Yoane 7

Kitɛ Ebato baYesu

1Iyana asia mijɔ mimina, Yesu akɛkɛ mɛngɔ minde oko a Galile pɛ. Aipala bokɛ mɔngɔ a Yuda, cina bo BaYuda badaka na mokano bo bamowoe. 2Yana ko abatama ehole eKola eBaYuda, oko Kola-eMaako, 3bananango babala na nde bo. Donga ya; kɛ oho Yuda bo bacingami bawɛ banɛe bilomu bikɔkɔ wɛ. 4Mojɔ bo, isa moto apalaka bo bato bamojebe na soti, atakɔ nongo mojɔ a libombi. Akɔkɔ wɛ agando jiji, saneja a bohu a ngondo. 5Cina edi bo bananango mɛnɛ baimojimea nongo. 6Yesu abala na bu bo, Ehole embi ebwanakini. Ehole enu ko ebwani masu masusu. 7Ngondo editi na nu soki; edi ko na mbi soki, mojɔ bo mbi namejaka mijɔ mibe mingondo a bohu. 8Kɛni ko a Kola; mbi nitakɛ a Kola edɛye, mojɔ bo ehole embi ebwanakini. 9Ama yo bala boa, ami dika oko a Galile.

10Bananango bakɛ a Kola, na yo akɛ oko ngɔngɔ. Iyo ko aikɛ a bohu; akɛ oko a libombi. 11BaYuda bamoduka a Kola. Babala bo, Adi yo jɔ? 12Bato babomana kitɛ bou mɛnɛ a mojɔ monde. Bakina babala bo, Adi moto mopele. Batongo babala bo, Pɛpɛ nongo mweka; alabojaka bato oko bolaboja. 13Pɛpɛ nongo moto ko obala a mojɔ moYesu a boso bobato, cina bo babangaka BaYuda.

Yesu a Yelusalema

14Yana asia makina masu maKola, Yesu akwea a tempelo na abanga bokoja. 15BaYuda bakamoa bou mɛnɛ. Babala bo, Moto yo ajebaka Misɔnɔ na ye? Iyo aikoa nongo. 16Yesu abasɔmbeja bo, Bokoja bombi boditi bombi mɛnɛ; bodi oko bokoja boyona olomani. 17Isa moto apalaka bo akɔe bolulea boyona olomani, adi bocingea bokoja bombi, isa bohulaka ai Njambe, isa nakojaka na kpaci embi mɛnɛ. 18Yona okojaka na kpaci ende mɛnɛ apalaka bo asakumejae. Yona ko opalaka bo akumejae yona omoloma, yo adi moto osoti, na bokosea boditi a tei ende. 19Opa no Mibeko nda? te Mose? Pɛpɛ nongo okina onu ko osumaka Mibeko. Opalakani bowa mbi mojɔ moye? 20Bato bamosɔmbeja bo, Odi na mwembo mobe! Opalaka bowa wɛ nda? 21Yesu abala na bu bo, Mbi nakɔi mojɔ momɔci, na okamoakani a mojɔ momina. 22Ino bɛnɛ olenakani moto ganda a busa boSabata, mojɔ bo Mose apa no mobeko momina. (Ekɔmɛli emina ko eihula ai Mose, ehula oko ai batata.) 23Oko boa, isa otasopakani mobeko moMose yana alenaka no moto ganda a busa boSabata, okɛnjɔkɔni na mbi mojɔ bo nahelejai moto a yogo a busa boSabata cina eye? 24Sambejani na soti; t’osambejaeni oko esambasamba.

