Yokana 17

Yesu Olego ne Josiao mege

1Kakame Yesu otieko waco kede kope gi, en eko tingo wange malo di eko lego be, “Papa, esawa otuno do, mi Wodi deyo, me wek Wodi da mi deyo buti. 2Pien in itieko mine akarunikin i kom jo dedede, me wek emi jo dedede kame in imio bute kuo kame bedo nakanaka. 3Kuo kame bedo nakanaka en ine be, wek gin kingei in Rubanga acel keni me ateni, kede Yesu Kirisito ngat kame in ioro. 4Ango atieko mini deyo i piny kan, pien atieko tic kame oudo imia pi timo. 5Papa, nan mia deyo i nyimi; epone me deyo kame bin atie kede i nyimi di pwodi likame kocweo piny.

6“Ango atieko mino nyingi ongere but jo kame in imia i piny. Gin oudo kibedo jo nin, in iko mino gi buta, doko gin kiko lubo kop nin. 7Nan gin kingeo be gi dedede kame in imia owok kibuti; 8pien ango atieko mino gi kop kame in bin imia, doko gin kiko yei gamo. Doko nan kingeo i ateni be, ango awok ki buti, doko kitieko yei da be in en kame iora.

9“Ango nan atie lego ne gi; likame atie lego ne piny, do atie lego ne jo kame in imia; pien gin kibedo megi. 10Jo nango dedede obedo megin, doko jo nin dedede obedo mega; ango audo deyo pirgin. 11Do nan ango likame bobo abino meede bedo i piny; gin en kame kitie dong i piny; ango atie bino but in. Papa Kacil, gwok gin kede twer me nyingi, en nying kame in itieko mina, tetekeny kibed jo acel, bala kite kame ango kede in otie acel. 12#Sabuli 41.9; Yokana 13.18I kare kame oudo atie karacel kede gin, ango bin agwoko gin kede twer me nyingi, en nying kame imia. Ango atieko gwoko gi, doko likame tie ngatamoro kame orwenyo kikom gi, kenekene dano kame oudo poore rwenyo, me wek iwandik kacil cobere kakare. 13Do nan ango atie bino buti, ango awaco kope nogi di pwodi atie i piny, tetekeny gin kibed kede kilel na di opong i cuny gi. 14Ango atieko mino gi kope ni; do piny oko dagi gin, pien likame gin kibedo jo me piny, bala kite kame ango da likame abedo kede dano me piny. 15Ango likame akwao be ikwany gi ki piny, do be igwok gi kibut Ngarac. 16Likame gin kibedo jo me piny, bala kite kame ada likame abedo kede dano me piny. 17Lony gi kede ateni; kop nin en ateni. 18Bala kite kame in iora kede bino i piny, kamanono ada aoro gi ot i piny. 19Ango amio kuo na buti pirgin, me wek gida kimi kuo gi buti i ateni.

20“Ango likame akwao ne gin kenekene, do akwao da ne jo kame bino yei ango pi kope gin. 21Wek gin dedede kibed jo acel, bala kite kame in Papa itie kede i ango, doko ada atie i in. Mi gida kibed i wan, en kame mi piny yei be, in en kame iora. 22Deyo kame itieko mina, ada atieko mino gin, me wek kibed jo acel, bala kite kame wada otie kede acel; 23ango i gin, kede in i ango, me wek kibed jo acel atwal atwala, tetekeny piny ngei be in en kame iora, doko in imaro gi bala kite kame imara kede.

24“Papa, cunya mito be jo kame imia bed keda kakame ango ayaro bedo iye, pi neno deyo na kame imia, pien in imara cako di likame pwodi koketo acakini me piny. 25Okwe Papa kopoore, piny likame ongei, do ango angei, doko jogi ngeo be in en kame iora. 26Ango atieko mino gi kingeo nyingi, doko abino mino nyingi medo ngere, tetekeny amara kame in imara kede bed i gin, kede ada i gin.”

Currently Selected:

Yokana 17: BILK13

Highlight

Copy