Markɛ̀n 6

Nazarɛtɛ̀n bɔ̀ ke sɩ́ bú Zhezü ankà kɛ tán ankàẅì

(Nyɛ́n nyan Matie 13:53-58; mán Lükɛ̀n 4:16-30 wrú lɔ mɛ̀n)

1Zhezü cɔhɔ́ ɛyri ndɔ lɔ kɩ hɔ́n anmàn léyi nɛ́n dù nɛ̀n sɔ́ nɔn; n'ɛsɛ̀nkɛn-bɔ̀ cɔ́ nɛ̀n mɛhi yɔ hɔ̀n. 2Ɛnyanmánbì lɔ, Zhezü ke yé yɔ Ɔwɔ ankà Ɔwɔ-sɛ́n-wɔn lɔ mɛ̀n. Anwrɔn bobrebe hɔ̀n léyi ke die nɛ̀n nukùɛ nɔn dú anvɛmɛ̀n-frɛ́n mɛ̀n. Yo dɔ̀ le: “Tɛyri de ankà-nyrì ndɔ léyi nɛ́n cɔ̀ mán ɛkɔrɛsrɔn-ci ndɔ léyi nɛ hán nɔn ndù nvà nɛ́n? 3Kɛ̂ kè sɩ̀ dù nɛ́n de nɛ̀n dù anbɔ̀hɔ́ kɔ̀hɔ̀n-hán-wrɔn lɔa, Mari ẅì, nɛ́n muan-ẅì hɔ̀n kè sɩ̀ dù Zhakɛ̀n, Zhoze, Zhüdɛ̀n mán Simɔn hàn? Nɛ́n muan-ẅì hɔ̀n wúyɔ̀-ẅì hɔ̀n mɛhi bɔ̀ sɩ̀ dù ɛnu hɛ́n?”

Kɩ ndɔ lɔ kruhú de yɔ sɩ́ bú n'ankà yɔ tán ankàẅì nɔn. 4Zɛtɛn Zhezü kɛ dɔ́ yɔ le: “Ɔwɔ-mùanwú-ankà-dɔ́-wrɔn ẅɛn ɛwá ɛyri lɔ fɛn, tɛ́n n'anmàn ɛnhi-wú-bɔ̀ mán n'ɛmɛ̀n-mɛ̀n-bɔ̀ kè sɩ̀ ẅɛ̀n n'ɛwá.” 5Hɩ le kruhú de Nazarɛtɛ̀n anmàn lɔ, Zhezü kè sɩ̀ hàn anvɛmɛ̀n-frɛ́n-ci zriɛmɛ́n, tɛ́n nɛ̀n di ɛnlɔẅiɛ-bɔ̀ jan ankɔrɛ̀ ɛwú kɩ nɛ̀n kɔrɛ yɔ. 6Kɩ y'ankàẅì-bùtan léyi yɔ sɩ̀ ẅɛ̀n hàn nɔn, kɛ frɛ́n nɛ̀n anvɛmɛ̀n.

Zhezü kɛ wá n'ɛsɛ̀nkɛn-bɔ̀ ɛvà-anhyrɛ̀ lɔ ɔkɔ̀hɔ̀n anwrɔn anhyrɛ̀ yrɛ̀

(Nyɛ́n nyan Matie 10:5-15; mán Lükɛ̀n 9:1-6 wrú lɔ mɛ̀n)

