Zɛnɛse 5
5
Adaŋ ŋɔsuui
(Kɔlɔnikɔ Maa-ŋuŋ 1:1-4)
1Adaŋ ŋɔsuui maa kɔlɔi ká ŋí. (Tãi Ɣâla è núu-kpune kpɛ̀tɛ lai, è gbɛ̀tɛ a gbîŋ ƃóloŋ-maa. 2È surɔ̂ŋ kpɛ̀tɛ da nɛnî, é lûwa láa dîa é dílaa sée a “Núu kpune.”) 3Tãi Adaŋ è kɛ̀ la ɣele ma a kóraŋ ŋuŋ tɔnɔ pôlu buu saaƃa (130) è lóŋ-surɔ̂ŋ maa sɔlɔ ƃô moloŋɔɔ ma. È ǹáa sèe a Sɛ̂. 4Nyíŋi pôlu ma Adaŋ è kɛ̀ ɣele ma a kóraŋ ŋuŋ lɔ́ɔlu mɛi saaƃai (800). È lóŋ-sinaa da nɛyâa maa sɔlɔ ƃô máŋ é lɛ́ɛ saâi. 5Góraŋ kélee Adaŋ è gɛ̀ ɣele mai, è kɛ̀ a kóraŋ ŋuŋ lɔ́ɔlu mɛi náaŋ pôlu buu saaƃa (930) é lɛ́ɛ saâi.
6Tãi Sɛ̂ è kóraŋ ŋuŋ tɔnɔ káo lɔ́ɔlu (105) kɛ̀ la ɣele mai, è Inɔsi maa sɔlɔ ƃô. 7Inɔsi maa sɔlɔ ƃóɔɔ pôlu ma, Sɛ̂ è kɛ̀ ɣele mâ a kóraŋ buu lɔ́ɔlu mɛi saaƃa káo lɔ́ɔlu mɛi feerɛ (807). È lóŋ-sinaa da nɛyâa maa sɔlɔ ƃô. 8Góraŋ kélee Sɛ̂ è gɛ̀ ɣele mai, è kɛ̀ a kóraŋ ŋuŋ lɔ́ɔlu mɛi náaŋ pôlu puu káo feerɛ (912) é lɛ́ɛ saâi.
9Tãi Inɔsi è kɛ̀ la ɣele mâ a kóraŋ buu lɔ́ɔlu mɛi náaŋ, è Kenaŋ maa sɔlɔ ƃô. 10Inɔsi è kɛ̀ ɣele ma a kóraŋ buu lɔ́ɔlu mɛi saaƃa pôlu puu káo lɔ́ɔlu (815) Kenaŋ maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô. 11Góraŋ Inɔsi è gɛ̀ ɣele mai, gélee è kɛ̀ a kóraŋ ŋuŋ lɔ́ɔlu mɛi náaŋ káo lɔ́ɔlu (905) é lɛ́ɛ saâi.
12Kenaŋ è Maâlalɛ maa sɔlɔ ƃô tãi è kɛ̀ la a kóraŋ buu lɔ́ɔlu mɛi feerɛ. 13Kenaŋ è kóraŋ ŋuŋ lɔ́ɔlu mɛi saaƃa pôlu buu náaŋ (840) kɛ̀ ɣele mâ Malalɛ maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô ǹyaa máŋ. 14Kóraŋ ŋuŋ lɔ́ɔlu mɛi náaŋ pôlu puu (910) ƃé Kenaŋ è gɛ̀ ɣele mâ é lɛ́ɛ saâi.
15Maâlalɛ è kóraŋ buu lɔ́ɔlu mɛi da káo lɔ́ɔlu kɛ̀ ɣele mâ é lɛ́ɛ Zare maa sɔlɔ ƃôi. 16Malalɛ è kóraŋ ŋuŋ lɔ́ɔlu mɛi saaƃa pôlu buu saaƃa (830) kɛ̀ ɣele mâ Zare maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô ŋɔ́nɔ. 17Malalɛ ŋɔkóraŋ kélee è kɛ̀ a kóraŋ ŋuŋ lɔ́ɔlu mɛi saaƃa pôlu buu lɔ́ɔlu mɛi náaŋ káo lɔ́ɔlu (895) é lɛ́ɛ saâi.
