Markɛ̀n 12

Ankɛ̀tɛ̀ kɔ̀hɔ̀n-hán-bɔ̀ gbàngbàn nyandrɛn mɛ̀n ankà dɔ̀

(Nyɛ́n nyan Matie 21:33-46; mán Lükɛ̀n 20:9-19 wrú lɔ mɛ̀n)

1Zɛtɛn Zhezü ci nyandrɛn mɛ̀n kɛ dɔ́ yɔ ankà: “Ɔwrɔn tɔ̀n srɛ anzhà kɛ̀tɛ̀; nɛ̀n wá ɔkɔ̀ nɛ̀n sɛ́n ɛkɛ̀tɛ̀ lɔ, nɛ̀n bɔ́ ɛnnànmàn nɛ̀n hán anzhà-wɔn-yri, kɩ nɛ̀n ku ɛyri-nan-wɔn. Zɛtɛn nɛ̀n bɩ́ ɛkɛ̀tɛ̀ lɔ nɛ́n wá ɔkɔ̀hɔ̀n-hán-bɔ̀ antamɛ̀n kɩ nɛ̀n hɔ́n ɛyri. 2Ɛnvra léyi anzhà küɛ vra cɔ̀ nɔn, ɛkɛ̀tɛ̀-nɛ́n-zi wá n'eci-bɩtan-wrɔn tɔ̀n ɔkɔ̀hɔ̀n kɛ̀ hɔ́n ɛkɛ̀tɛ̀-kɔ̀hɔ̀n-hán-bɔ̀ yri kè bɩ́ nɛ tɛ́n ɛci kɛ̀ và sɩ̀ nɛ̀n. 3Tɛ́n ɔkɔ̀hɔ̀n-hán-bɔ̀ léyi nɛ̀n wá ɛkɛ̀tɛ̀ antamɛ̀n nɔn ẅɛn ɔkɔ̀hɔ̀n-wá-wrɔn lɔ gorɛ, wrɔ́ nɛ̀n, nɛ̀n hɔ́n anta kɔra. 4Ɛkɛ̀tɛ̀-nɛ́n-zi vru wá eci-bɩtan-wrɔn nyàntɛn tɔ̀n ɔkɔ̀hɔ̀n; ɔkɔ̀hɔ̀n-wá-wrɔn ndɔ lɔ, yɔ ẅɛn nɛ̀n yɔ cüran nɛ̀n ɛci ɛnkru kɩ yɔ wɔra nɛ̀n. 5Ɛkɛ̀tɛ̀-nɛ́n-zi vru hán ɔwrɔn tɔ̀n nhɔ̀n, kɩ ɔwrɔn ndɔ lɔ yɔ wrì nɛ̀n, kɩ anwrɔn bobrebe hɔ̀n léyi ɛkɛ̀tɛ̀-nɛ́n-zi wá ɔkɔ̀hɔ̀n nɔn, ɔkɔ̀hɔ̀n-hán-bɔ̀ lɔ hán yɔ eci zri lɔ: Yɔ gorɛ ɛnjanbɔ̀ kɩ yɔ wri ndɔ hɔ̀n. 6Ɔwrɔn zri léyi wɔrɔ dú nɛ̀n ɛtɛ̀sɛ̀n nɔn, dú n'ɛcüɛ́n ẅì lɔ. Ɔtrɔmɛ̀n lɔ nɛ̀n wá yi ɔkɔ̀hɔ̀n, ɔkɔ̀hɔ̀n-hán-bɔ̀ lɔ yri, kɩ nɛ dɔ̀ le: ‘M'ɛnẅì tɛ́n, yɔ lɛ ẅɛn n'ɛwá.’ 7Tɛ́n ɔkɔ̀hɔ̀n-hán-bɔ̀ lɔ kɛ dɔ́ y'edomɛ̀n le: ‘Nyàn ɔwrɔn léyi kɛ lɛ srɔ anja-di-wrɔn nɔn de kɛ và nɔn! Bɔ̀ hɔ̀n bɔ́ wri nɛ̀n, kɩ ɛkɛ̀tɛ̀ lɔ kɛ lɛ srɔ bɔ́ tɛ́n!’ 8Yɔ ẅɛn ɛkɛ̀tɛ̀-nɛ́n-zi ẅì lɔ ye wrì kɩ yɔ kɔ́n nɛ̀n ze ɔkɔ̀ mɛẅi.”

