan obedo imiegu tomon kiwie are kame papa wa onywalo; ngat acel oto, do awobi atidi odong kede papa wa i lobo me Kanan.’ 33Di icuo nono, ngapug me lobo nono, oko waco ne wa be, ‘Ango abino ngeno be wun iliunu kede angalo ka itimunu kaman: wekunu ominu acel kede ango, di jo apat kikomu ko tero cam ne jo me miere wu kame kec odio. 34Kelunu ominu atidi buta, di ango ako bino ngeno be wun likame ibedunu ibegai, do ibedunu jo kame yamo kop me ateni. Di ango ako bino gonyo ominu, di ikounu twero bedo kan di itimunu tic me cato wil.’ ”

35Kakame oudo kitie yabo kede ipukoi gi, ngat acelacel kikom gi oko udo ikapu mere me sente i dog epuko mere. Kakame kineno kede abunge me sente gi, lworo oko mako gi karacel kede papa gi Yakobo. 36Papa gi Yakobo oko waco negi be, “Wun itienu minango akei idwe na: atieko kei Yosepu, doko atieko kei Simeon da, nan doko imitunu tero Benjamin da. Can nogi dedede opoto i komango!”

37Ruben oko waco ne papa mere be, “Ka likame ango adwoko Benjamin, in nek awobe nango are. In kete i cinga, di ango ako bino dwoke buti.”

38Do Yakobo oko waco be, “Likame woda bino ot kede wu, pien omin mere otieko to, nan en edong kene. Ka gimoro arac otimere ne i yongayo, ango atieko ti, ibinunu mino par neka.”

Currently Selected:

Ageini 42: BILK13

Highlight

Copy