གོ༌ཟུག༌ 9
9
དཀོན༌མཆོག༌གི༌ ནོ༌ཨ༌ ཉམ༌པོ༌ ཆད༌དོན༌ ཛདས༌།
9:1-17
1དཀོན༌མཆོག༌གི༌ ནོ༌ཨ༌ དང༌ ཁོའེ༌ བུ༌ཚ༌གུན༌ལ༌ ཅིན༌ལབས༌ སལ༌ཏེ༌ མོལ༌ལ༌ ཛདས༌, “ཇིག༌རྟེན༌ གང༌པོའེ༌ ནང༌ང༌ ཕེལ༌ཅེས༌སི༌ ཕིའ༌ ཕྲུ༌གུ༌ མང༌པོ༌ སྐྱེ༌ཅུག༌ཤིག༌། 2སའེ༌ཀ༌ དུག༌ཁན༌ནི༌ སེམས༌ཅན༌, ནམ༌ཁའེ༌ ཅ༌, སའེ༌ཀ༌ གྲུལ༌ཁན༌ནི༌ སེམས༌ཅན༌ ཆུ༌ངུན༌ དང༌ ཆུའི༌ ནང༌ང༌ ཡོད༌ཁན༌ནི༌ ཉ༌ ཚང༌མའ༌ ཁྱོ༌རང༌གུན༌ནི༌ ཇིགས༌སི༌ ནང༌ང༌ དུག༌ཨིན༌། ངའེ༌ ཏེ༌ ཚང༌མ༌ ཁྱོ༌ཞའེ༌ ཝང༌ངི༌ ཡོག༌ག༌ ཏང༌ངད༌། 3ངའེ༌ སྲོག༌ ཡོད༌ཏེ༌ གྲུལ༌ཁན༌ ཚང༌མ༌ ཁྱོ༌ཞའ༌ ཟའ༌ཅེས༌ལ༌ ཏང༌ངད༌, ཀ༌ཟུག༌གི༌ ངའེ༌ ཁྱོ༌ཞའ༌ སྔོན༌པོའེ༌ རིགས༌ དང༌ ཀྲོ༌ནས༌ ཚང༌མ༌ ཏངས༌ཏེ༌ ཨིན༌པིན༌། ཟའ༌ཅེས༌ལ༌ ཏ༌ ངའེ༌ ཁྱོ༌ཞའ༌ ཅི༌ཚང༌མ༌ ཏང༌ངད༌།”
4“ཨིན༌ནའང༌ ཁྲག༌ ཡོད༌ཁན༌ནི༌ ཤ༌ ཟའ༌ མ༌གོས༌, ཅིའ༌ཟེར༌ན༌ སྲོག༌པོ༌ ཁྲག༌གི༌ ནང༌ང༌ ཡོད༌ཏེ༌ ཨིན༌ནོག༌། 5ཀལ༌ཏེས༌ མི༌ཞིག༌གི༌ སྲོག༌ ལེན༌ན༌, ཏེ༌ སྲོག༌ ལེན༌ཁན༌བོའ༌ ཤི༌ཅེས༌སི༌ ཆད༌པ༌ ཕོག༌གོས༌། སེམས༌ཅན༌ ཨིན༌གྲོ༌ ཡ༌ མི༌, མི༌ སད༌ཁན༌བོ༌ སད༌གོས༌།”
6“མི༌ སད༌ཁན༌བོའ༌ ཤི༌ཅེས༌སི༌ ཆད༌པ༌ ཞན༌ཡང༌ མི༌གུན༌ནི༌ ཏང༌གོས༌, ཅིའ༌ཟེར༌ན༌ དཀོན༌མཆོག༌གི༌ མི༌བོ༌ ཁོང༌རང༌ ཙོགས༌ ཅོའ༌ ཛད༌ཏེ༌ ཨིན༌ནོག༌། 7ཡང༌ ཁྱོ༌ཞ༌གུན༌, ཇིག༌རྟེན༌ གང༌པོའེ༌ ནང༌ང༌ ཕེལ༌ཅེས༌སི༌ ཕིའ༌ ཕྲུ༌གུ༌ མང༌པོ༌ སྐྱེ༌ཅུག༌ཤིག༌།”
8ཏེ༌ནེ༌ དཀོན༌མཆོག༌གི༌ ནོ༌ཨ༌ དང༌ ཁོའེ༌ བུ༌ཚ༌གུན༌ལ༌ མོལས༌, 9“ཏ༌ ངའེ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཏངས༌ཁན༌ནི༌ ཆད༌དོན༌བོ༌ ཏན༌ཏན༌ ཅོའད༌། 10ཏེ༌ ཆད༌དོན༌བོ༌ ཁྱོ༌རང༌ ཉམ༌པོ༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ སྲོག༌ ཡོད༌ཁན༌: སྲལ༌ཁན༌ དང༌ ནག༌ཚོགས༌སི༌ སེམས༌ཅན༌, དང༌ ཅ༌ཅིའུ༌ ཡང༌ན༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མའེ༌ ཕིའང༌ ཨིན༌། 11འོ༌ན༌, ངའེ༌ ཁྱོ༌རང༌ ཉམ༌པོ༌ ཅོ༌ཁན༌ནི༌ ཆད༌དོན༌བོ༌ སྟན༌པོ༌ ཅོའད༌། ཏ༌ནེ༌ཕར༌ལ༌ ཆུ༌ལོག༌གི༌ ཆུའི༌ སྲོག༌ ཡོད༌ཁན༌ ཚང༌མ༌ མེད༌ཁན༌ མ༌ནེ༌ མི༌ཅོ༌། འི༌ ཇིག༌རྟེན༌བོ༌ ཆུ༌ལོག༌གི༌ ཆུ༌ གྱུད༌ཏེ༌ མེད༌ཁན༌ མ༌ནེ༌ མི༌ཆ༌།”
12དཀོན༌མཆོག༌གི༌ མོལས༌ལ༌ ཛདས༌, “འི༌བོ༌ ངའེ༌ ཁྱོ༌ཞ༌གུན༌ དང༌ སྲོག༌ ཡོད༌ཁན༌ ཚང༌མ༌, ཡང༌ ཡོང༌ཅེས༌ཅན༌ནི༌ ཏུས༌སི༌ མིར༌གྱུད༌ ཚང༌མ༌ ཉམ༌པོ༌ ཅོས༌ཁན༌ནི༌ ཆད༌དོན༌ནི༌ སྟགས༌པོ༌ ཨིན༌། 13ངའེ༌ ནམ༌ཁའེ༌ ནང༌ང༌ ཟའ༌ཆུ༌ཐུང༌ཞིག༌ ཤར༌ཅུག༌ཨིན༌, ཏེ༌བོ༌ ཁྱོ༌ཞའ༌ དང༌ ཇིག༌རྟེན༌ གང༌པོ༌ ཉམ༌པོ༌ ངའེ༌ ཆད༌དོན༌ ཅོ༌ཁན༌ནི༌ སྟགས༌པོ༌ ཨིན༌། 14ངའེ༌ སྲིན༌ ཀལ༌ཏེ༌ ཇིག༌རྟེན༌ནི༌ཀ༌ ཆར༌པ༌ ཕབས༌ཏེ༌, ནམ༌མི༌ ནང༌ང༌ ཟའ༌ཆུ༌ཐུང༌ ཐོང༌ ཟ༌ནེ༌, 15ངའ༌ ཁྱོ༌ཞའ༌ དང༌ སྲོག༌ ཡོད༌ཁན༌ ཚང༌མ༌ ཉམ༌པོ༌ ཅོ༌ཁན༌ནི༌ ཆད༌དོན༌བོ༌ ཨིད༌ཏུ༌ ཡོང༌ཨིན༌། ཆུ༌ལོག༌གི༌ ཆུའི༌ སྲོག༌ ཡོད༌ཁན༌ ཚང༌མ༌ ཡང༌སྐྱར༌ མེད༌ཁན༌ མ༌ནེ༌ མི༌ཅོ༌། 16ཟའ༌ཆུ༌ཐུང༌ ནམ༌མི༌ ནང༌ང༌ ཤར༌ཏེ༌ ཐོང༌ང༌ཅིག༌, ངའ༌ ཇིག༌རྟེན༌ནི༌ཀ༌ ཡོད༌ཁན༌ནི༌ སྲོག༌ ཡོད༌ཁན༌ ཚང༌མ༌ ཉམ༌པོ༌ ངའེ༌ ཅོ༌ཁན༌ནི༌ ཆད༌དོན༌བོ༌ ཨིད༌ཏུ༌ ཡོང༌ཨིན༌།”
17དཀོན༌མཆོག༌གི༌ ནོ༌ཨ༌ མོལས༌ལ༌ ཛདས༌, “འི༌ ཟའ༌ཆུ༌ཐུང༌བོ༌ ངའེ༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མ༌ ཉམ༌པོ༌ ཅོ༌ཁན༌ནི༌ ཆད༌དོན༌ནི༌ སྟགས༌པོ༌ ཨིན༌།”
ནོ༌ཨ༌ དང༌ ཁོའེ༌ བུ༌ཚ༌གུན༌།
9:18-10:1
18གྲུ༌ཟིང༌ངི༌ ནང༌ནེ༌ བིང༌ཁན༌ནི༌ ནོ༌ཨའེ༌ བུ༌ཚ༌གུན༌ ནི༌, ཤེམ༌, ཧེམ༌ དང༌ ཡབ༌ཕེད༌ གུན༌ ཨིན༌པིན༌། ༼ཧེམ༌ ཀེ༌ནན༌ ནི༌ ཨ༌བ༌ ཨིན༌པིན༌།༽ 19ནོ༌ཨའེ༌ འིན༌ན༌ བུ༌ཚ༌ སུམ༌ཀོའེ༌ ཀ༌ནེ༌ ཇིག༌རྟེན༌ནི༌ ནང༌ང༌ མི༌ཚང༌མ༌ ཕེལ༌།