9Zɛtɛn, Zhezü ke yrɛ n'ɛsɛ̀nkɛn-bɔ̀ lɔ le: “Ecitan de ɛkɛ̀tɛ̀-nɛ́n-zi lɔ kɛ lɛ hán nɛ́n? Ɛkɛ̀tɛ̀-nɛ́n-zi kɛ lɛ và ke le wri ɔkɔ̀hɔ̀n-hán-bɔ̀ gbàngbàn hɔ̀n lɔ, kɩ ke le bɩ́ ɛkɛ̀tɛ̀ lɔ kɛ̀ wá anwrɔn nyàntɛn hɔ̀n antamɛ̀n. 10Annànwɔrɛ mɛ̀n lɔ nyɛ́n krɛ́ ankà-dɔ̀ ndɔ lɔ Owrú Prɔnprɔn lɔ mɛ̀n hàn?

‘Obù léyi ɔwɔn-ku-bɔ̀ kɔ́n ze nɔn

hɩ de srɔ ɔwɔn-kàvà mɛ̀n bù nɔn.

11Nyàn eci léyi ɛẅɛnwrɔn Ɔwɔ hán hɩ dú eci ankrànkràn b'anvɛmɛ̀n nɔn!’ ”

12Zhüifɛ̀n-bɔ̀ cüìcüì hɔ̀n ke ji ɛyri ô kè di Zhezü owúemɛ̀n, ɔmuhi yɔ nyrì le y'ankà de Zhezü ci nyandrɛn mɛ̀n kɛ dɔ̀ nɔn. Tɛ́n yɔ sú fɛcüè kɩ yɔ teze nɛ̀n yɔ nán hɔ̀n.

Anmàn wɔɛ̀n léyi ye di Sezarɛ̀n nɔn

(Nyɛ́n nyan Matie 22:15-22; mán Lükɛ̀n 20:20-26 wrú lɔ mɛ̀n)

13Herɔdɛ̀n tɛ̀sɛ̀n bɔ̀ wá ɛnyànmàn-gbànvri-ankà-yé-bɔ̀ ɔkɔ̀hɔ̀n kɛ̀ hɔ̀n wɔɛ́n Zhezü kɛ̀ nyan. 14Kɩ yɔ và yɔ yrɛ nɛ̀n ankà: “Ankà-yé-wrɔn, bɔ́ nyrì le ɛ dɔ́ ankà ɔmùan zri; e sɩ́ ci anwrɔn zriɛmɛ́n anvɛwú-mrɛ̀n, ɔmuhi ɔwrɔnẅì sù mán ɔwrɔnẅì vrisì ke sɩ́ kɛ́n mɛ́n Ɔwɔ ankà-dɔ̀ anmùan mɛ̀n kɛ hɛ́n hán, kɩ ɛ dɔ́ ankà annànwɔrɛ eci léyi Ɔwɔ ke ji nɔn wú. Ɛ̀ dɔ́ bɔ̀, ke dú kɛ bɔ́ ɛnyànmàn lɔ kɛ wá tán ye di Sezarɛ̀n anmàn wɔɛ̀n hàn? Zɛtɛn bɔ́ yrɛ mɛ́n: bɔ̀ dì le kale bɔ́ bɩ́ dìɛ?” 15Tɛ́n Zhezü nyri ɔmu le, yɔ bán nɛ̀n y'ɛnbɔrɛmɛ̀n ankà-tro; kɩ zɛtɛn nɛ dɔ́ yɔ le: “Ecitan kruhú kɛ nyɛ krɔn mɛ̀n antanwrɔn hán? Nyɛ́n bɩ́ ɔkùa lɔ ɔtɔ̀n nyɛ́n và sɩ́ mɛ̀n mɛ̀n nyan.” 16Yɔ bɩ́ ɔkùa zri yɔ vá sɩ́ nɛ̀n, kɩ Zhezü ke yrɛ yɔ le: “Picɛ̀ ndɔ lɔ mán ebɩ́ léyi ye merɛ́n ɔkùa lɔ ɛwú nɔn, antɔnwrɔn tɛn hán?” Yɔ dɔ́ nɛ̀n le: “Sezarɛ̀n tɛn.” 17Zɛtɛn Zhezü kɛ dɔ́ yɔ le: “Eci léyi dú Sezarɛ̀n tɛn nɔn, nyɛ́n bɩ nyɛ́n tán Sezarɛ̀n, ô eci léyi dú Ɔwɔ tɛn nɔn, nyɛ́n bɩ nyɛ́n tán Ɔwɔ.” Zhezü ankà-dɔ̀ lɔ frɛ́n yɔ anvɛmɛ̀n.

