Gênesis 22
22
Deusũ Abraão ikũwaĩ unãti wanikiaki, na hãtxarã
1Bari betsatiã Deusũ Abraão: “Haska ea ikũwãmismẽkaĩ?” unãti wanũ ishũ, Abraão kenakĩ yuikĩ:
—Abraãonẽ— aka
—Ẽ nenuki. Ea yuiwe— aka 2yuikĩ:
—Mĩ huni bakerã, ha mĩ betxipaihairairã, mĩ aĩ kayabĩ bake bestitxai Isaquerã, Moriá mai pakea anu iyuwe. Hanu ha mati ẽ mia uĩmai anushũ mĩ bake Isaque ea inãshãwẽ, ea daewakĩ ea menu keyushũkinã— aka
3nĩkashina hanua shaba betsatiã penamahaira Abraão bututã hawẽ kuati karu watã hawẽ jumento kamaki karu nanetã hawẽ bake Isaque inũ hawẽ dayaru dabe hatu iyui hanu Deusũ yuishina anu hatube hari kai 4usha dabekaĩ Abraão nukutã hanu Deusũ yuishina betxitã 5hawẽ tsuma dabe bashikĩ hatu yuikĩ:
—Nenu jumentobe tsaushũ nuku manayukãwẽ, nuku dabes kashũ Deus kẽwãtã nũ ana txĩtũkiranairã— hatu watã 6ha karu beshu Isaque iamabaĩkĩ kẽti txi tsistuyabi inũ nupe bitã hati bui habe kaya 7hanushũ hawẽ bake Isaque hawẽ epa Abraão yukakĩ:
—Epã— aka nĩkatã:
—Hawamẽ, epaã?— aka
—Uĩwẽ. Txi inũ karu nũ ma hayaki. Hakia txashuwã bake ha menuti nũ hayamaki. Hania?— aka 8Abraão kemakĩ:
—Epaã, txipu Deusũ txashuwã bake nũ ha menunũ nuku inaĩkiki— abaini hawẽ bakebe kai 9hanu Deusũ yuishina anu hikitã mishki txi tapu wakĩ mishki itxawakĩ maspu watã haki karu mãtxĩshũ hawẽ bake Isaque sebitã txi tapu anu karu mamaki datãshũ 10hawẽ bake teshtenũ, iwanã, Abraão meshũkaĩ nupe bikĩ sitanaya 11hawaira nai anushũ Senhor Deusũ nai tsumã kenakĩ:
—Abraãonẽ, Abraãonẽ— aka nĩkai teku iki e itã yuikĩ:
—Ẽ nenuki. Ea yuiwe— aka 12nai tsumã yuikĩ:
—Mĩ bake haska wakĩ tenãyamawe. Deuski mesekĩ mĩ bake bestitxai mĩ haki hawa yaushiama ẽ unaiĩ— akaya 13hanushũ hawẽ petxiuri Abraão hawaira uĩkĩ txashuwã bene hawẽ mashũki tsukuski bitxa hawaira atxitã neatã beshũ hawẽ bake hana butetã pekatã hanushũ Deus kẽwãkĩ hawẽ shãtukũ txashuwã bene tesẽshũ kuashũkĩ menu keyunikiaki. 14Haska watã Abraão ha mati kenakinã: “Na mati Senhor Deusũ hatu yupa watirumaki”, anikiaki. Na habiatiãri ikis yurabũ habiariri kenariakĩ heneisbumaki.
15-17Hanushũ nai anushũ Senhor Deusũ nai tsumã Abraão ana kenakĩ yuikĩ:
—Ẽ tsuma Senhor Deusũ mia yuikĩ: “Ẽ mia yuishina mĩ ma ashuki. Mĩ huni bake bestitxai mĩ eki hawa yaushiamaki. Haskawẽ taeshũ ẽ mia yubaii. Ẽ kushipawẽ emebi ẽ mia yubai ea nĩkawe. Pepawakĩ ẽ mia duawashanaii, pa wakinã. Pa wakĩ minabu ẽ mirimawashanaii, bishi mĩ uiaĩti wakĩ inũ ianẽwã kesha mashiti wakinã, tsuã tanatiruma wakinã. Tsuabura minabuki sinataibu minabũ hatu maemakubaĩshãkanikiki. 18Ẽ mia yunushina mĩ ea ashũshuwẽ taeshũ minabu katushũ hatuwẽ nawa betsa betsapa mae hirabi anu ẽ hatu duawakubaĩshanaii”, akĩ Senhor Deusũ ea mia yuimashuki— aka 19nĩkatã hawẽ tsuma dabe bashibirananu Abraão hawẽ bakebe ana txĩtũkirã hatuki nukua Berseba anu hawẽ jumentoya ana bui hikiabu hanu Abraão hawenabube hiweyukũkainikiaki.
Abraão betsa Naor bakebu hati hiwenibukiaki, na hãtxarã
20-24Hatiãra tsuãra Abraão yuikĩ:
—Mĩ betsa Naor bake itxapa ma hayaki. Hawẽ aĩ Milca 8 huni bakeyaki, hawẽ bake iyuarã, Uz inũ, ha katxu Buz inũ, Quemuel inũ, Quésede inũ, Hazo inũ, Pildas inũ, Jidlafe inũ, Betuelrã. Hatiki, hawẽ huni bakebũ kenarã— anikiaki. Ha inũ, hawẽ nãtakea aĩ bikĩ pakatã bini aĩbu betsa Reumárã, 4 huni bake hayarianikiaki, Teba inũ, Gaã inũ, Taás inũ, Maacárã. Hatikiaki, hawẽ huni bakebũ kenarã. Txipu Naor bake betsa Quemuelĩ huni bake betsa bawani hawẽ kena Arã inikiaki. Ha inũ, Naor huni bake betsa Betuelĩ aĩbu bake betsa bawanirã, hawẽ kena Rebeca inikiaki.
Currently Selected:
Gênesis 22: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
