Markɛ̀n 5

Zhezü kɔrɛ ɔwrɔn tɔ̀n léyi anhɛ́n gbàngbàn ke di ejüe nɔn

(Nyɛ́n nyan Matie 8:28-34; mán Lükɛ̀n 8:26-39 wrú lɔ mɛ̀n)

1Zɛtɛn yɔ cɔ́ Galile nɛnbà cɛ mɛẅi, Gadara kpɔsɔ wú. 2Zhezü dú anhàka mɛ̀n kakɛ kɩ, ɛnvra zri lɔ, ɔwrɔn tɔ̀n dú ɛzhe-nànmàn mɛ̀n srɔ ɛntrɛ hɔ́n nɛ̀n ɛsù. Ɔwrɔn ndɔ lɔ ɛnhɛ́n gbàngbàn tɔ̀n ke di nɛ̀n ejüe 3kɩ nɛ̀n sɔ́n ebɩ́ ɛzhe-bɩ́-yri. Ɔwrɔn zriɛmɛ́n kè sɩ̀ ẅɛ̀n n'ɛkɔra kɔrɛ̀levri, ke dú gbràka mɛ̀n mán. 4Annanwɔrɛ mɛ̀n yɛ kɔra nɛ̀n ɛngbɛ́n-ẅì hɛ́ annan frɛfrɛ, kɩ yɛ tɔ́n nɛ̀n ankɔrɛ̀ gbràka mɛ̀n. Ɔwrɔn zriɛmɛ́n ecüì bàdà edomɛ̀n ká ẅɛn nɛ̀n kɛ hɛ́n nɔn. 5Ɛnvra lɔ fɛn ɛnnyran mán ɛcɛ̀n, nɛ̀n dú ɛzhe-bɩ́-yri mán ɛnkpò cɛ wú, kɩ ne di nkù, ne bɩ́ ɛbù ne wri n'edomɛ̀n eci edù. 6Nɛ̀n kán Zhezü esùshe; zɛtɛn nɛ̀n srɛ́, nɛ́n hɔ̀n shɛ́n yi annankru ezìwú. 7Kɩ ne di nkù esùva cüìcüìemɛ̀n: “Zhezü, Ɔwɔ léyi dú ɛwú hɛ́n nɔn n'ɛnẅì, cɛci e ji ɛ̀ hán mɛ̀n hàn? Mɛ sɛ́n mɛ́n, Ɔwɔ bɩ́mɛ̀n, e bɩ́ wá mɛ̀n ejüe!” 8(Nɛ dɔ́ ɔmu lɔ ɔmuhi Zhezü kɛ wá ɛnyànmàn ndɔ lɔ tán nɛ̀n nɔn: “Ɛnhɛ́n gbàngbàn, cɔhɔ́ ɔwrɔn ndɔ lɔ edomɛ̀n!”) 9Zhezü ke yrɛ ɔwrɔn lɔ le: “Anhɔntan yɛ hán ye bi mɛ́n hɛ́n?” Ɔwrɔn lɔ kɛ dɔ́ nɛ̀n le: “M'ebɩ́ dú ‘Bobrebe’, ɔmuhi bɔ̀ cüɛn nɔn.” 10Kɩ, nɛ̀n vru nɛ sán sɛ́n Zhezü ke bɩ́ hán anhɛ́n gbàngbàn hɔ̀n lɔ kɛ hɔ́n ɔkpɔsɔ nyàntɛn wú.

