Zhan 5

Zhezü kɔrɛ ɔkpɔ̀cɔ-wrɔn tɔ̀n

1Ndɔ lɔ mɛẅi, Zhüifɛ̀n-bɔ̀ kɛ nyanmán Ɔwɔ-wɔn koran tɔ̀n kɩ Zhezü hɔ́n Zherüzalɛmɛ̀n anmàn. 2Anmàn ndɔ lɔ mɛ̀n, ɛyri léyi ye bi “kɔ̀kɔ̀sɛ̀ gbàtà” nɔn, n'ɛtɛ̀sɛ̀n, ɛnshi-jrɔ́-yri tɔ̀n ndù hɩ mán angbàtà ɛnlevri ɛnrì léyi ẅɛn ɛbù-hi-nan nɔn; ɛyri lɔ, ye bi nɛ̀n: “Ɛnhyɔ̀bɔ̀-nyri wɔn” (Ebre mɛ̀n yɛ dɔ̀ le: “Bezàta”). 3Angbàtà-levri ndɔ hɔ̀n lɔ mɛ̀n, ɛnlɔẅiɛ-bɔ̀ bobrebe dɛ́: anvɛ̀-bɔyɛ-bɔ̀, annan-yɔ-bɔ̀, ɔkpɔ̀cɔ-bɔ̀. [Yɔ vrá ɛnshi lɔ kɛ̀ jɔ̀kɔ̀; 4ɔmuhi ɛnvra janbɔ̀ kɛ cɔ̀ hô, Ɔwɔ-kùyüre-wrɔn tɔ̀n kɛ kakɛ ɛnshi lɔ mɛ̀n kɩ kɛ hán nɛ̀n nɛ jɔ̀kɔ̀. Kpàkpà lɔẅiɛ-wrɔn léyi ke bru ɛnshi lɔ mɛ̀n ɛnvra léyi yɛ jɔ̀kɔ́ nɛ̀n nɔn, ɛnlɔẅiɛ-wrɔn ndɔ lɔ kɛ cɔ́ ɔkɔrɛ̀ ɛnlɔẅiɛ hɔ̀n lɔ fɛn wú.] 5Nanvrɛn lɔ, ɛnlɔẅiɛ-wrɔn tɔ̀n ndù; n'ɛnlɔẅiɛ lɔ di ɛnnanwàn kru ɛẅia-ɛvà-eẅirì. 6Ɛnvra léyi Zhezü kán nɛ̀n nɛ̀n dɛ́, hɩ nyri ɔmu le nɛ́n gɔ̀ dú ɛnlɔẅiɛ mɛ̀n ɛnvra sheshemɛ̀n nɔn, ne yrɛ yi le: “E ji ɛ̀ kɔrɛ̀a?” 7Ɛnlɔẅiɛ-wrɔn lɔ mrɛ́n nɛ̀n ɔmùan le: “Ankà-yé-wrɔn, mɛ̀n sɩ̀ ẅɛ̀n ɔwrɔn zriɛmɛ́n hɩ ká ẅɛn mɛ̀n kè di ɛnshi-jrɔ́-yri lɔ, ɛnvra léyi ɛnshi lɔ kɛ jɔ̀kɔ̀ nɔn; ɛnvra léyi mɛ bɔ́sɔ́ m'edomɛ̀n, ô mɛ̀n bru ɛnshiemɛ̀n nɔn, ɔwrɔn nyantɛn kɛ hɛ́ mɛ̀n ezì.” 8Zhezü kɛ dɔ́ nɛ̀n le: “Tɔhú, bɩ v'ɛnpkà lɔ, ô nán esù.” 9Kpatakpata lɔ, ɔwrɔn lɔ kɔrɛ̀; nɛ̀n bɩ́ n'ɛnkpà lɔ kɩ nɛ̀n bukru nɛ nán esù. Tɛ́n, ɔmuhi eci ndɔ lɔ wɔɛn ɛnyanmán-bì lɔ mɛ̀n nɔn, 10Zhüifɛ̀n-bɔ̀ cüìcüì hɔ̀n kɛ dɔ́ ɔwrɔn léyi cɔ́ ɔkɔrɛ̀ nɔn le: “Ɛnyɔncì lɔ dú ɛnyanmán-bì, kɩ bɔ́ ɛnyanmàn lɔ ke sɩ́ wá tán mɛ́n é bɩ́ v'ɛnkpà lɔ.” 11Nɛ́n mrɛ́n yɔ ɔmùan le: “Ɔwrɔn léyi kɔrɛ mɛ̀n nɔn, dɔ́ mɛ̀n le: ‘Bɩ v'ɛnkpà lɔ, ô nán esù.’ ” 12Zɛtɛn yɔ yrɛ nɛ̀n le: “Antɔn de dɔ́ mɛ́n le: ‘Bɩ v'ɛnkpà lɔ, ô ɛ̀ nán esù nɛ́n’?” 13Tɛ́n ɛnlɔẅiɛ-wrɔn lɔ kè sɩ̀ nyrì ɔwrɔn léyi dɔ́ nɛ̀n ankà lɔ nɔn, ɔmuhi Zhezü tɛn zrɛ́n fɛcüè léyi bɔrɛkru nanvrɛn lɔ nɔn n'anwanzi.

