Lükɛ̀n 5

Zhezü ke bɩ́ ɛnvrakpà sɛnkɛn-bɔ̀

(Nyɛ́n nyan Markɛ̀n 1:16-20 wrú lɔ mɛ̀n)

1Ɛnbì tɔ̀n Zezü nyɔn Zhenezarɛtɛ̀n nɛnbà cɛ gbàtà muàn, kɩ fɛcüè gbrɛnkɛn nɛ̀n ɔmuan ô kɛ̀ yá Ɔwɔ mùan ankà. 2Nɛ̀n kán anhàka anhyrɛ̀ ɛnshi gbàtà mùan: Ɛnshiemɛ̀n-kɔhɔ̀n-hán-bɔ̀ dú yɔ ɛmɛ̀n kakɛ, ke juru y'ɛdàn. 3Zhezü bru anhàka tɔ̀n mɛ̀n, Simɔn anhàka lɔ, kɩ nɛ sɛ́n yi kɛ wɔ́ ɛvrà kɛ̀ hɔ́n ɛwú jan. Zhezü ci anhàka lɔ mɛ̀n yɛ́, kɩ ke yé fɛcüè ankà.

4Ɛnvra léyi nɛ̀n dɔ́ ankà trɔ nɔn, nɛ dɔ́ Simɔn le: “E sɩ́ anhàka lɔ esùshe ɛyri léyi ɛnvrɛ̀n ndú nɔn, zɛtɛn vɛ́n mán ɛnyran hɔ̀n mɛhi nyɛ́n die ɛdàn lɔ.” 5Simɔn kɛ dɔ́ Zhezü le: “Ankà-yé-wrɔn, bɔ̀ kán ɛgbàn ɛnnyran mùmù lɔ fɛn, bɔ̀ sɩ̀ ẅɛ̀n eci zriɛmɛ́n, tɛ́n ɔmuhi ɛ dɔ̀ le mɛ̀n hán nɔn, me le die ɛdàn lɔ.” 6Yɔ die ɛdàn lɔ kɩ yɔ ẅɛn ɛcàn cüɛn, hàn mán y'ɛdàn lɔ bukru kɛ shà. 7Zɛtɛn yɔ bi yɔ nyran hɔ̀n léyi dú anhyrɛmɛ̀n anhàka lɔ mɛ̀n nɔn, kɛ̀ và kɛ̀ wá yɔ ɛkɔrɛ̀. Yɔ nyran hɔ̀n lɔ nvà kɩ bɩ́ ɛcàn yɩ́ anhàka anhyrɛ̀ lɔ, hàn mán, anhàka hɔ̀n lɔ kɛ hɔ́n ɛnshiemɛ̀n trɔ. 8Ɛnvra léyi Simɔn Piɛrɛ̀n kán ɛci lɔ wɔɛ̀n nɔn, nɛ̀n shɛ́n Zhezü ezìwú annankruemɛ̀n kɩ nɛ dɔ̀ le: “Ɛ̀ sɔnhɔ́n ɛmɛẅi esù she m'ɛtessɛ̀n Ɛẅɛnwrɔn, ɔmuhi mɛ̀n dú ɛgbàn-hán-wrɔn nɔn!” 9Simɔn ɛnjansù bru, nɛ́n mán n'anwrɔn hɔ̀n mɛhi. Ɔmuhi ɛcàn lɔ yɔ ẅɛ̀n nɔn zeze cüɛn. 10Eci zri lɔ de wɔɛn tán, Simɔn nɛ́n nyran hɔ̀n léyi dú Zhakɛ̀n mán Zhan, Zebede ẅì hɔ̀n. Zɛtɛn Zhezü kɛ dɔ́ Simɔn le: “Ɛnjansù ke bɩ́ ẅɛn mɛ́n, bukru zɛtɛ̀ lɔ nɔn, anwrɔnẅì de ɛ vá ɛẅɛn yri nɔn.” 11Yɔ sɩ́ yɔ anhàka hɔ̀n lɔ ɛnhi, kɩ yɔ tecüe ɛci lɔ fɛn, yɔ kɛ́n Zhezü ɛsɛ̀n yɔ hɔ̀n.