11Nanvrɛn lɔ gbrokò kà vri tɔ̀n dú ɛnkpò cɛ tɛ̀sɛ̀n ke ji ɛci-zî. 12Anhɛ́n gbàngbàn hɔ̀n lɔ kɛ sɛ́n Zhezü kɛ dɔ́ nɛ̀n le: “È sɩ́ bɔ̀ gbrokò hɔ̀n lɔ tɛ̀sɛ̀n ô bɔ̀ bru yɔ ɛmɛ̀n!” 13Zhezü tán yɔ ɛkɔrɛ̀levri. Zɛtɛn anhɛ́n gbàngbàn hɔ̀n lɔ dú ɔwrɔn lɔ edomɛ̀n srɔ ɛntrɛ kɩ ku gbrokò hɔ̀n lɔ ɛmɛ̀n. Gbrokò kà lɔ fɛn (Yɔ dú tɛ̀bru-kru-anhyrɛ̀) dú ɛnkpò lɔ wú trɛ́n ku nɛnbà cɛ lɔ mɛ̀n kɩ yɔ lɔ fɛn yɔ wù. 14Anwrɔn hɔ̀n léyi kɛ nán gbrokò hɔ̀n lɔ nɔn srɛ́ kɩ hɔ́n dɔ́ yɔ ɛmɛẅi ankà anmàn mán nanbuenu. Anwrɔn vá nyan eci léyi wɔɛ̀n nɔn. 15Yɔ hɔ́n Zhezü ɛtɛ̀sɛ̀n kɩ yɔ kán ɔwrɔn léyi anhɛ́n gbàngbàn bobrebe dú edomɛ̀n nɔn: nɛ̀n yɛ́, nɛ̀n cɔ́ ɛceci kɩ ɛnkruemɛ̀n bi nɛ̀n anvrɛnvrɛn. Anwrɔn lɔ ɛnjansù bru. 16Anwrɔn hɔ̀n léyi kán ankà hɔ̀n lɔ fɛn ɛyri nɔn kɛ dɔ́ yɔ eci léyi wɔɛ́n ɔwrɔn léyi anhɛ́n gbàngbàn dú edomɛ̀n mán gbrokò hɔ̀n léyi trɛ́n ku ɛnshi nɔn yi ankà. 17Zɛtɛn yɔ bukru yɔ sɛ́n Zhezü kɛ̀ cɔhɔ́ y'ɔkpɔsɔ lɔ wú. 18Ɛnvra léyi Zhezü dù ke bru anhàka mɛ̀n nɔn, ɔwrɔn léyi anhɛ́n gbàngbàn cɔhɔ́ edomɛ̀n nɔn kɛ sɛ́n nɛ̀n ô nɛ̀n cɔ́ yi mɛhi yɔ yɛ́. 19Zhezü kè sɩ̀ shrì kɛ tán nɛ̀n ɛkɔrɛ̀levri, tɛ́n dɔ́ nɛ̀n le: “Vrù ɛmɛẅi hɔ̀n ɛbemɛ̀n, v'ɛmɛ̀n mɛ̀n, ô ɛ̀ dɔ́ yɔ eci léyi Ɛnnɛ̀ncüì hán tán mɛ́n n'ɛnhyɔ̀bɔ̀-nyrì lɔ mɛ̀n nɔn.” 20Ɔwrɔn lɔ hɔ̀n kɩ kɛ dɔ́ anwrɔn hɔ̀n léyi dú anmàn ɛvà kpɔsɔ lɔ wú nɔn, eci lɔ fɛn léyi Zhezü hán tán nɛ̀n nɔn; kɩ anwrɔn hɔ̀n léyi ke die nɛ̀n nukùɛ nɔn dú anvɛmɛ̀n-frɛ́n mɛ̀n.

Zhahirüsɛ̀n nyɔnwrɔn-ẅì mán ɛnnyɔnwrɔn léyi tɛ́ Zhezü ɛceci ɛkɔrɛ̀ nɔn

(Nyɛ́n nyan Matie 9:18-26; mán Lükɛ̀n 8:40-56 wrú lɔ mɛ̀n)

