Lükɛ̀n 6

Zhezü mán ɛnyanmán-bì

(Nyɛ́n nyan Matie 12:1-8; mán Markɛ̀n 2:23-28 wrú lɔ mɛ̀n)

1Ɛnyanmán-bì tɔ̀n, Zhezü kɛ ci dùdu kɛ̀tɛ mɛ̀n. N'ɛsɛnkɛn-bɔ̀ tɛn kɛ voyan dùdu kɩ kɛ küɛ kɛ rá. 2Ɛnyanmàn-sùva-wa-bɔ̀ zri zri hɔ̀n léyi dú nanvrɛn nɔn ke yrɛ yɔ le: “Cɛci kruhú kɛ nyɛ hán eci léyi bɔ́ ɛnyanmàn ke si ɛnyanmán-bì mɛ̀n nɛ́n?” 3Zhezü mrɛ́n yɔ ɔmùan le: “Nyɛ́n sɩ̀ krɛ̀ owrú léyi kɛ dɔ́ Davidɛ̀n mán n'anwrɔn hɔ̀n ankà, ɛnvra léyi ɔmuanwù kɛ ẅɛn yɔ nɛ́n? 4Davidɛ̀n bru Ɔwɔ-wɔn-mɛ̀n, kɩ bɩ́ Ɔwɔ-cice-abùtùkumɛ́n lɔ rá, kɩ bɩ́ tán n'anwrɔn hɔ̀n mán rá; bɔ́ ɛnyanmàn tɛn kɛ wá tán le, Ɔwɔ-cice-bɔ̀ zri kɩ kɛ̀ rá abùtùkumɛ́n ndɔ lɔ.” 5Zhezü vru kɛ dɔ́ yɔ le: “Ɔwrɔnẅì Ẅì dú ɛnyanmán-bì nɛ́n zi.”

Ɔwrɔn léyi ɛkɔrɛ̀ wù nɔn

(Nyɛ́n nyan Matie 12:9-14; mán Markɛ̀n 3:1-6 wrú lɔ mɛ̀n)

6Ɛmyanmán-bì nyantɛn tɔ̀n, Zhezü bru Ɔwɔ-sɛ́n-wɔn lɔ mɛ̀n, kɩ nɛ̀n bukru ne yé yɔ ankà. Ɔwrɔn tɔ̀n dú nanvrɛn, n'ezì-kɔrɛ̀ kɔrɛ̀ lɔ nwù. 7Ɛnyanmàn-gbànvri-ankà-yé-bɔ̀ mán Ɔwɔ-nyanmàn-sùva-wá-bɔ̀ kɛ sɔ́n Zhezü ɛvɛ̀, ô yɔ nyan ke dú kɛ nɛ lɛ kɔrɛ ɔwrɔn ɛnyanmán-bì lɔ, ô yɔ ji ɛyri yɔ vra anẅìɛ yɔ tán nɛ̀n. 8Tɛ́n Zhezü nyri y'ankà-tro. Nɛ dɔ́ ɔwrɔn léyi ɛkɔrɛ̀ nwù nɔn le: “Tɔhú nyɔn ɛnu lɔ, anwrɔn lɔ fɛn zìwúɛ.” Ɔwrɔn lɔ tɔhú, kɩ nyɔn anwrɔn lɔ fɛn zìwú. 9Zɛtɛn Zhezü kɛ dɔ́ yɔ le: “Me yrɛ nyɛ̀n le: Ecitan de bɔ́ ɛnyanmàn lɔ kɛ wá tán nɛ́n? Yɛ hán anvrɛn ɛnyanmán-bì lɔ kale yɛ hán ɛgbàn hàn? Ye bɩ́ ɔwrɔnẅì ye die kale yɛ jrɛ́ nɛ̀n hàn?” 10Nɛ̀n nyan yɔ lɔ fɛn kɩ zɛtɛn nɛ dɔ́ ɔwrɔn lɔ le: “È sɩ́ v'ɛmàn lɔ ezì.” Ɔwrɔn lɔ sɩ́ ɛmàn ezì, kɩ ɛmàn lɔ cɔ́ ecüì. 11Tɛ́n, ɛnyànmàn-gbànvri-ankà-yé-bɔ̀ mán ɛnyànmàn-sùva-wá-bɔ̀ ke bɩ́ bɩ́ ɛmɛ̀nhyì, kɩ ke yrɛ y'edomɛ̀n eci léyi yɔ lɛ hán Zhezü nɔn.