Zhezü kɔrɛ kokove-lowiɛ-wrɔn tɔ̀n

(Nyɛ́n nyan Matie 8:1-4; mán Markɛ̀n 1:40-45 wrú lɔ mɛ̀n)

12Zhezü hɔ́n anmàn tɔ̀n kɩ ɔwrɔn tɔ̀n srɔ́n nɛ̀n ɛsù, kokove-lowiɛ bɩ́ nɛ̀n edomɛ̀n. Ɛnvra léyi nɛ̀n kán Zhezü nɔn, nɛ̀n bore yi ezìwú ɛnhibɩ kɩ nɛ sɛ́n yi, nɛ dɔ̀ le: “Ankà-yé-wrɔn, ke dú kɛ e ji hô, ɛ lɛ hán mɛ̀n me le fì.” 13Zhezü trɛ́n ɛkɔrɛ̀, tɛ́ nɛ̀n ɛkɔrɛ̀, kɩ kɛ dɔ̀ le: “Me ji, è fì!” Ɛnvra zri lɔ, kokove cɔhɔ́ ɔwrɔn ndɔ lɔ edomɛ̀n. 14Zhezü wá ɛnyanmàn ndɔ lɔ tán nɛ̀n: “E bɩ́ dɔ́ ɔwrɔn zriɛmɛ́n ankà lɔ. Tɛ́n, è bɩ́ v'edomɛ̀n ɛ̀ hɔ̀n yé Ɔwɔ-cice-wrɔn, kɛ̀ kán ɔmu le ɛ̀ hán e dú nɔn, ɛ̀ hán eci léyi Mohizì nyanmàn wá tán nɔn, ô ye nyrì le ɛ kɔrɛà.” 15Tɛ́n Zhezü bɩ́-dì bonyí ɛyri lɔ fɛn; fɛcüè bobrebe kɛ borɛkru kɛ yá n'ankà, ô nɛ̀n kɔrɛ y'ɛnlɔẅiɛ hɔ̀n lɔ. 16Tɛ́n Zhezü teze yɔ hɔ́n ɛyri tramɛ̀n, ô kɛ̀ sɛ́n Ɔwɔ.

Zhezü kɔrɛ ɔkpɔcɔ-wrɔn tɔ̀n

(Nyɛ́n nyan Matie 9:1-8; mán Markɛ̀n 2:1-12 wrú lɔ mɛ̀n)