20ཞིང༌བད༌པ༌ ནོ༌ཨ༌ ནི༌ རྒུན༌ཚས༌ ཏབ༌ཁན༌ ཏང༌པོ༌ མི༌བོ༌ ཨིན༌པིན༌། 21ཞག༌ཤིག༌, ཁོ༌ རྒུན༌ནི༌ ཆང༌ ཐུངས༌ཏེ༌ ར༌རོས༌པ༌, ཁོ༌ ལྗེར༌ཉལ༌ལ༌ ཁོ༌རང༌ངི༌ ཀུར༌རི༌ ནང༌ང༌ ཉིད༌ལ༌ སོང༌། 22ཀེ༌ནན༌ནི༌ ཨ༌བ༌, ཧེམ༌, ཁོ༌རང༌ངི༌ ཨ༌བའེ༌ ཀུར༌རི༌ ནང༌ང༌ སོང༌པ༌, ཨ༌བ༌ ལྗེར༌ཉལ༌ལ༌ ཡོད༌ཁན༌བོ༌ ཐོང༌། ཁོ༌ ཕི༌ལོག༌ག༌ ཡོངས༌ཏེ༌ ཁོ༌རང༌ངི༌ ཨ༌ཅོ༌ ཉིས༌ཀོའ༌ ཤདས༌། 23ཏེ༌ནེ༌ ཤེམ༌ དང༌ ཡབ༌ཕེད༌དི༌ རས༌ ཆེན༌མོ༌ཞིག༌ ཁོ༌རང༌གུན༌ནི༌ སྤུང༌པའེ༌ཀ༌, ལག༌པ༌ ཉམ༌པོ༌ ཟུམས༌ཏེ༌ གྱབ༌ལོག༌ག༌ ཀུར༌རི༌ ནང༌ང༌ ཨ༌བ༌ ཡོད༌ས༌ སོང༌ཏེ༌, ནོ༌ཨ༌ ལྗེར༌ཉལ༌ ཡོད༌ཁན༌བོ༌ ཀབས༌། ཏེ༌ཟུག༌ ཅོ༌ ཟ༌ནེ༌ ཨ༌བ༌ ལྗེར༌ཉལ༌ལ༌ མི༌ཐོང༌ཅེས༌སི༌ ཕིའ༌ ཁོང༌གུན༌ནི༌ ལྡོང༌བོ༌ ཨ༌བ༌ མེད༌ས༌ ཆོགས༌ལ༌ གྱུརས༌།
24ནོ༌ཨ༌ ར༌ཞུ༌ཏེ༌ ཉིད༌ཚད༌ད༌དང༌, ཁོའ༌ ཁོའེ༌ བུ༌ཚ༌ ཆུང༌ཤོག༌པོའེ༌ ཁྲེལ༌བའེ༌ ལས༌ ཅོས༌ཁན༌བོ༌ གྱུས༌སོང༌། 25ཡང༌ ཁོའེ༌ ཟེརས༌,
“ཧམ༌མི༌ བུ༌ཚ༌ ཀེ༌ནན༌ དང༌ ཁོའེ༌ པུར༌གྱུད༌གུན༌ལ༌
ངན༌ ཕོག༌ཤིག༌།
ཁོང༌གུན༌ ཁོང༌ངི༌ ཨ༌ཅོ༌གུན༌ནི༌ ཚེ༌ཡོག༌ ཚང༌མའེ༌སང༌
རྩི༌ཝ༌ མེད༌ཁན༌བོ༌ གྱུར༌ཤིག༌།”
26ནོ༌ཨའེ༌ ཡང༌ ཟེརས༌,
“ཡ༌ཝ༌, ཤེམ༌མི༌ དཀོན༌མཆོག༌ག༌ སྟོད༌པ༌ ཐོབ༌ཤིག༌,
ཡང༌ ཀེ༌ནན༌ ཁོའེ༌ ཚེ༌ཡོག༌ གྱུར༌ཤིག༌།
27དཀོན༌མཆོག༌གི༌ ཡབ༌ཕེད༌དི༌ མིར༌གྱུད༌གུན༌ ཕེལ༌ཅུག༌ཤིག༌།
ཡབ༌ཕེད༌ དང༌ ཤེམ༌མི༌ མིར༌གྱུད༌གུན༌ནི༌ མི༌ཚེ༌ ཉམ༌པོ༌ ཕུད༌ཤིག༌།
ཡང༌ ཀེ༌ནན༌པ༌གུན༌ ཡབ༌ཕེད༌དི༌ པུར༌གྱུད༌གུན༌ནི༌ ཚེ༌ཡོག༌ གྱུར༌ཤིག༌།”
28ཆུ༌ལོག༌གི༌ སྟིང༌ནེ༌ ནོ༌ཨ༌ ཡང༌ ལོ༌ 350 སོན༌ཏེའ༌ ལུས༌། 29ཁོ༌ ལོ༌ 950 སོན༌ཏེའ༌ ལུས༌ ཏེ༌ནེ༌ ཤི༌།
Currently Selected:
གོ༌ཟུག༌ 9: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
