GÉNESIS 19
19
Aptovasomap tingma Sodoma najan tingma Gomorra
1Intalhnacmec nic nat apquilvocmo tingma Sodoma apcanit maycaa. Ángeles Dios apquilasinancama ilhnic nat maycaa. Apnec nic nat Lot atong apjalhtam tingma. Apcaneyclhec nic nat maa enlhitaoc. Pilapcasquic nic nat Lot apvita maycaa. Apquinmaclhec nic nat netin yoyam emoc tacja. Apquilpolintac nic nat nalhpop Lot. Apticlhiquic nic nat acpayjaclha napaat nalhpop.
2Aptomjac nic nat Lot apcanya maycaa: —Quellhip emoc. Noelyeycaja nasa tingma ajac. Alhtaa intomjac. Elnateyin sat tingma ajac. Coo sictomja silancam quellhip. Elcaoc sat yingmin apmancaoc. Secaseclha alhtoo sat elquimpiclha mocjam— nic nat aptomjac.
Apquilatingmavoc nic nat: —Am ongiltamjoc onlhic. Ongnam sat malamong tingma— nic nat apquiltomjac.
3Apquilinlhanacmec nic nat Lot. Apquilyajaclhoc nic nat maycaa. Apquilmec nic nat tacja Lot. Apquilanesquic nic nat aptoycaoc. Apquilanescasquic nic nat sepo yompac (motajap) mepqui apyipjescama. Aptovcamquic nic nat maycaa.
4Am nic nat enatenac mocjam. Pilapcasquic nic nat apquilvaa enlhitaoc. Aplicacpoc nic nat enlhitaoc as tingma Sodoma, aplhamoclhojo apquitcoc najan apquilvanyam. Apvocjingveclhoc nic nat enlhitaoc Lot tingma pac.
5Apquililpalhamam nic nat. Apquiltomjac nic nat apquilanya: —¿Jalhco apnamcaclha enlhit apquilvoy tingma pac? Ilantipquis sat siclho. Ningiltamjoc ongyitojoc lhama yoyam ongilpatjetamcoc maycaa— nic nat apquiltomjac.
6Aptipquic nic nat Lot. Apcapeclhec nic nat atong.
7Aptomjac nic nat Lot apquilanya enlhitaoc: —Quip elaylhojo enaymacoc. Noelyeyesacpojo nasa ilhma. 8Innam coo anit eyitquic quilvanaa ayitcoc. Am coltamecac mocjam acpatjetaycaoc enlhit. Olantipsic sat eyitquic. Eltime sat apquililtamjoclha eltimjic. Noelnatovas nasa as maycaa apquilvoy tingma ajac— nic nat aptomjac.
9Apquilyimnatesquic nic nat apquilpayvam enlhitaoc: —Ingyinyi, iyas maa. Jave nac lhip ningmolhama. Copvanquejec jingilanic nincoo. Coyangvomoc sat nigilticpaycam apyimpejic lhip. Casilhtojoc sat ningilticpaycam maycaa— nic nat apquiltomjac.
Yejemoc nic nat apquilticponga apyimpejic Lot. Apquillanac nic nat atong yoyam elintacsic. 10Apquilyoctac nic nat maycaa atong. Apquilyinyovasquiclhec nic nat Lot aptalhneseclho congne tingma. Apquilapeclhec nic nat mocjam atong. 11Pilapcasquic nic nat aptomja mepqui apataoc enlhitaoc apcanaycam atong. Insovjoc nic nat actomjaycaoc mepqui apataoc aplhamoclhojo apquitcoc najan apquilvanyam. Inmasquec nic nat apquilyimnaa apquilquitamsama atong.
12Apquiltomjac alhta maycaa apquilanya Lot: —¿Apnam ya apmolhama as tingma? Inalovsingvoclha sat apmolhama apquiltomja apquitquic apquilinava najan quilvanaa najan apipjaymayc najan poc aptomja apmolhama. Inalaclha sat mocjay. 13Pac otvacsic as tingma. Ayinyemaclha avanjec amyaa apquiltemaclha enlhitaoc as tingma napato Dios. Eycaso ayinyema singilapajasa Dios ontovacsic as tingma— nic nat apquiltomjac.
14Yejemoc nic nat apmiyaclho Lot apnamcaclha quilyimnanic alponcanma apquitquic. Am nic nat covocmoc alyimjapmaclha.
Aptomjac nic nat Lot apquilanya: —Noc, onginyejic sat as tingma. Etvacsic sat Dios apyovoclhojo tingma— nic nat aptomjac.
Apquilyascacmec nic nat quilyimnanic. Am nic nat elilyajaclhoc. 15Inmopacmec nic nat congne amamyi ayitsay.
Apquiltomjac nic nat maycaa apquilanya Lot: —¡Ipecjesam! Ingyinyajas sat aptava najan anit apquitquic, yoyam conatovasalhquejec sat lhama as tingma naysicsa ningyanmongsayclha apquiltemaclha apancaoc enlhitaoc— nic nat aptomjac.
16Am nic nat appecjesam Lot. Yejemoc nic nat apquilma apmic apquilinyajasa Lot. Ayinyemaclha apquiltamjoc nic nat evomsic tap Dios. Apquilmec nic nat amic yoyam elvomsic tap Lot aptava najan apquitquic. Apquilyinyajasquic nic nat aptava najan apquitquic tap tingma.#2 P 2.7.