Owúemɛ̀n-dù-frɔ́ ankà yrɛ tɔ̀n

(Nyɛ́n nyan Matie 22:23-33; mán Lükɛ̀n 20:27-40 wrú lɔ mɛ̀n)

18Anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn vá cɔ́ Zhezü ô kè yrɛ nɛ̀n ankà. (Yɔ de yɔ dɔ̀ le ɔwú-bɔ̀ ke sɩ̀ vru vá ɛkɔrɛ-bɔ̀ mɛ̀n hán.) Kɩ nyàn ɔmu le yɔ yrɛ nɛ̀n ankà nɔn: 19“Ankà-yé-wrɔn, Mohizì tán bɔ̀ ɛnyànmàn ndɔ lɔ ye merɛ́n le: ‘Ke dú kɛ ɔwrɔn tɔ̀n kɛ ẅɛn nɛ́n muan-ẅì, ke yri ɛnnyɔnwrɔn kè sɩ̀ bî ɛnẅì, kɩ ke wù, nɛ́n muan-ẅì lɔ kè bɩ́ ɛnnyɔnwrɔn lɔ, ô kè bî ɛẅì kɛ̀ tán nɛ́n muan-ẅì léyi nwù nɔn.’ 20Tɛ́n ɛnbi tɔ̀n anwrɔn nɛ́n muan-ẅì hɔ̀n ɔbɔɛ̀n de ndù nɔn. Ɛnvrakpà-wrɔn lɔ yri ɛnnyɔnwrɔn kè sɩ̀ bî ɛnẅì kɩ nwù. 21Anhyrɛ̀ mɛ̀n wrɔn lɔ bɩ́ ɛngrɔn hi lɔ, nɛ́n mán nɛ̀n sɩ̀ bî ɛnẅì kɩ nɛ́n wù. Eci zri lɔ de wɔɛ́n tán anhɔnmɛ̀n wrɔn lɔ 22mán yɔ anwrɔn ɔbɔɛ̀n lɔ fɛn; yɔ wù ye sɩ̀ bî ɛẅì zriɛmɛ́n. Kɩ ɔtrɔmɛ̀n lɔ, ɛnnyɔnwrɔn lɔ mán nwù. 23Ɛnvra léyi anwrɔn ke le dú owúemɛ̀n kɛ frɔ́ nɔn, antɔn de ke le dú ɛnnyɔnwrɔn lɔ nɛ́n cüì nɛ́n? Ɔmuhi yɔ, anwrɔn ɔbɔɛ̀n lɔ fɛn lɔ yɔ gɔ́ dú nɛ́n cüì hɔ̀n nɔn!” 24Zhezü mrɛ́n ɔmùan le: “Ɛzɛ̀n dú nyɛ tɛn, kɛ̂ nyɛ́n nyri eci le kruhúɛ? Ɔmuhi nyɛ́n sɩ̀ nyrì Ɛwrú Prɔnprɔn hɔ̀n ankà mán Ɔwɔ kɔrɛ̀srɔn léyi ẅɛ̀n nɔn. 25Annànwɔrɛ mɛ̀n, ɛnvra léyi owú-bɔ̀ lɔ fɛn kɛ lɛ frɔ́ nɔn, wúcɔ̀ mán wúyɔ̀ ke sɩ̀ vru yri y'edomɛ̀n, tɛ́n yɔ le dù kɛ lɛ hán Ɔwɔ-kùyüre-bɔ̀ léyi dú anhobɩ́ nɔn hɔ́. 26Owúemɛ̀n-dù-frɔ́ ankà léyi mɛ dɔ̀ nɔn, nyɛ́n sɩ̀ yà ankà léyi Ɔwɔ dɔ́ Mohizì ɛnhyà gbú tɛ̀sɛ̀n nɛ́n? Nanvrɛn lɔ ye mrɛ́n le Ɔwɔ kɛ dɔ́ Mohizì le: ‘Mɛ̀n dú Abrahamɛ̀n Wɔ, mɛ̀n dú Izaakɛ̀n Wɔ, mɛ̀n dú Zhakɔbɛ̀n Wɔ.’ ” Zhezü vru kɛ dɔ́ yɔ le: 27“Ɔwɔ dú ɛkɔrɛ-bɔ̀ Wɔ, nɛ́n sɩ̀ dù owú-bɔ̀ Wɔ. Ɔmu lɔ de nyɛ́n dú ɛzɛ́n mɛ̀n kokroho nɔn.”