17Ɛnbì tɔ̀n, Zhezü dù ke yé yɔ ankà. Ɔwɔ-nyanmàn-sùva-wa-bɔ̀ mán ɛnyanmàn-gbànvri-ankà-yé-bɔ̀ mán dú nanvrɛn; yɔ dú Galile mán Zhude kpɔsɔ wú mán Zherüzalɛmɛ̀n anmàn, yɔ và. Ɛẅɛnwrɔn kɔrɛ̀srɔn dú Zhezü edomɛ̀n kɩ kɛ hán nɛ̀n nɛ kɔrɛ ɛnlɔwiɛ-bɔ̀. 18Anwrɔn và, yɔ wɔrɔ ɔkpɔcɔ-wrɔn tɔ̀n dɛ́ sofà wúɛ; ye ji ɛyri ô ye sɩ́ nɛ̀n anwɔn mɛ̀n, ô yɔ hɛ́n nɛ̀n Zhezü zìwúɛ. 19Zɛtɛn ye sɩ́ nyri ɛyri léyi yɔ le cì, ɔmuhi fɛcüè nyɔn nɔn. Zɛtɛn yɔ bɩ́ nɛ̀n yɔ cí ɔwɔn wú, kɩ yɔ mrɛ́n ɛnlevri ɛbù-kɔhɔ́ granmɛ̀n, kɩ yɔ hán nɛ́n sofà lɔ kakɛ fɛcüè wanzi Zhezü zìwú. 20Ɛnvra léyi Zhezü kán y'ankàẅì-bútan lɔ nɔn, nɛ dɔ́ ɛnlɔwiɛ-wrɔn lɔ le: “M'annyran, v'ɛgbàn hɔ̀n lɔ bɩ́ ce mɛ́n.” 21Ɛnyanmàn-gbànvri-ankà-yé-bɔ̀ mán ɔwɔ-nyanmàn-sùva-wa-bɔ̀ bukru ke tro ankà: “Antɔn dú ɔwrɔn ndɔ lɔ, hɩ kɛ dɔ́ ɔwra-ankà tán Ɔwɔ nɛ́n? Antɔn de ke le bɩ́ ɛgbàn kè ce nɛ́n? Ɔwɔ zri kɩ ẅɛn ɛgbàn-bɩ-ce kɔrɛ̀levri!” 22Zhezü cɔ́ y'ankà tro lɔ nyrì kɩ kɛ dɔ́ yɔ le: “Cɛci kruhú kɛ nyɛ ẅɛn ankà tro ndɔ hɔ̀n lɔa? 23Hɩ le, yɛ lɛ dɔ̀ le: ‘V'ɛgbàn lɔ bɩ́ ce mɛ́n’ mán ‘Tɔhú nán esù’? Ankà d'anhyrɛ̀ lɔ, tɛ tán de jrɔ nɛ́n? 24Tɛ́n, me ji nyɛ́n nyrì le, Ɔwrɔnẅì Ẅì ẅɛn ɛkɔrɛ̀srɔn, ɛnhibù wú ke le bɩ́ ɛgbàn kè ce.” Zhezü kɛ dɔ́ ɔkpɔcɔ-wrɔn lɔ le: “Mɛ dɔ́ mɛ́n, tɔhú, bɩ́ vɛ́n sofà lɔ hɔ̀n ɛbemɛ̀n!” 25Ɛnvra zri lɔ, ɔwrɔn lɔ tɔhú anwrɔn lɔ fɛn zìwú, bɩ́ sofà léyi nɛ̀n dɛ́ ɛwúɛ nɔn, kɩ hɔ́n ɛbemɛ̀n, Ɔwɔ mrɛ́n dú nɛ̀n anmùan mɛ̀n. 26Yɔ lɔ fɛn, yɔ dú anvɛmɛ̀n-frɛ́n mɛ̀n. Yɔ mrɛ́n Ɔwɔ, ɛnjansù mán dú yɔ edomɛ̀n, kɩ yɔ dɔ̀ le: “Ɛnyɔncì lɔ, bɔ̀ kán ɛci anvrɛnvrɛn!”

Zhezü ke bi Levi

(Nyɛ́n nyan Matie 9:9-13; mán Markɛ̀n 2:13-17 wrú lɔ mɛ̀n)

27Hɩ vra lɔ vacì, Zhezü srɔ ɛntrɛ kɩ kán anmàn-wɔɛ̀n-yrɛ-wrɔn léyi ye bi Levi nɔn, nɛ̀n yɛ́ n'ɔwɔɛ̀n-yrɛ-wɔn lɔ mɛ̀n. Zhezü kɛ dɔ́ nɛ̀n le: “Kɛ́n mɛ̀n ɛsɛ̀n!” 28Levi tɔhú, tecüe ɛci lɔ fɛn, kɩ kɛ́n nɛ̀n ɛsɛ̀n. 29Zɛtɛn Levi bi Zhezü ɛci-zî vriemɛ̀n n'eyri ebemɛ̀n; anmàn-wɔɛ̀n-yrɛ-bɔ̀ bobrebe mán anwrɔn nyantɛn mɛhi, yɔ yɛ́ ɛci-zî tɛbrɛ̀ wúɛ. 30Ɔwɔ-nynanmàn-sùva-wá-bɔ̀ mán ɛnyanmàn-gbànvri-ankà-yé-bɔ̀ léyi dú yɔ ɛmɛ̀n nɔn, ke sɩ́ cüɛn eci ndɔ lɔ kɩ kɛ dɔ́ Zhezü sɛnkɛn-bɔ̀ le: “Cɛci kruhú kɛ anmàn-wɔɛ̀n-yrɛ-bɔ̀ mán anwrɔn hɔ̀n léyi yɛ krɛ́, ɛci-gbangbàn-hán-bɔ̀ nɔn, mɛhi nye zî ɛci kɩ nye mi ɛnshi ɛyri zriɛ?” 31Zhezü kɛ dɔ́ yɔ le: “Anwrɔn hɔ́n léyi ɛnlɔwiɛ bádà edomɛ̀n nɔn, yɔ sɩ́ ji anháẅi-hán-wrɔn, tɛ́n ɛnlɔwiɛ-bɔ̀ de ke ji anháẅi-hán-wrɔn nɔn. 32Mɛ̀n sɩ̀ và anwrɔn anvrɛnvrɛn hɔ̀n bi-yri, tɛ́n ɛci-gbangbàn-hán-bɔ̀ kruhú de mɛ́n và nɔn, ô yɔ crɔn ɛnkru.”

