Mâki 9
9
1Nya ƃe è m̀o dîa, ǹyɛɛi, “Tɔ̃yâ ma, ŋá m̀ó kâa, núu da-ni díkaa tɔɔ ní ƃɛ́, dífe pâi saâi é lɛ́ɛ la zu dí Ɣâla ŋɔkâloŋ-laai káa é pá, wála-wala-laa kɛ́ ƃò bôlu.”
Zîsɛ ŋɔkpɛtɛ-perei maa è fàleŋ
(Maafîu 17:1-13; Lûu 9:28-36)
2Ɣele kûu lɔ́ɔlu mɛi da tɛ̂ɛi pôlu ma, Zîsɛ è lì a Pitɛ, Zĩi, da Zɔ̂ŋ yée tɔ́ɔ tɔnɔ ma dítɔnɔ kwaa ma. Nya ƃe m̀aa è fàleŋ díŋɛi. 3Ŋɔseɣei è kɛ̀ fólôi kpɔ́ yɛ̂ɛ vóloi núu da fa pɔ̂ri kɛ̀ m̀aa kpɛɛ̂i. 4Nya ƃe bôlu-ƃela saaƃai ŋí dí Zîsɛ kàa gɛ́ lòno Ilaiza da Mose pɔ́. 5Pitɛ è m̀o Zîsɛ ma, “Kaamɔ̂ɔ, ǹɛ́lɛɛ̂i a gɛ́ɛ kúkaa ƃɛ́. Kwaa ƃûu saaƃa tɔɔ, dɔnɔ kɛ́ ƃò ímɛni ma, dɔnɔ Mose mɛni ma, dɔnɔ Ilaiza mɛni ma.” 6Pitɛ da m̀arâai dí kɛ̀ yaôi díkɛ kpɛ̃liŋ. Pitɛ fé kɛ́ ní a mɛni kɔ́lɔŋɔɔ a pɔ̂ri kɛ̀ m̀ôi.
7Nya ƃe ɣele-kɔlɔŋ kole è dímɛi pɛ̂lɛ. Wóo da è kula ŋ̀ele-kɔlɔŋ kolei su ǹyɛɛi, “Ŋáwɛli kɛ́-maa Loŋ ká ŋí, ka ŋ̀óo mɛ́ni.” 8Dítinaŋɔ̂ɔi, dífe Mose da Ilaiza káa ní, fɛ̂ɛ nɔ́ kɛ̀ Zîsɛ nyaa tɔnɔ.
9Díkɛɛ ǹyéei yenîi, è dília-woo ƃò a gɛ́ɛ mɛnii dí gàai dífe m̀o núu da ma, é lɛ́ɛ la zu núu-kpune Ǹóŋ é m̀u síɣe saa yêei. 10Dí m̀ɛnii ŋí lâai kɛ̀ díkili ŋá, kɛ́lɛ dí kɛ̀ díkili ŋá siâi, “M̀u siɣɛɛ saa yêei su-kulâi ƃa lé?” 11Dí Zîsɛ marê kɛ̀, dîyɛɛ m̀ai, “Lé mɛni ƃé Dɔ̂ŋ lɛ́-ƃelai da mò la dîyɛɛ, ‘Fɛ̂ɛ Ilaiza a pa fúlɔi?’ ”
12È díwoo su tòo ǹyɛɛ dîai, “Ilaiza a pâi kpɔ́ fúlɔi a gɛ́ɛ é m̀ɛnii kélee su sã́a. Kɛrɛ̂e, bɔ̃yɛɛ̂i Ŋ̀âla-kɔlɔi su a gɛ́ɛ fɛ̂ɛ núu-kpune Ǹóŋ é mɔ̃lɛ mɛni támaa su, dí tûa la yɛ̂ɛ luɛ? 13Kɛ́lɛ, ŋá m̀ó kâa, Ilaiza a gbâa pá. Dí tùa la yɛ̂ɛ berei dí ŋ̀wɛli la, yɛ̂ɛ berei bɔ̃yɛɛ̂i la Ŋ̀âla-kɔlɔi su é pîlaŋ mài.”
