Luk 21

Kin karpikg ur uk kweiur kweiur kai Maur Wailen

1Ak wang ketn ripa Jisas kil atn yipmingki wonen a wan yalming a Maur Wailen pa atn ari tu melnum a ntie kweiur kweiur wailet pa tu ye kweiur kweiur pa kai alupm kinar yo tmpal ekg uk kai Maur Wailen. 2Yatom kil ari kin karpikg yek ur a arpm warkip pa kai uk marpm watet ek wekg pa. 3Yatom wa kil la tolpa, “Kupm la nasepm la tolpa, kin karpikg yek a arpm warkip kil, pa kil uk wailmanten paitn hangken tu wrongwailet. 4Tol tu wrongwailet a ntie kweiur kweiur pa tu uk pake, ake tu uk kweiur kweiur alntuen a ha pa plaln, kweiur kweiur wailet tiur alntuen pa ha. Pake kin karpikg yek a arpm warkip pa kil uk plaln tolti kuina waitketn ur alkilen pa.”

Jisas kil la wan yalming a Maur Wailen pa hi wa kai paitn

5Yatom tu tiur pa, tu ark la kiti wan yalming a Maur Wailen pa la tolpa wan pa ari wor wrijen, tu le ak weij a ariworwor, wa tu nakure ak kweiur kweiur worwor a tu uk kai Maur Wailen pa. Ari Jisas la nasen la tolpa, 6“Kweiur kweiur wrongwailet a kipm ari ti pa, wang ur hi wa paln pa, hi ake weij ur a tu ak le wan ti pa ur ak alile tita atn wrik alntuen pa, kalpm, hi tu tikale piln plaln.”

Kalkut wailet hi wa paln

7Yatom tu wrong kinkpman ropon Jisas pa la tolpa, “Melnum a Uk Arie, kweiur kweiur pa hi paln ak wangkarke? Aki, hi kuina ur paln ekg ak plan wang ripa yampingken ekg al paln pake?” 8Ari wa Jisas la nasen la tolpa, “Tolpa ti kipm irk ri, tu melnum akplain hi kul akepmplain ekg lokepm ye kai pa kai pa. Ekg nte, tu wailet hi kul ak nang a kupm pa la tolpa, ‘Apm kupm melnum a kipm nungkwangen apm tike!’ Wa la tolpa ‘Wang a kipm la pa, apm yampingken ekg al paln tike!’ Pake ampur kipm kai katnun tu pa, yaper. 9Tol kipm atning tolpa wrong hripon aki, tu melnum paln wrongken paitn pa, ampur kipm kark, pa kweiur kweiur tolpa hi apm paln pake, pake wang humpuen pa ha pa.”

10Yatom wa kil wa la tolpa, “Ha knokg wail ur hi wa hripon nti ha knokg wail ur, wa wrong a melnum tukgunakgen ur hi wa hripon nti wrong a melnum tukgunakgen ur. 11Ti yelm wailwail tiur hi wa no, a wang nikg a numpet wailwail tiur hi paln hor ha tiur, hi wa kipm ari kweiur kweiur tiur a paln kaino ktnong ti, wa kweiur kweiur paitnpaitn tiur a hi ak ntekg kipm ekg kipm kark pa, hi paln.

12Pake, hep pa, hi tu arkulepm om yipowepm a ntekgepm paitn, wa hi tu wiyepm ye kai atn yangkipm kahor wan tiur a atning yangkipm a Maur Wailen atne pa, om wiyepm ye kahor arpm wan tipmning. Wa hi tu wiyepm ye kai atn ikg a tu melnum tukgunakgen a tu melnum wailwail ekg nte, kipm ukpma kupm. 13Ak wang ripa, hi wa wang wor akipm ekg laron kipm alkipm pa tolpa kipm ukpma kupm. 14Ti kipm lupm yangkipm a kupm la nasepm kil: ampur kipm akwonalmpen wailet tolpa hi wa kipm la yangkipm tolhai ak wang a kipm atn yangkipm pa. 15Ekg nte, kupm hi wa ukwepm ekla nikgwalpm arie worwor ak wang ripa. Tu wrongmnto akipm pa hi ake ntie ekg talpulntepm ek aki lok arkuepm pa.

16Ti kipm hi wa tu manjan, a tu wailwail wasokwasok, a tu walmpopmwrij, a tu melnum wokgen alkipmen pa wiyepm ye kai atn yangkipm, wa tiur alkipmen pa hi wa tu erepm mo. 17Tu wrongwailet hi wa ukwepm ipma paitn, ekg nte wa kipm ukpma kupm. 18Pake tol tukgunakg walkg wrij ur alkipmen pa, hi ake nur. 19Ti kipm itn titnongket, pa hi wa kipm arpm wor aklei wang.”