25Bakina bato baYelusalema babala bo, Iyoyo, te moto odukaka bato bo bamowoe? 26Anjani ko! Atɔndɔkɔ mwako a bohu, na batabalaka na nde nongo ekenge. Isa bakumu bajimi bo adi Masiya soti? 27Bojebaka esika ehuli moto yoyo; Masiya ko akadoa, pɛpɛ nongo moto odi bojeba esika ehulaka yo. 28Oko boa, yana akojaka Yesu a tempelo, abekoa bo, Ojebakani mbi, na ojebakani esika ehuli mbi. Mbi nadoiti na kpaci embi mɛnɛ. Iyona oSoti alomani; ino ko otamojebakani. 29Mbi namojebaka, mojɔ bo nadonga ai yo, na yo alomani. 30Badaka na posa bo bamopee a mojɔ momina. Pɛpɛ nongo moto ko obakea ebɔ ai yo, mojɔ bo ehole ende eipaka mea. 31Bato bangando ko banɛnɛ bamojimea. Ibo babala bo, Masiya akadoa, bimbete binde bînɔ bimbete bikɔkɔ moto yo? 32BaPalusi baka bikenge bibalaka bato a mojɔ moYesu; na nganga na BaPalusi baloma bapolisi bo bamopee.

33Yesu abala bo, Mbi nadi boyeyoa na nu mweka, na ngɔngɔ nadi boyana ai yona olomani. 34Ino ôdukani mbi, pɛ ko boboloja mbi, na otahɔnɔkɔni bomea a esika edi mbi. 35BaYuda babalana bo, Iyo akanaka bokɛ jɔ, bo so botamoboloja? Isa akanaka bokɛ ai BaYuda baya banangana a tei eBaEla, isa âkoja BaEla? 36Gina eekenge ebali yo edi bo?—Ino ôdukani mbi pɛ ko boboloja mbi; na, Otahɔnɔkɔni bomea a esika edi mbi.

Madiha Mabomɔ

37A busa bosuka, oko busa bonɛnɛ boKola, Yesu angɔ na abekoa bo, Isa moto adi na ekangola, yɛ adoe ai mbi bo amwake. 38Moto akajimea mbi, melo midua mimadiba mabomɔ mimana a molema monde, o abalaka Misɔnɔ. 39Iyo abala boa a mojɔ moMwembo, cina bo baya bamojimea babwana bomosɔ ngɔngɔ. Mojɔ bo, Mwembo moipaka doa a ehole emina, cina bo Yesu aipaka kumama. 40Yana aka bo bikenge bimina, bakina bato babala bo, Iyo adi Motɔndɔi yona, soti mɛnɛ. 41Batongo babala bo, Iyo adi Masiya. Bakina ko babala bo, Masiya adi bomana a Galile? 42Mokina mosɔnɔ motabalaka bo Masiya adi boda moto ombota eDawidi, moto oBɛtɛlɛmɛ, ngando edaka Dawidi? 43Oko boa baidaka na monɔkɔ momɔci a mojɔ monde. 44Bakina badaka na posa bo bamopee; endele ko, pɛpɛ nongo moto obakea ebɔ ai yo.

45Oko boa bapolisi basɔmbɔ ai nganga na ai BaPalusi. Ibo baba hɔjɔ bo, Ohulitini na nde mojɔ moye? 46Bapolisi babasɔmbeja bo, Moto aipaka bala o abalaka moto omina, pɛpɛ nongo omɔci. 47BaPalusi babasɔmbeja bo, Ino opengoini pongono? 48Bakina baku mu isa BaPalusi bamojimeaka? 49Bato bangando ko, bato bandakeja, batajebaka Mibeko. 50Nikodemo, (yona oma kɛ ai Yesu boso; yo adaka okina Obu;) abala na bu bo, 51Mibeko misu midumbaka moto, pɛ bopeta ka monɔkɔ monde, na pɛ bokokeleja mojɔ monde? 52Ibo bamosɔmbeja bo, Adi wɛ koko moto oGalile? Okaduka odi bonɛ bo motɔndɔi atamana nongo a Galile. 53Na banangana, moto na moto a ndako ende.

Currently Selected:

Yoane 7: NTNG61

Highlight

Copy