Luka 8

1Ngɔngɔ mweka, Yesu akɛ mokina mɔngɔ a ngando na ngando, ngando jinɛnɛnɛ, na ngando jikɛkɛ. Atɔndɔ Mwako Mopele, na ajebeja bato mojɔ moBokumu boNjambe. 2Bacingami bande domi-na-babae bamopaka, na bakina bali baya bama hela a miembo mibe na bego; Malia oMagadala yona oma hela a miembo mibe sambo, 3Yoana mwali oKusa yona odaka mokɔmɛli oElode, na Susana, na bakina batongo koko baya bamokɔkɔ monganji na likonja libu.

Mondɛ Mongua

4Yana atitana bato banɛnɛ mɛnɛ, na adonga bato a ngando na ngando bo badoe ai yo, abala na bu mondɛ mu. 5Okina moto akɛ a bomɛsɛ ngua a gbie. Yana amɛsɛkɛ yo, jikina ngua jikwa a dɔngɔ dinjea. Bato badɛhɛ ngua jimina na bibota bibu, na mbulu bajikoma. 6Jikina jitongo jikwa a diko dilitai linɛnɛnɛ; ama ju tɔ, jimi wɔsɔsɔ oko bowɔsɔsɔ cina etaka emadiba. 7Jikina jitongo jikwa a tei enjani; njani jidaka na bohohu, na jigbokeja ngua. 8Jikina jitongo koko jikwa a kpɔtɔ jipele, jikandoa na jibota mokama-mokama. Asieja yo bobala mojɔ momina, abekoa bo, Isa moto adi na matoi manjoki, yɛ ahokee.

9Bacingami bande bamohɔjɔ cina emondɛ momina. 10Iyo abasɔmbeja bo, Mijɔ miBokumu boNjambe miboloi ai no bo omijebeni; midi a tei emindɛ ko a mojɔ mobato batongo, bo batanɛ, nongo adi bo na njɛnɛ, na bo batacingea, nongo adi bo na njoki. 11Gina emondɛ oko ye; ngua jidi Ebaeli eNjambe. 12Ijia jidi a dɔngɔ dinjea, oko baya bakaka. Satana ko adoaka na acinoaka ebaeli emina a milema mibu, bo basaka jima na basaka hela. 13Ijia jidi a litai, oko baya bakaka na basɔkɔ ebaeli na sepi. Bapeliti ko njeli; ejimeli ebu etayeyoaka ehole eyai, na bangwaka a ehole ebomeka. 14Ngua jia jikwa a tei enjani jidi oko bato baya bakaka, bayanaka na bakinaka bo ebaeli egboke na mikakwano, na likonja, na ngando jingasangasa jingondo. Ibo babotaka oko mipapa pɛ. 15Ijia jikwa a kpɔtɔ jipelejidi oko baya bakaka na babaneaka ebaeli a milema mipele mibowi. Ibo badi na lingbangba, na babotaka mbuma.

16Moto akayoja paka, atabomba paka emina a cina eteni isa cina egbagba. Aebakeaka a mesa, bo baya bakweaka banɛe bohu. 17Mojɔ bo ngando jibombamake jiboloa jisusu, na jia jikundami jîkukuoama jisusu, bo bato bajebe. 18Toma nganjamani na mijɔ mikaka no. Mojɔ bo, yona opeli âsɔ koko; yona ko odi oko ngasa, badi bomokatoa leka lodingaka yo bo apeli.

19Nange eYesu na bananango badoa a ehole emina. Bainɛ ko njea a bobatama na nde a mojɔ moembamba ebato. 20Bakina babala na nde bo, Ngwao na banangwao badi oho sokolu. Bapalaka bo banɛnɛe na wɛ. 21Iyo asɔmbeja bo, Ngwa’mbi na banangwa ’mbi badi oko baya bahokeaka na basumaka Ebaeli eNjambe.

Yesu Agɔleja Mopomba

22Yesu atamba na bacingami bande a bwato bokina busa. Abala na bu bo, Yɛni so bolekele oho a dɔngɔ ditongo dilibale. Oko boa bakɛ. 23Alekelaka bo, yo ahwɛ hiɔ. Mopomba modoa a libale; madiba manɛnɛ makwea a bwato, na bapa njupi mɛnɛ. 24Babatama na Yesu, bamosisoja, babala na nde bo, Moswa’su, moswa’su; iso bodindi! Iyo asisoa, asia pwea na mula monɛnɛ, na mopomba moyɛyɔ bowi mɛnɛ. 25Abala na bu bo, Ejimeli enu edoni? Ibo ko bagbɛlɛmwana na bɔ. Bakamoa bou, na babalana bo, Iyo moto ndani? Nongo akabala na pwea na madiba, bamosumaka.

