Gênesis 21
21
Isaque kaĩ eskanikiaki, na hãtxarã
1-4Senhor Deusũ Abraão yubaimashũ Sara shinãkĩ hatu merabewaya hanushũ Abraão mestebuhairabiatũ hawẽ aĩ Sara txutakĩ bakewaima haska Deusũ yubakĩ yuima keska Sara huni bake bimaima kaiã Abraão kenakĩ: “Isaqueki”, ashĩshũ 8 shabatiã hawẽ hina kubitxi bikĩ meshtenikiaki, haska Deusũ yunuima txibãkinã. 5Hanua Abraão 100 ano hayakẽ Sara Isaque kaĩtã 6Sarã shinãkĩ: “Deusũ ea benimawakĩ ea usãmashuki. Haskakẽ ẽ huni bake kaĩshina habũ nĩkatã benimariashãkanikiki, ebetã usãriairã. 7Ẽ benẽ ea bakewaima kaĩshũtã ẽ txutxu amashũtirurã, tsuã bebũkiri shinãtirumahaira ikimaki. Hakia ẽ bene mestebuhairabiatũ ea bakewaima ẽ huni bake kaĩshũshinaki”, inikiaki.
Agar inũ hawẽ bake Ismael hatu hiwemabiashũ Abraão hatu nitxinikiaki, na hãtxarã
8Hanua ha hawẽ bake Isaque ewaya hawẽ beya txibãkĩ txutxu henemakĩ taewakẽ habiatiãri Abraão hawenabu piti itxapa washũ hatu pimakĩ benimawaya 9hawẽ aĩ betsa Egito nawa Agarĩ bake Ismael haki beparamekĩ dayuikĩ Isaque itxaya hawẽ ibu Sarã uĩshũ 10sinatakĩ Abraão yuikĩ: “Mĩ dayaru escravo Egito nawa hawẽ bakebe nitxĩriwe, ẽ ana hatu betxipaiamakirã. Hanu nuku nũ mawaya nukũ mabu inũ, nukũ inabu inũ, nukũ dayarubu Ismael hau Isaquebetã pashkayamashanũ, ẽ bake kayabi Isaque bestitũ ibu wakĩ bishanikiki. Haskawẽ taeshũ hatu nitxĩriwe”, aka
11Ismael hawẽ bake ma berunãwẽ dabanã Abraão shinaĩ hawẽ nui pes dakakẽ 12-13hanushũ Deusũ Abraão yuikĩ: “Mĩ dayaru Agar inũ mĩ bake Ismaelwẽ dabanã ikĩ shinaĩ pesyamawe. Haska Sarã mia yunuai keska hatu wawe. Haska ẽ mia yubanirã, Isaquewẽ taea minabu kayabi besti inũbarishãkanikiki. Hakia mĩ dayaru escravã bake mĩ bakeriwẽ taeshũ Ismaelĩ enabu itxapahairari ẽ mia hatu ashũriashanaii”, aka
14haska washina penamahaira Abraão butushũ bitxi bishtuki ũpash maneshina inũ misi Agar hawẽ dayaru inãkĩ hau haya butanũbũ peumatã hawẽ huni bake berunãbe nitxiã bui Berseba mai pakea hanu tsua hiweriabumanu iaketani 15hawẽ ũpash inũ hawẽ piti keyui ma netsukẽ hawẽ bake Ismael ũpash manuhairai ma babukẽ ni utapã namã hau dakayunũ yunua dakakẽ 16henebaini uĩ benãta tsaushũ shinãkĩ: “Ẽ bake mawai ẽ uĩkatsi ikamaki”, ika hawẽ bakekiri petxitã tsaukẽ hawẽ bake kashaya 17hanua hawẽ bakẽ hui Deusũ nĩkaya nai anushũ Deusũ nai tsumã Agar kenakĩ yuikĩ: “Agarĩ, mĩ haskai ikai? Mĩ bake ni utapã namã daka kashai Deusũ nĩkashuki. Miarã, dateyamawe, mã mawamakirã. 18Benitã mĩ bakeri metsũshũ heneyamawe, mĩ bake Ismael duawakĩ hawenabu itxapa ẽ hatu wariashanairã”, atã 19hanua Deusũ Agar ũpash inãkĩ txatxa uĩma kashũ bikĩ bitxi bishtuki txatxa ũpash mata washũtã hawẽ bake amanikiaki. 20Deusũ merabewakubainaya hawẽ bake Ismael ewai pia kuĩwẽ tsaka mebeyai dekuyakũkaini 21Parã mai pakea betsa hanu tsua hiweabumanu hawẽ ewabe hiweaya txipu hawẽ ewã Egito anuabu aĩbu iweshũ aĩyã wãkĩ aĩbu bimanikiaki, hawenabu kayabi bimakinã.