Ɛnyànmàn lɔ fɛn hɩ léyi ẅɛn vɔ̀nshɛ́ nɔn

(Nyɛ́n nyan Matie 22:34-40; mán Lükɛ̀n 10:25-28 wrú lɔ mɛ̀n)

28Ɛnyànmàn-gbànvri-ankà-yé-wrɔn tɔ̀n yá yɔ ɔmùan ankà-dɔ́ mɛ̀n, kɩ nɛ̀n nyri ɔmu le Zhezü dɔ́ ankà annànwɔrɛ owúemɛ̀n-dù-frɔ́ ankà wú. Ɛnyànmàn-gbànvri-ankà-yé-wrɔn ndɔ lɔ hɔ́n Zhezü ɛtɛ̀sɛ̀n, kɩ ke yrɛ nɛ̀n le: “Ɛnyànmàn tán de dú ɛnyànmàn hɔ̀n lɔ fɛn hɩ léyi ẅɛn vɔ̀nshɛ́ nɛ́n?” 29Zhezü mrɛ́n nɛ̀n ɔmùan le: “Nyàn ɛnyànmàn léyi ẅɛn vɔ̀nshɛ́ vrán ɛnyànmàn lɔ fɛn nɔn: ‘E die nukùɛ, Izraɛlɛ̀n! Ɛẅɛnwrɔn bɔ́ Wɔ dú bɔ́ Ɛẅɛnwrɔn zri. 30Ke ji le è bɩ́ v'ɛnbɔrɛ múmù lɔ fɛn, vɛ́n wàwúyɛ lɔ fɛn, v'ɛnhɛ́n lɔ fɛn mán v'ecüì lɔ fɛn ɛ̀ cüɛn Ɛẅɛnwrɔn v'Ɔwɔ.’ 31Kɩ nyàn anhyrɛmɛ̀n tɛn léyi ndù cá nɛ̀n nɔn: ‘Ke ji le ɛ̀ cüɛn ɛnyran-wrɔnẅì kɛ̀ hán vɛ́n múmù hɔ́.’ Ɛnyànmàn zriɛmɛ́n kè sɩ̀ ẅɛ̀n vɔ̀nshɛ́ kɛ̀ vràn ɛnyànmàn anhyrɛ̀ ndɔ hɔ̀n lɔ.”

32Zɛtɛn ɛnyànmàn-gbànvri-ankà-yé-wrɔn kɛ dɔ́ Zhezü le: “Ankà léyi ɛ dɔ̀ nɔn zrɔ Ɛẅɛnwrɔn! Ankà léyi ɛ dɔ̀ nɔn dú annànwɔrɛ. Ɛẅɛnwrɔn dú Ɔwɔ zri kpokpo, kɩ Ɔwɔ nyàntɛn ke sɩ̀ dù kɛ̀ krɔn nɛ̀n. 33Ke ji le Ɔwrɔnẅì kɛ̀ cüɛn Ɔwɔ n'ɛnbɔrɛ lɔ fɛn mɛ̀n, n'ɛnhɛ́n lɔ fɛn mɛ̀n mán n'ecüì lɔ fɛn mɛ̀n; kɩ ke ji le nɛ̀n cüɛn nɛ́n nyran wrɔnẅì kɛ̀ hán nɛ́n múmù hɔ́. Ndɔ lɔ zrɔ vrán annɔ̀n hɔ̀n léyi ye wrì yɛ biɛ ye ce Ɔwɔ nɔn.” 34Zhezü kán ɔmu le ɛnyànmàn-gbànvri-ankà-yé-wrɔn ndɔ lɔ dɔ́ ɛnkruemɛ̀n-ẅɛn-ankà; kɩ zɛtɛn kɛ dɔ́ nɛ̀n le: “Anhobɩ́ nɛ̀ncüì-dúyri esù kè sɩ̀ gbɔ̀ mɛ́n.” Ɔtrɔmɛ̀n lɔ ɔwrɔn zriɛmɛ́n kè sɩ̀ vru yrɛ nɛ̀n ankà.