Zɛtɛn Zhezü hɔ́n anmàn hɔ̀n lɔ fɛn dú ɛtɛ̀sɛ̀n nɔn ke yé yɔ ankà. 7Nɛ̀n bi n'ɛsɛ̀nkɛn-bɔ̀ ɛvà-anhyrɛ̀ lɔ, kɩ nɛ̀n bukru nɛ wá yɔ ɔkɔ̀hɔ̀n anwrɔn anhyrɛ̀ yrɛ̀. Nɛ̀n tán yɔ ɛkɔrɛ̀srɔn yɔ wrɔ́ anhɛ́n gbàngbàn. 8Kɩ nɛ̀n wá tán yɔ le: “Nyɛ́n bɩ́ bɩ́ eci zriɛmɛ́n nyɛ́n wá edomɛ̀n nyɛ́n nɛ̀nnyànmàn hɔ̀n lɔ mɛ̀n; kpamán zri kɩ; nyɛ́n bɩ́ bɩ́ ɛci-zî, bagɛ̀n mán nyɛ́n bɩ́ bɩ́ɛ, yakɛ ɔkùa mán ke bɩ́ dú nyɛ̀n kotokuemɛ̀n. 9Nyɛ́n wá ɛnanwrú, tɛ́n nyɛ́n bɩ́ bɩ́ ɛwú ceci anhyrɛ̀.”

10Zhezü vru kɛ dɔ́ yɔ le: “Ɛnvra léyi nye bru anmàn tɔ̀n nɔn, nyɛ́n yɛ́ ebɩ́ léyi ye le bɩ́ nyɛ̀n nɔn mɛ̀n hàn kɩ kɛ̀ cɔ́ ɛnvra léyi nyɛ lɛ cɔhɔ́ ɛyri ndɔ lɔ nɔn. 11Ke dú kɛ nye bru anmàn kɛ̂ nanvrɛn bɔ̀ ke sɩ́ ji kɛ̀ ẅɛn nyɛ̀n nɛ̀nnyàn-bɔ̀, ke sɩ́ ji kè die nyɛ̀n nukùɛ, nyɛ́n cɔhɔ́ nanvrɛn lɔ ô nyɛ́n korɛ ny'annantrɛ̀mɛ̀n hi nyɛ́n cüe: hɩ lɔ de ke le dú ankà-bì-dɔ̀ kɛ̀ tán yɔ nɔn.” 12Zhezü sɛ̀nkɛn-bɔ̀ lɔ hɔ̀n kɛ dɔ́ anwrɔn ɛnbɔrɛ-sàn-crɔn ankà. 13Yɔ wrɔ́ anhɛ́n gbàngbàn bobrebe; kɩ yɔ bɩ́ ɛnzhì yɔ kɔrɛ ɛnlɔẅiɛ-bɔ̀ bobrebe.

Zhan Batisì wú vra ankà

(Nyɛ́n nyan Matie 14:1-12; mán Lükɛ̀n 9:7-9 wrú lɔ mɛ̀n)

14Ɛnnɛ̀ncüì Herɔdɛ̀n yá yɛ dɔ́ Zhezü ankà, ɔmuhi n'ebɩ́-dì bonyí ɛyri lɔ fɛn nɔn. Anwrɔn ndɔ hɔ̀n kɛ dɔ̀ le: “Zhan Batisì de dú owúemɛ̀n frɔ́ nɔn! Hɩ le kruhú de nɛ̀n ẅɛn ɛkɔrɛ̀srɔn nɛ hán anvɛmɛ̀n-frɛ́n-ci nɔn.” 15Tɛ́n anwrɔn nyàntɛn ndɔ hɔ̀n vru kɛ dɔ̀ le: “Eli.”

Kɩ ndɔ hɔ̀n vru kɛ dɔ̀ le: “Ɔwɔ-mùanwú-ankà-dɔ́-wrɔn tɔ̀n, nɛ̀n dù nɛ̀n cá ɛnbihɛ́n Ɔwɔ-mùanwú-ankà-dɔ́-bɔ̀ lɔ ɔtɔ̀n.” 16Ɛnvra léyi Herɔdɛ̀n yá ankà ndɔ lɔ nɔn, nɛ dɔ̀ le: “Ɔwrɔn lɔ Zhan Batisì! Mɛ́n hán ye wí nɛ̀n ɛnkru; tɛ́n nɛ̀n vru nɛ̀n vá ɛkɔrɛ-bɔ̀ mɛ̀n!”