14Ɛnvra vacì, Zhezü cɔ́ ɛnlɔẅiɛ-wrɔn lɔ Ɔwɔ-cice-wɔn lɔ mɛ̀n kɩ kɛ dɔ́ nɛ̀n le: “È die nukùɛ; zɛtɛ̀ lɔ ɛ kɔrɛ̀a. E bɩ́ vru hán ɛgbàn, ô ankà nyantɛn ke vru kɛ vá mɛ́n edomɛ̀n ke sevriɛ.” 15Ɔwrɔn lɔ hɔ̀n kɩ kɛ dɔ́ Zhüifɛ̀n-bɔ̀ cüìcüì hɔ̀n le, Zhezü de kɔrɛ nɛ̀n nɔn. 16Zɛtɛn yɔ bɩ́ ankà yɔ cɔ́ Zhezü ɔmuhi nɛ̀n kɔrɛ ɛnlɔẅiɛ-wrɔn ɛnyanmán-bì lɔ mɛ̀n nɔn. 17Tɛ́n Zhezü mrɛ́n yɔ ɔmùan le: “Dade Ɔwɔ kɛ hán ɔkɔhɔ̀n ɛnvra lɔ fɛn kɩ mɛ̀n mán mɛ̀n dú ɔkɔhɔ̀n hán mɛ̀n.” 18Zhezü ankà-dɔ̀ ndɔ lɔ kruhú de Zhüifɛ̀n-bɔ̀ cüìcüì hɔ̀n vru ke ji ɛyri kè wri nɛ̀n nɔn; ɔmuhi nɛ̀n hán eci léyi ɛnyanmán-bì ke sɩ́ nɔn, tɛ́n nɛ̀n vru nɛ́n dɔ̀ le Ɔwɔ dú nɛ́n zi ebî-wrɔn, kɩ ne bɩ́ n'edomɛ̀n nɛ krɔn Ɔwɔ.

Ɔwɔ Ẅì kɔrɛ̀levri

19Zhezü vru bɩ́ ankà-dɔ̀ kɩ kɛ dɔ́ yɔ le: “Hɛ̀ɛ̀ mɛ dɔ́ nyɛ̀n le: Ɛnẅì lɔ ke sɩ́ hán eci zriɛmɛ́n nɛ́n dùku n'ɛkɔrɛ̀levriemɛ̀n; nɛ hán eci léyi nɛ kán nɛ́n zi kɛ hán nɔn. Eci lɔ fɛn léyi Ɛnẅì-nɛ́n-zi kɛ hán nɔn, Ɛnẅì mán kɛ hán eci zri lɔ. 20Ɔmuhi, Ɛnẅì-nɛ́n-zi kɛ cüɛ́n Ɛnẅì kɩ ke yé nɛ̀n eci léyi nɛ́n dùku nɛ hán nɔn. Ne le yé yi ɔkɔhɔ̀n-hán ke le sevri vrán ndɔ hɔ̀n léyi nɛ̀n hán, kɩ nye le dú anvɛmɛ̀n-frɛ́n-mɛ̀n. 21Ɔmuhi, ɔmu zri léyi Ɛnẅì-nɛ́n-zi kɛ hán owú-bɔ̀ kɛ vá ɔkɔrɛ-bɔ̀ mɛ̀n nɔn, hɩ zri lɔ Ɛnẅì mán kɛ tán ɔkɔrɛ̀ anwrɔn hɔ̀n léyi ne ji nɛ̀n tán nɔn. 22Kɩ Ɛnẅì-nɛ́n-zi ke sɩ́ ci ɔwrɔn zriɛmɛ́n ɛmrɛ̀n, tɛ́n nɛ̀n tán Ɛnẅì ɛkɔrɛ̀srɔn lɔ fɛn kè ci ɛmrɛ̀n, 23ô anwrɔn lɔ fɛn kɛ ẅɛn Ɛnẅì wá kɛ hán ɔmu le yɛ wá Ɛnẅì-nɛ́n-zi nɔn hɔ́. Ɔwrɔn léyi ke sɩ́ wá Ɛnẅì lɔ nɔn, nɛ́n sɩ́ wá Ɛnẅì-nɛ́n-zi léyi wá Ɛnẅì ɔkɔ̀hɔ̀n nɔn.”

