Yoane 20
20
Yesu AngÉ” a Bogwa
1Malia oMagadala akɛ a esɛmɔ a busa boboso, a ehole eehuma pu, oko na ehindahindi, na anɛ bo litai lima donga a esɛmɔ. 2Oko boa apota ebango, akɛ ai Simona Pɛtɛlo na ai mocingami yona otongo opalaka Yesu. Abala na bu bo, Badongejai Kumu a esɛmɔ, na botajebaka esika emosambei bo. 3Pɛtɛlo na mocingami yona otongo bamana bo bakɛe a esɛmɔ. 4Ibo basusu babae bapota mbango. Mocingami yona otongo ko anɔ Pɛtɛlo na ebango, na yo amea a esɛmɔ boso. 5Asumana, anja a tei, na anɛ bisenja bipu bisambi; aikwea ko a tei. 6Simona Pɛtɛlo amea ngɔngɔ jinde; yo akwea a tei eesɛmɔ, na anɛ bisenja bipu bisambi, 7na litambala pongono lia limaka da a molo moYesu. Litambala liidaka a esika ebisenja bipu; lima bulukama pundu, na lidaka a esika etongo. 8Mocingami otongo, yona omea boso a esɛmɔ, akwea a tei pongono. Iyo anɛ, na ajima. 9Mojɔ bo baipaka cingea Mosɔnɔ bo adi bongɔ a bogwa. 10Oko boa bacingami bamina basɔmbɔ koko a ndako.
11Malia ko adaka ami a sokolu eesɛmɔ, na ayeaka bio. Ayeaka yo, asumana a bonja a tei eesɛmɔ, 12na anɛ babwɛnji baDiko babae. Ibo badaka na mbondo a esika emaka da mokuku moYesu, okina a molo, otongo a bibota, na bisenja bibu bidaka bipu. 13Babwɛnji bahɔjɔ Malia bo, Mwali, oyeaka mojɔ moye? Iyo abasɔmbeja bo, Mojɔ bo badongejai Kumu ombi, na nitajebaka esika emosambei bo. 14Amaka yo bala boa, ami hekoa oko bohekoa, na anɛ Yesu yona odaka ami ena; aijeba ko bo yo adi Yesu. 15Yesu abala na nde bo, Mwali oyeaka mojɔ moye? Odukaka nda? Malia alɛkɛ bo yo adi moswa ogbie, na abala na nde bo, Kumu, isa wɛ omodongejai, tɔndɔ mbi esika emosambei wɛ, bo mbi namotombe. 16Yesu abala na nde bo, Malia! Malia ahekoa, na abala na nde a kɔpi eBaEbele bo, Laboni! (Cina emina edi Mokoja.) 17Yesu abala na nde bo, Yɛ bobandani na ebɔ, mojɔ bo naweakini ai Sango. Wɛ ko, kɛ ai baninga bambi; bala na bu bo mbi nakawee ai Sangwa’mbi na ai Sangwa’nu, ai Njambe ombi na ai Njambe onu. 18Malia oMagadala akɛ na bwɛnji bomina ai bacingami bo, Mbi nani Kumu. Abatɔndɔ koko mijɔ mibala Kumu na nde.
Yesu Asaboloja ai Bacingami
19Yana adipa busa bomina, oko busa boboso, bacingami badaka baboli a ekina ndako, na bakanda midipe a mojɔ mobɔ boBaYuda. Yesu adoa, ama a ndanda ebu, na abala na bu bo, Bowi ai no! 20Ama yo bala boa, ami baneja oko mɔmɔ mande na litebu linde. Bacingami badaka na sepi yana anɛ bo Kumu. 21Yesu abala na bu koko bo, Bowi ai no! Mbi nalomaka no o aloma Sango mbi. 22Aseja yo bobala bikenge bimina, asopa mohuli a diko dibu, na abala bo, Asɔni Mwembo Mosɛnɔke. 23Okacingoani bato a jibe jibu, bada bacingoamake. Okabakinani a mbɔci, bada oko a mbɔci.
24Toma, kombe ende etongo Lipasa, okina obu Domi-na-babae, aidaka na bu yana adoa Yesu. 25Oko boa bacingami batongo babala na nde bo, Iso boni Kumu. Iyo ko abala na bu bo, Mbi namiti nɛ na miso bihuli bikala a mɔmɔ mande, na namiti sa mosapi mombi a litebu linde, nitajima nongo. 26Yana anɔ masu bomwambe, bacingami badaka baboli koko a ndako, na Toma adaka na bu. Bakanda midipe; Yesu ko akwea, ama a ndanda ebu, na abala bo, Bowi ai no! 27Abala koko na Toma bo, Anja mɔmɔ mambi. Batea mosapi ya. Ninoja ebɔ. Isa ebɔ ewɛ a litebu limbi. Yɛ boda na kitɛ; jima oko bojima. 28Toma amosɔmbeja bo, Kumu ombi na Nja-mbe ombi! 29Yesu abala na nde bo, Wɛ ojimi mojɔ bo oni mbi na miso. Bojongoa ai bato baya bajimaka, nongo adi bo pɛ bonɛ na miso.
30Yesu akɔ bimbete bitongo binɛnɛ a boso bobacingami, bia bisɔnɔmiti a mokanda mu. 31Ibi ko bisɔnɔmi bo ojimeni bo Yesu adi Masiya, Mwana oNjambe, na bo odaeni na bomɔ a kombe ende, oko a mojɔ moejimeli.
Currently Selected:
Yoane 20: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
