Yoane 18

Bapea Yesu

1Yana asieja yo mijɔ mimina bobala, Yesu amana na bacingami bande. Baleka ekina ediba, kombe Kedelona; bakɛ a ekina esika edaka gbie, na akwea ena na bacingami bande. 2Yuda, mokabi onde, ajeba esika emina, mojɔ bo Yesu atitanaka na bacingami bande oho bihole bmɛnɛ. 3Oko boa Yuda asɔ pɔlɔtɔ ebasoda na bapolisi ai basuku banganga na BaPalusi. Ibo batomba paka na mitanda na mililo mibila, na bakɛ a esika emina. 4Yesu ajebaka mijɔ misusu mia midi bokwa na nde. Oko boa, yo adoa a bosongana na bu, na abala na bu bo, Odukakani nda? 5Ibo bamosɔmbeja bo, Yesu oNasaleta. Yesu abala na bu bo, Mbi yoyo. 6Yana abala yo na bu bo, Mbi yoyo, bagasima oko bogasima, na bakwa a kpɔtɔ. 7Yesu abahɔjɔ koko ho, Odukakani nda? Iho basɔmbeja bo, Yesu oNasaleta. 8Yesu asɔmbeja bo, Mbi natɔndɔi no bo mbi nadi yo. Isa odukakani mbi, kinani bato ba bayane. 9Oko boa, ekenge engama yena ebala yo bo, Naibungeja nongo omɔci obato bapani wɛ. 10Simona Pɛtɛlo adaka na abɛnɛ. Oko boa amohwa, akwɛlɛ mokɔmɛli omosuku onganga pola, na amolena litoi liebɔ ebami; kombe emokɔmɛli omina Maluko. 11Yesu ko abala na Pɛtɛlo bo, Sɔmbeja abɛnɛ owɛ ta ligbogbo. Mbi nitamwa kɔpɔ epini Sango?

12Pɔlɔtɔ ebasoda, na kapitɛni obu, na bapolisi baBaYuda, bapea Yesu na bamokanda mbɔci. 13Bakɛ na nde boso ai Ana, mojɔ bo yo adaka bokio boKayapa, mosuku onganga a yanga emina. 14Kayapa adaka moto yona oleha BaYuda bo moto omɔci abwani bogwa a mojɔ mobato.

Petɛlo Angana Yesu

15Simona Pɛtɛlo asusa Yesu, na okina mocingami otongo pongono. Mocingami omina ajebeanaka na mosuku onganga. Oko boa yo akwea na Yesu a lopango lomosuku onganga. 16Pɛtɛlo ko adika oko sokolu. Oko boa, mocingami yona otongo amana sokolu, abala na mwali yona onjaka modipe, na akweja Pɛtɛlo. 17Mwali yona onjaka modipe abala na Pɛtɛlo bo, Wɛ, te mocingami omoto omina? Iyo asɔmbeja bo, Te mbi. 18Bakɔmɛli na bapolisi batokana mosa na malo, na badaka ba’mi ena bo basahumejae a mojɔ mopio. Pɛtɛlo adaka ami na bu pongono bo asahumejae a mosa.

19Mosuku onganga akokeleja Yesu a mojɔ mobacingami bande na bokoja bonde. 20Yesu amosɔmbeja bo, Mbi nabali na ngondo a bohu mɛnɛ. Nakojaka a sinagoge na a tempelo, a bisika bititanaka BaYuda basusu. Naibala nongo a libombi. 21Ohɔjɔkɔ mbi mojɔ moye? Hɔjɔ bato baya baki mijɔ mibali mbi na bu. 22Abala yo boa, okina polisi yona odaka hulelu amohoma epapata, na abala bo, Osɔmbejaka mosuku onganga boa mojɔ moye? 23Yesu amosɔmbeja bo, Isa nabali mojɔ mobe, aneja bobe bomina. Isa ko nabali bopele, obomi mbi mojɔ moye? 24Ana ko amoloma oko a mbɔci boso Kayapa, mosuku onganga.

25Simona Pɛtɛlo adaka ami ena be asahumejae a mosa. Bakina babala na nde bo, Wɛ oditi okina obaemgami bande? Iyo angana oko bongana; abala bo, Te mbi. 26Okina mokɔmɛli omosuku onganga (Pɛtɛlo alena litoi limwangwa’nde) ahɔjɔ Pɛtɛlo bo, Mbi nataniti wɛ na nde a gbie? 27Pɛtɛlo angana koko, na kɔkɔ abelekoa bokpa.

Esambie Yesu

28Bamana na Yesu a ndako eKayapa, na bakɛ na nde a ndako egouverneur. Edaka oko mwakeli. Ibo bɛnɛ baikwea a ndako egouverneur na cina ebikia bibu, mojɔ bo bapalaka bo bayake Kola-eBonɔ. 29A mojɔ momina, Pilato amana, na abala na bu bo, Odini na moto omina mojɔ? Modi bo? 30Bamosɔmbeja bo, Akɔki yo da moto mopele, ka bodoiti na nde ai wɛ. 31Pilato abala na bu bo, Motombani no bɛnɛ; mosambejani na Mibeko minu bɛnɛ. BaYuda babala na nde bo, Iso boditi na kpaci a boweja moto. 32Mojɔ mu mongameja ekenge ema bala Yesu a boneja tungu ebogwa bonde.

33Pilato akwea koko a ndako tei. Abea Yesu na abala na nde bo, Wɛ odi Kumu oBaYuda? 34Yesu amosɔmbeja bo, Obali boa wɛ mɛnɛ, isa bato batongo babali na wɛ a mojɔ mombi? 35Pilato asɔmbeja bo, Adi mbi MoYuda? Bato bawɛ mɛnɛ, na basuku banganga badoi na wɛ ai mbi; mojɔ mokɔi wɛ nda? 36Yesu abala bo, Bokumu bombi boditi bokumu bongondo ye. Akɔki mbi da na bokumu bongondo ye, ka bakɔmɛli bambi bani bila, bo BaYuda batapea mbi. Bokumu bombi ko boditi bokumu bongondo. 37Pilato abala na nde bo, Oko boa odi Kumu? Yesu amosɔmbeja bo, Wɛ mɛnɛ obali bo nadi Kumu. Cina ebobotama bombi, cina ebodoa bombi a ngondo edi oko bo natate tati a mojɔ moSoti. Moto na moto yona odi moto oSoti akaka monɔkɔ mombi. 38Pilato abala na nde bo, Soti, iye nde? Yana abala yo ekenge emina, amana sokolu ai BaYuda. Abala na bu bo, Mbi nabolojaiti nongo mojɔ na nde. 39Ino ko odini na ekina ekɔmɛli bo nacingoe moto omɔci ai no a ehole eKolaeBonɔ. Opalakani bo nacingoe Kumu oBaYuda ai no? 40Ibo babekoa koko bo, Te moto yo, oko Balaba! Balaba ko adaka mobengo.

Currently Selected:

Yoane 18: NTNG61

Highlight

Copy