GÉNESIS 23
23
Ayitsepma Sara
1Invocmec nic nat 127 años actiyascam Sara. 2Inquitsepquic nic nat tingma Quiriat-arba, moc apvisay tingma Hebrón yoclhilhma Canaán. Apvinec nic nat Abraham ayitsepa aptava Sara. Inyitnocjavoc nic apvalhoc Abraham. 3Apyinyovquic nic nat acyitnaclha ayitsepma. Apmiyaclhec nic nat yoyam epamejitsic enlhitaoc hititas.
Aptomjac nic nat Abraham apquilanya: 4—Cotnaja sicmolhama inyicje quellhip. Altamjoc oyanmongsic lhopactic ayitcoc yoyam ongvatoynic ayitsepma— nic nat aptomjac.#He 11.9,13.,#Hch 7.16.
5Apquilatingmavoc nic nat enlhitaoc hititas: 6—Visqui Abraham, quip ingyeylhojo. Lhip aptomja Dios apyacyescama. Apvanquic lhip ingyatoynic ayitsepma actamila anco amyip. Comyovalhquejec sat mataa acyitnaclha tacjalhop.
7Apquinmaclhec nic nat netin Abraham. Apjalhingvocmec nic nat napatavo enlhitaoc hititas.
8Aptomjac nic nat apquilanya: —Naso, apquililtamjoc quellhip ongvatoynic ayitsepma. Altamjoc coo eltimnacsic siclho quellhip enlhit apvisay Efrón, Zohar apquitca. 9Altamjoc oyanmongsic malhic amyip Macpela, nicja yoclhilhma. Oyanmongsic sat solyayem acvamlha acyanmongam malhic. Cotnejic sat coo ajancoc as tacjalhop.
10Apnec nic nat Efrón nipyesicsa enlhitaoc maa. Apcatingmavoc nic nat Efrón napatavo apnaymacoc najan napatavo enlhitaoc apquilyeycajangvoy apquilyascama tingma apvanyam.
Aptomjac nic nat apcatingmavo: 11—Visqui Abraham, motingyeje coo acyanmongam. Pac omquecsic mepqui acyanmongam malhic najan amyip ajac. Apquillingac lhac siclhanma enaymacoc actomja sicmescama mepqui acyanmongam. Ingyatoyin sat aptava ayitsepma— nic nat aptomjac.
12Apjalhingvocmec nic nat mocjam Abraham napatavo enlhitaoc.
13Aptomjac nic nat Abraham apcanya Efrón napatavo enlhitaoc: —Quip ingyeylhojo siclho. Nongyapajas nasa sicmescama acyanmongam. Pac ongvatoynic sat ayitsepma— nic nat aptomjac.
14Apcatingmavoc nic nat Efrón: 15—Quip ingyeylhojo, visqui Abraham. Invocmec acyanmongam amyip ajac, 400 solyayem plata asoc alyinmom. ¿Inquitsi ya acyanmongam? Ingyatoyin sat aptava ayitsepma— nic nat aptomjac.
16Aplingac nic nat Abraham acvamlha acyanmongam aplhanma Efrón napatavo apnaymacoc. Apmasquic nic nat acyanmongam solyayem anco. 17Apmec nic nat Abraham amyip apác Efrón acvisay Macpela, tap amyip apác apvisay Mamre, nicja actiyapmaclha acnim. Yitnec nic nat as amyip malhic najan ayimjaclha yamit. 18Amyip apancoc nic nat aptomjac Abraham. Apquillingac nic nat aplhamoclhojo enlhitaoc hititas najan apquilyeycajangvoy apquilyascama tingma apvanyam.
19Apcatonquic nic nat Abraham aptava ayitsepma acvisay Sara. Inyitnec nic nat tacjalhop amyip acvisay Macpela, tap amyip apác enlhit apvisay Mamre, nicja actiyapmaclha acnim. Moc apvisay nic nat tingma Hebrón yoclhilhma Canaán. 20Amyip apancoc nic nat aptomjac Abraham najan malhic apquilyamasma enlhitaoc hititas, apcatoynaclha aptava ayitsepma.
Currently Selected:
GÉNESIS 23: ENHL
Highlight
Share
Copy
Want to have your highlights saved across all your devices? Sign up or sign in