Zhezü mrɛ́n ɔkɔhɔ̀n-wá-bɔ̀ ɛvá-anhyrɛ̀ nbɩ̀

(Nyɛ́n nyan Matie 10:1-4; mán Markɛ̀n 3:13-19 wrú lɔ mɛ̀n)

12Hɩ vra lɔ, Zhezü hɔ́n ɛnkpɔ̀ cɛ tɔ̀n wú, kɩ ɛnnyran mumù lɔ fɛn, nɛ̀n dú Ɔwɔ sɛ́n mɛ̀n. 13Ɛnvra léyi ɛyri wó nɔn, nɛ̀n bi n'ɛsɛnkɛn-bɔ̀, nɛ̀n mrɛ́n anwrɔn ɛvá-anhyrɛ̀ nɛ́n bɩ, kɩ nɛ̀n wá yɔ ebi: ɔkɔhɔ̀n-wá-bɔ̀. 14Simɔn, (nɛ̀n wá yi ebi, obù Piɛrɛ̀n) mán nɛ́n muan-ẅì Andre, Zhakɛ̀n mán Zhan, Filipɛ̀n mán Bartelemi. 15Matie mán Toma, Zhakɛ̀n Alfe ẅì mán Simɔn Kanaan wrɔn. 16Zhüda Zhakɛ̀n ẅì mán Zhüda Iskariɔtɛ̀n (nɛ́n de nɛ lɛ hɛ́ Zhezü nɔn).

Zhezü ke yé fɛcüè ankà kɩ nɛ kɔrɛ ɛnlɔẅiɛ-bɔ̀

(Nyɛ́n nyan Matie 4:23-25 wrú lɔ mɛ̀n)

17Zhezü mán n'ɔkɔhɔ̀n-wá-bɔ̀ mɛhi dú ɛnkpò cɛ lɔ wú kakɛ, kɩ sannyɔn ɛyri tɔ̀n léyi ɛnhi hán sɛsɛ; ɛyri léyi n'ɛsɛnkɛn-bɔ̀ bobrebe ndù nɔn. Nanvrɛn lɔ mán anwrɔn fɛcüè vri ndù: yɔ dú Zhüde kpɔsɔ wú, Zherüzalɛmɛ̀n anmàn mán anmàn ndɔ hɔ̀n léyi dú ecüe gbatà mùan, Tirɛ̀n mán Sidɔn kpɔsɔ wú; 18yɔ và; yɔ và yɔ yá n'ankà-dɔ̀, ô nɛ̀n kɔrɛ y'ɛnlɔẅiɛ hɔ̀n lɔ. Yɔ hɔ̀n léyi, anhɛ́n gbangbàn ke di ejüe nɔn, yɔ kɔrɛ̀. 19Anwrɔn lɔ fɛn ke ji kɛ̀ tɛ́ nɛ̀n ɛkɔrɛ̀, ɔmuhi ecüì tɔ̀n dú nɛ̀n edomɛ̀n kɛ srɔ ɛntrɛ, kɩ kɛ kɔrɛ yɔ lɔ fɛn.

Ɛnborɛbru mán muzhie

(Nyɛ́n nyan Matie 5:1-12 wrú lɔ mɛ̀n)

20Zhezü nyan n'ɛsɛnkɛn-bɔ̀ lɔ kɩ zɛtɛn kɛ dɔ̀ le:

“Ɛnbɔrɛbru dú nyɛ tɛn, nyɛ́n léyi nyɛ́n mìan,

ɔmuhi Anhobɩ́ Nɛ̀ncüì-dúyri dú nyɛ tɛn nɔn!

21Ɛnbɔrɛbru dú nyɛ tɛn, nyɛ́n léyi nyɛ́n dú ɔmùanwuemɛ̀n zɛtɛ̀ lɔ,

ɔmuhi nyɛ lɛ cɔ́ ɛci bobrebe nye le zî nɔn!

Ɛnbɔrɛbru dú nyɛ tɛn, nyɛ́n léyi nyɛ́n dú eyúwùemɛ̀n zɛtɛ̀ lɔ,

ɔmuhi nye le dú ɛnhyürɛ̀-yürɛ̀ mɛ̀n nɔn!