17Annànwɔrɛ mɛ̀n lɔ Herɔdɛ̀n dùku de wá tán yɛ ẅɛn Zhan, yɛ kɔrà ye di anwɔn-mɛ̀n-wá-wɔn mɛ̀n. Herodiadɛ̀n kruhú de Herɔdɛ̀n hán eci ndɔ lɔ nɔn, ɔmuhi nɛ̀n bɩ́ nɛ́n muan-ẅì Filipɛ̀n hi nɛ́n srɔ nɛ́n hi nɔn. 18Ɔmuhi Zhan kɛ dɔ́ Herɔdɛ̀n le: “Kè sɩ̀ wá tán mɛ́n è bɩ́ ɔmuan-ẅì hi è yrì!” 19Herodiadɛ̀n bɩ́ ɛmɛ̀nhyì ku Zhan ɛwú kɩ ne ji yi ewri-yri, tɛ́n Herɔdɛ̀n kruhú nɛ́n sɩ́ cɔ́ hɩ kɔrɛ̀levri lɔ. 20Herɔdɛ̀n ke sú Zhan, ɔmuhi nɛ̀n nyri ɔmu le, Zhan dú ɔwrɔn anvrɛnvrɛn, prɔnprɔn-wrɔn kɩ nɛ wá yi esùva. Ɛnvra léyi Herɔdɛ̀n ke die Zhan nukùɛ nɔn, ne dú ɛnkrɛ̀ta kuemɛ̀n, ɔmu tɛ̀kɩ nɛ cüɛn yi nukù die. 21Ɛnbì tɔ̀n Herɔdɛ̀n kɛ kɔran n'ebî-vra-kɔran, kɩ Herodiadɛ̀n brá pɔ̀püɛ̀ ɛnbì lɔ kruhú. Herɔdɛ̀n bi n'ɛtɛ̀sɛ̀n-bɔ̀ lɔ mán anwrɔn cüìcüì hɔ̀n lɔ fɛn léyi dú Galile Kpɔsɔ wú, hɩ ẅɛn vɔ̀nshɛ́ nɔn ɛci. 22Herodiadɛ̀n nyɔnwrɔn-ẅì bru ɛmràn-wɔn mɛ̀n kɩ bri ɛmràn; kɩ n'ɛmràn brì lɔ zrɔ Herɔdɛ̀n mán anwrɔn hɔ̀n léyi nɛ̀n bi ɛci nɔn. Zɛtɛn Herɔdɛ̀n kɛ dɔ́ ɛnnyɔnwrɔn-ẅì lɔ le: “Ɛ̀ sán mɛ̀n eci léyi e ji nɔn, kɩ mɛ lɛ tán mɛ́n.” 23Kɩ nɛ dɔ́ yi ɔmùan-wá ankà ndɔ lɔ: “Mɛ wá ɔmùan le eci lɔ fɛn léyi e ji nɔn, ke dú m'ɛyri léyi mɛ́n ẅɛ̀n nɔn, hɩ cá mán mɛ lɛ tán mɛ́n.” 24Ɛnnyɔnwrɔn-ẅì lɔ srɔ ɛntrɛ ke yrɛ nɛ́n muan: “Ecitan de mɛ lɛ sán nɛ́n?” Nɛ́n muan mrɛ́n ɔmùan le: “Zhan Batisì kru.” 25Ɛnnyɔnwrɔn-ẅì lɔ kpramàn vru ɛmɛẅi hɔ́n cɔ́ Herɔdɛ̀n kɩ kɛ dɔ́ nɛ̀n le: “Me ji ɛ̀ tán mɛ̀n Zhan Batisì kru zɛtɛ̀ lɔ kpokpo trɛtrɛ mɛ̀n!” 26Ɛnvra léyi ɛnnɛ̀ncüì lɔ yá ankà ndɔ lɔ nɔn nɛ̀n dú obòto mɛ̀n; tɛ́n nɛ́n sɩ́ ji nɛ̀n kɔrɔ, ɔmuhi nɛ̀n wá ɔmùan anwrɔn zìwú nɔn. 27Herɔdɛ̀n wá gɔliɛ-wrɔn tɔ̀n ɔkɔ̀hɔ̀n kpatakpata lɔ anwɔn-mɛ̀n-wá-wɔn mɛ̀n, ô ye bɩ́ Zhan Batisì ɛnkru yɛ và. Gɔliɛ-wrɔn lɔ hɔ́n anwɔn-mɛ̀n-wá-wɔn mɛ̀n, kɩ wí Zhan ɛnkru. 28Zɛtɛn nɛ̀n sɩ́ ɛnkru lɔ dú kpokpo trɛtrɛ mɛ̀n, kɩ nɛ́n và sɩ́ ɛnnyɔnwrɔn-ẅì lɔ, kɩ ɛnnyɔnwrɔn-ẅì lɔ mán bɩ́ hɔ́n sɩ́ nɛ́n muan. 29Ɛnvra léyi Zhan sɛ̀nkɛn-bɔ̀ lɔ yá ankà ndɔ lɔ nɔn, yɔ vá bɩ́ Zhan dùwrú lɔ yɔ hɔ́n wá ezhe-nànmàn tɔ̀n mɛ̀n.

