Acts 5

Ananias ahn Sapphira lai tu di Laad Spirit

1Now wan neks man, weh wehn niem Ananias, ahn ihn waif Sapphira wehn sel wan piis a lan tu. 2Bot ihn kiip bak paat a di mony fi ihnself, ahn ker di res —laik if dah wehn aala ih— ahn gi'ih tu di apasl dem. Ihn waif wehn wel ahn nuo weh ihn wende du.

3Bot Peter tel im seh, “Ananias, how yuu mek Satan kanchruol yo main, man! Yuu deh tel di Holy Spirit wan lai, wen yo kiip bak som a di mony fi yoself ahn den yu priten seh yo wende gi aala ih! 4Di lan dah fi yuu fahn di fos, no chruut? Ahn wen yu don sel'ih, yu kuda yuuz di mony enywie yu waahn. Den, dah wai yo disaid fi du wan ting laik dis? Yuu no ongl deh tel lai tu man, bot dah God ihnself yuu deh tel lai tu!”

5Wen Ananias hier dis, siem taim ihn jrap dong ded! Ahn aala di pipl dem get uova fraitn, wen dehn hier weh hapm. 6Den som yong man kom ahn rap op di bady ahn ker im out, gaan ber.

7Bout three owaz lieta, Ananias waif kom iin, bot ihn neva nuo weh wehn hapm ataal. 8Peter aks im, “Tel mi somting: dat dah aal di mony weh yuu ahn yo hozban get fi di lan?” Ahn shii ansa, “Yees sah; dat dah aal di mony.” 9Den Peter seh tu im, “How di two a unu kuda grii tugeda fi lai tu di Laad Spirit, ahn den tink seh unu kuda get-weh wid ih? Luk yah! Di man dem weh ber yo hozban deh rait yahso dah di duo —ahn dehn gwain ker yuu out tu!” 10Siem taim ihn jrap dong ded bai Peter fut! Ahn di yong man dem weh jos kom iin, fain im ded tu! Den dehn ker im out ahn ber im saida ihn hozban. 11So evrybady iina di chorch, ahn evrybady els, weh wehn hier bout weh wehn hapm, get uova fried fi weh God kuda du.

Di apasl dem du wan paila mirakl

12Now di apasl dem wende du wan paila mirakl ahn wandaz fahn God mongs di pipl dem. Ahn aal di biliiva dem wende miit tugeda laik wan famaly dah di plies weh dehn kaal Solomon Pieza. 13Bot dem weh neva biliiv wehn fried ahn neva waahn miit'op wid dem, iivn duo dehn wehn rispek dem. 14Iin spaita dat, muo ahn muo man ahn uman chros iina di Laad, ahn wan paila dem jain dem. 15Ahn sieka weh di apasl dem wende du, di pipl dem kiip aan deh ker dehn sik outa duo iina di ruod pahn bed ahn strecha, so at liis Peter shaduo kuda paas uova som a dem, wen ihn wende paas bai. 16Ahn plenty ada pipl fahn di toun dem roun Jerusalem wende gyada deh tu, deh ker dehn sik ahn dem weh wehn gat bad spirit tu; ahn aala dem tugeda wehn get beta.

Dehn hiiv di apasl dem iina jiel

17Bot di Hai Priis ahn evrybady weh deh wid im, weh dah wehn paat a di Sadducee gruup, wehn uova jalas. 18So dehn grab di apasl dem ahn hiiv dem iina di sity jiel. 19Bot iina di nait wan ienjel fahn di Laad kom uopm di jiel duo ahn ker dem out. Afta ihn ker dem out, ihn tel dem seh, 20“Unu go, go stan op iina di Templ agen ahn tel di pipl dem evryting bout dis Nyuu Wie fi Liv.” 21So, wen die-lait kom, dehn gaan dah di Templ jos laik weh di ienjel tel dem, ahn staat tiich di pipl dem weh wehn dedeh.