Zîsɛ è nyînaŋ nyɔ́mɔɔ kpɛ̀ surɔ̂ŋ-loo tɔnɔ pôlu
(Maafîu 17:14-21; Lûu 9:37-43a)
14Dí seriɛɛ bôlu-ƃelai gbeli-ŋai dîai, dí kpɔŋ kɛ́tɛ kàa dínaŋɔɔ dîa. Dɔ̂ŋ lɛ́-ƃelai da bôlu-ƃelai díkɛ sîa toôi. 15Gbɔŋ su-ƃelai kɛ́ɛ da Zîsɛ káai, dípɛlɛ è pù a gɛ́tɛ. Díkelee dí kîrɛ sìɣe dí lí bɔ́ dí dílaa tí ma. 16Zîsɛ è ŋɔpôlu-ƃelai marê kɛ̀, ǹyɛɛ dîai, “Lé ƃé ka dîa-ní ka m̀aa sîa toôi?.”
17Gbɔŋ su-nuui dɔnɔ e zu tòo, ǹyɛɛ m̀ai, “Kaamɔ̂ɔ, ŋá pà a ńoŋ ípɔ. Nyînaŋ nyɔ́mɔɔ káa bôlu. 18Ƃɛ́i kélee à zòŋ naai, a tòo, ǹá-ya file-file kɛ́ tɔ̀ɔ ǹá, gɛ́ ǹyíŋ ŋá mii, gɛ́ kɛ̀ kàŋ-kàraŋ. Ŋá mò ípôlu-ƃelai dîa a gɛ́ɛ dí gbɛ́ bôlu, kɛ́lɛ, dífe pɔ̂ri ní.”
19Zîsɛ è m̀o dîa, “Óo, ŋ̀éniɛi ŋí su-ƃelai, laa-la fé káyêei, ɣele ɣɛɛlu ƃé fɛ̂ɛ ŋá kɛ́ la kákɔlɛi? Ɣele ɣɛɛlu ƃé fɛ̂ɛ ŋá ńii kpéle la káyêei? Ka pá la ḿbɔ.” 20Dí pà a zurɔ̂ŋ-looi bɔ́. Nyînaŋ nyɔ́mɔɔi kɛ́ɛ a Zîsɛ káai, è zurɔ̂ŋ-looi tùmo-tumo, é doo ǹɔii ma, gɛ kiliŋ, ǹá-ya file-file kɛ́ tɔ̀ɔ ǹá. 21Zîsɛ e zurɔ̂ŋ ǹâŋ marê kɛ̀, ǹyɛɛi, “Nyînaŋ nyɔ́mɔɔi ŋí a kɛ́ bôlu a ɣele ɣɛɛlu?”
È mò ma, “É síɣe ńoloŋ tãi ma. 22Tãi támaa a bìli ŋɔŋ su da ǹyái a gɛ́ɛ é bàa. À kɛ̀ yà pɔ̂ri mɛni da kɛ̂i, kúmalôŋ káa í kpɔ́ŋ kûa!”
23Zîsɛ è m̀o ma, “À kɛ̀ yá kpîŋ yâ pɔ̂ri! Mɛni kélee ŋ̀aa-see a kɛ̀ laa-la nuu yêei a ǹɛ́lɛɛ.”
24Ǹaa ŋáa ma, ǹôloŋ ǹâŋ è làɣi a wɔ́lɔ, ǹyɛɛ m̀ai, “Ŋa láa la, kpɔŋ mâ, berei máŋ ŋálaa-lai láa fé fɛ́ɛ ní lai!”
25Zîsɛ kɛ́ɛ a gàa a gɛ́ɛ gbɔŋ su a kɛ́ kɛ̂tɛi díkɔlɛi, è lòno nyînaŋ nyɔ́mɔɔi ma, ǹyɛɛi, “Yá nyînaŋ nyɔ́mɔɔ, ŋa m̀ó yâ, ye kúla ǹoloŋ ŋí pôlu, ífe wɔ́lɔ ŋɔ́nɔ lɛ̀ɣɛ la.”
26Nyînaŋ nyɔ́mɔɔi è làɣi, é dumo-tumo a ŋ̀ánaa, é kúla bôlu. Zurɔ̂ŋ-looi è kɛ̀ yɛ̂ɛ a saa, ǹúui da-ŋa dí m̀ó dîyɛɛi, “Aâ saa.” 27Kɛ́lɛ, Zîsɛ è zòŋ a ǹyée é m̀u síɣe é tɔ́ɔ.
