ÉXODO 13
13
Macponquinquiscama (sicaa) aptiyam apmamyi
1Aptomjac nic nat Dios Apyimtalhnamo apcanya Moisés: 2—Iponquinquis (ilyacyes) moclhama sicaa (apquinavo) aptiyam apmamyi, etnejic ajanco. Iponquinquis moclhama aptoscama aptiyam apmamyi, otnejic ajanco — nic nat aptomjac Dios.#Nm 3.13; Lc 2.23.
3Aptomjac nic nat Moisés apquilanya apnaymacoc: —Colyit apatic (noncolvonquim nasa) as acnim apquilantiyapma quellhip as yoclhilhma Egipto. Apquiltimesaycam alhta quellhip malha apquilmomap. Apmopvan apanco Dios Apyimtalhnamo apquilyinyovquiscama quellhip Egipto. Noeltovaoc nasa quilpasmongam ayincajay apquimpascaoc. 4Apquilantipquic quellhip as acnim apvisay Abib (marzo - abril). 5Ellana sat fiesta as acnim acyitnama ingatic yoclhilhma apquilvoycamlha. Enaliclhac sat quellhip Dios Apyimtalhnamo yoclhilhma actomja apancaoc enlhit cananeos, najan enlhit heteos, najan enlhit amorreos, najan heveos najan jebuseos. Aplhanma Dios Apyimtalhnamo actomja nasoc anco ellhovamcoc apquilyeyjamcaa as yoclhilhma. Malha acyitnamaclha yingmin sat cotnejic leche ningyam najan yamyovjene, mepqui ninsovjomo. 6Eltovaoc sat pan mepqui apquimpascaoc acvaycmo 7 acnim. Vocmec sat ancoc 7 acnim, ellana sat fiesta, colhic ayaco Dios Apyimtalhnamo. 7Eltovaoc sat 7 acnim, pan mepqui apquimpascaoc. Sicmasma coo asoc ayincajay. Copvanquejec apyovoclhojo enlhitaoc eytic pan apanco. 8Eliltimnas sat apquitquic as acnim actema nac jay: —Eycaso acyitnama ingatic singilantipquiscama yoclhilhma Egipto Dios Apyimtalhnamo — sat eltime. 9Cotnejic sat asoc monquinatquiscama apectong enlhit, tasic lha payjaclha napaat. Quellhip sat ellingacsic singanamaclha Dios. Apmopvan apanco Dios Apyimtalhnamo Jehová apquilyinyovquiscama quellhip yoclhilhma Egipto. 10Elyiplovquis sat moclhama año ellana fiesta nac jay, mepqui apquilyeycajascama as acnim.
11Dios Apyimtalhnamo aplhanma ilhnic nat mepqui apyeycajascaoc napatavo quellhip najan apquilyeyjamcaa. Aplhanma nic nat yoyam ellhocac quellhip yoclhilhma apquilaoclha cananeos. 12Apquilvocmec sat ancoc quellhip as yoclhilhma, elyiplovquis sicpayvam silanya quellhip: —Elponquinquis apquitca quilhva aptiyam apmamyi, colhic sat acmesa Dios Apyimtalhnamo. Acno apnatoscama, apquitcoc aptiyam apmamyi, colhic sat acmesa Dios Apyimtalhnamo.#Lc 2.23. 13Intiyacmec sat ancoc yamelyeyjaycoc ayitcoc (inquinavo), colhic sat acmesa Dios Apyimtalhnamo (yataay) nipquesic apquitcoc. Cotnejic sat acya'mongam macmescama yamelyeyjaycoc ayitcoc. Am sat ancoc coyitnac acya'mongam macmescama, ingyintas sat ayispoc, yoyam cotsapoc. Elhnasojo sat actema nac jay, apquitca quilhva aptiyam apmamyi, nipyesicsa quellhip. 14Moc acnim sat etnejic ingyanic apquitca: —¿Tata, so acvisay qui? — sat etnejic ingyanic. Ingyatingmojo sat lhip: —Dios Apyimtalhnamo apmopvan apanco singnalovsingveclho yoclhilhma Egipto, ningiltimesaycamcaclha alhta malha ningilmomalhca. 15Am alhta cotamilam apvalhoc faraón aptemaclha apmasma, jingilyinyovsic yoclhilhma. Yejemoc alhta apcanama Dios Apyimtalhnamo ematong co Egipto apquitcoc quilhva aptiyam apmamyi, najan apnatoscama apquitcoc aptiyam apmamyi. Eycaso ayinyema nintemaclha ningmescama Dios Apyimtalhnamo. Acvisay ningmescama ninatoscama appaliyam apmamyi apquilinava macmescama Dios Apyimtalhnamo. Najan maa acya'mongam inquitquic appaliyam apmamyi, colhic sat acmesa nintoscama apquitcoc. 16Cotnejic sat malha asoc monquinatquiscama ingectong, najan malha acyipitcay payjaclha ningaat. Ayinyema alhta Dios Apyimtalhnamo apmopvan apanco singnalovsingveclho yoclhilhma Egipto — sat itne ingyatingmojo — nic nat aptomjac Dios Apyimtalhnamo.
Yipjopay ayimja najan talha actotseycaoc
17Invocmec alhta acnim, yoyam elapajacsic enlhitaoc apvisqui faraón. Apnalaclhec alhta Dios Apyimtalhnamo moc amay. Jave actomjaclha ningato yoclhilhma filisteos. Inlhenquic nic nat apvalhoc Dios Apyimtalhnamo: Elacac sat enlhitaoc, apquilvita inlhojo apquilnapomacpilha. Eltajojoc sat mocjam yoclhilhma Egipto — nic nat intomjac apvalhoc. 18Apnalaclhec nic nat Dios Apyimtalhnamo moc amay, elmilanic yoclhilhma actamopeycaoc elyipjongvomoc vatsam Yingmin Acyilhvasem (Mar Rojo). Apquilyinyovquic nic nat Egipto enlhitaoc Israel. Malha singilpilhtetemo apquilsoycam apquilmaycam. 19Apquilsovquic nic nat yamit aysicsic apyitnaclha José apjápac. Aplhalhma ilhnic nat Moisés. Aptomjac nic nat siclho José apquilanya: Naso, Dios Apyimtalhnamo elvomsic tap quellhip. Elmiyov sat quellhip elhquipcoc (ejápac), yoyam elvomsic maa — nic nat aptomjac José. Am nic nat elyeycajasac apquillhanma enlhitaoc apnaymacoc.#Gn 50.25; Jos 24.32.
20Apquilyinyovquic nic nat amyip Sucot, apquilyipjongvocmo yoclhilhma actamopeycaoc amyip Etam. 21Aplhalhma apquimja apmamyi ilhnic nat Dios Apyimtalhnamo. Naysicsa yipjopay ayimja ilhnic nat apnalaclho acnim anco. Naysicsa talha ayimja netin nic nat apnalaclho alhtaa. Actomja ilhnic nat talha ayimja netin ayitsasquiscama olhma. 22Am nic nat covonquepac mataa yipjopay ayimja. Am nic nat covonquepac mataa talha ayimja amamyi.#Ex 40.34-38; Nm 9.15-23.
Currently Selected:
ÉXODO 13: ENHL
Highlight
Share
Copy
Want to have your highlights saved across all your devices? Sign up or sign in