Now, wen di Hai Priis ahn evrybady weh deh wid im kom di neks maanin, dehn kaal wan miitn a di Jewish Kongsl tugeda wid aal di ada rula dem fahn mongs di Israel pipl, ahn dehn sen dah di jiel fi dehn ker di apasl dem. 22Bot wen di aafisa dehn get dah di jiel, di apasl dehn neva dedeh! So dehn gaan bak 23ahn seh, “Wi fain di jiel lak'op gud, wid di gyaad dem deh stan op dah di duo dem, bot wen wi uopm dem op, nonbady neva deh iin deh!” 24Wen dehn hier dis, di kyapm a di Templ gyaad ahn di chiif priis dehn wende wanda uova ahn uova weh gwain kom outa aala dis.

25Den sombady kom ahn seh, “Unu nuo wat! Di man dem weh unu put iina jiel, dehn deh rait now iina di Templ deh tiich di pipl dem!” 26So di kyapm a di Templ gyaad wid ihn aafisa dem gaan fi grab di apasl dem agen, ahn ker dem bak. Bot dehn mek shuor seh dehn neva yuuz no fuos, bikaaz dehn wehn fried seh di pipl dem wuda lik dem dong.

27Wen dehn ker di apasl dem fronta di Jewish Kongsl, di Hai Priis staat kwestyan dem deh seh, 28“Wi gi unu strik aadaz no fi kantinyo deh tiich iina Jesus niem, no chruut? Stil yet, unu gaan ahed ahn priich iina dah niem, so dat aal di pipl rait yah iina Jerusalem wehn hier weh unu gat fi seh. Wosa yet, unu mek'ih luk laik dah wii wiself wehn kil Jesus!”

29Bot Peter ahn di ada apasl dem seh, “Wii hafy obie God, ahn no man. 30Unu uonself mek dem kil Jesus wen unu aada dem fi niel'im op pahn wan kraas, bot di siem God weh fi wi ansesta dem yuuztu waaship riez'im op fahn di ded. 31God wehn ana im plenty, wen ihn mek im sidong pahn ihn rait han said fi bii Prins ahn Sievya, so ihn kuda gi wi Israel pipl di chaans fi chienj wi wikid wiez so ihn kuda fargiv wi sin dem. 32Wii wehn si aal demya tingz, ahn di Holy Spirit pruuv seh aala dem dah chruut tu: God wehn gi di Holy Spirit tu aala dem weh obie him.”

33Bot wen di memba a di Kongsl dem hier dis, dehn wehn so beks dehn wehn waahn kil di apasl dem rait dehso. 34Bot wan Pharisee man niem Gamaliel, weh yuuztu tiich di Laa ahn weh evrybady rispek, stan op fi taak. Ihn tel dem fi mek di apasl dem go outsaid fi wan likl wail. 35Den ihn tel di Kongsl, “Unu man fram Israel, tek kier how unu hangl demde man. 36Unu memba wan man, Theudas, weh yuuztu mek prablem? Ihn wehn tink ihn so big, ahn bout four hundred man fala im. Bot ihn wehn get kil, ahn aala ihn falowa dem wehn skyata, ahn ihn huol muuvment gaan tu notn. 37Afta dat, iina di taim a di sensos, Judas fahn Galilee lan mek wan nada prablem, ahn ihn wehn liid wan nada paila pipl fi fala him. Bot ihn get kil tu, ahn aala ihn falowa dem wehn skyata. 38So iina dis kies, fi mi advais tu unu dah fi unu no tek non akshan ataal. Lef dem luon, ahn mek dem go bout dehn bizniz. If, weh dehn deh plan or weh dehn deh du kom fahn man, ih no gwain kom tu notn. 39Bot if ih deh kom fahn God, unu gwain kyaahn stap dem ataal, ahn unu gwain fain unuself deh fait gens God ihnself!”

40Di Kongsl disaid fi fala di advais weh Gamaliel gi dem. So, dehn kaal iin di apasl dem, biit dem op, ahn aada dem no fi taak bout Jesus no muo. Den dehn let dem go.

41Afta di apasl dem lef di Jewish rilijos liida dem, dehn wehn uova glad, bikaaz dehn wehn get fi sofa shiem sieka Jesus. 42Ahn evry die dehn go dah di Templ ahn fahn hous tu hous, ahn dehn kantinyo deh tiich di pipl dem ahn priich dis mesij: “Di Mesaya weh unu deh luk fah dah Jesus ihnself!”

Currently Selected:

Acts 5: NTIC

Highlight

Copy