22Nyɛ́n dú ɛnbɔrɛbruemɛ̀n, ke dú kɛ anwrɔn ke gbri nyɛ̀n, yɛ wrɔ́ nyɛ̀n ze, yɛ wra nyɛ̀n, ɔwrɔn-ẅì Ẅì kruhú. 23Nyɛ́n brá pɔpüɛ̀ ô nyɛ́n dú ɛmànkɔ́nmɛ̀n, ɛnvra léyi ejüezì ndɔ lɔ kɛ lɛ srɔ́n nyɛ̀n ɛsù nɔn, ɔmuhi anjakpà vri dú anhobɩ́ kɛ vra nyɛ̀n nɔn. Ɔmu lɔ de, annànwɔrɛ mɛ̀n lɔ yɔ nancüì hɔ̀n hán Ɔwɔ-mùanwù-ankà-dɔ́-bɔ̀ kán ɛgbàn nɔn.

24Tɛ́n muzhie dú tán, nyɛ́n léyi nyɛ́n di ɛnnɛncüì,

ɔmuhi nyɛ́n gɔ̀ cɔ́ ny'ɛnbɔrɛbru lɔ nɔn!

25Muzhie dú tán nyɛ́n léyi nyɛ́n ẅɛn ɛci-zî bobrebe zɛtɛ̀ lɔ,

ɔmuhi ɔmùanwù kɛ lɛ ẅɛn nyɛ̀n nɔn!

Muzhie dú tán nyɛ́n léyi nyɛ́n dú ɛnhyürɛ̀-yürɛmɛ̀n zɛtɛ̀ lɔ,

ɔmuhi nye le dú oboto mɛ̀n kɩ nyɛ́n le wú eyú nɔn!

26Muzhie dú nyɛ tɛ́n, ke dú kɛ anwrɔn lɔ fɛn kɛ dɔ́ ny'ankà ankrànkràn, ɔmuhi ɔmu lɔ de yɔ nancüì hɔ̀n hán yɔ mán ɛyɔ̀n Wɔ-mùanwú-ankà-dɔ́-bɔ̀ mɛhi nɔn!”

Ɛgbri-bɔ̀ cüɛ̀n

(Nyɛ́n nyan Matie 5:38-48; 7:12a wrú lɔ mɛ̀n)

27“Tɛ́n, mɛ dɔ́ nyɛ̀n, nyɛ́n léyi nye die mɛ̀n nukùɛ nɔn. Nyɛ́n cüɛ́n ny'egbri-bɔ̀, nyɛ́n hán anvrɛn nyɛ́n tán yɔ léyi yɔ sɩ́ cüɛn nyɛ̀n nɔn, 28nyɛ́n dɔ́ ankà ankrànkràn nyɛ́n tán yɔ léyi yɔ dá nyɛ̀n ɛẅìɛ̀, ô nyɛ́n sɛ̀n nyɛ́n tán yɔ léyi yɔ hán nyɛ̀n nyɛ kán ɛgbàn nɔn. 29Ke dú kɛ ɔwrɔn tɔ̀n ke sɩ́ mɛ́n nukù tɔ̀n hô, ɛ̀ tán nɛ̀n nukù ndɔ lɔ mán; ke dú kɛ ɔwrɔn tɔ̀n ke bɩ́ mɛ́n ɛceci she, teze nɛ̀n, nɛ̀n bɩ́ v'ɛwú ceci lɔ mán. 30Ɛ̀ tán, ɔwrɔn totɔtɔ̀n léyi kɛ sán mɛ́n eci nɔn; ke dú kɛ ɔwrɔn tɔ̀n ke bɩ́ eci léyi dú vɛtɛn nɔn, e bɩ́ vru dɔ́ nɛ̀n le nɛ̀n tán mɛ́n eci lɔ. 31Eci léyi ɛ cüɛ̀n le yɛ hán yɛ tán mɛ́n nɔn, ɛ̀ hán eci zri lɔ, ɛ̀ tán ɛnyran mán. 32Ke dú kɛ nyɛ cüɛn anwrɔn hɔ̀n léyi kɛ cüɛ́n nyɛ̀n nɔn tɛ̂kɩ, anvrɛn tán de nyɛ́n vru nyɛ vrá nɛ́n? Ɛgbàn-hán-bɔ̀ mán, kɛ cüɛ́n anwrɔn hɔ̀n léyi kɛ cüɛn yɔ nɔn! 33Kɩ ke dú kɛ nyɛ hán anvrɛn tɛ̀kɩ nyɛ tán anwrɔn hɔ̀n léyi kɛ hán nyɛ̀n anvrɛn nɔn, cɛci kruhú kɛ nyɛ́n vru nyɛ vrá anvrɛn nyantɛn hán? Ɛgbàn-hán-bɔ̀ mán kɛ hán eci zri lɔ! 34Ke dú kɛ anwrɔn hɔ̀n léyi, nyɛ́n vɛ́n eci, hɩ nyɛ́n nyrì le kɛ lɛ wɔrɛ̀ tán nyɛ̀n nɔn kɩ nyɛ tán eci, anvrɛn tán de nyɛ́n vru nyɛ vrá nɛ́n? Ɛgbàn-hán-bɔ̀ mán kɛ vɛ́n ɛgbàn-hán-bɔ̀ eci, ô yɔ wɔrɛ̀ yɛ tán y'edomɛ̀n! 35Tɛ́n mɛ dɔ́ nyɛ̀n le, nyɛ́n cüɛ́n ny'egbri-bɔ̀, nyɛ́n hán yɔ anvrɛn, nyɛ́n vɛ́n eci, ô nyɛ́n bɩ́ vrá ɔwɔrɛ̀tan. Nyɛ lɛ cɔ́ anjakpà vri, kɩ nye le dú Ɔwɔ léyi dú anhobɩ́ nɔn, n'ɛẅì hɔ̀n, ɔmuhi nɛ cüɛ́n anwrɔn hɔ̀n léyi kè sɩ̀ nyrì anvrɛn mán anbɔrɛ-bɔ̀ nɔn. 36Nyɛ́n ẅɛn ɛcüɛ̀n kè yɩ́ nyɛ́n ɛmɛ̀n kɛ̀ hán ɔmu le nyɛ́n Zi mán ɛcüɛ̀n yɩ edomɛ̀n nɔn.”

