San Lucas 12

Pa Jesús vanqu'eyjatsjanjulh pava niyijôach'e

1Pa lhechesh pa nayjatva'ne papi doce nivacle, pa acloj papi vat'ua. Lhech t'aplhuqu'e ti nifaclem japi t'eyjatsjanjas pa Jesús:

“Anujumatsenelhjulh ja yicap'ofinatshi yitsôt'ajesh japi fariseos, nôque yich'e' nôque vatjôts'ôclônjayash.*xc* 2Lhayaash ti ampa ca chiniistajatesh ca jaspa ninô'cla, shi' shta ca nichintô'yaa ca nichinatpeeycheyeesh jayu.*xd* 3Caju' pava lhôveshelhshi pa tulh'e' ti lhteetshelh'in, pa lhatpeeycheyeshelhshi jayu pa nalhu; pava lhasinôquielh'ôcji pava jpôyjey ti lhp'oelhey pa lhashi, lhech jayu pavôque chitônesh'in jayu ca chinanfactaj yiey pa lhcaavju. #12.1 Mt 16.6; Mr 8.15.,#12.2 Mr 4.22; Lc 8.17.

Naô pa nôv'e' papi nanjovay'in

(Mt 10.26-31)

4Napi yic'utsfas, janfaclelh'am ca ya aj ca anjovayelhem papu ca naclôntajelh, lhayaash ti tanca nasnatesh t'ôyish'e pa'na. 5Janfaclelh'am tatsha ti naô pa nôv'e' papi nanjovay'in: anjovayelhem jô lhech jan najôôcshelh jayu pa amônlhajayashelh, ti caajjop pa t'unaj ca nutajsham papu pa itôj ninmac pa cat'elheesh.

6¿Lhchenelhjulh t'e pava napu' tinshanjay pava ve'lhanôjesh ajôclôs? Taj ti ja Dios ninantôvacleey pa ca ve'lhaa. 7Yamja nava aye'selh ti ve'lha ts'ivee ti yitsjuulh lhacôm'a. Ya aj ca anjova'yelh'in; avaatsheelh t'ashelhc'oya pava ajôclôs.

Papi ninvapenesh pa Jesucristo ti yitôyjata pap'elh

(Mt 10.32-33; 12.32; 10.19-20)

8Jayeetshelh'a ti lhacôm'a papi ninvapeneshyam ti yitôyjatyiy pap'elh, yivaatsha shta, ya Nivacle Lhô'sesh, pa tanca vapeneshem ca nivantaj japi lh'ángeles ja Dios. 9Taj ti vooy papi vantanyishc'oya pap'elh nivacle, lhech papi chivantaneshem jayu japi lh'ángeles ja Dios.

10“Lhacôm'a papu ti chaya na Nivacle Lhaôs pa chiyvômjatemch'e jayu: lhan'e papi ti yinvacle'matan ja Espíritu Santo, tanca chinvômjatemch'e pa cat'elheesh.#12.10 Mt 12.32; Mr 3.29.

11“Ca lhech lhayaashtaja ca chinachaajtajelhey pava vatvanqu'eyjatsjanjavtes shi' papi tcaasclanchaysha'ne shi' papi lhcaanvaclesesh, pa ya aj ca atanapunshelh pa ca eetajeshelh ca aculhjantajelh, 12lhayaash ja Espíritu Santo ti neyjatsjaneshelhjulh jayu pava lhteetshelhjulh jayu.#12.11-12 Mt 10.19-20;Mr 13.11; Lc 21.14-15.

Suyjulh pava chi'acôseshiin

13Pa yit'esh pa ve'lha papu lhech acloj:

—Vanqu'eyjatsjan, ayôjaa ja checla' ca nanjutyiy vitsha pav'elh java shincheyjes secl'esh ca nôstsôt'ajesh.

14Taj ti yit'esha pa Jesús:

—Nivacle, ¿she papi tsisnatshelh'ajop ca yijunash'ajulh pa tcaasclanchaysha'ne, ja't'ajesha ca yijunashajulh pa lhavoesh ti yicatsônjatesh pa'na pap'elh?