Abimeleque Abraãobe yubakanamenibukiaki, na hãtxarã
22Habiatiãri Gerar nawa shanẽ ibu Abimeleque hawẽ detenamenikabu shanẽ ibu betsa Ficolbe Abraão anu hushũ yuikĩ:
—Mĩ Deusũ haibuki. Dasibi mĩ akai Deusũ mia merabewakubaĩmiski. 23Eskawẽ taea Deusũ nuku uiãyã ma mae anua ẽ mibe yubakaii, ea inũ, ẽ bakebu inũ, enabu pakubainaibu mia inũ minabu hau nuku txakabuwayamashanũbũwẽ. Ea yubawe. Mĩ nuku dapi hiweaya ẽ mia duawaima keska wakĩ ea inũ enabu na mai pakea anu nũ hiweabu habiaskari wakĩ nuku duawariapakeshãkãwẽ— aka 24-25Abraão nĩkatã kemakĩ:
—Ẽ mia yubatiruki. Hakia mia yuinũ, nĩkawe, ea haska waimaburã. Mĩ tsumabũ ẽ ũpash kini ea mebĩmabuki. Ẽ mibe yubakaya minabũ nuku ana habiaska watirubuki— aka 26hanushũ Abimeleque Abraão nĩkatã kemakĩ:
—Tsuabũ mia akimamẽ? Haska mia waimabu natiã ẽ hawa unãmaki. Mĩ ea yuiama ikima ẽ dama nĩkaii— aka 27hanua txashuwã itxapa inũ ina awa itxapa Abraão Abimeleque inã habe yubakai parananãtima ha dabe yubakanametã habias shabatiã 28hanushũ Abraão hawẽ txashuwã bake yushãs 7 katushũ pashkatã tari nitxĩkẽ 29haska wai Abimeleque uĩkĩ yukakĩ:
—Haskakĩ mĩ txashuwã bake 7 yushãs mĩ katushũ tari nitxĩshumẽ?— aka 30Abraão kemakĩ:
—Ha txashuwã bake 7 ẽ mia inã mĩ bishuwẽ taeshũ txanima dasibitũ unãkĩ: “Ha ũpash kini Abraão hatu pukĩmaniki”, akĩ unãshãkanikiki— aka Abimeleque txashuwã bikĩ:
—Peki— itã ibuwaya 31hanua ha dabe yubakaibuwẽ taeshũ ha ũpash pukĩ anu mae kenakĩ: “Bersebaki”, anibukiaki. 32Berseba anua yubakanametã hawẽ detenamenikabu shanẽ ibu Ficol inũ Abimeleque hawẽ mae Filisteu nawabu hiweabu anu txĩtũbainibukiaki. 33Hanushũ Berseba anu hawẽ ũpash kini dapi hi betsa Abraão banatã hanua Senhor Deus hiwea ikibi ikabe hãtxakĩ kẽwanikiaki. 34Hanua haskai Abraão Gerar nawabu anu hatu dapi bai kani hawenabube hiwepaunikiaki, bari itxapa hanu Filisteu nawabu hiweabu anurã.
Currently Selected:
Gênesis 21: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
