Yokana 13

Yesu Olwoko Tien Josiao mege

1Manoni en oudo ceng kame ru ceng me camo Ebaga me Kalamo. Yesu oudo ngeo be esawa mere do otieko tuno me yai ki piny kan pi ot but Papa. En oudo emaro jo mege kame tie i piny kan, doko da eko maro gi tuno i ajikini.

2Yesu kede josiao mege oudo tie camo cam me otieno. Sitani oudo otieko mino Yuda Isikariot wot ka Simoni tam me rupao en. 3Yesu oudo ngeo be Papa otieko mino jame dedede i cinge, kede da be en ewok kibut Rubanga doko etie dok but Rubanga. 4En eko yai malo i kacam, eko gonyo igoen mege kame oudo edoko, di eko tweno taulo i piere. 5En eko onyo pii i kalaya di eko cako lwoko tien josiao mege, eko donyo weweo tien gi kede taulo kame oudo etweo i piere nono. 6En eko tuno but Simoni Petero; Petero oko penye be, “Rwot, in kom iyaro lwoko tiena?”

7Yesu oko dwoko ne be, “In nan pwodi likame ingeo gikame ango atie timo, do ibino niang i cen mere.”

8Petero oko dwoko ne Yesu be, “In likame iyaro lwoko tiena akadi acel.”

Yesu oko dwoko ne be, “Ka likame alwoko tieni, likame bobo abino nywako kedi.”

9Simoni Petero di do oko dwoko be, “Rwot kur ilwok tiena kenekene, lwok do cinga kiton wia da!”

10Yesu oko waco ne be, “Ngat kotieko bol likame doko lwoko kome dedede, elwoko do tiene kenekene, pien udo kome dedede do cil; aso in icil, do likame wun dedede.” 11Yesu oudo ngeo ngat koyaro bino rupao en; kop no en komio ewaco be, “Likame wun dedede icilunu.”

12 # Luka 22.27 Ingei lwoko tien gi, Yesu oko bobo ngapo igoen mege, di eko dok i kabedo mere kacam di eko penyo gi be, “Wun iniangunu gikame ango nan atimo ne wu no? 13Wun ilwonganu be Apwony kede be Rwot; ebo, mano tie kakare, pien ango inonono. 14Aso, ka do ber ango Rwot kede Apwony wu alwoko tienu, wuda do poore ilwokunu tien jowot wu. 15Pien ango atieko mino wu anyut, tetekeny wuda itimunu ne jo apat bala kite kame ango atimo ne wu kede. 16#Matayo 10.24; Luka 6.40; Yokana 15.20Ateteni, ateteni awaco ne wu be, likame tie ngatic moro kame pire dwong kalamo ngadwong mere, arabo ngaor kame pire dwong kalamo ngat oore. 17Ka ingeunu gigi di ikounu lubo gi, itienu kede winyo.

18 # Sabuli 41.9 “Ango likame atie waco wun dedede; ango angeo jo na kame ayero. Do iwandik kacil miero cobere kakare be, ‘Ngat kame onywako keda cam en kame bobo oloko ebela i wia.’ 19Nataman ango awaco ne wu di pwodi likame etimere, tetekeny ka etimere do, wun ibinunu yei be ango en inonono. 20#Matayo 10.40; Marako 9.37; Luka 9.48; 10.16Ateteni, ateteni awaco ne wu be, ngat kame gamo dano kame ango aoro, udo egama; doko ngat kame gama udo egamo ngat kame oora.”

Yesu Otuco be Kobino Rupao en

(Matayo 26.20-25; Marako 14.17-21; Luka 22.21-23)

21Kakame Yesu otieko waco kede kop noni, cunye oko winyo lito adikinicel, di eko waco kakaler be, “Ateteni awaco ne wu be, ngat acel kikom wu bino rupao ango.”

22Josiao oko donyo ngire ken gi ken gi di likame kiniang ngat kame en oudo etie waco. 23Ngat acel kikom josiao, kame Yesu oudo bin singo maro, oudo tie gongere di iyapiyapi kede kor Yesu; 24Simoni Petero oko gwete di oko waco ne be, “Penye ber ngat kame en etie waco.”

25Di pwodi egongo wie i kor Yesu kamanono, en eko penyo Yesu be, “Rwot ngai inonono?”

26Yesu oko dwoko be, “Ngat kame ango ayaro odo dek ako mino en inonono.” Kikano en eko odo dek di eko mino Yuda Isikariot wot ka Simoni. 27Ingei gamo dek kame koodo nono, Sitani di do oko donyo ne Yuda. Yesu oko waco ne be, “Susunyo do timo gikame imito timo nono.” 28Likame tie ngatamoro kikom jo kame oudo tie kacam kuno kame oko niang gikame omio Yesu owaco ne Yuda kamanono. 29Mogo oudo paro be, pi kite kame Yuda oudo mako kede isau me sente, Yesu oudo tie waco ne be eoti ewil jame kame mitere ne gi me ebaga, arabo be emi jocan da gimoro.

30Kikano, ingei gamo dek kame koodo, cucuto di do Yuda yai donyo ooko. Piny da do oudo otieko doko col.

Cik Kanyen

31Di do Yuda otieko yai ooto, Yesu oko waco be, “Nan do kotieko mino Wot ka dano deyo, doko kotieko mino Rubanga deyo pi en. 32Ka kotieko mino Rubanga deyo pi en, Rubanga da bino mino Wot ka dano deyo i en Rubanga, doko ebino mine deyo susunyo. 33#Yokana 7.34Idwe na, ango likame abino bedo kede wu pi kare alac. Ibinunu mona, do bala kite kame oudo awaco ne kede Iyudayan, iepone nono da, nan ango awaco ne wuda be, ‘Wun likame itwerunu bino kakame ango ayaro ot iye.’ 34#Yokana 15.12, 17; 1 Yokana 3.23; 2 Yokana 5Ango nan amio wu cik anyen be, marerenu kenu kenu; bala kite kame ango amaro wu kede, wuda poore imarerenu kenu kenu. 35Iepone nono, jo dedede bino ngeno be wun ateteni ibedunu josiao nango, ka imarerenu kenu kenu.”

Yesu Otuco be Petero bino Dage

(Matayo 26.31-35; Marako 14.27-31; Luka 22.31-34)

36Simoni Petero oko penye be, “Rwot, in itie ot tuai?” Yesu oko dwoko ne be, “Kakame ango atie ot iye in likame itwero luba iye nan, do ibino luba i cen mere.”

37Petero oko penye be, “Rwot, pinyo komio ango likame atwero lubi nan? Ango abino jalo kuo na piri!”

38Yesu oko penye be, “In ibino jalo kuo ni pira? Ateteni, ateteni awaco ni be, di pwodi likame tongweno okok, udo in itieko daga tien adek.”

Currently Selected:

Yokana 13: BILK13

Highlight

Copy