Moto Omiembo Mibe

26Basɛmɛ a ngunda eBaGelasa yena eyɛli Galile. 27Yana aduboa yo a ngondo, asongana na okina momi ongando emna yona odaka na miembo mibe. Ama yeyoa ekoka, pɛ bolwa nongo bisenja, pɛ boda nongo a ndako, oko a bisɛmɔ pɛ. 28Yana anɛ yo Yesu, agboma, na akwa a boso bonde. Abekoa bo, Yesu, Mwana oNjambe oBonɔ! Odoi a boduka na mbi mojɔ? Yɛ bodingojani! mbi na-ngɔɔnɔkɔ wɛ. 29Mojɔ bo Yesu atɔndɔ mwembo mobe bo momane ai moto omina. (Mwembo momina momodumbaka mandɛli-mandɛli. Bamo’saka mikɛsɛ, na bamokandaka na minyɔlɔ. Iyo ko amitwaka oko botwa, na mwembo mobe momolabojaka a esika.) 30Yesu amohɔjɔ bo, Kombe ewɛ nda? Iyo asɔmbeja bo, Lindundu, cina bo miembo mibe minɛnɛ mima kwea a tei ende. 31Miembomibe mingɔɔnɔ Yesu bo atamibengana a mombɔndɔ mua mopeliti cina. 32Bwela bonɛnɛ bongulube bodaka bokayake a mono. Oko boa, miembo mibe mingɔɔnɔ Yesu bo amipɛ njea a bokwea a tei engulube, na yo ajima. 33Miembo mibe mimana ai moto, na mikwea a tei engulube. Bwela bosusu bokilima mbango a mono oko a libale, na bagwa a madiba. 34Yana anɛ banjeli bangulube mojɔ momina, bacia oko bocia. Batɔndɔ bato mojɔ momina a ngando na a njea jigbie. 35Oko boa bato bakɛ a bokokeleja mojɔ. Amea bo ai Yesu, batana moto yona ohela a miembo mibe. Iyo adaka na mobondo a bibota biYesu. Ama lwa bisenja, adaka na yongi epele, na babanga oko bobanga. 36Bato baya banɛ mojɔ babajebeja njea ema bela na moto omina a miembo mibe. 37A mojɔ momina, bato basusu balikota liBaGelasa bangɔɔnɔ Yesu bo ayane, mojɔ bo badaka na bɔ bonɛnɛ mɛnɛ. Oko boa yo atamba a bwato, na ayana. 38Moto yona ohela a miembo mibe amonga njea bo akɛe na nde. Yesu ko amoyaneja; abala na nde bo, 39Sɔmbɔ a ngando ewɛ, tɔndɔ mojɔ monɛnɛ mokɔi Njambe ai wɛ. Oko boa, yo ayana, akɛ atɔndɔe bato a ngando esusu mojɔ mosusu mokɔ Yesu ai yo.

Mwana ’Yailo Ahela

40Bato banɛnɛ basɔ Yesu na sepi a lihule linde, mojɔ bo ibo basusu badaka na njingo ai yo. 41Okina momi adoa, kombe ende Yailo. Iyo adaka mosuku osinagoge; asadumba a bibota biYesu na amongɔɔnɔ bo akɛe a ndako ende. 42Mojɔ bo adaka na mwamwali omɔci pɛ yona odaka na bianga domi-na-bibae na dea, na adaka asambi na yogo egbasoake mɛnɛ.

Yana adalaka yo a njea, bato bamombambameja bou. 43Okina mwali adaka acingi na nde engbanga yona odaka na yogo eekia bianga domi-na-bibae. Ama sieja likonja linde lisusu na nganga basengo; ibo ko baihɔnɔ bomoheleja a yogo ende. 44Mwali omina abɛnjɛ gbomba ekasaka eYesu na ebɔ ende, na ekia ende ekoka bokpa. 45Yesu ko abala bo, Obɛnjɛi mbi na ebɔ nda? Bato basusu bangana. Pɛtɛlo ko na batongo baya badaka na nde, babala na Yesu bo, Moswa’su, bato bahikaka wɛ banɛnɛ mɛnɛ, na bambambamejaka wɛ. 46Yesu ko abala bo, Moto omɔci abakei ebɔ ai mbi. Najebi bo ekina ngulu emani ai mbi. 47Yana anɛ mwali bo mojɔ monde moboloa, adoa na mongongoma na asadumba a boso boYesu. Atɔndɔ mojɔ mosusu a boso bobato basusu, bo ahela a yogo ende bokpa a eholeebɛnjɛ yo Yesu na ebɔ. 48Yesu abala na nde bo, Mwana’mbi, ejimeli ewɛ ehelejai wɛ; yana na bowi.

49Abalaka yo boa, okina moto omosuku osinagoge adoa na abala bo, Yɛ bonɔngeja koko Mokoja! Mwana’wɛ agwi. 50Yana aka Yesu ekenge emina, abala na mosuku bo, Yɛ bobanga! Jima oko bojima na yo âhela. 51Amea Yesu a ndako, ajima bo Pɛtɛlo, na Yoane, na Yakobo, na sange’mwana na ngwa’nde, bakwee na nde a tei, pɛpɛ nongo okina otongo. 52Bato basusu badaka bakayee a mojɔ mobogwa bomwamwali. Yesu abala bo, T’oyeeni oko. Iyo aditi mogo. Ahwɛi oko hiɔ pɛ. 53Ibo ko bamosɛkɛ, mojɔ bo bajebaka bo agwa. 54Iyo ko apea ebɔ ende, amobea bo, Mwana, angɔ! 55Mwembo monde mohula, na angɔ bokpa. Na Yesu abatɔndɔ bo bamopɛ ekina eka eboyaka. 56Baboti bande bakamoa na bokamoa bonɛnɛ. Yesu ko abaleha bo batatɔndɔ nongo moto mojɔ momina.

Currently Selected:

Luka 8: NTNG61

Highlight

Copy