21Zhezü bɩ́ anhàka nɛnbà cɛ mɛẅi vru vá nɛnbà cɛ gbàtà mùan. Fɛcüè vri tɔ̀n bɔrɛkru n'ɛtɛ̀sɛ̀n kɩ nɛ tɛ́n nɛ̀n nyɔn ɛnshi mùan. 22Ɔwɔ-sɛ́n-wɔn mɛ̀n wrɔn cüìcüì tɔ̀n, ye bi Zhahirüsɛ̀n nvà. Nɛ̀n kán Zhezü, nɛ̀n bore yi annan tɛ̀sɛ̀n, 23kɩ nɛ sán yi ɛkɔrɛ̀-wá ɛnhyɔ̀bɔ̀ wúemɛ̀n: “M'ɛnẅì ɛnnyɔnwrɔn-ẅì cɛ ke ji kè wù. Mɛ sɛ́n mɛ́n, ɛ̀ và è di nɛ̀n ɛkɔrɛ̀ ɛwú ô nɛ̀n kɔrɛ̀!” 24Zhezü mɛhi yɔ hɔ̀n. Fɛcüè vri tɔ̀n hɔ́n sɩ́ nɛ̀n kɩ kɛ kɛ́n nɛ̀n ɛyri lɔ fɛn.

25Nanvrɛn lɔ ɛnnyɔnwrɔn tɔ̀n ndù, nɛ̀n ẅɛn ɛnkrɛ̀ lɔẅiɛ dú nɛ̀n edomɛ̀n ɛnnànwàn kru ɛvà-anhyrɛmɛ̀n ndɔ. 26Nɛ̀n kán ɛgbàn bobrebe, ɛci-hán-bɔ̀ bobrebe yri kɩ nɛ̀n jrɛ́ n'ɔkùa lɔ fɛn. Ɔmu tɛ̀kɩ edomɛ̀n ke sɩ́ wole nɛ̀n roa; n'ɛnlɔẅiɛ lɔ kɛ sán kɛ́n ɛwú. 27Ɛnnyɔnwrɔn lɔ yá yɛ dɔ́ Zhezü ankà; zɛtɛn nɛ̀n bru fɛcüè lɔ mɛ̀n, kɩ nɛ̀n ci Zhezü ɛmɛẅi, nɛ̀n tɛ́ yi ɛceci ɛkɔrɛ̀. 28Ɔmuhi nɛ dɔ́ n'edomɛ̀n le: “Ke dú kɛ mɛ tɛ́ n'ɛceci lɔ ɛkɔrɛ̀ hô, edomɛ̀n ke le wole mɛ̀n.” 29Ɛnvra zri lɔ n'ɛnkrɛ̀ lɔẅiɛ lɔ sannyɔn kɩ nɛ̀n nyri ɔmu le edomɛ̀n wole nɛ̀n hán. 30Ɛnvra zri lɔ mɛ̀n, Zhezü nyri ɔmu le ecüì tɔ̀n dú nɛ̀n edomɛ̀n srɔ ɛntrɛ. Nɛ̀n crɛ ɛmɛẅi fɛcüè wanzi kɩ ne yrɛ le: “Antɔnwrɔn de tɛ́ m'ɛceci hɔ̀n lɔ ɛkɔrɛ̀ nɛ́n?” 31N'ɛsɛ̀nkɛn-bɔ̀ mrɛ́n nɛ̀n ɔmùan le: “Ɛ kán fɛcüè lɔ kɛ kɛ́n mɛ́n ɛyri lɔ fɛn kɩ e vru e yrɛ le: Antɔnwrɔn de tɛ́ mɛ̀n ɛkɔrɛ̀ nɛ́n?” 32Zhezü crɛ nyan n'ɛtɛ̀sɛ̀n ô kɛ̀ kán ɔwrɔn léyi hán eci lɔ nɔn. 33Ɛnnyɔnwrɔn lɔ ɛnjansù mán gbɔ̀gbɔ̀ bru edù, ɔmuhi nɛ̀n nyri eci léyi wɔɛ́n nɛ̀n edomɛ̀n nɔn; ɛnnyɔnwrɔn lɔ hɔ́n bore Zhezü annan tɛ̀sɛ̀n kɩ dɔ́ nɛ̀n ankà lɔ fɛn annànwɔrɛ mɛ̀n. 34Zhezü kɛ dɔ́ nɛ̀n le: “M'ɛnẅì, v'ankàẅì-bùtan lɔ kɔrɛ mɛ́n. Ɛ̀ hɔ́n anwɔwɔ mɛ̀n, ô v'ɛnlɔẅiɛ lɔ kɛ̀ trɔ mɛ́n edomɛ̀n.”

