Matiu 25

Bisapɔm piig a bɔŋal

1“N-yonn nmɔn paab a naam na yin nann bisapɔm piig ban kaa nyi uja wee ki nan ta bi filaam ke bin too lipiichanil daan nsan bu-n le. 2Bisapɔm biŋmu le nan ye tijɔri le biŋmu mu ye bilandam. 3Ban jɔrin nan ŋmag filaam le kaa sin ŋmag fila nyum ki guun bi ba. 4Le bilandamin ma ŋmag fila nyum kpiɛ man be bi filaamin ni. 5Lipiichanil daan nin kaa nan foon weemi, le njiɛm nan choo bisapɔmin biɛn, le bi dɔɔn jiɛn.

6“Le kunyiɛgtasiig le bi gbir likukɔl ke, ‘Lig lipiichanil daan ni le chaan nin! Ni nyann ki nan too u!’

7“Le bisapɔm piigin biɛn fii ki nyɔɔ bi filaam. 8Le ban jɔrin miɛ bilandamin ke, ‘Ni ŋa ni fila nyum nan wama ki sei ti. Ke ti filaam ban i junn le.’

9“Le bi jiin ke, ‘Aai, naa yin foo tim nin nimi. Ni li chaa ban kɔɔr fila nyumin ban ki tan da ni yaam.’

10“Amaa baah nan labir jon ke bin tan da fila nyumin, le lipiichanil daan nmɔn foon. Bilandam biŋmu ban nan ŋa sili-n ma nan nɔɔ u le ki jon ipiichan niin ki tan kɔɔ ndiin le bi loon ki kpal linaanganl.

11“Ni bɔɔn bu le tijɔrin mu nan foon, ki tan si ntimansanmɔnn ki kpaar linaanganl ki yi ke, ‘Uninkpel! Uninkpel! Loor linaanganla wee ti kɔɔ.’

12“Le upiidaan nin, jiin bi ke, ‘N bei ni ibamɔn le, maa nyi ni.’

13“Mambu ni li guu ni ba man, nan bu-n naa nyi lidaal lan bee n-yonn man ni.

Bitoontum bita a bɔŋal

14“Paab a naamin ji nann uniindaan uba kaah nan ŋa sili ke un jo nsan, wee ki yin u toontum bita ki nan ta u faal ki sei bi-n le. 15U nan sei chinchinn a toontunnu salima a bɔɔlim miŋmu, ki sei wan paa-n mu salima a bɔɔlim milee, ki sei wan gurin mu salima a bɔɔlig kiba. U nan sei bi biɛn baah li fir ŋmag man le ki yaar jon u sam. 16Wan nan gaa miŋmu-n nan nyan le weem ki tan ta piin kpoŋkpoŋ, ki kan tinyɔɔr salima a bɔɔlim miŋmu ki kpiɛ i bu. 17Man mu le wan nan gaa ilee-n mu ta ŋa kpoŋkpoŋ ki kan salima a bɔɔlim milee tinyɔɔr ki kpiɛ i bu. 18Amaa wan nan gaa kiba-n ma nan nyan le, ki tan gbii kiboog ki ta u yudaau a ligi yin piin nin yaan.

19“Ni nan yuur pam, le u niin daan nmɔn ni nan jirin, le ki yin u toontumin, ke un lig bi ligi nmɔn ki kan baah kan tinyɔɔr man. 20Wan nan gaa miŋmu-n kaah kɔɔ n-yonn man ni, le u ta nbɔɔlim miŋmu ki kpiɛ ki ta sei u yudaau ki ke, ‘N yudaau, a nan seim salima a bɔɔlim miŋmu le, lig, n mu tun ki kan tinyɔɔr miŋmu le ki kpiɛ.’

21“Le u yudaau nmɔn jiin bei u ke, ‘N faan, a ye utoontunn ŋan le! Ki ji tun nbamɔm, ŋaah ŋmag wama nan nbamɔm nan, mambu, n yin ta tiwann takpem a ninkper le ki ŋa a nɔɔn. Npopeen man wee n jɔɔ nan, ni ye min nin fin yaal le.’

22“Le wan mu nan gaa milee-n kɔɔ u yudaau ban, ki bei u ke, ‘N yudaau, lig, a nan seim salima a bɔɔlim milee le, amaa le n ta kpeŋ ki kan milee tinyɔɔr ki kpiɛ.’

23“Le u yudaau jiin bei u ke, ‘Nfaan, a ye utoontunn ŋan le! Ki ji tun nbamɔm, ŋaah ŋmag wama nan nbamɔm nan, mambu n yin ta tiwann takpem le ki ŋa a nɔɔn. Npopeen man wee n jɔɔ nan, ni ye min nin fin yaal le.’

24“Le wan nan gaa kiba nan ma kɔɔ u yudaau ban ki bei u ke, ‘N yudaau, n nyi a bɔr kaah pɔɔ, ŋaah kaa bu nan ni a chiɛ ni ma le. Ŋaah kaa yaal tijiir tan ni, ti ma le a pii. 25Mambu le n saŋ bijawaam, ki gbii kiboog, ki ta a ligin nmɔn piin. Lig, a ligi nmɔn sɔ, gaa a wan.’

