San Lucas 19

Pa Jesús shi' pa Zaqueo

1Pa lhechesh pa yamey pa Jesús ja Jericó pa yitshaam ja yitsaat, 2lhech yie' caaj pa ve'lha nivacle acôjjiin pa lhey Zaqueo, pa lhech chinvacleyanjop papi yivoyanesh pava lhpesoc pa lhanvacle. 3Côque Zaqueo yit'esh ca nivan pa Jesús jaspa nitôfaclesh jayu, taj ninvaneyshi, lhayaash ti tiqu'in lhavaatsha pa lhavôôj, lhayaash ti acloj papi tanaôycheelh. 4Pa lhechesh pa vacumajey t'ajuyish pa yama lhpa sintsitsuuc pa vôlhch'ejop jaspa yi'van, lhayaash ti lhech nash'e jayu pa Jesús. 5Meelh ti yam'ôcji pa Jesús pa yovalheychisham pa yit'esh:

—Zaqueo, ecletsha'ne clap, ca shnôquey pa ajpôyich.

6Pa lhechesh pa lhfanishlhavach'in ti t'eclatsha'ne pa Zaqueo, pa nishamesh ti t'acuumjulh pa Jesús. 7Meelh ti yi'van côque pa yic'aclanshem lhacôm'a pa yit'esha ts'ivee ti seec ca nôquelhey na Jesús ja lhajpôyich na sasch'e lhavo'. 8Pa lhechesh pa nitshaam pa Zaqueo pa yit'esha pa Lhcaanvacle:

—A'va, Lhcaanvacle, jacatsônshelh jayu japi ts'aclaaysha'ne nava ja'van; vooy japi jaycuteem lhapesh c'ashjatem jayu ca yichatjulheesh ts'ivee pava jajutey.

9Pa yit'esha pa Jesús:

—Nôqueesh namey na vatqu'ilhjenjayash nôque jpôyich, lhayaash nôque nivacle lhaôs shta ja Abraham. 10Lhayaash ti janam ya Nivacle Lhô'sesh jaspa javooy papi tastay'in pa c'alhjen.#19.10 Ez 34.16;Mt 18.11.

Na vatovalhjayasheyjop pava napu'nôjesh uj ti tashaay tinshanjay

(Mt 25.14-30)

11C'oya ti tach'ansha papi nivacle cavôque, pa yit'esh shta pa Jesús pa vatovalhjayasheyjop, lhayaash ti palha yujeey ca ninamey ja Jerusalén, pa yaychavalhey ts'ivee ti shalhac'oya ca ninamey pa Dios lhanvacleyash.*xt* 12Pa lhechesh pa yit'esh: #19.11-27 Mt 25.14-30.

“Caaj pa ve'lha nivacle is pat'ajôôjjam, pa yichey pa tojey yitsaat, jaspa chinvacleyan'e, c'oya pa t'elhesh pa yit'esh ca natpectajshi jayu. 13Yujeey ca nôc pa tôney papi napu'nôjesh lhcavos pa yijutey pava ve'lha ts'ivee pesoc uj ti tashaay, pa yit'esh: ‘Jajutelh'ay navôque pesoc, taj ti uyjatelh'ôcji pava matas pa amjelhey ca jatpectaj.’ 14Taj ti papi lhchifas yapun pa yichench'e tatsha pap'elh jaspa nifaclem pan yit'esh: ‘Niyit'eshelh ca yinvacleashelh nôque nivacle.’ 15“Taj ti pan chinvacleyan pa lhechesh pa vapecley pa lhavtsaat. Meelh ti yamey pa lhajpôyich pa tayôjijanesh papi lhcavos ca ninachey, papi lhech yijutey lhapesh pava lhpesoc, jaspa nivan pava chiyashjat'apeeen pavan chive'lhan'e ts'ivee. 16Pa nam pa vatjutsa' pa yit'esh: ‘Lhcaanvacle, lha atinshanja yaash nava napu'nôjesh nat'ajôjqu'e.’ 17Pa yicuulh pa lhcaanvacle pa yit'esh: ‘Tajulhey ti a is yicavo: t'ôfisjach'e java napu'qu'e, c'asnatesh ca alhcaanvacleaesh java napu'nôjesh yitsates.’ 18Pa nam pa'elh pa yit'esha: ‘Lhcaanvacle, lha atinshanja yaash nava ve'lhanôjesh nat'ajôjqu'e.’ 19Pa yicuulh shta pa yit'esh: ‘Vooy avaatsha alhcaanvacleaesh java ve'lhanôjesh yitsates.’ 20Pa nam shta pa'elh pa yit'esh: ‘Lhcaanvacle, anôque atinshanja. Jasclansha'ne'am janshi' na vatôc'ôcle lhaôs; 21Ts'ijovay'am, lhayaash ti nat'un'in, lhant'ôqu'e' nava na an'e', lht'ovôseshch'e na niacôvjiyanach'a.' 22Pa lhechesh pa yit'esh pa lhcaanvacle: ‘Av'ojey yicavo, qu'ivalh'a jayu cava lhteesh'in. Natô'yish ti tsit'un'in, ti jantôqu'e' nava niyan'e', jat'ovôseshch'e shta na niyicôvjiyanach'a, 23¿ta lhayaash t'em ti naacumesh'in lha yitinshanja ca ja'van pava chiyashjat'apee nôqueesh ti jatpecley na yijpôyich?’ 24Pa lhechesh pa yiyôjeesha papi lhech yielh'e pa yit'esh: ‘Anjôcleshelh lha tinshanja pa ajutelhey nan caajem nava napu'nôjesh.’ 25Pa yit'esha ts'ivee: ‘Lhcaanvacle, apis ti caaj nava napu'nôjesh, ¿pa ta lhayaash ca chinjutey pav'elh?’ 26Pa yicuulh pa Lhcaanvacle pa yit'esh: ‘Jayeetshelhaam, papi ti p'alha ti caajem pa chiyjutey jayu shta; lhan'e vitsha papi amemc'oya pa chinjôclesh jayu shta pa yi'tajop.*xu* 27Vooy papi niyic'utsfasaesh papi ninteetajesh ca niyalhcaanvacleaesh, anchajelh ca aclônelh'e yijuyish.’ #19.26 Mt 13.12; Mr 4.25; Lc 8.18.

