Zɛnɛse 15
15
Gbanaŋ-wooi Ɣâla è gɛ̀ Eberaŋ yêei
1Mɛni-ŋai ŋí kélee pôlu ma, Yâwɛɛ è lòno Eberaŋ pɔ́ zĩ̂a su ǹyɛɛ mai, “Eberaŋ, ífe yào. Ŋa pâi ímaa kɔ̃ɔ̂i. Ífela-fei a pâi kɛ̂i a gɛ́tɛ.”
2Kɛ́lɛ Eberaŋ è mò ma ǹyɛɛi, “Óo Yâwɛɛ Ɣâla, lé ƃé ƃa pâi dɛ̂ɛi ḿbɔ, kpɛ́ni fêi, fé pâi lóŋ maa sɔlɔ ƃôi? Ǹúui ŋ́gɔ̃liŋ a pâi lɛɛ̂i ǹyêei ǹyaa ƃa Iliezɛ nyii kùla Dɛmɛikai?” 3Eberaŋ è mò ma ŋɔ́nɔ ǹyɛɛi, “Gáa, ífe lóŋ tɛ̀ɛ ní ḿbɔ. Ǹúɛi gáa ŋápɛrɛi mui, ǹyaa ƃé pâi lɛɛ̂i ŋ́gɔ̃liŋ mɛi.”
4Nya ƃe Yâwɛɛ è lòno bɔ́ ǹyɛɛ mai, “Nalôŋ ŋí fé pâi lɛɛ̂i íkɔ̃liŋ mɛi. Íkpîŋ lóŋ ƃé pâi lɛɛ̂i íkɔ̃liŋ mɛi.” 5Nya ƃe Ɣâla è kùla la ŋ̀énii ŋá ǹyɛɛ mai, “Ŋ̀élei su káa à kɛ̀ ƃà pɔ̂ri Bɛmɛlɛŋ-káo-ŋai lônoi, í dílono. Bere ƃé ísuui a pâi tâmai la.”
6Nya ƃe è làa a Yâwɛɛ. Ǹyaŋ Yâwɛɛ è ŋɔlaa-lai sìɣe a tɔ̃yâ-laa.
7Nya ƃe è mò ma ǹyɛɛi, “Ńyãa ƃa Yâwɛɛ nyii íkùla Babelɔŋ-ŋai dítaai su da kɛ̂ ma Ɔ̂ɔi, ŋá pá a yá a gɛɛ ŋá ǹɔii ŋí tɛ́ɛ ípɔ a ípɔɔ.”
8Kɛ́lɛ Eberaŋ è mò ma ǹyɛɛi, “Óo Yâwɛɛ Ɣâla, ŋa pâi gɔ́lɔŋ-pere kɛ̂i léŋ a gɛɛ ǹɔii a pâi kɛ̂i a ḿbɔɔ?”
9Yâwɛɛ è mò ma ǹyɛɛi, “Pá mî a kóraŋ saaƃa niŋa loŋ, da kóraŋ saaƃa ƃoli saa, da kóraŋ saaƃa ƃála-sirɛ da tòloŋ tɔnɔ é pɛ́lɛ popôo loŋ ma.” 10Nya ƃe è pà a dîa bɔ́ é dípaa é dísu tée a gbua feerɛ-feerɛ, é gbua láa tɛi-tɛi gîe-ni téniŋ ma, kɛ́lɛ vé ŋɔni-ŋai su tée ní. 11Tãi ŋɔni-ŋai dí pà la a gɛɛ dí zua poma-ŋai lúu kpélei, Eberaŋ è díkpɛ̀.
12Tãi vólo-kaoi è kɛ̀ kpɛɛ̂i la ɣele mai, Eberaŋ è pìli nyii su kôyaa su. Ǹyaŋ kpíni kɛ́tɛ è tòo ma. 13Nya ƃe Yâwɛɛ è mò Eberaŋ ma ǹyɛɛi, “Dɔ̃yâi ŋí kɔ́lɔŋ a gɛɛ ísuui su-ƃela da pâi kɛ̂i a ŋɔ̃ya-ŋa lɔii da su nyii vé a dípɔɔi. Da pâi kɛ̂i naa a luɛ-ŋa. Da pâi dímɔ̃lɛi naa kóraŋ ŋuŋ náaŋ (400) yée mu. 14Kɛ́lɛ ǹɔii-ŋuŋ da pâi tíi kɛ̂i mîi, ŋa pâi ŋɔmɛnii ŋá teêi. Nyíŋi pôlu ma, da pâi kulâi naa a tɔɔ-laa su kɛ́tɛ. 15A kɛ̀ a yá, ƃa pâi liî ínâŋ-ni pɔ́ lii-see su. Ƃa pâi pɔlɔ̂i a ŋánaa í lɛ́ɛ saâi. 16Ílônii díwɔ̂ lonii lônii díɣeniɛi su, da pâi pâi pôlu ƃɛ́, kpɛ́ni fêi, Amɔra-ŋai díŋwana-lɔɔi fé niî kpɛɛ ní.”
17Tãi vólo-kaoi è tòo la gbínii é pɛlɛ̂i, ŋɔŋ-luru da ŋɔŋ-soŋ dí tɛ̀ɛ zua kpua-ŋai ŋí loai. 18Maa ɣelei tí Yâwɛɛ è góno tèe Eberaŋ yêei ǹyɛɛ mai, “Ŋa ǹɔii ŋí tɛ́ɛ ísuui pɔ́ é kúla Ize lɔii kóyaŋ ma é seri Yufeletii Ya-leei mâ nyii gáa a 19Kɛŋ lɔii, Kɛŋ-ŋai, Kamoni-ŋai, 20Ita-ŋai, Pɛriza-ŋai, Lefaiŋ-ŋai, 21Amɔra-ŋai, Kɛŋ-ŋai, Gɛgasi-ŋai da Zɛbusi-ŋai dílɔii.”
Currently Selected:
Zɛnɛse 15: KWB
Highlight
Share
Copy
Want to have your highlights saved across all your devices? Sign up or sign in