18Zare ǹyaŋ kɛ́ɛ ɣele ma a kóraŋ ŋuŋ tɔnɔ pôlu buu lɔ́ɔlu mɛi da káo feerɛ (162), è Inɔ maa sɔlɔ ƃô. 19Inɔ maa sɔlɔ ƃóɔɔ pôlu ma Zare è kɛ̀ ɣele ma a kóraŋ ŋuŋ lɔ́ɔlu mɛi saaƃa (800). Ǹyaa máŋ è lóŋ-sinaa da nɛyâa maa sɔlɔ ƃô. 20Zare ŋɔkóraŋ kélee è kɛ̀ a kóraŋ ŋuŋ lɔ́ɔlu mɛi náaŋ pôlu buu lɔ́ɔlu mɛi da káo feerɛ (962) é lɛ́ɛ saâi.
21Inɔ ǹyaa máŋ è kóraŋ buu lɔ́ɔlu mɛi da káo lɔ́ɔlu kɛ̀ ɣele mâ é lɛ́ɛ Mɛtusela maa sɔlɔ ƃôi. 22Inɔ è tùa a Ɣâla nîa-pere Mɛtusela maa sɔlɔ ƃóɔɔ pôlu ma a kóraŋ ŋuŋ saaƃa (300) é lóŋ-sinaa da nɛyâa maa sɔlɔ ƃô ŋɔ́nɔ. 23È kóraŋ ŋuŋ saaƃa pôlu buu lɔ́ɔlu mɛi da káo lɔ́ɔlu (365) kɛ̀ ɣele mâ. 24Inɔ è tùa a Ɣâla nîa-pere. È làŋ núu-kpune ŋɛ́i, kpɛ́ni fêi, Ɣâla è zìɣe.
25Tãi Mɛtusela è kɛ̀ la ɣele ma a kóraŋ ŋuŋ tɔnɔ pôlu buu lɔ́ɔlu mɛi saaƃa káo lɔ́ɔlu mɛi feerɛ (187), è Lamɛ maa sɔlɔ ƃô. 26Mɛtusela è kɛ̀ ɣele mâ a kóraŋ ŋuŋ lɔ́ɔlu mɛi feerɛ pôlu buu lɔ́ɔlu mɛi saaƃa káo feerɛ (782) Lamɛ maa sɔlɔ ƃóɔɔ pôlu ma. È lóŋ-sinaa da nɛyâa maa sɔlɔ ƃô. 27È kóraŋ ŋuŋ lɔ́ɔlu mɛi náaŋ pôlu buu lɔ́ɔlu mɛi da káo lɔ́ɔlu mɛi náaŋ (969) kɛ̀ ɣele mâ é lɛ́ɛ saâi.
28Lamɛ è kóraŋ ŋuŋ tɔnɔ pôlu buu lɔ́ɔlu mɛi saaƃa káo feerɛ (182) kɛ̀ ɣele mâ máŋ é lɛ́ɛ pâi lóŋ-surɔ̂ŋ maa sɔlɔ ƃôi. 29È ǹáa sèe a Nôa. È mò ǹyɛɛi, “Ǹɔii kpɔ́ ŋí Yâwɛɛ è ǹáɣaŋ làai, nôloŋ ŋí a pâi kúŋa nɛnɛ̂i ma kútii kpanaŋ-ŋai da kúmɛni-soli-ŋai su.” 30Nôa maa sɔlɔ ƃóɔɔ pôlu ma, Lamɛ è kɛ̀ ɣele mâ a kóraŋ ŋuŋ lɔ́ɔlu pôlu buu lɔ́ɔlu mɛi náaŋ káo lɔ́ɔlu (595). È lóŋ-sinaa da nɛyâa maa sɔlɔ ƃô. 31Lamɛ è kóraŋ ŋuŋ lɔ́ɔlu mɛi feerɛ pôlu buu lɔ́ɔlu mɛi feerɛ káo lɔ́ɔlu mɛi feerɛ (777) kɛ̀ ɣele mâ é lɛ́ɛ saâi.
32Nôa è kɛ̀ a kóraŋ ŋuŋ lɔ́ɔlu (500) é lɛ́ɛ pâi Sɛ̂ŋ, Aaŋ da Zafɛ dímaa sɔlɔ ƃôi.
Currently Selected:
Zɛnɛse 5: KWB
Highlight
Share
Copy
Want to have your highlights saved across all your devices? Sign up or sign in