35Ɛnvra léyi Zhezü dù kɛ dɔ́ ɛnlɔẅiɛ-hi lɔ ankà nɔn, ɔkɔ̀hɔ̀n-wá-bɔ̀ dú Zhahirüsɛ̀n nanvrɛn ɛbemɛ̀n nvà kɛ dɔ́ nɛ̀n le: “V'ɛnẅì lɔ wù. Ecitan kruhú kɛ e vru ɛ wá Ankà-yé-wrɔn ejüe hɛ́?” 36Tɛ́n Zhezü ke sɩ̀ die y'ankà-dɔ̀ zriɛmɛ́n nukùɛ kɩ kɛ dɔ́ Zhahirüsɛ̀n le: “Ɛnjansù ke bɩ́ ẅɛn mɛ́n, è bùtan ankàẅì kɩ.” 37Zhezü kè sɩ̀ tàn ɔwrɔn zriɛmɛ́n ɛkɔrɛ̀levri kɛ̀ hɔ̀n ke sɩ́ nɛ̀n, ke dú kɛ kè sɩ̀ dù Piɛrɛ̀n, Zhakɛ̀n mán nɛ́n muan-ẅì Zhan. 38Yɔ bru Zhahirüsɛ̀n nanvrɛn ɛbemɛ̀n, nanvrɛn lɔ Zhezü cɔ́ anwrɔn ke wú eyú, ke di bobo ecüìemɛ̀n. 39Nɛ̀n bru anwɔn mɛ̀n kɩ nɛ dɔ̀ le: “Cɛci kruhú kɛ nyɛ jɔkɔ́ ny'edomɛ̀n kɩ ecitan kruhú kɛ nye wú eyúɛ? Ɛnẅì lɔ kè sɩ̀ wùɛ, tɛ́n nɛ di ndà.”

40Tɛ́n yɔ hán nɛ̀n ɛnhyürɛ̀. Zɛtɛn nɛ̀n hán yɔ lɔ fɛn yɔ srɔ ɛntrɛ, nɛ̀n bɩ́ ɛnẅì nɛ́n zi, nɛ́n muan mán n'ɛsɛ̀nkɛn-bɔ̀ anhɔ̀n lɔ yɔ bru ɛnẅì wɔndà lɔ mɛ̀n. 41Zhezü ẅɛn ɛnẅì lɔ ɛkɔrɛ̀ kɩ kɛ dɔ́ nɛ̀n le: “Talita kum!” (hɩ mɛ̀n kɛ dɔ̀ le: “Ɛnẅì cɛ, mɛ wá tán mɛ́n, tɔhú!”)

42Ɛnẅì cɛ lɔ tɔhú ɛnvra zri lɔ kɩ kɛ nán esù (Ɛnẅì lɔ ẅɛn ɛnnànwàn kru ɛvà-anhyrɛ̀). Ɛnvra léyi yɔ kán ndɔ lɔ nɔn, yɔ lɔ fɛn yɔ dú anvɛmɛ̀n-frɛ́n vriemɛ̀n. 43Tɛ́n Zhezü sɩ́ tán yɔ, yɔ bɩ́ dɔ́ ɔwrɔnẅì zriɛmɛ́n ankà lɔ; zɛtɛn nɛ dɔ́ yɔ le: “Nyɛ́n tán ɛnẅì lɔ ɛci kè zî.”

Currently Selected:

Markɛ̀n 5: ƐAA03

Highlight

Copy