28Zîsɛ liɛ́ɛ bɔ́ naai, ŋɔpôlu-ƃelai dí m̀arê kɛ̀ dítɔnɔ kwaa ma dîyɛɛ m̀ai, “Lé mɛni ƃé kúfe pɔ̂ri ní kɛ̀ ǹyînaŋ nyɔ́mɔɔi kpɛ̂i la zurɔ̂ŋ-looi tí pôlui?”
29È díwoo su-tòo ǹyɛɛ dîai, “Ɣâla fɛliɛɛ kpanaŋ (da suŋ kpanaŋ siɣeɛɛ) nɔ́ ƃa gɛ̀ núu é ǹyînaŋ nyɔ́mɔɔ sii ŋí kpɛ́ núu da pôlu.”
Zîsɛ è ŋɔ́nɔ ŋɔsaai maa mɛni ƃò naa túɛ
(Maafîu 17:22, 23; Lûu 9:43b-45)
30Dí kùla naa dí tɛ́ɛ Galalii. Zîsɛ fé kɛ́ ní ŋ̀wɛ̂lii núu da é gɔ́lɔŋ ƃɛ́i è kɛ̀ naai, 31kpɛ́ni fêi, è kɛ̀ mɛni lɛ̂i ŋɔpôlu-ƃelai dîa, ǹyɛɛi, “Da pâi núu-kpune Ǹóŋ tɛɛ̂i nûa pɔ́ a gɛ́ɛ dí bàa. Dà bàa, ɣele kûu saaƃa a tɛ̀ɛ, a pâi m̀u siɣêi ŋɔ́nɔ.” 32Kɛ́lɛ, dífe táre ní ŋɔsɛŋ lɛ́ɛi ŋí su, dí kɛ̀ yaôi a gɛ́ɛ dí m̀arê kɛ́ m̀ɛni ma.
Gbɛ̂ɛ ƃa ǹúui gɛ́tɛi
(Maafîu 18:1-5; Lûu 9:46-48)
33Nya ƃe dí lì dí sèri Kapɔ̂nia. Dí lɔ́ɔ kɛ̀ bɛ́rɛi mui, Zîsɛ è ŋɔpôlu-ƃelai marê kɛ̀, ǹyɛɛ dîai, “Lé ƃé ká kɛ̀ m̀aa sîa toôi berei sui?” 34Kɛ́lɛ, dífe pɔri ní kɛ̀ ŋ̀óo su toôi, kpɛ́ni fêi, m̀ɛnii dí kɛ̀ zîa toôi díkîe-ní loai ƃé kɛ̀ a gbɛ̂ɛ ƃa ǹúui gɛ́tɛ ɣelei dísamai. 35Nya ƃe Zîsɛ è sèe é ŋɔpôlu-ƃelai tóli, ǹyɛɛ dîai, “À kɛ̀ núu da à ŋ̀wɛli é kɛ́ a núu-tuɛ-nuu, fɛ̂ɛ m̀aa nuui é kɛ́ a ǹúui kélee gbɛɛ ŋái, gɛ́ ƃò a ǹúui kélee dílɔmu-nuu.” 36Nya ƃe è pà a lôloŋ tɔnɔ é dɔ́ɔ dísama, é zee ǹyée tɔ̃ɔi, è m̀o dîa ǹyɛɛi, 37“Ǹúui a ǹyée sèe lôloŋ kɛ́ɛ ŋí mu ńaai sui, m̀aa nuui a ǹyée sée ḿû. Ǹúui ŋɔ́nɔ a ǹyée sèe ḿûi, m̀aa nuui fa ǹyée sèe nɔ́ ḿû, kɛ́lɛ, m̀aa nuui a ǹyée sée nuui mu ńdɛ̀ɛi.”