17Apquilvoclhec nic nat tap tingma. Aptomjac nic nat ángel Dios apcasinancama apcanya Lot: —¡Ingyinyi, ivomsap tap! Nopaycacpojo nasa niptamin. Notningvom nasa naysicsa apquinyem amay. Ivomjo sat netin inquilhe alvinatem yoyam evomsacpoc tap— nic nat aptomjac.
18Apcatingmavoc nic nat Lot: —Visqui, movanqueje coo. 19Aptasic alhta lhip. Emyovquic alhta mataa lhip. Evomcasquic alhta tap. Movanquejec coo oyacsic ongvinyejic netin inquilhe alvinatem. Jetjanyiclhac sat asoc yoyam jetvacsic. Ongvitsapoc sat nalhit amay. 20Quip ilanojo tingma apyitna ningato. Am eyov'ac as tingma. Pac oyacsic ongvinyejic maa yoyam omoc tap. ¿Naso ya meyoy as tingma?— nic nat aptomjac.
21Aptomjac nic nat maycaa apquinyajascama: —Aclingac lhac lhip appayvam. Motvacsejec sat as tingma aplhena lhcac. 22¡Noc maa! Ivomjo sat maa, evomoc sat tap. Movanquejec otvacsic mocjam tingma, mevocmo inlhojo lhip apyasaclha— nic nat aptomjac apcanya.
Eycaso ayinyema actimem apvisay as tingma Zoar, ningiltimem nincoo Meyoy.
23Intipquic nic nat acnim apvocmo Lot tingma Zoar. 24Yejemoc nic nat acpalentamo talha najan azufre acpayesayclha talha nipyesicsa tingma Sodoma najan Gomorra. Malha acmamay nic nat intomjac acpalentamo talha, ayinyema Dios apna netin. 25Insovjoc nic nat talha aclhamoclhojo asoc#Mt 10.15; 11.23-24; Lc 10.12; 17.29; 2 P 2.6; Jud 7. najan enlhitaoc apnaycam as tingma. Insovjoc nic nat talha asoc ayimja amyip. 26Inpaycalhcoc nic nat Lot#Lc 17.32. aptava natamin. Am nic nat colhnanacmoc actomjaclha. Malha mataymong ayimja ilhnic nat intomjac.
27Secaseclha ilhnic nat intomjac aplhinga Abraham appamejitquiscamaclha alhta Dios. 28Apquilyajavoc nic nat tingma Sodoma najan Gomorra najan yoclhilhma maa. Apvitac nic nat actepa etin acyivey. Malha paat apaoc acmeyasma nic nat intomjac etin. 29Eycaso ilhnic nat aptomjaclha Dios aptovascama tingma apvanyam najan yoclhilhma aptiyascamcaclha Lot. Inlhanvocmec nic nat apvalhoc Dios actemaclha aplhanma napatoc Abraham. Apquinyajasquic nic nat Lot yoyam emmoc tap yicpintama aptovascama Dios as tingma.
Enlhitaoc moabitas najan amonitas
30Apcacac nic nat elhic mocjam Lot tingma Zoar. Apyasquic nic nat inquilhe alvinatem yoyam elhic maa. Apnalaclhec nic nat anit apquitquic. Apnaclhec nic nat Lot najan apquitquic avalhoc mataymong.
31Inquilpamejitsalhquic nic nat Lot apquitquic. Intomjac nic nat cotnaja ayitcoc ayanya inyalhing: —Apvanacmec tata ingac. Paj quilyimnanic as yoclhilhma yoyam jingilyimjapamcoc actemaclha mataa singilyimjapma. 32Pac ongmecsic sat anmin tata ingac yoyam eynic. Incajac sat ancoc anmin, ongilpatjetamcoc sat tata ingac. Ongvitac sat inquitquic, tata aptovana— nic nat intomjac.
33Alhtaa ilhnic nat intomjac. Inquilmasquic nic nat anmin yoyam eynic inyap. Incajac nic nat anmin. Inpatjetamquic nic nat inyap cotnaja ayitcoc. Am nic nat eyasamcoc inyap acyitnocjayo lhama, am nic nat eyasamcoc actemaclha aclhaticjay apquitca. 34Moc acnim nic nat intomjac.
Intomjac nic nat cotnaja ayitcoc ayanya inyalhing: —Caylhojo lhiya. Acpatjetamquic alhtaa lhcac tata ingac. Pac ongmecsic mocjam anmin alhtaa nac jay. Copatjetamcoc sat lhiya tata ingac. Ongvitac sat inquitquic, tata ingac aptovana— nic nat intomjac.
35Altaa ilhnic nat intomjac. Inquilmasquic nic nat mocjam anmin yoyam eynic inyap. Incajac nic nat anmin. Inpatjetamquic nic nat inyap apquitca insilhyo. Am nic nat eyasamcoc inyap acyitnocjayo lhama, am nic nat eyasamcoc actemaclha aclhaticjay apquitca. 36Inlovsoc nic nat intomjamcoc anit quilvanaa ayinyema inyap. 37Intimcasquic nic nat ayitca quilvana cotnaja ayitcoc. Inquiltimec nic nat apvisay Moab. Apvitac nic nat Moab aplhamoclhojo aptovana. Apquiltimec nic nat apquilvisay moabitas acvocmo quilhvo nac jay. 38Invitac nic nat ayitca Lot apquitca insilhyo. Inquiltimec nic nat apvisay Ben-ammi. Apvitac nic nat Ben-ammi aplhamoclhojo aptovana. Apquiltimec nic nat apquilvisay amonitas acvocmo quilhvo nac jay.
Currently Selected:
GÉNESIS 19: ENHL
Highlight
Share
Copy
Want to have your highlights saved across all your devices? Sign up or sign in