Jisas kil la Jerusalem hi wa kai paitn

20Om Jisas kil wa la tolpa, “Ti tol kipm ari tu wrongmnto pa kul kapringen Jerusalem pa, pa kipm ari tolpa, Jerusalem yampingken ekg al kai paitn pake. 21Wang pa paln pa, kipm melnum a Jutia ti pa, kipm kirk kaino ham kaino tipmning ai om, wa kipm a arpm Jerusalem kil pa, kipm wreitn kirk tukulein, wa kipm a ark hor yampingken ha wail ti pa, ampur kipm kahor kil, kipm kirk hor pa kai om! 22Ekg nte, pa wang paitn wrijen a Maur Wailen hi wa akalmpe paitnpaitn a tu wrong kinkpman ntekg pa kai tolpa komkiti tukol yangkipm wrongwailet a ro hel kai wurkapm a Maur Wailen ti. 23Ti rein ekg tu kin a itna, wa tu mantin a warim ark ma pa ak wang pa! Hi ak wang pa kalkut wail hi wa paln atn knokg ti, wa ipma wakget a Maur Wailen atn ekg al hi wa ntekg paitn ekg tu wrong kinkpman a Juta. 24Tu tiur a ark Jerusalem ti pa, pa hi wa tu a ake Juta pa kul ak painat almpen mo, wa hi wa tu wiyen plaln ye kai hrak hor pa hor pa ekg akwap horhanekg a tu atn knokg wrongwailet. Wa tu a ake Juta ti wi wrik pa ark ikghlen Jerusalem ti ak wakrong alntuen, tolpa kaingkai ngko wang ur a Maur Wailen la tolpa tu ikghlen kaingkai elnten pake.”

Warim Kpman a Melnum hi wa nar

25Wa Jisas kil wa la tolpa, “Ak wang pa, hi wa kipm ari kweiur kweiur a paln kaino ktnong pa kai takgni ti, kainil, wa kungkumeim pa. Wa atn knokg ha ti pa, tu wrongwailet hi wa atning lko a hunokg wail a kat tupor harharen kul pa. Tu hi wa kark paitn kwarkwar tolti. 26Ti tu wrong kinkpman hi wa kark paitn, nikgwalpm kaino hroij wa hi wa ark nungkwangen kweiur kweiur hi wa paln atn hor knokg ti. Wa kweiur kweiur titnongket titnongket a atn kaino ktnong pa, hi wa tutut tutut winwin ekg al narku. Kweiur kweiur tolpa paln pa, 27pa hi wa tu ari Warim Kpman a Melnum pa hi wa weipmunu ak wi ye nar namponen titnongket a klalen wailmanten. 28Ti tol yampingken ekg kweiur kweiur pa ekg al paln pake, pa kipm wreitn kit ikg pa kaino kwa pa irpm utopen nungkwangen, ekg wang a Maur Wailen ekg al akwiyepm pa, apm yampingken tike.”

Yo fik pa ak la wang

29Yatom Jisas la nasen yangkipm kla ur pa la tolpa, “Ti kipm ikwonilmpen yo fik pa, wa yo wrongwailet manet ai yat. 30Wang a kipm ari hipm wulkga horen pa, kipm ari tolpa, wang yampingken ekg al takgni wor pake. 31Ti apm wa tolpa yat pake, wang a kipm ari kweiur kweiur tolpa akal paln pa, kipm ari tolpa, wang yampingken ekg al Kingdom a Maur Wailen paln pake.

32Kupm la nasepm aklahle wrijen la tolpa, kipm wrong kinkpman a ark ak wang ti pa kipm hi ake mo, kipm tiur hi wa ark, kaingkai kipm ari kweiur kweiur ripa a paln pa. 33Ti ktnong a knokg pa hi wa kai plaln, pake yangkipm alkupmen pa, hi ake kai plaln, hi apm ha tolpa kai pake.”

Kipm irpm ri

34Wa Jisas kil wa la tolpa, “Ti kipm irpm wonirpme! Ampur kipm nikgwalpm ark ekg ekpma, wa al hu hmit kweiur kweiur pa, aki ampur kipm nikgwalpm ark ekg kweiur kweiur a numpalk pa atn knokg ti. Kipm irpm wonirpme, ekg wang pa hi wa palntepm tukol hik a le hep elntatn, 35ti kipm hi wa wonmit kai om ngkowe tolti. Wang pa hi wa paln ekg tu kinkpman wrongwailet atn hor ha knokg ti. 36Ti kipm irpm wonirpme om wa ropon Maur Wailen ti aklei wang, ekg al kil ukwepm titnongket, ekg kipm hi wa ntie ngkom nlokgen kweiur kweiur a hi akal palntepm pa, wa ekg kipm hi wa ntie atn kai ikg a Warim Kpman a Melnum pa.” 37Aklei wang pa, Jisas kil apm ro tukgunakg lngkep a tu wrong kinkpman pa atn kahor yipmingki wonen a wan yalming a Maur Wailen pake. Wa aklei nungkutikg mning wrij wrij pa, kil kai kaino hokg kaino tipmning Olip, 38yatom kil nar ak kang mningket wrij wrij pa. Tu kinkpman wrongwailet pa tu kul ark atning yangkipm a kil piln pa, atn kahor yipmingki wonen a wan yalming a Maur Wailen pa.

Currently Selected:

Luk 21: uriK

Highlight

Copy