15Pa yit'esh shta:

—Anujumatsenelhjulh pa vat'acôjjiyashiin, lhayaash ti pa lhamônlhajayash pa nivacle tanca nimônlhanit pant'ajôôj pava yi'van.

16Pa lhechesh pa nifaclem pava yovalheyjop atesha ti yit'esh:

“Caaj pa ve'lha nivacle acôjjiin, pa acloj pava vacalh'e pa lhcootsjat. 17Pa yaychavalh'in pa lhech acôjjiin pa yit'esh: ‘¿Naô pa yifanisheesh jayu? Lhayaash ti ampa ca yan'e jayu ca janclantajshi nava yicôvjiyanjay.’ 18Pa yit'esh: ‘Nôqueesh tsitô'yish na yifanishesh jayu. Javômjat jayu nava jajuyjata, pa jasnatesh jayu pav'elh pa us jayu, pa lhech jan'e' jayu lhacôm'a nava yicôvjiyanjay shi' nav'elh nava ja'van. 19Pa lhechesh pa jayeetsha jayu na yisôc'ôclit: Acloj nava lha'van ti lhasclansha'ne pa t'ajuya pava acloj nincôpes; pa ichay, pa atuj, pa ayô'ji, pa anshamesh.' 20Taj ti yit'esha pa Dios: ‘Naacajôyshay, nôque tulh lhavaf jayu; ¿she t'e papi yitsôt'ajesh jayu nava lha'van? 21Nôque lhjunash pa nivacle ti yaclôpjulhatam pava yi'van, taj ti vooy pa Dios ts'acla'yem.

Pa Dios vanujumatsenesh papi lhcles

(Mt 6.25-34)

22Pa yit'esha pa Jesús japi t'eyjatsjanjas:

“Ya aj ca tsishaa ca aychavalhelhac'oya pa amônlhajayashelh pa vatôc ca nimônlhanit; ca lhecha shta na avu'vat'elh, ca aychavalhshelha pava ca uyelhch'e. 23Pa vatmônlhajayash a'lheeshc'oya pa vatôc, shi' pava vat'uyjatshiyis a'lheeshc'oya shta pa vatvuvaat. 24Ovalhelhey pava ajôclôs, ninatcôvjiyanjan, ninanclanshi shta pa ca lhcôvjiyanach'a, ey ca lhecha pa ca lhajpôyich'a ca nicaajem, nilhecha shta lhpa ca nijuyjata pava ca lhcôvjiyanjaya; taj ti vooy ja Dios yijutem pa lhôc. ¡Taj ti t'aashelhc'oya pava ajôclôs! 25¿Ta yie' avaatsheelh papi lhaychavalhtajelhey ca anapshineshelh'e pa medio metro? 26Jech yijô' ti tanca natôôyshelh ca asnatshelh pava tiqu'icsha'ne, ¿Pa ta t'e lhayaash ti lhaychavalhtajelhaan pav'elh?

27“Aychavalhqueelhey ajaalh pa lhjunash pava lhavôs ti tôlhshi', ca tin'e ninatcum'in ey ca nitôftilhjan; taj ti lhech jayeetshelh'a ni lhech lhjunasha ca lhcaanvacle Salamón ti yuych'e pava isis t'uyjatshiyis a'lheeshc'oya pava lhavôs.*xg* 28Jech nôque lhjunash ti yiisiyan ja Dios lhpa yiteej, pan yie' nôqueesh pa joot taj ti vooy lhum'ashi yivutunsham jayu, ¡taj ti t'aashelh ti nuyjatshiyanelh, a'nivacleselh ti tiqu'in na niacacujayasheelh! 29Vooy avaatsheelh ya aj ca aychavalhelhey jum ca avo'tajelhey pa ôclelh shi' pa ca ayôelhshi. 30Lhayaash ti lhech lhfanishesh nap'elh yiey na cotsjaat; taj ti vooy avaatsheelh caajelh'am ja Atataelh yitô'ya pa ca suytajeshelhshiam. 31Tajulhey ca ajutsjatelh ca avoolhey ja Dios lhanvacleyash, pa chiyjutelh'am jayu pava matas. #12.27 1 R 10.4-7; 2 Cr 9.3-6.

