Bikɔmɛli 2
2
Bodoa boMwembo Mosɛnɔke
1Ibo basusu badaka baboli a esika emɔci a busa boDomi-itano. (Busa boPɛntekɔsta) 2Daka ehula oho Diko bundumo, o pwea epipo mɛnɛ, na elumeja ndako esusu edaka bo. 3Mojɔ monɛ bo modaka o biemi bimosa bia bikabama a tei, na bibakama a diko dimoto na moto. 4Ibo basusu baluma na Mwembo Mosɛnɔke, na babenga bobala na kɔpi jitongo mijɔ mibapa Mwembo bo babale.
5BaYuda baya badaka na lisuma ai Njambe badaka a Yelusalema a masu mamina, baya bama donga a makota masusu mangondo. 6Yana aka bo daka emina, bato batitana banɛnɛ mɛnɛ, na bayegebana bou, cina bo bakaka moto na moto, a kɔpi ende mɛnɛ. 7Ibo bakamoa na dilese mɛnɛ, na babalana bo, Ikani! Bato baya babalaka, bo basusu te bato baGalile? 8Oko boa, ekaka so moto na moto monɔkɔ monde mɛnɛ cina nda? 9Iso te BaPalutia, BaMadai, BaElama, na bato baya badonga a Mɛsɔpɔtamia, Yuda, Kapadokia, Ponto, Asia, 10Pelugia, Pampuha, Ejipito, na makota maLibia oho a dɔngɔ diKulene, na bato baya badonga oho Loma, na BaYuda na bapakano baya bahekoa Bayuda; 11BaKulete na BaAlabia; na bokaka bato bamina baya batɔndɔkɔ mijɔ miNjambe mibokamoa a kɔpi jisu bɛnɛ. 12Ibo basusu bakamoa na dilese, na badaka koko na mokakwano; babalana bo, Cina emina edi bo? 13Bakina batongo ko basɛkɛ oko bosɛkɛ, na babala bo, Balangoi na vino eyene.
Mwako Motɔndɔ Pɛtɛlo
14Pɛtɛlo adaka na babwɛnji batongo domi-na-omɔci, na yo angɔ, adipoa monɔkɔ monde, na abala na bu bo, Ino bami baYuda, na no basusu baYelusalema, hokeani mojɔ mobalaka mbi, na eingeani mojɔ mu. 15Ibaba balangoiti nongo o alɛkɛ no. Boni. Edi oko neuf heures ehuma pɛ. 16Mojɔ mu modi oko mojɔ mobala motɔndɔi Yoele bo,
17Njambe abalaka bo,
Mbi nasopabi Mwembo mombi Ai bato basusu a masu masuka.
Banabami banu na banabali banu bapabí biseko;
Menga manu banɛbi mijɔ a njɔti,
Na basuku banu batɔbí njɔti.
18Mbi nasopabí Mwembo mombi ai bakɔmɛli bambi bami, na Bakɔmɛli bambi bali a masu mamina, na bapabi biseko.
19Nanejabí mijɔ mibokamoa ta busa,
Na bimbete a ngondo ya nase,
Oko makia, na mosa, na modidi momosa.
20Modika-busa mohindabí,
Na songe abongoabí makia,
Oko busa bua boKumu bodoakini,
Busa bonɛnɛ boekumu.
21Na modabí bo moto na moto yona obeaka a kombe eKumu ahelabí.
22Ino bami baYisalaele, hokeani mijɔ mi. Ojehakani mojɔ moYesu oNasaleta. Njambe aneja no bo ahɔ moto omina a tei enu, oko na bimbete na mindumba mikɔ Njambe na nde a boso bonu. 23Ino ko omotombani na omowejani a mole-mobokea na mɔmɔ mabato babe. Njambe ajeba a bobanga mɛnɛ bo badi bomokaba; mojɔ momina modaka oko a mokano monde. 24Njambe ko amocingoa a mbɔci jibogwa, na amongɔjɔ, mojɔ bo bogwa boidaka na ngulu a bomopea na bosusu. 25Mojɔ bo Dawidi abala mojɔ monde bo,
Mbi nanɛkɛ Kumu ombi a boso bombi masu masusu;
Mojɔ bo adi a dɔngɔ dimbi diebɔ ebami bo ambilimejae mbi.
