Lucas 2

Jesus kaĩnã, eskanikiaki, na hãtxarã

(Mt 1.18-25)

1Hanua ha haskaitiã Romano shanẽ ibuhaira César Augustõ hawẽ mai pakea kesua hirabi anushũ huni tibitũ kena netãkĩ hau tanashanũbũ hawẽ tsuma betsa betsapabu yununikiaki. 2Hanushũ tsuã haska tanakĩ taewariama Síria mai pakea anu Romano shanẽ ibu beshmas Cirênio shanẽ ibuaya Romano shanẽ ibuhaira César Augusto ha dukũtũ hau hawenabu tananũbũ shanẽ ibu beshmas dasibibu hatu yunuimawẽ taea 3hau tananũbũ hatũ shenipabũ mae tibi anua besti itxai buaibũ 4José hawẽ mae Nazaré mai pakea hatiuma betsa Galiléia anu hiwebia Davĩ babawẽ taea 5Josẽ hawẽ kena hatu netãmanũ ika hawẽ shenipabu Davĩ mae Belém, Judéia mai pakea anu kakĩ Maria José bimakatsi ibuama bestimabu daratamea tuyaima iyui habe kai hikia 6-7Belém anu hiwe pakatã ushati ma keyubia teshke ikabũ hani itima ina hiwe anu José inũ Maria ikabũ hanua Mariã huni bake iuwa kaĩyã datxutã yabushũ burro pimati hi shãtu wanibuki basi nawatã datãshũ uĩaĩbũ

Nai tsuma damitã txashuwã mekemisbuki Jesus kaĩyãkiri txaninikiaki, na hãtxarã

8habiatiãri Belém dapishũ habũ ina txashu mekemisbũ basi shukua anushũ mexu merã uĩaĩbũ 9Deusũ nai tsuma damia Deusũ kuxipawẽ txashahaira hatu dapi nia txashuwã mekemisbũ uĩ datehairaibu 10nai tsumã hatu yuikĩ:

—Dateyamakãwẽ. Matunabu hawẽ benimai keyushanaibu ẽ matuki txanikĩ kaka pepa beshũshuki, nĩkakãwẽ. 11Matũ shenipabu shanẽ ibuhaira Davĩ mae Belém anu haska Deusũ yubani matũ merabenã Shanẽ Ibu ma kaĩyãki, Cristo Messiasrã. 12Hanu benabaũkĩ ina hiwe anu yabushũ burro pimati hi shãtu wanibuki datãbu mã betxi katiruki. Haska betxitã ẽ hãtxa kayabi mã unãshanaii— hatu waya

13hakimamari nai tsuma mirimahaira damibirã habetã Deus kẽwaĩ nawakĩ yuikĩ:

14“Mai anushũ tsuabũra habũ Deus txibãkĩ duawamisbu

Deus kuxipahairatũ hau hatu unãnuma hiwemanũwẽ.

Haskakẽ dasibibũ Deus kuxipa nai anua hau kẽwãrianũbũwẽ”,

hatu watã 15nai anu ana buaibũ benimai yuinamekĩ yuikĩ:

—Habaa! Haska Deusũ nuku yuishurã, Belém anu benakĩ uĩnũ bukãwẽ— itã

16hawairabaini Belém anu hikitã benabaũkĩ atimas ina hiwe merã José inũ Maria inũ hawẽ bake burro pimati hi shãtu wanibuki datãbu 17betxitã haska nai tsumã bakeixtakiri hatu yuia nĩkabirana hatũmebi txaniaibũ 18-20haska Deusũ nai tsumã hatu yuishu nĩkabirã uĩwani ikũ habiaska uĩkãshu txashuwã mekenikabu txĩtũbaĩkĩ Deus kẽwãkubainaibũ dasibibũ haska habũ yuikubainaibu yura betsabũ nĩkai e itã xinaĩ: “Hawa yui ikanimẽkaĩ?” ikaibũ hanua Mariã haska wanaibu hawẽ huĩti merãs xinã heneama inikiaki.