Zhezü tán anwrɔn tɛ̀bru-kru-ɛnrì ɛci-zî

(Nyɛ́n nyan Matie 14:13-21; Lükɛ̀n 9:10-17; mán Zhan 6:1-14 wrú lɔ mɛ̀n)

30Zhezü kɔ̀hɔ̀n-wá-bɔ̀ vru vá nɛ̀n ɛtɛ̀sɛ̀n kɩ kɛ dɔ́ nɛ̀n ɔkɔ̀hɔ̀n lɔ fɛn léyi yɔ hán kɩ yɔ yé nɔn hɩ ankà. 31Anwrɔn hɔ̀n léyi kɛ hɔ̀n hɩ kɛ và nɔn cüɛn kakɔrɛ̀ hán tán kɩ Zhezü mán n'ɛsɛ̀nkɛn-bɔ̀ ke sɩ́ cɔ́ ɛnvra hɩ ká zî ɛci nɔn. Hɩ le kruhú de nɛ dɔ́ yɔ le: “Nyɛ́n và nyɛ́n cɔ́ mɛ̀n bɔ̀ hɔ́n ɛyri tramɛ̀n ô nyɛ́n wrɔncüe jan.” 32Zhezü mán n'ɛsɛ̀nkɛn-bɔ̀ mɛhi bru anhàka mɛ̀n, sɔnba ɔhɔnán ɛyri tramɛ̀n. 33Tɛ́n anwrɔn bobrebe kán yɔ yɔ hɔ̀n kɩ nyri ɛyri léyi yɔ hɔ̀n nɔn. Zɛtɛn yɔ dú anmàn lɔ fɛn yɔ ci ɛnhi yɔ vá cɔ́ ɛyri ndɔ lɔ, yakɛ Zhezü mán n'ɛsɛ̀nkɛn-bɔ̀ vá kɛ́.