Ǹúui vé tɔɔ ní kûai, gáa a kútà
(Lûu 9:49, 50)
38Zɔ̂ŋ è m̀o ma, ǹyɛɛi, “Kaamɔ̂ɔ, kú núu da kàa gɛ́ nyînaŋ nyɔ́mɔɔ kpɛ̀ ílaâi su. Kɛ́lɛ kú gbèra, kpɛ́ni fêi, vé a kúta.” 39Kɛ́lɛ, Zîsɛ è m̀o dîa ǹyɛɛi, “Káfe gbèra, kpɛ́ni fêi, núu à mɛni kpaya-kpaya kɛ̀ ńaai sui, va pɔ̂ri mɛni nyɔ́mɔɔ ƃôi é pîlaŋ ḿâ a maa félaa. 40Ǹúui vé tɔɔ ní kûai, gáa a kútà. 41Tɔ̃yâ ma, ŋá m̀ó kâa, ǹúui a ya kɔ̂ɛɛ tɛɛ kápɔ, kpɛ́ni fêi, Kôrai láai káa kâai, m̀aa nuui fé pâi wɔ́lɔ ŋɔfela-fei lánîi.
Zu-kɔɔŋ-ŋai da núu kɛ̀ é sɔnyɔ̂ŋ kɛ̂i
(Maafîu 18:6-9; Lûu 17:1, 2)
42“Núu da à gɛ ǹîa-pɛlɛɛi ŋí dɔnɔ, nyii a lâa a ńyãai, é sɔnyɔ̂ŋ kɛ́, m̀aa nɛ̃ɛ̂i dí kɔni kɛ́tɛ ɣiri m̀aa ǹúui kpîŋ kɔŋ ma dí bili yúo su. 43À kɛ̀ íyee à gɛ̀ í sɔnyɔ̂ŋ kɛ́, dée yâ. Ímaa nɛ̃ɛ̂i íkɛ ƃò a ífulu, íyee tɔnɔ kpéŋ kɛ́ɛ yâ, é tɛ́ɛ la íyee feerɛ kɛ́ɛ yâ í lí Dɛ̂ƃele-taa ma, ŋ̀wɔ́lɔ-wɔlɔ ŋɔŋ su, [ 44nyii va wɔ́lɔ liiŋ, gbeli-ŋai pâi dímiî dífa saa.] 45À kɛ̀ íkɔɔ à gɛ̀ í sɔnyɔ̂ŋ kɛ́, dée yâ. Ímaa nɛ̃ɛ̂i íkɛ ƃò a ífulu, íkɔɔ tɔnɔ kpéŋ kɛ́ɛ yâ, é tɛ́ɛ la íkɔɔ feerɛ kɛ́ɛ yâ í lí Dɛ̂ƃele-taa ma, ŋ̀wɔ́lɔ-wɔlɔ ŋɔŋ su, [ 46nyii va wɔ́lɔ liiŋ, gbeli-ŋai pâi dímiî dífa saa.] 47À kɛ̀ íŋɛi à gɛ̀ í sɔnyɔ̂ŋ kɛ́, gula yâ. M̀aa nɛ̃ɛ̂i í lí Ɣâla ŋɔkâloŋ-laai su a íŋɛi-gao tɔnɔ kpéŋ é tɛ́ɛ la íŋɛi-gao veerɛ kɛ́ɛ yâ í lí dɛ̂ƃele-taa, ŋ̀wɔ́lɔ-wɔlɔ ŋɔŋ su, 48nyii va wɔ́lɔ liiŋ, gbeli-ŋai pâi dímiî dífa saa. 49Da pâi núu kélee liƃi waâi dîa a ŋɔŋ nɔ́ yɛ̂ɛ berei da sâla sãa liƃi wàa dîa a kpolo-liyeŋ 50Kpolo-lîyeŋ lɛ̂lɛɛi. Kɛ́lɛ, à kɛ̀ gboloi à ǹíyeŋ làŋ, a pɔ̂ri gɛ̂i léŋ é líyeŋ ŋɔ́nɔ? Tɔɔ kpolo-liyeŋ é kɛ́ kâa kákɛ-ɣeniɛi su, a gɛ́ɛ ka káƃarâai ká kɛ́ ƃò kwaa tɔnɔ ma lii-sêe su.”
Currently Selected:
Mâki 9: KWB
Highlight
Share
Copy
Want to have your highlights saved across all your devices? Sign up or sign in
