John 17

Jesus prie fi ihnself

1Wen Jesus don seh demde tingz, ihn luk op dah hevn ahn prie seh, “Faada, di taim don kom. Mek di pipl dem si di gluory weh yo Son gat, so ihn kyan shuo dem yo gluory tu; 2bikaaz yu gi'im di rait uova evrybady pahn dis ort, so ihn kyan mek aala dem weh yu wehn gi'im liv fareva wid yo. 3Ahn di wie fi mek dem liv fareva wid yo dah fi mek dem nuo yu, weh dah di ongli'is chruu God, ahn fi mek dem nuo mii, Jesus Christ, weh dah di Wan weh yu wehn sen. 4Ah shuo evrybady yah pahn dis ort yo gluory, bikaaz Ah don du evryting weh yu sen mi fi du. 5Ahn now, Faada, gi mi di siem gluory —aal di ana weh yo wehn gi mi wen Ah wende wid yo— fahn bifuor di worl wehn iivn staat mek.

Jesus prie fi ihn disaipl dem

6“Yuu wehn gi mi som falowa fahn mongs di pipl fahn disa worl ahn Ah don shuo dem dah huu yu ahn how yo stan. Dehn wehn dah fi yu; den yuu gi mi dem, ahn dehn kiip deh du weh yu wehn seh dehn fi du. 7Now dehn nuo seh evryting weh Ah gat dah riily fahn yu; 8bikaaz Ah tel dem di siem wod dem weh yu wehn tel mi fi seh, ahn dehn aksep dem. Dehn nuo seh Ah kom fahn yu fi chruut, ahn dehn biliiv seh dah yuu wehn sen mii. 9Faada, Ah deh prie fi demya; Ah no prie fi dem weh dah paat a disa worl, bot Ah deh prie fi demya weh yu wehn gi mi, bikaaz dehn dah fi yu tu. 10Ahn aala dem weh dah fi mi, dah fi yu tu; ahn dem weh dah fi yu, dah fi mi. Ahn evrybady kyan si mi gluory sieka how dehn stan.

11“Faada, Ah suun kom tu yu, ahn Ah no gwain deh iina disa worl no muo, bot dem gwain stil deh yah. So, Holy Faada, Ah deh aks yo fi protek dem chruu di powa weh deh iina yo niem, di siem powa weh yo wehn gi mi, so dem kyan bii wan, jos laik how mii ahn yu dah wan. 12Wail Ah wende wid dem, Ah wehn protek dem chruu di powa weh deh iina yo niem, di siem powa weh yu wehn gi mi. Ah wehn main dem gud ahn nat wan a dem neva gaan astrie, eksep di wan weh wehn baan fi go dah Hel, so weh di Skriptyo wehn seh bout him kom chruu.

13“Now Ah suun kom tu yu, bot Ah deh seh aala demya tingz wail Ah stil deh yah iina di worl, so mi falowa dehn haat kyan ful'op a di siem hapinis weh deh diip dong iina mi haat. 14Ah don tel dem di siem wod dem weh yu wehn tel mii, bot di pipl fahn disa worl wehn hiet mi falowa dem, bikaaz dehn no dah fi ih, jos laik how Ah no dah fahn disa worl niida.

15“Faada, Ah no deh aks yo fi tek dem outa di worl, bot Ah deh aks yo fi protek dem fahn di Wan weh Bad. 16Jos laik how Ah dah no fi di worl, mi falowa dem no bilang tu ih niida. 17So, Ah aks yo fi mek dehn gi demself uova tu yu, ahn jos tu yu, chruu di chruut, bikaaz fi yo Wod dah di chruut.#17.17 Or di vors kuda seh: “Sanktifai dem iina di chruut; fi yo Wod dah chruut.” 18Den, siem laik how yo wehn sen mi iina di worl, Ah deh sen dem out mongs di pipl dem iina dis worl tu. 19Ah wehn gi miself uova tu yu, ahn jos tu yu, so dehn kyan gi fi demself uova jos tu yu tu, laik how dehn fi du.

Jesus prie fi evrybady weh wehn gwain chros iina im fahn now go bak

20“Faada, Ah no ongl deh prie fi demya disaipl yah, bot Ah deh prie fi aala dem pipl weh gwain chros iina mii sieka weh demya seh bout mii. 21Faada, Ah prie seh aala dem kyan bii wan, siem laik how mii ahn yu dah wan. Mek dem jain aan tu wi siem laik how yu deh iina mii ahn mii deh iina yu. Den di pipl fahn disa worl gwain kyan biliiv seh dah yuu wehn sen mi. 22Ah gi dem di siem gluory weh yu wehn gi mi, so dehn kyan bii wan, siem laik how wii dah wan. 23Ai iina dem ahn yuu iina mii iina wan porfek wie bitout divizhan, so di res a di pipl fahn di worl kyan nuo seh yu wehn sen mi, ahn seh yu wehn lov dem jos laik how yu lov mii.

24“Faada, weh Ah waahn dah fi yo mek dem falowa, weh yu don gi mi aredy, deh dah di siem plies weh Ah gwain deh, so dehn kyan si mi gluory. Dah yuu wehn gi mi disa powa, bikaaz yuu wehn lov mi fahn bifuor di worl wehn iivn mek.

25“Mi Faada, yu weh joj rait aal di taim, di pipl iina disa worl no nuo yu ataal, bot Ai nuo yu, ahn dem weh yo wehn gi mi nuo seh dah yu wehn sen mii. 26Ah shuo dem dah huu yu, ahn Ah gwain kiip aan deh shuo dem, so di lov weh yu gat fi mi kyan deh iina dem, ahn Ah gwain kyan liv iina dem tu.”

Currently Selected:

John 17: NTIC

Highlight

Copy