Génesis 40
40
Pa Josê ti yashinitjach'e pava napu' vatatsamatas
1Ti nôjeshch'e côque pa caaj papi napu' lhcavos pa lhcaanvacle, pa lhavo'esh ti yiyôjayan'in shi' pa yucuve lhavo' suya pa lhanvacle, pa lhcaanvacleesh'e pa Egipto. 2Pa faraón, pan lhcaanvacleesh, suya papi lhech napu' t'acu'mem'in, pa lhcaanvacleesh papi yiyôjayan'in shi' pa lhcaanvacleesh papi yucuve lhavos. 3Pa tayôjijanesh ti chinchajey pa lhajpôyich pa lhcaanvacle papi c'afoquelhay ti chiyôcfa' yiey lhpa vatvanc'ocfajavte. Yiey pan chiyan'e pa Josê ti chiyôcfa'. 4Pa lhcaanvacleesh papi c'afoquelhay pa yiclôvalhchiyinesh pa Josê ca ninujumatsenesh papi lhech. Pa acloj pava nalhus ti mônlhee lhpa vatvanc'ôcfajavte.
5Ve'lha pa tulh papi napu' vanôôcfasha'ne pa yiyôjayan'in pa lhcaanvacle shi' pa yucuve lhavo' caaj pava lhtsamatas. Pava lhtsamatas caaj pa yich'e'. 6Ti nich'a nalhu ti yichey pa Josê pa yi'van ti uj ti yaychavalhvatsham'in; 7pa niy'ôsesh pa lhjunash:
—¿Ta lhayaash nôqueesh ti vena lhjunash nava atacoclelh?
8—Pa nifaclem papi lhech:
—Caaj java yitsamataselh pa ampapu ca nanfacleelhyam pa yich'e'.
Lhechesh pa yit'esh pa Josê:
—Vooy pa Dios yitô'yish pa yich'e' pava atsamataselh. Anfaclelhyam pava lhanjujômelh.
9Lhechesh pa nifaclem pa lhtsamaat pa lhcaanvacleesh papi yiyôjayan'in pa lhcaanvacle pa Josê cavôque yit'esh:
—Janjujôm lhpa ve'lha ôtjayetayuc ti yie' yijuyish. 10Lhpa lhech ôtjayetayuc pu'jana pava lht'oy, caaj tatsha pava lhsashay pa tavôy pa yoquen tatsha pava lhay. 11Pa jachaajsha'ne pa t'iyôjatshi ja faraón. Lhechesh pa jaycum'e pava ôtjayetas pa janofomjam pa t'iyôjatshi. Ti javaclhitesh pa jajutshey lhôn yivaatsha ja faraón.
12Pa yit'esh pa Josê:
Ca atsamaat nôque yich'e': pava pu'jana lht'oy lhech pava pu'jana nalhus. 13Pu'jana pava amc'oya nalhus pa ninaychavalh'ay ja faraón, yich'e' ti nacumjat jayu shta. Pa lhjutshey'in jayu shta pa t'iyôjatshi ja faraón jan lhjunash pa acumjayash lhapesh. 14Ca nôfiistajch'e côque pa istaa ca anaychavalhyiy. Istaa ca asfacleem ja faraón ca jaspa nitsayjat'e nôque. ¡Acavts'aclayeshyi yivaatsha! 15Yivaatsha chitsayjat'e ja lhcootsjat japi hebreos, pa niyajulhsham ti jôv'e' lha vatvanc'ocfajavte, lhayaash ti niyisnatesh pa ca sasach'e.
16C'oya ti yivanesh pa lhcaanvacleesh papi yucuve lhavos pa Josê ti is ti yashinitjatem pa yit'esha:
Yivaatsha janjujom pava pu'jana sisenlhiy yi'shi' pava climsha'ne yucuvec ti janesh'e yôtôj. 17Lhpa sisenilh janeshchishamnee pava nalhjunashvatc'oya yucuvec t'ajuya ja faraón, taj ti namey pava ajôclôs pa tuji' lhpa sisenilh janesh'e yôtôj.
18Lhechesh pa yicuulh pa Josê:
—Ca atsamaat nôque yich'e': pava pu'jana sisenlhiy lhech pava pu'jana nalhus. 19Pu'jana pava nalhus ca ninaychavalh'ay ja faraón, yich'e' ca nôcfeeshichisham lhpa aacjiyuc. Vooy pava ajôclôs tuj jayu pa asjaan.
20Pa pu'janach'e pava nalhus pa yameyshi pa lhavaatjashi pa faraón, pa yisnatesh pa uj lhclôyjayashc'oya papi lhcavos. Yiesh'e t'ajuyish papi namey tayôjijanesh pa faraón ca chinayjat'e lhpa vatvanc'ocfajavte pa lhcaanvaleesh papi yiyôjayan'in pa lhcaanvacle shi' pa lhanvacleesh papi yucuve lhavos. 21Pa lhanvacleesh papi yiyôjayan'in pa lhcaanvacle pa chiyicumjat shta. Pa yijutshey'in pa t'iyôjatshi pa faraón pa lhjunash lhapesh. 22Pa vooy pa yucuve lhavo' chiyôcfachisham pan t'ônashem pa Josê ti yashinitjatemch'e. 23Taj ti pa lhanvacleesh papi yiyôjayan'in pa lhcaanvacle nitôvacluey pa Josê.
Currently Selected:
Génesis 40: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
