ÉXODO 31
31
Apquilmaycam najan apquilnatanma santuario
(Ex 35.30; 36.1)
1Aptomjac nic nat Visqui ingac apcanya Moisés: 2—Quip ilanojo, apnec nipyesicsa apquilmolhama tribu Judá lhama enlhit silyacyescama coo, apvisay Bezaleel, Uri apquitca, najan Hur aptavin. 3Espíritu de Dios apnac apvalhoc, najan acyascamco apvalhoc, najan acyicpilquemo apvalhoc najan apvascapma as enlhit. 4Apvanquic ellana aptamjaycam actamila najan quilaycmasquiscama altamila apmaycam oro, najan plata, najan bronce. 5Apvanquic ellana mataymong alyinmom, najan quilaycmasquiscama yamit, najan moc aptamjaycam apquilnatanma. 6Ongvanic sat epasmoc Aholiab, Ahisamac apquitca apquinyema apquilmolhama tribu Dan. Oyangviscomjoc sat apquilyascamco as enlhit apquilmopvan, yoyam ellanac aclhamoclhojo asoc siyanama alhta: 7carpa aplhancoc apponquinomap, najan yamit aysicsic acyitnamaclha Dios appayvam najan maa ayapma atong, najan acyovoclhojo apquilmaycam, 8najan mesa acyiplomo apquilmaycam, najan candelabro de oro alapongmateyquiclha acyiplomo apquilmaycam, najan altar malvatnama asoc acmasis, 9najan altar malvatnama talha macmescama Dios holocaustos acyiplomo apquilmaycam, najan yingmin alhancoc acyiplomo avjac, 10najan apava apquilantalhnama sacerdote Aarón najan apquitquic apquiltimesaycam sacerdotes congne carpa apponquinomap. 11Najan ayingmenic acmasis ningatsisquiscama asoc, najan asoc acmasis colhic alvatna talha netin altar. Ellanac sat as enlhit apquilmopvan, acno siyanama alhta siclho, yoyam ellana — nic nat aptomjac.
Acnim ninnayclhilha
(Ex 35.1-3)
12Aptomjac nic nat Visqui ingac apcanya Moisés: 13—Iltimnas sat lhip israelitas coo sicpayvam: Apquilanyacpec eltamilquisic acnim ninnayclhilha. Cotnejic sat asoc monquinatquiscama nipyesicsa quellhip najan coo cotmongvoycamlha nelha. Elyasamcojoc sat mataa, coo sicvisay Visqui Dios silyacyescama quellhip. 14Acnim ninnayclhilha cotnejic sat acponquinomalhca nipyesicsa quellhip, yoyam elyiplovcasojo. Am sat ancoc etamilcasac enlhit as acnim ninnayclha, ematong sat. Enlhit aptamjaycam as acnim, etvasacpoc sat nipyesicsa apnaymacoc. 15Apvanquic mataa etnajam enlhit seis acnim, acnim acponquinomalhca nac séptimo acnim, acvisay acnim ninnayclhilha napato Dios. Aptamjam sat ancoc as acnim enlhit, ematong sat nipyesicsa apnaymacoc.#Ex 20.8-11; 23.12; 34.21; 35.2; Lv 23.3; Dt 5.12-14. 16Incaymalhquic israelitas elyiplovcasojo singanamaclha ongiltamilquisic as acnim ninnayclhilha. Acvisay actemaclha ningmiyovmalhca cotmongvoycamlha nelha. 17Acvisay asoc monquinatquiscama nipyesicsa enlhitaoc najan coo cotmongvoycamlha nelha — nic nat aptomjac Dios.
Dios Visqui ingac apquillanay nic nat netin najan nalhpop acvaycmo seis acnim. Aplovcasquic nic nat apyampay acvaycmo séptimo acnim.#Ex 20.11.
Quilaycmasquiscama vayqui inquinavo
(Dt 9.6-29)
18Appenasquic nic nat Dios appamejitquiscama Moisés netin inquilhe acvinatem. Aplhocac nic nat Moisés anit mataymong nicja actalhesamalhca. Dios Visqui ingac nic nat aptalhescama singanamaclha appayvam.
Currently Selected:
ÉXODO 31: ENHL
Highlight
Share
Copy
Want to have your highlights saved across all your devices? Sign up or sign in