24“Annanwɔrɛ mɛ̀n mɛ dɔ́ nyɛ̀n le: Ɔwrɔn léyi ke die m'ankà-dɔ̀ nukùɛ, hɩ ke bú ɔwrɔn léyi wá mɛ̀n ɔkɔ̀hɔ̀n, n'ankà kɛ tán ankaẅì nɔn, ɛwúvà léyi ke sɩ́ trɔa nɔn dú nɛ tɛn. Ye sɩ̀ bɔ́ nɛ̀n nwù, tɛ́n ne le dú owú-bɔ̀ mɛ̀n, nɛ̀n wrɔ̀ vá ɔkɔrɛ-bɔ̀ mɛ̀n. 25Annanwɔrɛ mɛ̀n mɛ dɔ́ nyɛ̀n le: ɛnvra dù kɛ và, kɩ ɛnvra lɔ mán cɔa, owú-bɔ̀ kɛ lɛ yá Ɔwɔ Ẅì sùva, kɩ anwrɔn hɔ̀n léyi kɛ lɛ yá esùva lɔ nɔn, ke le dú ɔkɔrɛ mɛ̀n. 26Ɔmuhi, ɔmu zri léyi Ɛnẅì-nɛ́n-zi ẅɛn ɛkɔrɛ̀-srɔn kɛ tán ɛwúvà nɔn, ɔmu zri lɔ de nɛ̀n tán Ɛnẅì mán ɛkɔrɛ̀srɔn kɛ̀ tán ɛwúvà nɔn. 27Kɩ nɛ̀n tán Ɛnẅì ɛkɔrɛ̀srɔn kè ci ɛmrɛ̀n, ɔmuhi Ɛnẅì lɔ dú ɔwrɔnẅì Ẅì nɔn. 28Ke bɩ́ frɛ́n nyɛ̀n anvɛmɛ̀n, ɔmuhi ɛnvra kɛ và, kɩ owú-bɔ̀ lɔ fɛn kɛ lɛ yá n'esùva, 29kɩ ke le dú ɛnnanmàn mɛ̀n kɛ lɛ srɔ. Anwrɔn hɔ̀n léyi hán anvrɛn nɔn, kɛ lɛ frɔ́ ô kɛ̀ cɔ́ ɛwúvà; tɛ́n anwrɔn hɔ̀n léyi hán ɛgbàn nɔn, yɔ mán yɔ lɛ frɔ́, ô yɔ cɔ́ y'ɛgbàn-hán-wɔɛ̀n-dì.”