Pa Jesús yitshaam pa Jerusalén

(Mt 21.1-11; Mr 11.1-11; Jn 12.12-19)

28Meelh ti yivaclhitesh cavôque ti yasinôqui, pa yichey pa Jesús ja Jerusalén. 29Meelh ti yujeey ts'ivee java yitsates Betfagé shi' ja Betania, shalheema lhja utiyuc yiey ja Olivochat, lhech'e ti yichen pa Jesús japi napu' t'eyjatsjanjas, 30pa yit'esh ti yiyôjaa:

—Alhunelhey ja yitsaat ti shalhee, meelh ca amtajelha pa lhech lhavanelh'e jayu pa ve'lha cuvôyutaj lhaôs ti vanôôcfa. Jô lhech jôjjeclay nichinôv'apee; anuqueeshelh pa anchajeelhnee. 31Ca nicaajtaj papu ca naniyôstajeshelh ca anuquetajshelh, pa at'eshelh: Suyshemshi ja Lhcaanvacle.

32Pa yich'in japi t'eyjatsjanjas pa yi'van lhacôm'a pa t'ônashem pa Jesús. 33Meelh ti nuqueesh pa cuvôyutaj, pa niyôsesh papin yitsôt'ajesh:

—¿Ta lhayaash ti lhnuqueeshelh na cuvôyutaj?

34Pa yicuulh ts'ivee pa yit'esh:

—Lhayaash ti suyshemshi ja Lhcaanvacle.

35Pa lhechesh pa yitojoneshey pan yie' pa Jesús, pan yan'apee pava t'uyjatshiyis pa cuvôyutaj pa yit'u'apee pa Jesús. 36Meelh ti yich pa Jesús, pa lhechesh pa yich'aneshch'ec'oya pava t'uyjatshiyis pa nôyish. 37Meelh ti yujaa ja tanjuy'eshicham lhja utiyuc yiey ja Olivochat, lhacôm'a papi nicacunajasa papi tanaôycheelh tônesh'in ti nishamesh ti yôclôj pa Dios, lhayaash ti tôlh'ejop pava lhasnôyjes ti yi'van ti yisnatesh pa Jesús. 38Pa yit'esh ts'ivee:

—¡Shtôclôj na lhech Lhcaanvacle ti nameshjooy pa lhey pa Lhcaanvacle! ¡Chiyisclanvatjulh ti yiey pa vôôs, pa chiyôclôj pa Dios!#19.38 Sal 118.26.

39Pa lhechesh pa caaj papi napu' fariseos yichenshi papi tanaôycheelh pa Jesús, pa yit'esh ts'ivee:

—Vanqu'eyjatsjan, istaa ca ayôjaa napi lhtanôycheelh ca canoach'enshi.

40Taj ti yicuulh pa Jesús pa yit'esh:

—Jayeetshelh'am, ca cano'tajach'enshi napuque, pa nitonvatsham'in jayu nava utes.

41Meelh ti shalheema pa yivansham ja yitsaat Jerusalén pa yip'in pa Jesús, 42pa yit'esh:

—¡Ca nataôytajeshelh nôque nalhu pava suyshelhshiam pa jaspa chinasclaneelhvatjulh! Taj ti nôqueesh chiyicapinatey'am jaspa tanca avan. 43Nam'ay jayu pava nalhus niyisisa, pa caaj jayu papi naac'utsfasa pa yisnatesh jayu pa t'afaych'eavôôj, pa tiyôjqu'e avôôj jayu, 44pa chinavômjat jayu shta. Chiyiclôn jayu lhacôm'a napi yiatshi, nichinmônlhanit'e jayu pava ca napuach'e pava utes, lhacôm'a jayu ti chiyivômjat; lhayaash ti naantôfa'clesh tatsha ti nach'ay ja Dios.

Pa Jesús yisclanvatich'e pa vatishjanjavat

(Mt 21.12-17; Mr 11.15-19; Jn 2.13-22)

45Pa lhechesh pa yich'ôcji pa Jesús ja vatishjanjavat, pa yisaasfach'ee lhacôm'a papi lhavcashanjas shi' papi tcashaytaj'in, 46pa yit'esha:

—Yit'esh avenna nava Vani'sesh'e: ‘Na yijpôyich vat'alhjavat'esh', lhan'e avaatsheelh lhjônelhch'e lhpa lhôvjôque' papi vôncaclônjanjas.’*xw* #19.46 Is 56.7.,#19.46 Jer 7.11.

47Lhacôm'a java nalhus vanqu'eyjatsjan'ôcji ja vatishjanjavat pa Jesús; taj ti papi vatcasinôc lhanvacles shi' papi vanqu'eyjatsjanesh pava lhfanishlhavach shi' shta papi lhcaanvacles yaychavalhtajey pa ca lhfanisheesh ca niclôn.*xy* 48Taj ti ninvanjop pa ca lhfanisheesh, lhayaash ti acloj papi nivacle yen ti tach'ana. #19.47 Lc 21.37.

Pa t'unaj pa Jesús

(Mt 21.23-27; Mr 11.27-33)

Currently Selected:

San Lucas 19: NIVA

Highlight

Copy