Pa vat'acôjjiyashiin pa vôôs

(Mt 6.19-21)

32“Nava yiclôy tashinshtas, ya aj ca anjova'yelh'in; ampuelh avaatsheelh, taj ti vooy ja Atataelh yen ca nijutelh'ay ja lhanvacleyash. 33Acashayeshelh'in pava lhavanelh pa ajutelhey papi ts'aclaaysha'ne; asnatshelh pava acatinôjiyelh pavan ninc'utsjan jayu, pa vat'acôjiyashiin ja vôôs ninôjeshch'e, yiey pa ninamey jayu papi cutsjanjas, nintuj jayu shta pava caftsisjayô. 34Pava lhech ti aacôsshelhshiin pa lhech yie' jayu shta pava acachiclelh.

Tajulhey ca avatjumteelh'in

35“Avatjumteelh'in ca atujatelhey pava avitôtaselh.*xh* 36Ajunasheelhjulh papi vatcavos ti vatjumtic'oya pa lhanvacle ti tôlhey pa vatajayayash. Ca namtajey pa nipôcôjey pa lhashi pa nanc'at'eyc'oya tatsha.*xi* 37Nishamitjat papi lhcavos pa lhcaanvacle ca nivantaj ca ninamôtajach'esha'ne. Yijô' na jayeesh pa lhech lhanvacle ti vataasclanesha'ne pa lhclô'vat pa yiyôjaa papi lhcavos ti yielhch'elhavooj pa lhtsaccunjavat pa yitsjulheem pa vatôc. 38Yamsha ca nam ca jonshajaesh ja't'ajesha ca clasim'ach'e pa tulh ca nivan ca ninmôach'esha'ne pa chinshamesha papi lhech vatcavos. 39Taj ti natôôyshelh cavôque, ca nitôôytajesh pa jpôyich lhanvacle pa t'aplhu' ti nam jayu pa cutsjanaj, pa tanca namôc'oya, pa tanca nancat'ey pa lhashi pa lhajpôyich ca natcuteem. 40Avaatsheelh shta tajulhey ca avatjumteelh'in; lhayaah ti nam jayu na Nivacle Lhaôs ca niaychavalhtajeelhc'oya.#12.35 Mt 25.1-3.,#12.36 Mr 13.34-36.,#12.39-40 Mt 24.43-44.

Pa vatcavo yivo'yeshch'e pa lhfanishlhavach shi' paelh ninvo'yeshch'e

(Mt 24.45-51)

41Pa lhechesh pa niyôsesh ja Pedro pa yit'esh:

—Lhcaanvacle, ¿lhasnatshelhyam cavôque lhovalheyjop atesha, ja't'ajesha ca lhacôm'aa nap'elh?

42Yit'esh pa Lhcaanvacle:

—¿She t'e papi vancaclôvalh ti yivo'yeshch'e jum ti tcajôyshay ti yiclôvalhchiyinesh pa lhanvacle papi yie' pa lhajpôyich pa tcufa'yesh pa vatôc ti yameyjop pa lhnônashesh? 43Yishamitjat pa lhcavo pa lhcaanvacle ti namey ti yi'van ti yisnatesh pan t'ônashem. 44Yijô' nava jayeesh, pa lhcaanvacle yinvacleyanesh pa lhcavo lhacôm'a pava yi'van. 45Taj ti ca naychavalhtajeyc'oya pa lhech lhcavo pa lhcaanvacle ti tanca nam jayu tatsha, pa lhechesh pa yapjayanvatsham'in pap'elh lhcavos shi' papi lhcavoquey, vooy lhavaatsha tsaccun shi' ti yiyô' pa yetsej shta. 46Pa lhechesh pa tapecshi jayu pa lhanvacle pa nalhu ti ninvatjumtic'oya pa lhcavo, pan t'elhesh ti nitavacluc'oya; pa lhechesh pa uj ti yitsô'yeem'in jayu, lhayaash ti ninvooyshemch'e pa lhech nivacle.

