Luka 21

Irabu me Apuserut

(Marako 12.41-44)

1Yesu bin oko tingo wange di eko neno jo ka obaro di tie keto giamia gi i adita me irabu me tempulo; 2doko en eko neno apuserut moro kame ngacan da di keto abolai mege are. 3En eko waco be, “Ateteni awaco ne wu be, apuserut ngacan ni en kokwanyo irabu kalamo jo apat dedede; 4pien gin kikwanyo gikame olamar ki abar gi, do i can mere, en ekwanyo gi dedede kame oudo epoore kuo kede.”

Yesu Owaco Kop me Reto Tempulo

(Matayo 24.1-2; Marako 13.1-2)

5Jo mogo oko donyo yamo kop kame mako tempulo, epone kame oudo kotubuso en kede kide kabeco kede giamia kame oudo komio but Rubanga; en eko waco ne gi be, 6“Gikame wun inenunu nogi, kare oyaro tuno kalikame tie kidi moro akadi acel ki kan kame bino dong cungo i wi kidi ocelu; kobino rereto gin dedede piny.”

Peko kede Itidil

(Matayo 24.3-14; Marako 13.3-13)

7Di gin kiko penye be, “Apwony, awene en kame gini bino timere kede, doko gianena nyo kame bino bedo tie pi nyuto be gi noni do oyapuno timere?”

8Yesu oko waco ne gi be, “Gwokerenu me wek kur rweny wu. Pien jo atot oyaro bino i nyinga di kiwaco be, ‘Ango en Kirisito!’ kede da be, ‘Kare otieko do tuno!’ Do kur iyeunu lubo gi. 9Doko kame iwinyunu rwonge me yi kede arubaruba, kur ibedunu kede lworo, pien gigi miero kong gei timere, do ajikini likame bino tuno cucuto.”

10Di do en eko waco ne gi be, “Atekerin bino yi, ajakanut acel da bino yi kede ajakanut ocelu. 11Piny bino donyo yangere kitek, doko kec kede aumpuli bino bedo tie i kabedere apapat, doko gikame kelo lworo kede gianena adongodongo bino neeno i malo. 12Do di pwodi likame gigi dedede otimere, kibino mako wu di kiko tidilo wu, di kiko tero wu i nyim kansulo me sinagogan kede i otkol. Kobino tero wu i nyim abakai kede i nyim wegi apugan pira. 13Man bino mino wu kare aber me mino ijura i koma. 14#Luka 12.11-12Pi mano, mokunu tam wu pi weko cako paro epone kame ibinunu dwoko kede peny; 15pien ango abino mino wu kope me ayama, kede rieko da kalikame tie ngakwor wu moro kame bino twero kanyakino arabo piem kede. 16Kiton jonywal wu, imiegu wu, joawade wu, karacel kede joawotino wu da bino rupao wu, di oko bino neko mogo kikom wu da. 17Jo dedede bino dagi wu pira. 18Do akadi yer acel me wi wu likame bino rwenyo. 19Ibinunu udo kuo me ateni pi ikanyakin wu.

Yesu Owaco Kop i kom Tuturo Yerusalem

(Matayo 24.15-21; Marako 13.14-19)

20“Do kame inenunu isirikalen oluko Yerusalem, ngeunu do be kare me poto mere do otieko tuno. 21Di do jo kame tie Yudea miero ringi i wi mori, doko jo kame tie i bomba noni do miero yai tenge, kede jo kame tie ooko me bomba noni kur doko dony iye; 22#Kosea 9.7pien ceng nogi obedo ceng me culo kwor, pi mino gikame riki kowandiko cobere kakare. 23Can tin bino bedo dwong benyo ne mon oyac kede kame doto idwe i ceng nogo! Pien can adwong bino bedo tie i wi lobo, kede lilo ka Rubanga bino bedo i kom jo nogi. 24Mogo kobino neko kede epima, doko kobino mako mogo di oko tero gi bala mabus i pinye dedede; di jo kalikame Iyudayan ko bino tuturo Yerusalem piny tuno kede kame kare gi otiek.

Dwogo ka Wot ka Dano

(Matayo 24.29-31; Marako 13.24-27)

25 # Isaya 13.10; Esekeri 32.7; Yoweri 2.31; Gianyuta 6.12-13 “Ceng kede duwe kede acer bino bedo kede gianena mogo, doko atekerin dedede me piny da ko bino bedo kede iturur pi mor kede ebuka me nam. 26Jo bino wile pi lworo kede pi paro gikame oyaro timere i wi lobo; pien twer dedede kame tie i malo bino yayangun. 27#Danieri 7.13; Gianyuta 1.7Di do kiko bino neno Wot ka dano di tie bino kede edou, kede twer kede twon deyo. 28I kare kame gigi bino cako timere kede, miero iyabunu wangu di ikounu tingo wi wu malo, pien alako wu do udo oyapuno tuno.”

Pwony kame Yai ki kom Yat Epigi

(Matayo 24.32-35; Marako 13.28-31)

29Di Yesu oko tatamo ne gi agole moro be, “Nenunu ber yat epigi, kede yen apat dedede; 30cucuto kame pote gi ogeo lot, wun inenunu di ikounu ngeno be iporo do oyapuno tuno. 31Iepone nono da, kame inenunu gigi do tie timere, ngeunu be Ajakanut ka Rubanga do oyapuno tuno. 32Ateteni ango awaco ne wu be, gigi dedede bino timere di pwodi jo kame nan tie di kuo likame oto. 33Malo kede lobo bino rwenyo, do kope nango likame bino rwenyo.

Bedunu di Ikiunu Piny

34“Do poore igwokerenu, me wek kur doko idonyunu keto cunyu itek i kom cam kede amera kede par pi kuo me i kare ni, di ceng no ko bino ngoole mako wu 35bala owic. Pien ceng no bino tuno ne jo dedede kame bedo i wi lobo lung. 36Do bedunu di ikiunu piny i kare dedede, di ilegunu, me wek iudunu teko me bwot ki gikame oyaro timere nogi dedede, kede me cungo i nyim Wot ka dano.”

37 # Luka 19.47 Ceng dedede Yesu oudo pwonyo i tempulo, do iwor en oudo eoto buto i wi moru me Olibeti. 38Doko odiko sek jo dedede oudo bino bute i tempulo pi winyo kop mere.

Currently Selected:

Luka 21: BILK13

Highlight

Copy