Nyɛ́n bɩ́ ci nyɛ́n nyran hɔ̀n ɛmrɛ̀n

(Nyɛ́n nyan Matie 7:1-5 wrú lɔ mɛ̀n)

37“Nyɛ́n bɩ́ ci nyɛ́n nyran hɔ̀n ɛmrɛ̀n, kɩ Ɔwɔ mán ke sɩ̀ ci nyɛ̀n ɛmrɛ̀n; nyɛ́n bɩ́ hán nyɛ́n nyran hɔ̀n ɛgbàn, kɩ Ɔwɔ mán ke sɩ̀ hán nyɛ̀n ɛgbàn; nyɛ́n bɩce nyɛ́n nyran hɔ̀n, kɩ Ɔwɔ mán ke le bɩce nyɛ̀n. 38Nyɛ́n tán nyɛ́n nyran hɔ̀n, kɩ Ɔwɔ mán kɛ lɛ tán nyɛ̀n; ye le ku nyɛ̀n ny'ɛceci kotoku vri lɔ mɛ̀n, yɛ lɛ sɔ̀n wá, ke le yɩ̀ ke le cüe. Ɔwɔ kɛ lɛ wɔɛ́n ɛci kɛ lɛ tán nyɛ̀n, kɛ lɛ hán ɔmu le nyɛ́n mán nyɛ wɔɛ́n tán nyɛ́n nyran hɔ̀n nɔn hɔ́.”

39Zhezü vru kɛ dɔ́ yɔ nyandrɛn mɛ̀n ankà: “Anvɛ̀-bɔyɛ-wrɔn ke sɩ̀ yé nɛ́n nyran anvɛ̀-bɔyɛ-wrɔn ɛnlevri rɔ́, kè sɩ̀ dù ɔmuhɛ́n? Ke dú kɛ yɔ hán ɔmu lɔ hô, yɔ anwrɔn anhyrɛ̀ lɔ, ye le bru ɛnnanmàn mɛ̀n. 40Owrú-wɔn-mɛ̀n-ẅì zriɛmɛ̀n ke sɩ̀ sevri kɛ̀ vrán n'owrú-nɛ́n-zi; tɛ́n, owrú-wɔn-mɛ̀n-ẅì léyi nyri n'owrú trɔ nɔn, ne le dù kɛ lɛ hán n'owrú-nɛ́n-zi hɔ́. 41Cɛci kruhú kɛ ɛ nyan ankɔ̀hɔ-ẅie léyi dú ɛnyran ɛvɛ̀-ẅiemɛ̀n, kɩ e sɩ́ kán ɛtɛ̀ mù léyi dú v'ɛvɛ̀ lɔ mɛ̀n nɛ́n? 42Anhɔntan de ɛ lɛ hán ɛ̀ dɔ́ ɔmuan-ẅì le: ‘Nman-ẅì, teze mɛ̀n, mɛ́n mrɛ̀n ankɔ̀hɔ-ẅie léyi dú v'ɛvɛ̀-ẅì lɔ mɛ̀n’, kɩ vɛ tɛn, e sɩ́ kán ɛtɛ̀ mù léyi dú vɛ tɛn lɔ mɛ̀n nɛ́n? Ɔmùan-anhyrɛ̀-wrɔn, ɛ̀ mrɛ́n ɛtɛ̀ mù léyi dú v'ɛvɛ̀ lɔ mɛ̀n, ô anvɛ̀ ke bi mɛ́n ɛ̀ kán ɛyri, ô ɛ̀ mrɛ́n ankɔ̀hɔ-ẅie léyi dú ɔmuan-ẅì vɛ̀ lɔ mɛ̀n nɔn.”