Templo anushũ Jesus hatu uĩmakĩ iyunibukiaki, na hãtxarã

21Hanua oito dia ka manaxĩshũ hawẽ shenipabu Abraãonẽ ani keska wakĩ hawẽ hina kubitxi meshtekĩ hatu bimatã Maria bake naneriama habias kena Deusũ nai tsumã yuimakiri xinãkĩ Josẽ Mariabetã kenakĩ Jesus wabũ

22Moisés yunukĩ bake kaĩma nashushatã besti hau itxati hiwe anu hikishanũbũwẽ, ani haska txibaĩ Maria bake kaĩma ma nashushai petã hanu hawẽ ibu dabetã ha bake Jerusalém anu hatũ Shanẽ Ibu Deus hawenawamanũ ishũ iyuaibũ 23ha dukũ bebũkiri Deus hãtxai “Huni bake ha dukũ kaĩyãnã, enaki”, ikai Moisés nĩkatã keneni haska txibãkĩ hawenawamatanũ, iwanã, 24iyukĩ ha inãtã ana hawena wakatsi ikĩ haska Deusũ yununi keska wakĩ deiwã dabe ha menushũti buaibũ

25habiatiãri huni betsa pepahaira Deus kẽwãkĩ kaneisma hawẽ kena Simeão Jerusalém anu hiweshũ Deusũ Israelbu dasibi ana merabewakĩ hatu pekakĩ akawashanai yubani Simeão manakakubaĩxina hawẽ Yushĩ Pepa haya hatũ merabewakĩ unãmaya 26Messias Deusũ yunushanai uĩriama hau debuyamashanũ Deusũ Yushĩ Pepatũ yubaimakẽ 27hanushũ Templo hemaĩtĩ anu Deusũ Yushĩ Pepatũ Simeão yunua ka tsaukẽ haska Moisés yusĩni hawẽ huni bake bianananũ ishũ ibubũ iyui hemaĩtĩ anu hikiaya hanushũ Deusũ Yushĩ Pepatũ Simeão yusĩkĩ haratura bake habũ merabenã hau unãnũ ishũ unãma 28benimakaĩ Maria Jesus mebĩtã ikushũ Ibu Deus kẽwãkĩ yuikĩ:

29“Shanẽ Ibu kuxipatuũ, natiã ea duawakĩ haska mĩ ea yubaima mĩ ma akaki.

Haskawẽ taea hawa dateama unãnuma benima paewẽ ẽ mawashanai ea ana nemayamashãwẽ.

30Na bakewẽ yurabu pashawakĩ mĩ mekeshanai ẽ ma uĩaiĩ,

31hawẽ taeshũ na bakewẽ dasibi hiwebaunabu mĩ shanẽ ibuai hawẽ mĩ hatu unãmashanairã.

32Harã, bĩ ewapa txasha keska nawa betsa betsapabũ uĩkĩ minabu Israelbu mĩ kuxipawẽ mĩ hatu duawai uĩriashãkanikiki”,

akaya

33haska wai nĩkai José inũ Maria e irabeaibũ 34-35hanushũ Simeãonẽ hatu yuikĩ:

—Deusũ hau matu duawakubaĩshanũwẽ— iwanã, Maria besti yuikĩ:

—Na bakerã, hawẽ yura Israelbu unãti wakatsi Deusũ katuniki. Hawẽ yusĩa nĩkatã hatiritũ xinã betsa watã txibaĩbũ inũ hatiritũ xinã betsa wama danãkubaĩshãkanikiki. Mĩ bake danãkĩ nupe kenuhairawẽ mĩ huĩti txatxia keska wakĩ mia yumãwãkĩ mia nuitapawashãkanikiki— anikiaki.

