Matayo 25
25
Mondɛ moBaseka Domi
1A ehola emina, Bokumu boDiko bôda obaseka domi. Ibo batomba paka jibu, na bakɛ a bolenoana momi obolongana. 2Ba’bu batano badaka na bondanga, na batano koko badaka na bowɛi. 3Bindanga batomba paka jibu ngasa, pɛ botomba nongo munɛ. 4Baya badaka na bowɛi batomba paka jibu na milangi mimunɛ pongono. 5Yana ayeyoa momi obolongana a njea, ibo basusu bapɔngɔpɔngɔ na hiɔ, na bahwɛ oko bohwɛ. 6Na bulu tei, moto abekoa bo, Momi obolongana akɛkɛ adoe. Kɛni a bomolenoana. 7Baseka bamina basisoa basusu, na basɛlingoa paka jibu. 8Bindanga babala na baseka babowɛi bo, Pani so ekenge emunɛ monu, mojɔ bo paka jisu jibengi bodimoa. 9Babowɛi ko babasɔmbeja bo, Pɛpɛ, motabwana na su na nu pongono. Kɛni ai bato babwasa, okasombeni a mojɔ monu bɛnɛ. 10Ama bo kɛ a bosomba munɛ, momi obolongana ami mea oko bomea; baya badaka na mosɛlingo bakwea na nde a libonje lilihango, na modipe modipama. 11Baseka batongo badoa ngɔngɔ, na babala bo, Kumu, kumu, kina so bokwee. 12Iyo ko abasɔmbeja bo, Mbi natɔndɔkɔ no na soti bo nitajebaka no. 13A mojɔ momina, toma sɛnjɛlɛni, mojɔ bo otajebakani busa na ehole.
Mondɛ moKumu na Bato Bande
14Mojɔ momina modi koko o moto yona okɛ mokina mɔngɔ. Abea bakɔmɛli bande, na akaba na bu likonja linde. 15Apa okina talenta jitano, yona otongo talenta jibae, na otongo koko talenta emɔci. Angɛ oko na mwɛngi mua mobwana na moto na moto, na akɛ a mɔngɔ monde. 16Moto yona osɔ talenta jitano, akɛ a bokɔ bwasa na likonja, na ahɛjɛ likonja limina na talenta jitongo jitano. 17Oko boa koko, yona osɔ talenta jibae akɛ na akɔ bwasa na likonja, na ahɛjɛ likonja limina na talenta jibae jitongo. 18Yona ko asɔ talenta emɔci akɛ a bolonga mombɔndɔ, na abomba likonja limoswa’nde oko ena. 19Moswa obakɔmɛli bamina ayeyoa ekoka. Yana ahula yo, akokeleja elomu ebu ebwasa. 20Yona osɔ talenta jitano adoa na likonja limina, na abakea koko talenta jitano. Abala bo, Moswa’mbi, opani talenta jitano; anja edɛyɛ; nabolojai litomba, talenta jitano. 21Moswa ’nde abala na nde bo, Bopele! wɛ odi mokɔmɛli mopele; obɔngi. Alongi wɛ na libondo likɛkɛ, nadi bokina leka lonɛnɛ a mɔmɔ mawɛ. Doa a bosepa na moswa’wɛ. 22Yona osɔ talenta jibae adoa, na abala bo, Moswa’mbi, opani talenta jibae. Anja edɛyɛ; nabakei diko talenta jibae jitongo, 23Moswa’nde abala na nde bo, Bopele! wɛ odi mokɔmɛli mopele; obɔngi. Alongi wɛ na libondo likɛkɛ, nadi bokina leka lonɛnɛ a mɔmɔ mawɛ. Doa a bosepa na moswa’wɛ. 24Yona oso oko talenta emɔci pɛ adoa pongono. Iyo abala bo, Moswa’mbi, najebaka bo wɛ odi moto mopipo. Obukaka ndongo a esika edi wɛ pɛ bona, Otombaka a esika edi wɛ pɛ bohɛhɛ. 25A mojɔ momina, mbi nadaka na bɔ, Nakɛ, nabomba likonja liwɛ a kpɔtɔ. Anja, likonja liwɛ didi. 26Moswa’nde amosɔmbeja bo, Wɛ mokɔmɛli mobe, mokɔmɛli obomɛli! Isa ojebaka bo mbi nabukaka ndongo a esika edi mbi pe bona, na bo natombaka a esika edi mbi pɛ bohehɛ, 27oikɔ bwasa na likonja limbi mojɔ moye, bo nasɛ likonja limbi a lihule limbi, na litomba pongono? 28Katoani likonja limina ai yo, na pani ai yona odi na talenta domi. 29Mojɔ bo, yona opeli asɔ koko, bo adae na lituna. Moto ko akada ngasa, badi bokatoa oko eka epeli yo. 30Dumbani mokɔmɛli omina yona odi edada sokolu a modidi, a esika ebio na bokpɛkpɛnɛ bomino.
