John 13

Di Laas Sopa

(Matthew 26.26-30; Mark 14.22-26; Luke 22.14-20; 1 Corinthians 11.23-25)

1Di iivnin bifuor di Paasuova selibrieshan, Jesus wehn nuo seh di taim kom fi mek im lef dis worl ahn go bak tu di Faada. Ihn wehn aalwiez lov aala dem weh deh iina di worl weh dah fi him, so now ihn shuo dem seh fi him lov fi dem wuda neva don nontaim.

2Now, bifuor dehn gaan fi iit di Paasuova sopa, di devl wehn don get iina Judas Iscariot suol fi mek ihn sel out Jesus. Dis dah di siem Judas huu dah wehn Simon son. 3Now Jesus wehn nuo seh di Faada wehn don gi'im aal di powa fi du evryting, ahn seh ihn wehn kom fahn God ahn ihn gwain bak tu im. 4So Jesus get'op fahn roun di tiebl, tek aaf ihn goun ahn put'ih wan-said, ahn rap wan towil roun ihn wies. 5Afta dat, ihn chruo som waata iina wan punpan ahn staat wash ihn disaipl fut dem ahn drai dem wid di towil weh ihn wehn gat rap roun im.

6Wen ihn kom tu Simon Peter, Peter aks im, “Laad, yu gwain go wash fi mi fut dem tu?”

7Jesus ansa seh, “Yu no andastan rait now weh Ah deh du, bot lietaraan yu gwain andastan.”

8Peter seh, “Neva! Yu no gwain wash fi mi fut dem nontaim!”

Bot Jesus ansa seh, “If yu no waahn mek Ah wash fi yo fut, den yu kyaahn bii wan a mai disaipl!”

9So Simon Peter seh, “Wel den, Laad, no jos wash mi fut dem, wash mi han ahn mi hed tu!”

10Jesus ansa seh, “Enybady weh don bied aredy ongl niid fi wash dehn fut, sieka weh di huol a im don kliin. Ahn unu kliin tu, bot nat aala unu.” 11Ihn wehn seh dat, bikaaz ihn wehn nuo aredy huu wehn gwain sel'im out.

12So wen ihn wehn don wash dehn fut, ihn put aan bak ihn goun ahn gaan bak, gaan sidong. Den ihn aks dem, “Unu andastan weh Ah jos du fi unu? 13Unu kaal mi ‘Tiicha’ ahn ‘Maasta,’ ahn dat dah chruut, bikaaz dat dah mii. 14Jos laik how mii —huu dah unu Maasta ahn Tiicha— wash unu fut, aala unu hafy wash wan anada fut tu. 15Ah du dis fi shuo seh aala unu shuda du di siem tingz fi wan anada. 16Ah deh tel unu di chruut: wan sorvant neva beta an ihn maasta, ahn wan mesinja neva beta an huu sen im. 17So, blesin gwain kom tu unu if unu nuo demya tingz ahn du dem. 18Ah no deh seh dis bout aala unu; Ah nuo evry wan a unu weh Ah don pik. Bot dis dah fi mek unu nuo seh weh di prafit dem wehn seh iina di Skriptyo gwain kom chruu. Ih seh: ‘Di siem wan weh deh iit mi fuud roun di tiebl wid mi, dah di wan weh wehn gwain ton gens mi.’ 19Now Ah waahn tel unu weh gwain hapm bifuor ih hapm, so wen ih hapm, unu gwain si seh mii dah di Wan weh Aalwiez Egzis.#13.19 Di egzak wod dem dah: “…so wen ih kom tu paas unu kyan biliiv seh Mii dah Him.” Luk pahn Luke 8.24, 28 & Mark 14.62 tu, weh paat Jesus refa tu imself agen az, “Mii dah Him,” weh dah wehn wan a God niem iina demde diez, “…di Wan weh Aalwiez Egzis.” 20Ah deh tel unu di chruut: if enywan a unu risiiv enybady weh Ah sen, unu deh risiiv mii tu; ahn enybady weh risiiv mi, dehn deh risiiv di Wan weh sen mi tu.”

Jesus taak bout ihn det agen

21Wen Jesus don seh dis, ihn haat get uova hevy, ahn ihn tel dem, “Ah deh tel unu di chruut: Wan a unu gwain sel mi out.”

22Den, aala di disaipl dem wehn luk pahn wan anada sieka weh dehn neva nuo dah wish wan a dem Jesus wende taak bout. 23Now, di disaipl —di wan weh ihn wehn lov— wende liin aan pahn Jesus. 24So Simon Peter mek sain tu im, ahn tel im, “Aks Jesus dah wish wan a wi ihn deh taak bout.”

25So di disaipl liin bak gens Jesus ahn aks im, “Laad, dah huu yu deh taak bout?”

26Jesus ansa seh, “Dah di siem wan huu Ah gwain gi dis piis a bred tu wen Ah don dip'ih iina di dish.” So ihn dip di piis a bred ahn gi'ih tu Judas, huu dah wehn Simon Iscariot son. 27Ahn az suun az ihn don gi'im di piis a bred, Satan get iina Judas.

So Jesus tel im, “Weh yu gwain du, mikies ahn du'ih.” 28Now nonbady roun di tiebl wehn andastan wai Jesus wende tel im dis. 29Bot, sins Judas dah wehn di wan weh main di mony bag fi di ada disaipl dem, som a dem wehn tink seh Jesus wende sen im fi go bai somting weh dehn wehn niid fi di Paasuova sopa, or fi go gi somting fi di puor pipl dem.

30So, az suun az Judas wehn don tek di bred, ihn gaan out; ahn dah wehn don nait.

31Wen ihn gaan, Jesus seh, “Now dah di taim wen di Son a Man get gluorifai, ahn ihn gwain mek aal di pipl dem si God gluory chruu weh ihn gwain du! 32Ahn if ihn mek pipl si how God wandaful, den God ihnself gwain mek dem si how di Son a Man wandaful tu, ahn ihn gwain du aala dis siem taim.

33“Uo mi pikniny, Ah gwain deh wid unu ongl wan likl bit langa. Ahn unu gwain luk fi mi, ahn jos laik Ah wehn tel di Jewish liida dem, so Ah deh tel unu: Weh paat Ah gwain, unu gwain kyaahn kom.

34“Ah deh gi aala unu wan nyuu komaan: Lov wan anada! Unu hafy lov wan anada jos laik how Ai wehn lov aala unu. 35If unu lov wan anada, den evrybady gwain nuo seh unu dah fi mi disaipl.”

Jesus seh Simon Peter gwain seh ihn no nuo im

(Matthew 26.31-35; Mark 14.27-31; Luke 22.31-34)

36Simon Peter aks im, “Weh paat yu gwain, Laad?”

Ahn Jesus ansa seh, “Weh Ah gwain yo kyaahn fala mi rait now, bot lietaraan yo gwain fala mi fi chruut.”

37So Peter aks im, “Bot Laad, wai Ah kyaahn go wid yo now? Ah wuda dongtu ded fi yo!”

38Den Jesus ansa seh, “Yu deh seh yuu wuda ded fi mii? Mek Ah tel yo di chruut: bifuor wan ruusta kruo dis maanin, yu gwain tel lai three taim seh yu no nuo mi ataal.”

Currently Selected:

John 13: NTIC

Highlight

Copy