Génesis 28
28
1Lhechesh pa Isaac tôney pa Jacob pa yit'eshem pa is, pa yijutem navôque lhayôjijates: “Ya aj ca ajayaeesh lhpa nivacche yiey nôque cotsjaat Canaán. 2Meey pa Padan-aram, yiey pa lhajpôyich pa act'eech Betuel, pa ajayaeesh lhpa lhech'e lhpa ve'lha lhôse ja atjooc Labán. 3Vooy pa Dios ampa ca nintôyeesh pa yit'esh'am jayu pa is pa yijut'am jayu shta papi acloj acles, pa avaatsha tôlh'a jayu papi acloj vatachifas. 4Pa yijut'am jayu shi' papi acles ca niteesh'am jayu pa is ca nifaclem lhapesh ca Abraham.*xc* Pa natsôt'ajesh jayu nôque cotsjaat yiey na shtanôôlhjônshi nan nifaclem lhapesh ca Abraham.”
5Nôque lhjunash ti yicheney pa Isaac pa Jacob pa cotsjaat Padan-aram. Pa Jacob yamey pa lhajpôyich pa Labán, lhaôs pa Betuel arameo lhavaatsha. Pa lhech Labán lhchecla' lhpa Rebeca, lhamimi pa Jacob shi' pa Esaú.
Pa Esaú tjayaay
6Pa Esaú yivanesh pa Isaac ti yit'eshem pa is pa Jacob pa yicheney pa Padan-aram ca lhjayaeesh lhpa lhech'e. Yivanesh shta pa lhtata ti yit'eshem pa is ti yiyôjiesha ca ya aj ca lhjayaeesh lhpa nivacche yiey pa Canaán, 7shi' ca nôquey pa Jacob pa Padan-aram nan lhjunash ti yiyôjiesha pa lhtata shi' lhpa lhamimi. 8Nôque lhjunash ti yitô'ya pa Esaú ti ninen pa lhtata papi ôcjeclôy yiey pa Canaán. 9Lhe'naa ti yichey pa Ismael, Abraham lhaôs, pa lhjayaesh lhpa lhôse lhey Mahalat. Lhpa lhech lhch'injô pa Nebaiot. Pa lhjayaesh lhpa lhech, nôqueesh shta papi apis lhjayas cananeas.
Pa Dios tanôclitem pa Jacob yiey pa Betel
10Pa Jacob tay'e pa Beerseba pa yuyey pa nôyish yichey pa Harán. 11C'oya ti yamey pa is'ejop ti mônlhee ti tulhey, lhayaash palha capch'e ja jumcuclaay. Pa t'ôsiyesh lhpa ve'lha utej pa lhech yijo'e. 12Lhech'e ti caaj pa lhtsamaat, ti yi'van pa vatvôôt tôlh'e cotsjaat pa yamey pa vôôs. Shi' papi lh'ángeles pa Dios ti vôlhch'e'in pa t'ecletch'esha'neen shta.*xd* 13Pa yi'van shta pa Lhcaanvacle ti shalheema pa yit'esha: “Yivaatsha ya Lhcaanvacle, lh'Diosyish ca act'eech Abraham shi' ja atata Isaac. Avaatsha shi' papi acles jajut'ay jayu nôque cotsjaat yiey nan lhjo'e.*xe* 14Papi lhech aclôj jayu jan lhjunash na josôj yiey na cotsjaat. Pa yamey jayu na fchenajjulh shi' na fiyatjulh, pa nôquee na lhum'ôcjinucjulh shi' na nuutch'e. Pa lhacôm'a papi lhtachifas yiey na cotsjaat ti chiyit'eshem jayu pa is tôlh'ejop avaatsha shi' papi acles jayu.*xf* 15Yivaatsha yamônlhaajop, pa janujumatsen'ash jayu pa ca vi'taj'e. Pa c'anachajey jayu nôque cotsjaat. Tanca vôm'ash ca niyôfisjatajch'e'am na janfacl'am.”
16C'oya ti nijat'oesh pa lhtsamaat pa Jacob, pa yaychavalh'in: “Yijô t'e'ma pa Lhcaanvacle ti nôque yie', yivaatsha ninastô'ya.” 17Uj ti nijovay'in pa yaychavalh'in: “Yiey nôque uj ti is'e'. Nôque yie' pa lhajpôyich pa Dios; ¡pa lhashiey pa vôôs!”
18Ti nich'a nalhu pa Jacob nitshaam, pa t'acum'e lhpa utej lhpa t'ôsivat'esh, pa yitsemaj ca ninantovacluach'e, pa yôtsiapee pa vatshachivo. 19Pa lhech yie' lhapesh pa yitsaat lhey Luz, vooy pa Jacob yinich'anatesh pa lhey pa yeyiyanesh Betel.
20Lhech'e pa Jacob ti yisnatesh pa lhfaclech ti yit'esh: “Pa Dios ca mônlhatajayijop pa ninujumatsenyish na jôcji', ca nanjutajyi pa yôc shi' lha pa ca c'uych'e, 21ca istaja ca jatpectaj shi' ca nits'ilhjenesh ca jatpecley ja tata lhajpôyich, lhecheesh pa Yinvacleesh pa yi'Diosesh jayu shta. 22Anôque utej lha jatsemaj ca ninastôvacluaey, lhajpôyich'esh jayu pa Dios. Yajatesh jayu ti jajut'ay, pa yi'Dios, pa diez'esh pa t'iya' lhacôm'a pava ca anjutajyam.
Currently Selected:
Génesis 28: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