34Ɛnvra léyi Zhezü dú anhàka mɛ̀n kakɛ nɔn, nɛ̀n kán fɛcüè vri ndɔ lɔ; n'ɛnbɔrɛ lɔ ẅɛn obòtò y'ɛwú, ɔmuhi yɔ dù yɔ cá annɔ̀n hɔ̀n léyi kè sɩ̀ ẅɛn ɔkùa-wrɔn nɔn. Kɩ nɛ̀n bukru ne yé yɔ ankà bobrebe. 35Ɛnvra bru ɛmɛ̀n, kɩ Zhezü sɛ̀nkɛn-bɔ̀ vá nɛ̀n ɛtɛ̀sɛ̀n kɛ dɔ́ nɛ̀n le: “Ɛnnyran gɔ̀n bru ɛmɛ̀n, kɩ ɛnu lɔ dú ɛyri tramɛ̀n. 36Ɛ̀ hán anwrɔn hɔ̀n lɔ kè vru ɛmɛẅi kɛ̀ hɔ́n anmàn ndɔ hɔ̀n léyi dú ɛtɛ̀sɛ̀n nɔn, ô kè ji ɛci kè zî.” 37Zhezü mrɛ́n yɔ ɔmùan le: “Nyɛ́n dùku nyɛ́n tán yɔ eci yɔ zî!” Tɛ́n n'ɛsɛ̀nkɛn-bɔ̀ lɔ ke yrɛ nɛ̀n le: “E ji le bɔ̀ hɔ̀n bɔ̀ wɔ́ ɛci angbɛ́n ɛkoẅi-ɛvà, ô bɔ̀ tán yɔ yɔ zîɛ?” 38Zɛtɛn Zhezü kɛ dɔ́ yɔ le: “Abùtùkumɛ́n ɛbɛ dú nyɛ̀n hán? Nyɛ́n hɔ̀n nyɛ́n nyan.” Yɔ hɔ̀n yɔ nyan, kɩ yɔ dɔ́ nɛ̀n le: “Bɔ̀ ẅɛn abùtùkumɛ́n ɛnrì mán ɛcàn anhyrɛ̀.” 39Zɛtɛn Zhezü wá tán n'ɛsɛ̀nkɛn-bɔ̀ kɛ̀ hán anwrɔn lɔ fɛn kɛ̀ yɛ́ ɔkpɔsɔ ɔkpɔsɔ, ɛfi wɔ̀ wú. 40Kɩ yɔ yɛ́ ɛkoẅi-ɛnrì-nrì mán ɛkoẅi-anhyrɛ̀ mán ɛẅì ɛvà mɛ̀n. 41Zɛtɛn Zhezü bɩ́ abùtùkumɛ́n ɛnrì mán ɛcàn anhyrɛ̀ lɔ, sɩ́ anvɛ̀ ɛwú fú ɛnshi kɩ tán Ɔwɔ ɔkùɛn. Nɛ̀n voyan abùtùkumɛ́n lɔ kɩ nɛ̀n tán n'ɛsɛ̀nkɛn-bɔ̀ kɛ̀ dɛ́ anwrɔn. Nɛ̀n dɛ́ ɛcàn anhyrɛ̀ lɔ mán nɛ̀n tán anwrɔn lɔ fɛn. 42Ɔwrɔn wrɔn zî ɛci, ɛmɛ̀ntɛ̀ yɩ̀. 43Ɛci léyi yɔ zî hɩ wɔrɔ nɔn, yɩ́ ankɛ ɛvà-anhyrɛ̀. 44Anwrɔn hɔ̀n léyi zî ɛci nɔn yɔ dú anwrɔn tɛ̀bru-kru ɛnrì.

Zhezü kɛ nán esù nɛnbà-cɛ wú

(Nyɛ́n nyan Matie 14:22-33; mán Zhan 6:15-21 wrú lɔ mɛ̀n)