47“Pa vatcavo ti yitôôytajesha pan t'ônash pa lhanvacle, taj ti ninanc'ashamesh, pa lhechesh pa chiyclôyit jayu pa uj ti chiyc'ôn'in. 48Taj ti vooy pa lhcavo nintôôysha pa yisnatesh pava niysisa, pa tiqu'in'esh ti chiyc'ôn'in. Papi acloj pava yijutem, pa acloj vitsha pava chit'aalhsha; papi acloj pava chinujumatsenjayantajesh pa acloj vitsha pava chiyachajc'oya.

Tô'lha pa Jesús ti yicatsônjat papi yiey na cotsjaat

(Mt 10.34-36)

49“Janam pa jalhôn'apee na cotsjaat pa itôj; ¡uj ti jayeetajesh ca p'alha ca nôquesh! 50Tajulheyyam ca chinasc'alhtanesh pa vatnayjayash, ¡pa uj ti chitsiclôyitesh jayu pa ca nôjtaj'e!*xk* 51¿Lheclôjtajeshelh avaatsheelh ca nichaaj pa vataasclanjayashvatjulh yiey na cotsjaat? Jayeetshelh'a ti am, vooy ca chinacatsônjatelh. 52Lhayaash ti nôqueeshch'e shi' pav'elh nalhus, papi ve'lhanôjeshsham jayu pa t'ajôôjjam pa vanicatsônjat jayu, papi pu'jana t'ajuyjulh jayu papi napu', vooy papi napu' t'ajuyjulh jayu papi pu'jana. 53Pa vatata t'ajuyjulh jayu pa lhaôs, pa vataôs t'ajuyjulh pa lhtata; lhpa vatamimi t'ajuyjulh lhpa lhôse, shi' lhpa vatôse t'ajuyjulh lhpa lhamimi; lhpa vatcact'e t'ajuyjulh lhpa lhtômtee, lhpa vatômtee t'ajuyjulh lhpa lhcact'e.#12.50 Mr 10.38.,#12.53 Mi 7.6.

Chinôôclhanita pa lhjunash jayu pava nalhus

(Mt 16.1-4; Mr 8.11-13)

54Pa yit'esha shta pa Jesús papi lhech nivacle:

—Meelh ti lhavanelhjulh pava vosey ti tôlhey na nuutch'e, lhechesh pa lhteetshelh nam jayu pa tsha'nu, pa lhech jayu lhjunash. 55Pa vooy ti tanu' pa lhaviim tôlhey fiyat, pa lhteetshelh ti cus jayu nôqueesh, pa lhech lhjunash shta. 56¡Ajôts'ôclônjanjaselh! Natôôyshelh ti yalhatajesh pa lhjunash na vôôs shi' na cotsjaat, ¿ta t'e lhayaash ti naaychavalhelhey nava vaclan navôque nalhus?

Asclanjulh pa niac'utsfaa

(Mt 5.25-26)

57“¿Ta t'e lhayaash ti ni avoolhey avaatsheelh ca avatvoyjateshelhch'e? 58Vooy ca nanaactajey pa niac'utsfaa pa lhcaanvacle, pa asclaneelhvatjulh tatsha yiey pa nôyish, jaspa tanca nacha'jey pa tcaasclanchaysha'ne; lhayaash ti lhavaatsha yijut'ay jayu papi lhcavos, vooy papi lhech nachaj'ôcji jayu lhpa vatvanc'ôcfajayte. 59Jayeesh'a ti tanca ay'ôcji jayu amjey ca amtaj'apee pa yôj'esha'ne pa apiô.

Currently Selected:

San Lucas 12: NIVA

Highlight

Copy