Ageini 48

Yakobo Olamo ne Awobe ka Yosepu Winyo

1Di mago otiek, bin oko waco ne Yosepu be papa mere oudo tuo. Di en eko tero awobe mege are Manase kede Epuraimu eoto kede gi nene. 2Kakame bin oko waco ne kede Yakobo be, “Wodi Yosepu otieko bino pi neni,” en eko timo teko di eko yai ebedo i wi kabuto. 3#Ageini 28.13-14Di Yakobo oko waco ne Yosepu be, “Rubanga Won Twer bin onyutere buta i Lus i lobo me Kanan di eko mina winyo, 4di ewaco be, ‘Ango abino mini inywalo idwe atot di iko nyai. Abino mino ekodet me jo wok kibuti, doko abino mino lobo noni but ikwae ni me kare me anyim, me bedo mergi atwal.’ 5Pi mano, awobe nin are go, kame in inywalo i lobo me Misiri di pwodi ango oudo likame abino buti kan, nan do odoko mega; Epuraimu kede Manase bino bedo mega, bala Ruben kede Simeon. 6Do idwe kame in ibino nywalo i cen ngei gin bino bedo megi. Gin kobino maro gi i nying Epuraimu kede Manase i kom kop kame mako iner gi me lobo. 7#Ageini 35.16-19Ango atie timo kaman pi toto ni Lakeri. Pien i kare kame bin ango atuno kede Padan, gi me iturur, Lakeri oko to i yongayo i lobo me Kanan, di oudo Epurat pwodi bobor. Ango bin ako yike i yongayo me Epurat kuno” (kanono en Betelem).

8Kakame bin Yakobo oneno kede awobe ka Yosepu, en eko penyere be, “Alu ige?” 9Yosepu di oko gamo dwan papa mere be, “Gin awobe na kame Rubanga omia i kan.”

Yakobo di oko waco be, “Kel gi buta me wek alam negi winyo.” 10I kare nono wang Yakobo oudo do mwadamwada pi tio, omio likame oudo eneno piny kiber. Yosepu oko kelo awobe nogo bute di en eko gwako gi di enoto gi. 11Di Yakobo oko waco ne Yosepu be, “Ango oudo likame atamo be bobo abino neno wangi. Do nan Rubanga otieko mina aneno kiton idwe ni da.” 12Di do Yosepu oko kwanyo gi ki tien Yakobo di eko riebere piny i nyim papa mere.

13Yosepu di oko tero gin are nogo, Epuraimu i bade tetu cam kede Manase i bade tetu ngodal; di eko keto Epuraimu i bad Yakobo tetu ngodal kede Manase i bade tetu cam. 14Do Yakobo oko bin rieno bade elucakino tetu cam kede tetu ngodal, di eko dokakino bade tetu cam i wi Epuraimu, awobi atidi, do tetu ngodal edokakino i wi Manase, ngat kame bin obedo kao. 15Di eko lamo ne Yosepu winyo di ewaco be,

“Akwao Rubanga kame joakwari na Aburaam kede Isaka bin otio ne,

Rubanga kame obedo ngakwat nango pi kare me kuo nango lung tuno tin,

16malaika kame otieko laka ki gikareco dedede, mi awobe nogi winyo;

di nyinga, kede nying joakwari na Aburaam kede Isaka ko bino meede kibut gin.

Akwai imi gin kinyai kidok ekodet me jo i wi lobo.”

17Yosepu cunye likame oko bedo yom kakame eneno kede be papa mere oudo oketo cinge tetu cam i wi Epuraimu. Omio en eko mako cing papa mere pi koto kwanye ki wi Epuraimu di eko kobe i wi Manase. 18En ewaco ne papa mere be, “Likame kamano, papa. Man en awobi adwong, ket cingi tetu cam i wie.” 19Do papa mere oko dagi di ewaco be, “Woda, ango angeo gikame atie timo. Eda ikwae mege bino doko ateker, doko da ebino doko dano kame pire dwong. Do omin mere atidi bino bedo dwong kalamo en, doko ikwae mege bino doko ikodeta me atekerin.” 20#Iburanian 11.21Di en eko lamo negi winyo cenge nono di ewaco be, “Jo me Isirael bino tic kede nyingu ka kitie lamo ne dano winyo. Gin kibino waco be, ‘Rubanga mi ibed bala Epuraimu kede Manase.’ ” Epone noni en kame Yakobo omio Epuraimu oko doko kede ngat kame geo di Manase ko lube.

21Di do Yakobo oko waco ne Yosepu be, “Ango ayapuno to, do Rubanga bino bedo kedi di eko bino teri edwoki bobo i lobo ka joakwari ni. 22Nataman ango atie mini lobo kame kato me imiegu ni, en Sekem, adul kame bin ango amao kede epima kede emal kibut jo Amor.”

Currently Selected:

Ageini 48: BILK13

Highlight

Copy