26Molema mombi mosepaka a mojɔ momina, na monɔkɔ mombi modi na enanga;
Mojɔ motongo koko,—mokuku mombi môyeyoa a esika enjingo.
27Cina bo otakina mwembo mombi a esika ebogwa,
Na otajima bo Yona Mosɛnɔke owɛ apɔe.
28Onejaini njea jibomɔ,
Na molema mombi môda na sepi botɔ, mojɔ bo wɛ odi na mbi.
29Baninga, kinani nabale na nu a bohu a mojɔ motata osu Dawidi. 30Iyo agwa na bamopusea; esɛmɔ ende edi oko na su busa bu.
Iyo adaka motɔndɔi, na ajebaka bo Njambe amosakea mosako bo abakee okina mwana’nde a mongbɛlɛngɔ mobokumu bonde.
31Iyo abala boa a mojɔ moMasiya. Anɛ na atɔndɔ mojɔ mobongɔ boMasiya a bogwa, yana abala yo bo atayeyoa a esika ebagwake, na bo mokuku monde motapɔ. 32Oko boa Njambe amongɔjɔ, oko Yesu yo mɛnɛ. Iso basusu bodi banjɛnɛki bamojɔ momina. 33Oko boa, adi yo na ekumu a dɔngɔ diebɔ ebami eNjambe, na asi yo Mwembo Mosɛnɔke ai Sango, o akina yo sako, amosopi ai so, o anɛkɛ no na akaka no. 34Mojɔ bo Dawidi aikwea a Diko yo mɛnɛ. Iyo ko abala bo,
Kumu abali na Kumu ombi bo, Da ya a ebɔ embi ebami,
35Oko adi mbi pɛ bopeta dumba soki jiwɛ a cina jibibota biwɛ. 36Oko boa, bato basusu badenga diYisalaele babwani bojeba bo Njambe abakea Yesu bo adae Kumu na Masiya, oko yona owa ’no a mole-mobokea.
37Bikenge bimina bibandea oko a milema, na babala na Pɛtɛlo na babwɛnji batongo bo, Baninga, êkɔ so ndeni? 38Pɛtɛlo abala na bubo, Hekojani milema minu, na batisamani ino basusu a kombe eYesu Masiya, a mojɔ moboyɛ bojibe jinu, nongo osɛni epeeli eMwembo Mosɛnɔke. 39Sako ye edi ai no bɛnɛ, na bana banu, na bato basusu baya badi bohali pongono, oko bato basusu babeaka Kumu Njambe osu ai yo. 40Pɛtɛlo abatɔndɔ mijɔ mitongo minɛnɛ, na abaleha bo, Ciani elulu ye engulumake! 41Oko boa baya bajima mwako monde babatisama. Busa bomina, etango ebacingami ehɛ na bato koto jisato. 42Ibo badaka na bingi enɛnɛ a mojɔ mobokoja bobabwɛnji, na bakatana na molema momɔci a bobuka molɛmbɛ na a mojɔ mobo’nga.
43Bato basusu badaka na bɔ a mojɔ mobimbete na mindumba mikɔkɔ babwɛnji. 44Bato basusu baya bajimaka bakatana bopele, na bakabana leka pongono. 45Bangɛjɛ ndako na leka lobu, na bakaba likonja na bato batongo o adaka moto na moto na taka. 46Baikputoa bokwea a tempelo busa na busa na molema momɔci. Babukaka molɛmbɛ a ndako-ndako, na bayakaka mia oko na sepi na bowi a milema. 47Basakoaka Njambe, na badaka na gala epele a tei ebato bangando. Njambe anɛngɛja Denga busa na busa oko na bato baya bahelaka.
Currently Selected:
Bikɔmɛli 2: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