Ɛyri léyi Zhezü kɔrɛ̀levri lɔ dù kɛ và nɔn

30“Mɛ́n sɩ̀ hán eci zriɛmɛ́n rɔ́ m'ɛkɔrɛ̀levriemɛ̀n. Me ci ɛmrɛ̀n ankà léyi Ɔwɔ kɛ dɔ́ mɛ̀n nɔn yi wú kɩ m'ɛmrɛ̀ncì lɔ nyrɔn, ɔmuhi mɛ́n sɩ́ hán eci léyi me ji nɔn, tɛ́n, mɛ hán eci léyi ɔwrɔn léyi wá mɛ̀n ɔkɔ̀hɔ̀n, ke ji nɔn. 31Ke dú kɛ me di m'edomɛ̀n dalɛfuɛ hô, ankà léyi mɛ dɔ̀ nɔn, ke sɩ̀ dú annanwɔrɛ. 32Tɛ́n, ɔwrɔn nyantɛ̀n de ke di mɛ̀n dalɛfuɛ kɩ me nyri ɔmu le, ankà léyi nɛ dɔ́ m'ɛwú nɔn dú annanwɔrɛ. 33Nyɛ́n wá anwrɔn ɔkɔhɔ̀n Zhan yri kɩ nɛ̀n di dalɛfuɛ annanwɔrɛ mɛ̀n. 34Mɛ tɛn mɛ́n sɩ́ ji ɔwrɔn ke di mɛ̀n dalɛfuɛ; tɛ́n mɛ dɔ́ ɔmu lɔ tɛ̀kɩ, ô nyɛ́n cɔ́ ebɩ̀die. 35Zhan dù hán kɛniɛn léyi yɛ dɔ̀n hɩ kɛ kán ɛyri, kɩ nyɛ́n cüɛ̀n le, nyɛ́n brá pɔpüɛ̀ ɛnvra cá, n'ɛyri-kàn lɔ mɛ̀n. 36Tɛ́n mɛ̀n ẅɛn dalɛfuɛ-dì tɔ̀n sevri vrán Zhan tɛn lɔ: Ɛci hɔ̀n léyi mɛ hán, ndɔ hɔ̀n léyi Dade tán mɛ̀n mɛ̀n hán nɔn, kɛ dɔ́ m'ankà anvrɛnvrɛn kɩ ke yé tán le Dade wá mɛ̀n ɔkɔhɔ̀n. 37Kɩ Dade léyi wá mɛ̀n ɔkɔhɔ̀n nɔn mán kɛ dɔ́ m'ankà anvrɛnvrɛn. Ɛnbì zriɛmɛ́n nyɛ vá yá n'esùva, kɩ ɛnbì zriɛmɛ́n nyɛ vá kán n'ezì. 38Nyɛ́n sɩ́ ẅɛn n'ankà-dɔ̀ nyɛ́n hɛ́n hán, ɔmuhi nyɛ́n sɩ́ bú n'ɔkɔhɔ̀n-wá-wrɔn ankà nyɛ́n tán ankaẅì nɔn. 39Nyɛ hán Ɛwrú Prɔnprɔn kɔhɔ̀n, ɔmuhi nye tro le n'ɛmɛ̀n lɔ, nyɛ lɛ cɔ́ ɛwúvà léyi ke sɩ́ trɔa nɔn: yɔde annànwɔrɛmɛ̀n lɔ yɔ dɔ́ m'ankà nɔn! 40Ɔmu tɛ̀ kɩ nyɛ́n sɩ́ ji nyɛ́n vá m'eyri, ô nyɛ́n cɔ́ ɛwúvà annànwɔrɛ.”

41“Mɛ́n sɩ́ ji ɛmrɛ́n léyi ke dú anwrɔnẅì yri kɛ và nɔn. 42Tɛ́n, mɛ̀n nyri nyɛ̀n: mɛ̀n nyri ɔmu le nyɛ́n sɩ̀ ẅɛ̀n Ɔwɔ cüɛ̀n. 43Mɛ̀n vá Dade bemɛ̀n kɩ nyɛ́n sɩ́ ji nyɛ́n bɩ́ mɛ̀n. Tɛ́n, ke dú kɛ ɔwrɔn nyantɛn tɔ̀n kɛ vá nɛ́n dùku n'ɛkɔrɛ̀-levriemɛ̀n, nye le bɩ́ nɛ̀n! 44Nyɛ cüɛ́n ɛmrɛ́n léyi ke dú nyɛ́n dùku ny'edomɛ̀n kɛ và, kɩ nyɛ́n sɩ́ ji ɛmrɛ́n léyi ke dú Ɔwɔ yri zri kɛ và nɔn. Anwɔntan de nyɛ lɛ hán, ô nyɛ́n bùtan ankaẅì nɛ́n? 45Tɛ́n nyɛ́n bɩ́ tro le, mɛ lɛ bɔ́ nyɛ̀n nwù Dade zìwú. Mohizì de kɛ bɔ́ nyɛ̀n nwù, nɛ́n léyi nyɛ́n bɩ́ ny'esɛ́ lɔ nyɛ́n wá nɛ̀n ɛmɛ̀n nɔn. 46Ke dú kɛ annanwɔrɛ mɛ̀n nyɛ́n bú Mohizì ankà nyɛ́n tán ankaẅì hô, nye le bú m'ankà mán nyɛ́n tán ankaẅì, ɔmuhi ankà ndɔ lɔ, nɛ̀n merɛ́n yi m'ɛkruhú nɔn. 47Tɛ́n, ɔmuhi nyɛ́n sɩ́ bú ankà léyi Mohizì merɛ́n, nyɛ́n tán ankaẅì nɔn, anwɔntan de nyɛ́n le bú m'ankà-dɔ̀ nyɛ́n tán ankaẅì nɛ́n?”

Currently Selected:

Zhan 5: ƐAA03

Highlight

Copy