GÉNESIS 45
45
Apquilyicpilcangviyam apquilpipma
1Camjapasquic nic nat apvalhoc José nipyesicsa aplhamoclhojo apquilancam.
Apyimnatasquic nic nat appayvam apquilanya apquilancam: —Elanteyip aplhamoclhojo— nic nat aptomjac.
Apquilantipquic nic nat. Am nic nat elhnac lhama apquilancam. Inmasquec nic nat apyilhacpo José napatavo apquilpipma.#Hch 7.13. 2Avanjec nic nat apvinama José. Apquillingac nic nat aplhamoclhojo apquilancam egipcios. Inlingangvocmec nic nat amyaa apvisqui faraón tingma pac.
3Aptomjac alhta José apquilanya apquilpipma: —Coo nac sicvisay José. ¿Apmeyje ya mocjam tata coo?— nic nat aptomjac.
—Apquilvanmamquic nic nat apquilpipma. Pilapcasquic nic nat apquillinga aplhanma.
4Aptomjac nic nat José apquilanya: —Elmiyama jilip— nic nat aptomjac.
Apquilyacmec nic nat. Aptomjac nic nat mocjam: —Coo nac sicvisay José, elyipmaa nac quellhip, selyamasma alhta selapajasa yoclhilhma Egipto. 5Noncoltamjam nasa apquilvalhoc, noelnatjojo nasa apquiltomjaclha alhta selyamasma. Dios aptomja alhta seyapajascama emamyi as yoclhilhma yoyam olvomsic tap quellhip. 6Anit años intomjac quilhvo mayic lhalhma anco. 5 años mocjam cotnejic mayic. Mepqui ninginayclha actic sat cotnejic najan mepqui acnaclhamalhquilha acyilhna. 7Dios aptomja alhta seyapajascama emamyi. Apquiltamjoc Dios elvitac quellhip aptovana, yoyam elmiyovacpoc quellhip ayinyema ningilvomsomalhca tap. 8Jave quellhip selapajascama as yoclhilhma, Dios eyca aptomja seyapajascama. Etnescasquic alhta yatapvisqui apnaclha apvisqui faraón. Etnescasquic alhta siyimja emamyi tingma pac. Etnescasquic alhta yoyam otnejic siyanem mataa yoclhilhma Egipto. 9Eltajiclha sat quilhvo. Eliltimnas sat coo tata: Aptomjac lhac appayvam José, lhip apquitca: Dios aptomja setnesquiscama apvisqui yoclhilhma Egipto. Ipecjicsojo sat etyaningvojo. 10Elhic sat lhip yoclhilhma Gosén, najan aplhamoclhojo apquitquic najan aptovana najan apnatoscama najan apquilnatam. Ningatoc sat cotnejic coo lha tingma ajac. 11Olmesic sat aptoycaoc aplhamoclhojo apmolhama najan apquillhalhmaa. Coymalhquejec sat lhama asoc. Ayinyemaclha cotnejic sat mocjam mayic acvocmo 5 años — eltime sat elanic.#Hch 7.14 12Quellhip najan eyalhing Benjamín apquiltomja apquillingaycamco coo sicpayvam. 13Eliltimnas sat tata actomjac sicyimtalhnamo yoclhilhma Egipto. Eliltimnas sat aclhamoclhojo asoc actemaclha apquilvitay. Elpecjicsojo elyantementa coo tata— nic nat aptomjac.
14Appatjetquic nic nat José apyalhing Benjamín. Apvinec nic nat José. Apvinec nic nat najan Benjamín. 15Apsovjoc nic nat José appitsisma apmalhimpenic apquilpipma. Inyiplovcoc nic nat mataa apvinama. Natamin nic nat apquilpamejitsacpo apquilpipma.
16Aplingac nic nat amyaa apvisqui faraón. Apquilvaac lhac José apquilpipma— nic nat intomjac amyaa. Inpayjeclhec nic nat apvalhoc apvisqui faraón najan aplhamoclhojo yatapquilviscaa.
17Aptomjac nic nat apvisqui faraón apcanya José: —Iltimnas sat apquilpipma: Elpatimcasiclha apnatoscama yamelyeyjaycoc. Eltajiclha sat apquilaoclha Canaán. 18Elyantavoclha sat apquilyap najan apquilmolhama elmiyantac sat aso. Omquecsic sat nicja actamila anco yoclhilhma Egipto. Eltovamcoc sat actamila anco aptoycaoc. 19Ilane sat elyantemiclha carro alyivey. Colquinamtic sat quilvanaa najan apquitquic najan apquilyap quellhip. Elmiyantac sat aso. 20Noncolhen nasa apquilvalhoc apquilnatam yoyam elyinyoc maa. Ellhovac sat quellhip cotlaycaoc asoc altamila as yoclhilhma Egipto— nic nat aptomjac apvisqui faraón apcanya José.
21Apquilyajaclhoc nic nat apquilpipma, moc apquilvisay Israel apquitquic. Apquilmasquic nic nat carro José najan aptoycaoc nalhit amay, actemaclha apcanama apvisqui faraón. 22Apquillhocac nic nat apava apjalhnancoc yoyam elyanmoncasiclhac mataa poc aptalhnayclha. Aplhocac nic nat Benjamín 300 solyayem alyivey najan 5 apquilantalhnama. 23Apquilapajascasquic nic nat apyap José apquilmescama 10 yamelyeyjaycoc. Apquilpatimcasquic nic nat asoc altamila anco ayinyema Egipto. Mocjam nic nat 10 yamelyeyjaycoc alpatam motajap apactic. Apquilpatimcasquic nic nat pan najan moc nintom, yoyam etoc sat apyap nalhit amay aplhingacmo sat.
24Apquilapajascasquic nic nat apquilpipma José yoyam eltajiclha. Aptomjac nic nat apquilanya: —Noelnapap nasa nalhit amay— nic nat aptomjac.
25Apquiltajavoc nic nat apquilpipma. Apquilvoclhec nic nat yoclhilhma Canaán, apquilyap tingma pac, (moc apvisay Israel). 26Apquililtimnasquic nic nat amyaa apquilyap aptomja apjalhnancoc José. Najan aptomja apvisqui yoclhilhma Egipto. Inyimnaclhec nic nat apvalhoc apquilyap. Apyascacmec nic nat apquillhanma. 27Apquiltimnasam nic nat actemaclha appayvam José. Apvitac nic nat apquilyap aclhamoclhojo carro. José ilhnic nat apcapajascama yoyam ingyinamtic. Intamilaclhec nic nat apvalhoc apquilyap.
28Aptomjac nic nat apquilanya: —Vamlha. Paj oyascacmoc coo aptomja mocjam apjalhnancoc sictamongvoyam José. Olyintamalhcac sat otyaningvomjo amamyi siyitsepma— nic nat aptomjac.
Currently Selected:
GÉNESIS 45: ENHL
Highlight
Share
Copy
Want to have your highlights saved across all your devices? Sign up or sign in
