ÉXODO 7
7
1Aptomjac nic nat Dios Apyimtalhnamo apcanya Moisés: —Quip ingyeylhojo. Actimescasquic lhip apyimtalhnamo. Etnejic sat lhip malha Dios napato apvisqui faraón. Etnejic sat profeta aplingascama lhip apipma Aarón. 2Lhip sat eltimnacsic Aarón aclhamoclhojo actomjaclha sicpayvam. Apipma Aarón sat epamejitsic apvisqui faraón yoyam elyinyovsic enlhitaoc Israel yoclhilhma Egipto. 3Otnesquisic sat acmasom apvalhoc apvisqui faraón. Olhamasiclhac sat asoc monquinatquiscama yoclhilhma Egipto najan asoc simpilapquiscama.#Hch 7.36. 4Mengyeylhojoc sat apvisqui faraón quellhip apquilpayvam. Coo sat otnejic sicyimtalhnamo, malha sicpayescama emic yoclhilhma Egipto sat cotnejic. Oyinyovsic sat yoclhilhma Egipto enlhitaoc ajancaoc, enlhitaoc Israel, enlhitaoc appintalhnama. Coyiplovjoc sat sicyanmongsayclha apquiltemaclha apancaoc co Egipto. 5Elyasingvomoc sat sictomja Dios. Otnejic sat sicyimtalhnamo, malha sicpayescama emic yoclhilhma Egipto sat cotnejic. Olyinyovsic sat enlhitaoc Israel nipyesicsa co Egipto — nic nat aptomjac.
6Apquilyajaclhoc nic nat Moisés najan Aarón actemaclha apcanama Dios. 7Ochenta años nic nat apvocmoc Moisés. Ochenta y tres años nic nat apvocmoc Aarón apquilpamejitquiscama nic nat apvisqui faraón.
Aarón apsoycam yamit ayitcoc
8Aptomjac nic nat Dios Apyimtalhnamo apcanya Moisés: 9—Aptomjac sat ancoc ingyatingmojo apvisqui faraón: Itipquis asoc simpilapquiscama — sat etnejic ingyanic. Itne sat lhip ingyanic Aarón: Iyinyov sat yamit ayitcoc apquinmamcaclha apvisqui faraón. Cotniclhac sat acyeyva — nic nat aptomjac Dios.
10Apquilyoclhec nic nat Moisés najan Aarón apnaclha apvisqui faraón. Apquilyajaclhoc nic nat actemaclha apcanama Dios Apyimtalhnamo. Apyinyovquic nic nat Aarón yamit ayitcoc apquinmamcaclha apvisqui faraón najan apquilancam. Intomjaclhec nic nat acyeyva.
11Yejemoc nic nat apquilevamcaa apvisqui faraón apquilyascamco apquiltemaclha najan apquilyojolhma. Apnasoc nic nat apquiltemaclha apquilyojolhma ayinyema apquilyascamco apquiltemaclha. 12Apyinyovquic nic nat moclhama yamit apancaoc. Intomjaclhec nic nat mataa nimisma yamit ayitcoc. Inmasquec nic nat acvitaclho co Egipto yamit apancaoc actomjayclha acyeyva. Malha acnasipma ilhnic nat intomjac Aarón yamit ayitcoc pac. 13Am nic nat cotamilam apvalhoc apvisqui faraón. Am nic nat elyajaclhoc actemaclha apcanama Dios Apyimtalhnamo.
Acyanmongayclha apquiltemaclha ayinyema ema
14Aptomjac nic nat Dios Apyimtalhnamo apcanya Moisés: —Am cotamilam apvalhoc apvisqui faraón. Apmiyovquic nic nat elapajacsic enlhitaoc Israel. 15Emyaclhac sat secaseclha apvisqui faraón nicja vatsam. Ilamyilhaoc sat etjanyac sat lhip. Isov sat yamit ayitcoc actomjaclho alhta acyeyva. 16Itne sat ingyanic apvisqui faraón: Eyapajasquic alhta Dios Apyimtalhnamo, Apvisqui apancaoc hebreos. Aptomjac alhta seyanya ongvanic lhip: Ilapajas sat enlhit ajancaoc yoyam jelpayicsojo yoclhilhma actamopeycaoc. Quip, am elyajaclhoc mocjam lhip — sat itne ingyanic. 17Eycaso Dios appayvam: Eyicpilcangvomoc sat lhip sictomja Dios. Omoc sat yamit ayitcoc ajac. Oticpong sat yingmin vatsam. Ema sat cotniclhac yingmin.#Ap 8.8; 16.4. 18Colitsapoc sat quilasma aleyvam nayingmin. Cotjapoc sat vatsam. Eltanovac sat co Egipto elyinamcoc yingmin ayinyema vatsam — sat itne ingyanic.
19Aptomjac nic nat mocjam Dios: —Itne sat ingyanic Aarón: Ilic sat yamit ayitcoc. Iyasquis sat apmic tacjalhit yingmin yoclhilhma Egipto najan tacjalhit aclhamoclhojo vatsam najan tacjalhit vatsam actingaoc najan tacjalhit sangayc najan tacjalhit aclhamoclhojo acyitnamaclha yingmin. Cotniclhac sat ema acyovoclhojo Egipto. Acyovoclhojo yingmin alhanaoc cotniclhac sat ema — nic nat aptomjac Dios.
20Apquilyajaclhoc nic nat Moisés najan Aarón actemaclha apcanama Dios Apyimtalhnamo. Apticponquic nic nat yingmin yamit ayitcoc pac napatoc apvisqui faraón napatavo apquilancam. Intomjaclhec nic nat ema acyovoclhojo yingmin vatsam. 21Inquilitsepmec nic nat quilasma. Intajapquic nic nat yingmin. Am nic nat elyinamcoc co Egipto. Impayjeclhec nic nat ema acyovoclhojo yoclhilhma Egipto. 22Apnasoc nic nat apquiltemaclha apquilyojolhma ayinyema apquiltemaclha apquilyascamco. Am nic nat cotamilam apvalhoc apvisqui faraón. Am nic nat elyajaclhoc actemaclha apcanama Dios Apyimtalhnamo. 23Aptajaclhec nic nat apvisqui faraón. Am nic nat colhenac apvalhoc actemaclha asoc apvitay. 24Apquilmetmec nic nat yamilquit co Egipto nicja vatsam. Apquililtamjoc nic nat elyinamcoc. Am nic nat elyinamcoc yingmin as vatsam.
Acyanmongayclha apquiltemaclha ayinyema napnicting
25Siete acnim nic nat invocmoc natamin apticpaycam Dios Apyimtalhnamo as vatsam.
Currently Selected:
ÉXODO 7: ENHL
Highlight
Share
Copy
Want to have your highlights saved across all your devices? Sign up or sign in
