Génesis 18
18
Pa Dios nifaclem pa Abraham ti caaj jayu pa lhaôs
1Pa Lhcaanvacle tanôclitem pa Abraham yiey pa yita' lhe Mamre. Jôjjeclay yi'sha'ne pa Abraham yiey pa lhashi pa lhatsha'nuvo ti nalhcachi. 2Pa Abraham tpôychisham pa yi'van papi pu'jana nivacle ti vatsavatjop. Ti yi'van ti lhfanishlhavach'in ti nitshaam pa yichjuulh.*xy* Pa tanjuyshicham pa yama cotsjaat, 3pa yit'esh:
—Yinvacle, jatants'aclan'a ti jayalh'a ca ya aj ca mo' tatsha. 4Ca nitajulhtajey'am pa jayiyôjijanesh jayu pa tiqu'in yinôôt ca acleshelhsha'ne nava afoclelh. Pa ichayelh cum clee yiey na lhajpec lha aacjiyuc. 5Ti lhnashelh'e na yie' na acavo, pa javooy jayu pa ca atujelh, secl'esh ca nat'unelh'in shta ca môtajelhch'e pa nôyish.
—Jech, tajulhey —yicuulh ts'ivee.
6Pa Abraham yich'ôcji pa lhatsha'nuvo pa yit'esha lhpa Sara:
—¡Afanisheesh'in! Ca acum'e pava veinte kilos na isshi climshi pa asnatesh pava yucuvec.
7Lhechesh pa vacumajey shta pa Abraham pa yie' pava vôcôc. Pa yeneyshi pa yilhavun nich'a uj. Pa yijutem pa ve'lha lhcavo ca lhfanisheesh'in ca nasnatesh pa vatôc. 8Ti yivaclhitesh pa t'acum'e pa Abraham pa t'asjaan shi' pa queso shi' pa vôcô lhts'oos, pa yiclôvalhesh ti t'acumem'e ti tuj ts'ivee yiesh'ôcji lhpa aacjiyuc.
9Ti yivaclhitesh ti tuj, papi namey pa niy'ôs pa Abraham:
—¿Ta yie' lhja ajaya Sara?
—Yicuulh pa Abraham —yi'ôcji na tsha'nuvo.
10Lhechesh pa ve'lha pa yit'esh:
—Vooy peelh nincôôp jatpec jayu ca janjôchinee, pa lhecheesh pa nicaaj jayu pa lhaôs lhja Sara.*xz*
Taj ti p'alha ti yipe'ya lhpa Sara ti tasinôyelh'in, lhayaash ti yiey t'oyiish pa Abraham yiey pa lhashi pa tsha'nuvo. 11Pa Abraham shi' lhpa Sara palha c'utsjas. Lhpa Sara vô'mesh ti vacla' nan lhjunash napi nivacchey. 12Lhe'naa lhpa Sara ti nilhaajulh ti nicaaysiyuin, pa yaychavalh'in: “¿Ta lhayaash ca nicaaj côque nôqueesh ti palha ya c'utsjaselh na yijaya?”*xa* 13Taj pa Lhcaanvacle yit'esha pa Abraham:
—¿Ta lhayaash ti nicaaysiyu'in lhja Sara? ¿Ninlheclôjesh ca nicaaj pa lhaôs nan t'aplhuqu'e'? 14¿Caaj t'e pa tavijatay na Lhcaanvacle ca nasnatesh? Peelh nincôôp jatpec jayu ca janjôchinee, lhecheesh pa nicaaj pa lhaôs lhja Sara.*xb*
15Ti yipe'ya côque, pa nijovayshi lhpa Sara yeetajesh ca nivaantanesh. Lhe'naa ti yit'esh:
—Yivaatsha ninascaaysiyuin.
Taj pa Lhcaanvacle ti yicuulh:
—Tsitô'ya ti lhancaaysiyuin.