Ebɩdie-wrɔn mán Davidɛ̀n

(Nyɛ́n nyan Matie 22:41-46; mán Lükɛ̀n 20:41-44 wrú lɔ mɛ̀n)

35Ɛnvra léyi Zhezü ke yé anwrɔn Ɔwɔ ankà Ɔwɔ-sɛ́n-wɔn lɔ mɛ̀n nɔn, ne yrɛ yɔ le: “Anhɔntan kɛ̂ ɛnyànmàn-gbànvri-ankà-yé-bɔ̀ kɛ lɛ dɔ́ tɛ̀ le, Ebɩdie-wrɔn lɔ dú Davidɛ̀n mɛẅi wrɔn hán? 36Ɔmuhi Davidɛ̀n, Ɛnhɛ́n Prɔnprɔn nyrɔn kɩ nɛ́n mumù nɛ́n dɔ̀ le:

‘Ɛẅɛnwrɔn Ɔwɔ dɔ́ m'Ɛẅɛnwrɔn le:

Và yɛ́ mɛ̀n ezì-kɔrɛ̀a,

hàn mán kɛ̀ krɔn ɛnvra léyi mɛ lɛ kɔ́n v'egbri-bɔ̀ cüe mɛ́n annantrɛmɛ̀n hán nɔn.’

37Davidɛ̀n dùku mán ke bi nɛ̀n ‘Ɛẅɛnwrɔn’. Anhɔntan de zɛtɛn Ebɩdie-wrɔn ke dú Davidɛ̀n mɛẅi wrɔn nɛ́n?”

Zhezü kɛ dɔ́ fɛcüè kɛ wá n'edomɛ̀n esùva ɛnyànmàn-gbànvri-ankà-yé-bɔ̀ tɛ̀sɛ̀n

(Nyɛ́n nyan Matie 23:1-36; mán Lükɛ̀n 20:45-47 wrú lɔ mɛ̀n)

Fɛcüè bobrebe de ke die Zhezü nukù pɔ̀püɛ̀ mɛ̀n. 38Zhezü kɛ dɔ́ anwrɔn hɔ̀n léyi ne yé ankà nɔn le: “Nyɛ́n wá ny'edomɛ̀n esùva ɛnyànmàn-gbànvri-ankà-yé-bɔ̀ tɛ̀sɛ̀n; yɔ léyi yɔ cɔ́ ɛceci she yɔ becì, yɔ cüɛn anhyɛyì ɛkrubɔrɛ yri lɔ fɛn nɔn. 39Ɔwɔ-sɛ́n-wɔn mɛ̀n mán ɛci-zî-yri vri de yɔ ji ɛyri anvrɛnvrɛn yɔ yɛ́. 40Yɔ bɩ́ ɛngrɔn-wúyɔ ɛci lɔ fɛn edomɛ̀n yɔ sɔhɔ́, kɩ ɛnvra zri lɔ yɔ sɛ́n ɛfrɛ́n Wɔ-sɛ̀n sheshe, ô kɛ̀ hán tán le yɔ dú anwrɔn ankrànkràn hɔ̀n. Yɔ lɛ cɔ́ ɛgbàn-wɔɛ̀n-dì ke le sevri kɛ lɛ hán yɔ ɛgbàn hɔ̀n lɔ hɔ́!”

Ɛmian grɔn-hi tɔ̀n cice

(Nyɛ́n nyan Lükɛ̀n 21:1-4 wrú lɔ mɛ̀n)

41Zɛtɛn Zhezü yɛ́ kɔprɛ̀-fɔ́n-yri tɛ̀sɛ̀n Ɔwɔ-cice-wɔn lɔ mɛ̀n, kɩ nɛ nyan ɔmu le anwrɔn ke ce ɔkùa nɔn. Ɛnnɛ̀ncüì hɔ̀n bobrebe kɛ tán ɔkùa kɛ cüɛn. 42Ɛmian grɔn-hi tɔ̀n nvà kɩ bɩ́ kɔprɛ̀ ẅì hɔ̀n anhyrɛ̀ di eciemɛ̀n. 43Zɛtɛn Zhezü bi n'ɛsɛ̀nkɛn-bɔ̀ kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le, ɛmian-grɔn-hi ndɔ lɔ ce eci vrán anwrɔn lɔ fɛn léyi di ɔkùa eciemɛ̀n nɔn. 44Ɔmuhi anwrɔn lɔ fɛn tán y'ɔkùa léyi fɛ́-ɛwú nɔn; tɛ́n nɛ tɛn, n'ɛmìan lɔ mɛ̀n nɛ̀n tán n'ɔkùa lɔ fɛn léyi nɛ́n ẅɛ̀n, ô nɛ̀n bɩ nɛ̀n zî ɛci nɔn.”

Currently Selected:

Markɛ̀n 12: ƐAA03

Highlight

Copy