26“Le u yudaau jiin bei u ke, ‘Fin utoontunn wan a pool to nan a ye ugbanyagdaan le! A pii nyi ke n chiɛ nan wee maa bun le, ki ji nyi ke n pii nan wee maa yaal ni le. 27Man ke, a bi ta n ligi nmɔn ki bil baŋ ni le. Maah bi nan jirin nan n bi li kan n ligi nmɔn ke tinyɔɔr paa i bu.

28“ ‘Ni gaa ilig nmɔn u ban na man, ki ta kpiɛ wan jɔɔ bɔɔlim piigin na. 29Nan bu-n wan biɛn jɔɔn ke bi li kpiɛ u, le un mann kan takpem, amaa wan kaa jɔɔ nan, hali waah le jɔɔ nan ni bi gaan ni le. 30Wee ki ta utoontunn wan kaa jɔɔ tinyɔɔr nan gab nkaafiin libunbɔnlin na, nan yaan wee timɔr nin kufabuŋ nin linyinŋmanl na yin be.’

Njoorim a bɔjil

31“Uninfosaal a Bigin nan jirin nin u pag nin malakam biɛn n-yonn man ke, u na yin kal u naangbɔŋ bu le nin u pag. 32Dulinya nan a ninfob a booli biɛn na li lagin u nintogil, le un bɔgir bi ke upeekpaar kaah ti bɔgir ipee nin iŋɔɔb man ni. 33U na yin ta ipee le ki siin u nɔɔjiim paam, le ki ta iŋɔɔb mu ki siin u nɔɔgam paam.

34“Le ubɔrin na li bei ban si u nɔɔjiim paamin ke, ‘Ni dan, nim ban wee n Baa kaab tikaar ki jaa ni bu nan, ni gaam ni faal, nnaam man wee Uwonbɔr nan ŋa mi sili ki guu ni dulinya a piinimin ni. 35Nan bu-n nkom nan jɔɔm le ni seim tijiir, le nnyunyum jɔɔm le ni seim nnyum. N nan ye uchaan, le ni gaam ki ŋaam kuchɔŋ ni niin ni. 36N nan choon gaan le ni seim tiwann yɔɔr yee kaar, n nan bu le, le ni terim, bi nan taam ŋa kuloondiigin le, le ni dan nan gɔnnim.’

37“Le bibuchim nmɔn na li jiin ki baan u ke, ‘Uyudaan, ibayoo wee ti nan kaŋ wee nkom jɔɔŋ wee ti seiŋ tijiira? Bee ibayoo wee ti nan kaŋ wee nnyunyum jɔɔŋ wee ti seiŋ nnyuma? 38Bee ibayoo wee ti nan kaŋ wee a ye uchaan wee ti gaaŋ ki ŋaaŋ kuchɔŋ ti niin yin naa? Bee a choon ki gaan wee ti seiŋ tiwann yɔɔraa? 39Bee ibayoo wee ti nan kaŋ ki miin a bu wee ti teriŋ bee ibayoo wee ti nan kan a be kuloondiigin wee ti gɔnniŋ ŋaa?’

40“Le ubɔrin mu na li jiin ke, ‘N bei ni ibamɔn le, naah nan tun man ki tenn n nabum ban waarin, ni nan ye min le ni nan tun ki tenn.’

41“Le u na li bei ban si u nɔɔgam paamin, ‘Nim ban wee limɔpool nɔɔ nan, fɔɔr n ban na, ki li chaa ki tan kɔɔ nŋmi man gaan kaa jɔɔ njunim wee Uwonbɔr mann ki guun ulinlaril nin u malakam mi. 42Nan bu-n nkom nan jɔɔm, le naa seim tijiiri, le nnyunyum jɔɔm, le naa seim nnyumi, 43N nan ye uchaan le, le naa gaam ni niin yin ni, n nan choon le ki gaan, amaa le naa seim tiwann yeekaar, le n nan bu ki be kuloondiigin, le naa che ni lig mi.’

44“Iyaayoo nmɔn le bi mu na li jiin ki baan u ke, ‘Uyudaan, ibayoo wee ti nan kaŋ ki miin nkom jɔɔŋ bee nnyunyum jɔɔŋ bee a ye uchaan, bee a choon gaan, bee a bu, bee a be kuloondiigin wee taa teriŋ ŋaa?’

45“Iyaayoo nmɔn le u li jiin ni ke, ‘N bei ni ibamɔn le, nan wee ni nan yii kaa tun sei n nabum ban waarin, ni nan ye min le.’ 46Le bi na li jo ki tan kɔɔ litudaril lan kaa jɔɔ ndiɛm ni, amaa le bibuchim n mu li jo ki tan gaa limiɛfol lan kaa jɔɔ ndiɛmin.”

Currently Selected:

Matiu 25: KUGL

Highlight

Copy