Esambi eMakota
31Mwana ’Moto akadoa na babwɛnji bande basusu a ekumu ende, adi boda a ngɛndɛ eekumu ende. 32Âbolea makota masusu a boso bonde, Âbabɔteja, o abɔtejaka mobanei bata na kambɛli. 33Âkaba bata a dɔngɔ diebɔ ende ebami, kambɛli ko a dɔngɔ diebɔ ende ebali. 34A ehole emina, Kumu âbala na bato a dɔngɔ diebɔ ende ebami bo, Doani. Bojongoa boSangwa’mbi bodi ai no, Sangoani Bokumu bua bosɛlingoama a mojɔ monu oko a bobanga bongondo. 35Mojɔ bo, adaka mbi na nja, ino opakani mia. Ekangola ekɔkɔni, na onusakani madiba. Adaka mbi mokɛndɛli, ino osɔni mbi a ndako jinu. 36Adaka mbi oko mbundu, ino olwajakani mbi. Adaka mbi nasambi na yogo, ino obaneakani mbi. Nadaka a blɔkɔ, na odoakani a bonja mbi. 37Bato babodongo ko badi bomosɔmbeja bo, Kumu, Iso bonɛ wɛ na nja, na bopa wɛ mia a ehole eni? Bonɛ wɛ na ekangola, na bonusa wɛ madiba a ehole eni? 38Iso botana wɛ mokɛndɛli, na bosɔ wɛ a ndako jisu a ehole eni? Botana wɛ mbundu na bolwaja wɛ a ehole eni? 39Iso bonɛ wɛ osambi na yogo, isa a blɔkɔ, na bokɛ a bonja we a ehole eni? 40Kumu ko âbasɔmbeja bo, Mbi nabalaka na nu na soti bo, Bihole bisusu bikɔ no boa ai okina obaninga bambi yona onɔi na bokɛkɛ, okɔni ai mbi mɛnɛ. 41Adi bobala na bato baebɔ ebali bo, Dongani ai mbi, ino bato bandakeja. Kɛni oko a mosa mua motadimea, mua mohɛngɛmɛ ai Satana na babwɛnji bande. 42Mojɔ bo, yana adaka mbi na nja, oipakani nongo dia diboyaka. Adaka mbi na ekangola, oinusani mbi madiba. 43Adaka mbi mokɛndɛli, oisɔni nongo mbi a ndako jinu. Adaka mbi mbundu, oilwajani mbi, Adaka mbi nasambi na yogo na a blɔkɔ, oidoani a bonja mbi. 44Ibo koko bâmosɔmbeja bo, Kumu, ehole enɛ so wɛ na nja, isa na ekangola, isa mbundu, isa na yogo, isa a blɔkɔ, na so pɛ bokɔmeja we, ehole eni? 45Iyo âbasɔmbeja na âbala bo, Mbi natɔndɔkɔ no na soti bo, Oikɔmejani nongo okina mokɛkɛ obaninga bambi; oko boa oikɔmejani mbi. 46Bato bamina badi bokɛ oko a bodingoa bua bopeliti nongo suka. Bato balilonga ko badi bokɛ oko a bomɔ, oko na bosusu.
Currently Selected:
Matayo 25: NTNG61
Highlight
Share
Copy
Want to have your highlights saved across all your devices? Sign up or sign in
Alliance Biblique de la R. D. Congo
