Luka 18

Mondɛ Mojuji Mobe

1Yesu abala na bu mokina mondɛ. Cina emondɛ momina edi bo bato babwani bonga bihole bisusu, pɛ nongo bongwa. 2Abala bo, Juji omɔci adaka a ekina ngando. Iyo aibanga Njambo, na aidaka na lisuma ai bato batongo. 3Okina mwali-obogwa adaka a ngando emina, na yo akɛkɛ ai juji mandɛli-mandɛli; abalaka na nde bo, Longeja mbi na mojɔ mombi na soki embi. 4Juji alona ekoka. Iyo ko alɛ ngɔngɔ bo, Mbi mtabangaka nongo Njambe; naditi nongo na lisuma ai okina moto. 5Mwali yo ko apukejaka mbi; bopele bo namolongejae. Namiti kɔ boa, adi bobeja molema mombi na bodoa bonde bihole bisusu. 6Kumu abala bo, Hokeani mojɔ mobalaka juji mobe. 7Njambe ko? iyo atalongeja bato bande mɛnɛ baya bamongɔɔnɔkɔ na bopipo na bulu na moi? Adi boyeyoa a bobakɔmeja? 8Mbi natɔndɔkɔ no bo adi bobalongeja bokpa mɛnɛ. Endele ko, Mwana ’Moto akadoa, âtana ejimeli a ngondo?

MoPalusi na Moto Otako

9Abala koko mondɛ mu na bakina bato baya badingaka bo badi bato babodongo na banyamoaka bato batongo. 10Abala bo, Bakina bato babae bakɛ a tempelo bo ba’nge Njambe. Okina adaka MoPalusi, yona otongo moputeja otako. 11MoPalusi angɔ, anga a tei ende na bikenge bi, Njambe, mbi nasakoaka wɛ cina bo mbi naditi na ekɔmɛli ebato batongo. Ibo badi bato bambengea, bato babokosea, bato babɔɔli; na so na moputeja yona otako, bosangiti nongo. 12Mbi nakiaka mia tu yenga bihole bibae. Napaka bipeeli, libondo lidomi lilikonja lisusu lisɔkɔ mbi. 13Moputeja otako ko ama bohali; aipala bokahoa miso mande diko; aboma bupa bonde na abala bo, Njambe, ikeani wa, mbi moto mobe! 14Mbi natɔndɔkɔ no bo yo ayana a ndako ende na lilonga, te nongo yona otongo. Mojɔ bo moto na moto yona osakumejaka, âsamboa; yona ko osatitejaka âsɔ ekumu.

Yesu na Bana Bakɛkɛlɛkɛ

15Badoa ai yo na bana bakɛkɛlɛkɛ bo ababakee mɔmɔ mande. Yana anɛ bacingami mojɔ momina, balemoa na bu. 16Yesu ko ababea ai yo; abala bo, Kinani bana bakɛkɛlɛkɛ badoe ai mbi; yɛni bobalemba, cina bo Bokumu boNjambe bodi oko ai bato baya badi o bana ba. 17Mbi natɔndɔkɔ no na soti bo, moto amiti sɔ Bokumu boNjambe na ekɔmɛli emwana mokɛkɛlɛkɛ, atakwea nongo ena.

Yesu na Lihɔjɔ Limoto

18Okina kumu ahɔjɔ Yesu bo, Mokoja mopele, êkɔ mbi ndeni bo nasangoe bomɔ bua bodi na bosusu? 19Yesu amosɔmbeja bo, Obeaka mbi mopele mojɔ moye? Pɛpɛ nongo omɔci odi mopele, oko Njambe pɛ. 20Ojebaka mibeko; T’ongɛe oko bɔɔli; T’owoe oko; T’obe oko; T’otate oko etateli ebokosea; Toma suma sangwao na ngwao. 21Iyo abala bo, Mbi namisumaka misusu, donga oko a bwɛngɛ bombi. 22Aka Yesu ekenge emina, abala na nde bo, Mojɔ motaki na wɛ oko momɔci pɛ. Peta’ngɛjɛ Ieka lowɛ losusu, pa likonja limina ai bato babokwali, bo okonje leka lonɛnɛ loyumu oho Diko; osa ko odoe a bocingama na mbi. 23Aka yo mojɔ momina, aka wa enɛnɛ a molema, mojɔ bo adaka na likonja linɛnɛ mɛnɛ. 24Yesu amonja na abala bo, Bato balikonja badi bokwea a Bokumu boNjambe oko na kpɔkɔsɔ. 25Na bokwea bokonji a Bokumu boNjambe, na bokwea bokamela a diso ditonga, bokwea bokonji a Bokumu bo-Njambe bonɔi na kpɔkɔsɔ. 26Baya baka mojɔ momina babala bo, Oko boa, odi bohela nda? 27Yesu asɔmbeja bo, Njambe abwani bokɔ ngando jimina, bato ko pɛ bobwana nongo. 28Pɛtɛlo abala bo, Ika, so bokini leka losu losusu bo bocingame na wɛ. 29Iyo abala na bu bo, Mbi natɔndɔkɔ no na soti bo, moto na moto yona okini isa ndako, isa mwali, isa bananango, isa baboti, isa bana, a mojɔ moBokumu boNjambe, 30atakputoa bosɔ libondo lia linɔi na bopele a ngondo ye, na bomɔ bua bodi na bosusu a ngondo yena ebodoa.

Yesu Abala a Mojɔ Mobogwa Bonde

31Yesu abea bacingami domi-na-babae, abala na bu bo, Anjani, iso bokɛkɛ edɛye a Yelusalema, na ngando jisusu jisɔnɔ batɔndɔi a mojɔ moMwana ’Moto jidi bongama. 32Mojɔ bo âkabama a mɔmɔ mabapakano; bâmotangola, bâmosamboja, bâmotuea masɔi, 33bâmotua nji, na bamowa; yo ko angɔ na masu masato. 34Ibo ko baicingea mijɔ mimina; bainɛ nongo cina eekenge emina, na baisipoa mojɔ mobala yo.

Moto Ogwa Miso Ahela

35Abatama yo na Yeliko, okina moto omiso mago adaka na mobondo a dɔngɔ dinjea a bo’mba yambo. 36Iyo aka bato banɛnɛ bakanɔe, na ahɔjɔ cina emina. 37Bato bamotɔndɔ bo Yesu oNasaleta akɛkɛ anɔe. 38Iyo abekoa bo, Yesu, Mwana ’Dawidi, ikeani wa! 39Baya badalaka boso balemoa na nde, bamotɔndɔ bo adae bogo. Iyo ko ahɛjɛ bingi, na abekoa na bopipo bo, Wɛ Mwana ’Dawidi, ikeani wa! 40Yesu ama, abatɔndɔ bo badoe na nde. Yana abatama yo hulelu, Yesu amohɔjɔ ho, 41Epalaka wɛ bo nakɔe ai wɛ nda? Iyo asɔmbeja bo, Kumu, kina nasɛ koko njɛnɛ embi. 42Yesu abala na nde bo, Asɔ njɛnɛ ewɛ. Ejimeli ewɛ ehelejai wɛ. 43Iyo asɔ njɛnɛ ende bokpa, acingama na Yesu, na abanga bokumeja Njambe. Bato basusu baya banɛ mojɔ momina basakoa Njambe pongono.

Currently Selected:

Luka 18: NTNG61

Highlight

Copy