Ɛtɛ̀ mán n'ɛẅì

(Nyɛ́n nyan Matie 7:16-20; 12:33-35 wrú lɔ mɛ̀n)

43“Ɛtɛ̀ ankrànkràn, ke sɩ́ shi ɛẅì gbangbàn. Ɛtɛ̀ gbangbàn mán ke sɩ́ shi ɛẅì ankrànkràn. 44Antɛ̀-ẅì de kɛ hán tán ye nyri ɛtɛ̀ nɔn: ye sɩ́ küɛ dúgùshì mango-tɛ̀ wú; ɛnnàngbàn-wú mán, ye sɩ́ küɛ anzhà. 45Ɔwrɔn ankrànkràn lɔ ɛnbɔrɛmɛ̀n de n'eci ankrànkràn hán lɔ ke dù kɛ và nɔn; ɔwrɔn gbangbàn mán, ɛbɔrɛmɛ̀n de n'eci gbangbàn hán lɔ ke dù kɛ và nɔn. Ɔmuhi, ɔwrɔnwrɔn mùan de kɛ dɔ́ ankà léyi yɩ́ n'ɛnbɔrɛ lɔ mɛ̀n nɔn.”

Anwɔn anhyrɛ̀

(Nyɛ́n nyan Matie 7:24-27 wrú lɔ mɛ̀n)

46“Ecitan kruhú kɛ nye bi mɛ̀n ‘Ɛẅɛnwrɔn, Ɛẅɛnwrɔn’ kɩ nyɛ́n sɩ́ hán m'ɔmùan ankà-dɔ̀ ci hɛ́? 47Me le yé nyɛ̀n ɔwrɔn totɔtɔ̀n léyi kɛ vá cɔ́ mɛ̀n, ke die mɛ̀n nukùɛ, hɩ kɛ hán m'ɛkɔrɛ̀zì-ci, eci lɛ́yi nɛ cá nɔn: 48nɛ cá ɔwrɔn tɔ̀n léyi bukru ke ku ɔwɔn, hɩ bɔ́ ɛnnanmàn vrɛ́n yakɛ wá ɛbùẅì ɛnhibɩ nɔn. Ɛnvra léyi ɛnshi bukru ke yɩ̀, hɩ kɛ gbɛ́ ku ɔwɔn lɔ edomɛ̀n nɔn, eci ẅì zriɛmɛ́n ke sɩ̀ hán ɔwɔn lɔ, ɔmuhi ye nyri ku nɛ̀n nɔn. 49Zɛtɛn, ɔwrɔn tɔ̀n léyi ke die m'ankà-dɔ̀ nukùɛ, hɩ ke sɩ́ hán m'ankà-dɔ̀ kɔrɛ̀zì-ci nɔn, nɛ́n dù nɛ̀n cá ɔwrɔn tɔ̀n léyi ku ɔwɔn ɛnhiẅia mɛ̀n, hɩ ke sɩ̀ wà ɛbùẅì ɛnhibɩ nɔn. Ɛnvra léyi, ɛnshi yɩ̀, hɩ kɛ gbɛ̀ ku ɔwɔn domɛ̀n nɔn, ɛnvra zri lɔ, ɔwɔn lɔ gbe kokroho.”

Currently Selected:

Lükɛ̀n 6: ƐAA03

Highlight

Copy