45Ɛnvra zri lɔ, Zhezü hán n'ɛsɛ̀nkɛn-bɔ̀ ku anhàka mɛ̀n ô kɛ̀ vɔ́n ɛnshi kɛ̀ hɔ̀n kɛ̀ vrá nɛ̀n ɛnshi mɛẅi Bɛtsahida anmàn tɛ̀sɛ̀n; nɛ tɛ́n nɛ lɛ hán fɛcüè lɔ kè vru ɛmɛẅi kɛ̀ hɔ́n y'edúyri. 46Ɛnvra léyi nɛ̀n hán fɛcüè lɔ hɔ̀n nɔn, Zhezü hɔ́n ɛnkpò-ce tɔ̀n wú kɛ sɛ́n Ɔwɔ. 47Ɛnvra léyi ɛnnyran gɔ̀n nɔn, anhàka mán Zhezü sɛ̀nkɛn-bɔ̀ dú nɛnbà-cɛ wanzi, kɩ Zhezü zri dú ɛnhi. 48Zhezü kán ɔmu le n'ɛsɛ̀nkɛn-bɔ̀ kɛ wɔ́ ɛvrà kɛ mian yɔ, ɔmuhi ɛndɔ̀nwrɔ̀n crɛ ezì kɛ́n yɔ nɔn; zɛtɛn ɛnnyran gɔ́n bru ɛmɛ̀n, kɩ Zhezü kɛ nán esù ɛnshi wú wrɔ́ yɔ hɔ̀n, kɩ nɛ vá yɔ ewui-yri. 49Tɛ́n ɛnvra léyi yɔ kán nɛ̀n nɛ nán esù ɛnshi wú nɔn, yɔ tro le ezhe tɔ̀n kɩ yɔ bukru yɔ di bobo, 50ɔmuhi yɔ lɔ fɛn yɔ kán nɛ̀n kɩ yɔ dú gbɔ̀gbɔ̀ mɛ̀n mán ɛnjansuemɛ̀n nɔn. Tɛ́n ɛnvra zri lɔ Zhezü kɛ dɔ́ ankà: “Nyɛ́n bɩ́ edùyì, mɛ̀n Zhezü; ɛnjansù ke bɩ́ ẅɛn nyɛ̀n!” 51Zɛtɛn Zhezü bru anhàka lɔ mɛ̀n y'ɛtɛ̀sɛ̀n, kɩ ɛndɔ̀nwrɔ̀n sannyɔn. Ɛsɛ̀nkɛn-bɔ̀ lɔ dú anvɛmɛ̀n-frɛ́n vriemɛ̀n, 52ɔmuhi yɔ sɩ̀ nyrì abùtùkumɛ́n anvɛmɛ̀n-frɛ́n-ci léyi Zhezü hán nɔn hɩ mɛ̀n ankà-dɔ̀: y'ɛnkruemɛ̀n-ẅɛ̀n kè sɩ̀ tàn yɔ ɛkɔrɛ̀levri yɔ nyrì ankà ndɔ lɔ n'ɛmɛ̀n.

Zhezü kɔrɛ ɛnlɔẅiɛ-bɔ̀ Zhenezarɛtɛ̀n kpɔsɔ wú

(Nyɛ́n nyan Matie 14:34-36 wrú lɔ mɛ̀n)

53Zhezü mán n'ɛsɛ̀nkɛn-bɔ̀ trɔ ɛnshi vɔ̀n, nɛnbà cɛ wú kɩ kakɛ Zhenezarɛtɛ̀n kpɔsɔ wú, kɩ yɔ mɔɛ́n y'anhàka lɔ ɛnshi gbàtà mùan. 54Yɔ dú anhàka mɛ̀n yɔ kakɛ, kɩ ɛnvra zri lɔ anwrɔn nyri Zhezü. 55Yɔ srɛ́ yɔ hɔ́n anmàn lɔ fɛn yɔ bɩ́ ɛnlɔẅiɛ-bɔ̀ ɛnkpà wú, yɔ vá sɩ́ nɛ̀n ɛyri lɔ fɛn léyi yɔ yá le nɛ́n dù nɔn. 56Kɩ ɛyri lɔ fɛn léyi Zhezü ke ci nɔn, anmàn cɛ hô, anmàn vri hô, nanbuenu hô, anwrɔn ke bɩ́ y'ɛnlɔẅiɛ-bɔ̀ kɛ vá hɛ́n ɛkrubɔrɛ yri lɔ, kɩ yɔ sɛ́n nɛ̀n ô nɛ̀n teze ɛnlɔẅiɛ-bɔ̀ lɔ kɛ̀ tɛ́ n'ɛceci lɔ ɛkɔrɛ̀; kɩ yɔ lɔ fɛn léyi yɔ tɛ́ n'ɛceci lɔ ɛkɔrɛ̀ nɔn yɔ kɔrɛ̀.

Currently Selected:

Markɛ̀n 6: ƐAA03

Highlight

Copy