Pa Abraham vatants'aclanema pa Dios pa Sodoma
16Lhechesh pa vatsavatch'e papi tanôtayey pa t'ajuyey pa yitsaat Sodoma. Pa Abraham tanaôycheelh ca jaspa nineecjuelh papi lhech. 17Lhechesh pa yaychavalh'in pa Lhcaanvacle: “Istaa ca janfacleem na Abraham na jasnatesh jayu, 18eem ti lhech nan lhtataesh jayu papi aclojjam lhtachifas pa t'un'in shta. Apis ti janfacleem ti tô'lha ti yiisiyan jayu lhacôm'a papi acloj lhtachifas yiey na cotsjaat. 19Apis ti jaycum'eyitam ca niyôjiesha papi lhclesh shi' papi tô'lha ca nanc'ashamem nava javanqu'eyjatsjanesh shi' ca nasnatesh lhacôm'a pa tajulhey shi' pa yivo'yeshch'e, secl'esh ca nôfisch'e lhacôm'a ca lhjunash ti janfacleem.” 20Lhech lhjunash pa Lhcaanvacle ti yit'esha:
—Napi nivacle yiey ja Sodoma shi' na Gomorra uj ti niysa' pa lhjunash shi' pa lhsasch'e yaash ti aôytej. 21Nôqueesh lhech jôcji' ca ja'van ca yijô'a pa lhsasch'e ca uja' jum yiey nan lhjunash ti chinfacyam. Pa nôque lhjunash tsitô'ya jayu.
22Pa napu' papin tanôtayey yichey pa Sodoma. Lhan'e pa Abraham jôjjeclay mônlhajop pa Lhcaanvacle. 23Pa ve'lheesh t'acuya pa lhechesh pa niy'ôs:
—¿Lhclônsha'ne jayu shta papi ninatmenlhavach lhamjatesham jayu papi tamenlhavach? 24Ca nicaajtaj papi cincuenta nivacle ninatmenlhavach yiey ja yitsaat. Ca lhech lhjunashtaja; ¿lhavômjat jayu ja yitsaat, pa tanca avômjatemch'e jayu ca nicaajtaj papi cincuenta? 25¡Nintajulhey ca asnatesh côque ca aclônsha'ne papi ninatmenlhavach ca namesham papi tamenlhavach, lhjunashjulh papi napu' papi lhjunashavatjulh pa lhsasch'e yisnatesh! ¡Ya aj ca asnatesh côque! Avaatsha, t'aashchisham ti lhasclanch'e nan tuc'a'e na cotsjaat, ¿tan jayu ca asclanch'e?
26Lhechesh pa yicuulh pa Lhcaavacle:
—Ca javantaj papi cincuenta ninatmenlhavach yiey na yitsaat Sodoma, papi lhech tôlh'ejop pa javômjatemch'e jayu lhacôm'a papi lhech yie'!
27Pa Abraham ve'lheesh ti yit'esha shta:
—Avômjach'eyam ti janôyit'aan ti c'asinômatan'in ti avaatsha a'Dios vooy yivaatsha ya nivalce jô. 28Taj ti ca amtajac'oya papi cinco ninatmenlhavach ca nameyshi cincuenta. ¿Tsi'sha papi cinco amc'oya pa lhavômjat jayu lhacôm'a ja yitsaat?
Yicuulh pa Lhcaanvacle:
—Ca javantaj papi cuarenta y cinco ninatmenlhavach, tanca yivômjat jayu.
29—Ja't'ajesha ca nicaaj papi cuarenta y cinco ninatmenlhavach... lhetipa'esh pa Abraham.
—Papuque cuarenta pa tan jayu ca yivômjat na yitsaat -yit'esh pa Lhcaanvacle.
30Taj pa Abraham ve'lheesh t'a'lha shta:
—Jatants'aclan'a ca ya aj ca asuyayi ti yalhetipaesh ti yalhetlhataj'in taj ti ca avantaj papi trenta atesha...
Pa Lhcaanvacle yit'esha shta:
—Ca nicaajtaj papi treinta, pa javômjatemch'e jayu na yitsaat.
31Pa Abraham lhetipaesh:
—Yinvacle, uj ti javatfiyit'am ti jayasinôy'am, taj ti, ¿ta lhjunash jayu ca avantaj papi veinte atesha?
Pa yicuulh pa Lhcaanvacle:
—Papuque veinte tan jayu ca yivômjat na yitsaat.
32Jôjjeclay lhetipaesh pa Abraham:
—Jatants'aclan'a, Yinvacle, ya aj ca asuyayi, taj ti ve'lheesh jayu atesha ca shtasinôy pa tanca t'ôyisheey ca c'avenchatsha'ne: ¿She pa lhasnatesh jayu ca avan lhôn papi napunôjesh atesha?
Pa yit'esh pa Lhcaanvacle:
—Ca nicaajtaj papi napunôjesh, tan jayu ca javômjat na yitsaat.
33C'oya ti tifeshch'e pa Lhcaanvacle ti tasinôyelh pa Abraham, pa tay'e pa lhech'e. Vooy pa Abraham vapecley pan yie' pa lhatsha'nuvo.
Currently Selected:
Génesis 18: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