36-37Hamẽ betsarã, Israelĩ bake Aserĩ baba betsakiri mia yuinũ nĩkawe. Fanuelĩ aĩbu bake Ana txipax beneyaima sete bari besti habe hiwea hawẽ bene mawanikẽ hanua beneuma 84 bari hiwekũkaini Deusũ hawẽ hãtxa yunua hawenabu hatu yuishũmis Deuski mesei samakekĩ hau hawenabu merabewanũ ika hawẽ kẽwãti Templo hemaĩtĩ anua kaĩama hatu Deus yukashũkubaĩmis 38José inũ Mariaki nukutã hari benimakĩ Deus kẽwãtã haska Deusũ Jerusalémkiri yubani dasibibũ manaibu Anã uĩwãxĩshũ Jesuskiri hatu yuikĩ kaka wakubainikiaki.

39Hanushũ huni bake ha dukũ kaĩyã hau haska wai bunũbũ Moisés kenekĩ yununi txibãkĩ menetã Galiléia hawẽ mae Nazaré anu txĩtũwãkĩ ana hawẽri Josẽ hatu iyuima 40haria Jesus ewai hawẽ yura kuxipai unãnepaya Deus hawẽ benimakĩ duawakubainikiaki.

Jesus berunã Templo hemaĩtĩ anu kaxiã ibubũ betxinibukiaki, na hãtxarã

41Haska inũ, Páscoatiã Egito anushũ hatũ huni bakebu tenãma hatũ shenipabu Deusũ nai tsumã hatu dũkebaini xinaĩ besinũ ika bari tibi Jerusalém anu Jesusũ ibubu bupakemisbũ 42hanua ma Jesus 12 bariyakẽ hawẽ ibubu hatũ beya txibaĩ buaibu habiatiãri Jesus hatube kai taexina 43-44hawẽ ibubu besi keyutã hawẽ mae anu hatube hiwemisbube José inũ Maria txĩtũbiranaibũ hanu Jerusalém anu Jesus besti baxikua ibuã unãma benariama xinãkĩ: “Habe berunãbube huikiki”, itã, José inũ Mariã xinãyabi kai ma shaba hirabi txai bushũ bari kaya Jesus hawenabu anu benakĩ nati atã 45hawenabu anu inũ hawẽ mae anu hiweabu anua hawa betxiama benakĩ keyutã hanu ushaxini Jerusalém anu benanũ ika txĩtũkaĩxina 46hanua três dia ibubũ benakubaũkĩ atimas Templo hemaĩtĩ anu haki nukutuxikĩ Deusũ hãtxa kenenibu yusĩnanãmisbube tsaushũ hatu nĩkakĩ Jesusũ hatu yukai hatube hãtxanamekũkainaya 47Jesus unãnepai nĩkakĩ habũ ha yukaibu tibi yui pewaiwẽ taea dasibibũ nĩkai: “Habaa! Tsuã huni bake berunã unãnepamẽ?” iki habube maniabu anu 48atimas hawẽ ibubu haki nukui e itã hawẽ ewa Mariã yuikĩ:

—Kukaã, haskakĩ mĩ nuku haska waxinamẽ? Ea inũ mĩ epa miwẽ nuitxakayamai datekĩ nũ mia benakĩ mae nati axiãki— aka 49Jesusũ hatu yuikĩ:

—Haskakĩ mã ea benabaunai? Ẽ Epã hiwe anua ma ẽ hatube yuinametiru mã xinãmamẽ?— hatu wa 50hawa hatu yuiai dabanẽ ikĩ nĩkabumakẽ

51hanua kaĩmabaini hawẽ ibu dabebe Nazaré anu txĩtũbainima haria Jesus yumei nĩkanikai hawẽ ibubũ hãtxa tapĩkubainaya ibu Mariã huĩti merãs Jesus haskai hakimama xinãshũkubainaya 52hanua hawẽ yura ewai hawẽ xinã unãnepaya Deus inũ hawenabu hawẽ benimakubainibukiaki.

Currently Selected:

Lucas 2: cbsBR

Highlight

Copy