Zhezü mán Kishe-bɩ

(Nyɛ́n nyan Matie 9:14-17; mán Markɛ̀n 2:18-22 wrú lɔ mɛ̀n)

33Anwrɔn kɛ dɔ́ Zhezü le: “Zhan sɛnkɛn-bɔ̀ ke bɩ́ kishe ɛnbì zrizri kɩ kɛ sɛ́n Ɔwɔ; eci zri lɔ de ɔwɔ-nyanmàn-sùva-wà-bɔ̀ sɛnkɛn-bɔ̀ mán kɛ hán nɔn; v'ɛsɛnkɛn-bɔ̀ tɛn, ɛci kɩ ke zî, ɛntàn kɩ ke mì.” 34Zhezü kɛ dɔ́ yɔ le: “Nye tro le, nyɛ́n lɛ wá tán anwrɔn hɔ̀n léyi ye bi eyri-ci-ziemɛ̀n nɔn, ke bɩ́ zî ɛci ɛnvra léyi, yɔ mán ɛnnyɔnwrɔn-nɛ́n-cüì mɛhi yɔ yɛ́ ɛci-zî tɛbrɛ̀ wú nɛ́n? Hɔ̂! Ke sɩ̀ hán rɔ́! 35Tɛ́n ɛnvra kɛ lɛ và, ye le bɩ́ ɛnnyɔnwrɔn-nɛ́n-cüì yɛ sɔhɔ́, kɩ nbì ndɔ hɔ̀n lɔ kɛ cɔ̀ nɔn, yɔ le bɩ́ kishe.” 36Zhezü vru kɛ dɔ́ yɔ ankà nyandrɛn mɛ̀n: “Ɔwrɔn zriɛmɛ́n ke sɩ́ sha ɛcàsa wrù hɔ́ kɛ brɛ́ ɛcàsa gbànvri wú, ke dú kɛ nɛ hán ɔmu lɔ hô, ɛcàsa wrù lɔ kɛ lɛ shá ɛgbànvri lɔ kɩ ɛcàsa anhyrɛ̀ lɔ ke sɩ̀ krɔn. 37Ɛnnyɔnwrɔn zriɛmɛ́n ke sɩ́ bɩ́ ankùa wrù ke gbro ankùa cüɛ mɛ̀n kɛ̀ gbrɛ̀; ke dú kɛ nɛ hán ɔmu lɔ hô, ankùa lɔ ke sɩ̀ zrɔ. 38Ke jí le nɛ̀n gbrɛ́ ankùa wrù mán ɔhɔnán, ô nɛ̀n gbrɛ́ ankùa cüɛ mán ɔhɔnán. 39Anwrɔn kɛ cüɛn ankùa cüɛ̀ vrán ankùa wrù. Kɩ yɔ dɔ̀ le: ‘Ankùa cüɛ̀ zrɔ.’ ”

Currently Selected:

Lükɛ̀n 5: ƐAA03

Highlight

Copy