Bisalu Ya Bantumwa 13
13
Mpeve Yanlongo binga Paulu ye Banaba
1Mu dibundu ya Antiokia vandaka bambikudi ye banlongi, Banaba ye Simeoni ya bingwa Ningeli, ye Lukiu ya Kilene, ye Manaeni ya kulaka sikamosi na Elode nyadi, ye Sauli.
2Bu bau sadilaka Mfumu ye buya madia, Mpeve Yanlongo tubaka: Sodila mono Banaba ye Sauli sambu na kisalu ya mono imene kubinga bau. Bis. 9:15; 10:19; 14:26; 15:28; Lom. 1:1; Ngal. 1:1, 15; Ef. 3:8; 1 Tim. 2:7; 2 Tim. 1:11
3Bu bau imene kubuya madia ye lomba ye tulaka bau maboko, bau sindikaka bau. Bis. 6:6; 14:23
Bau kwenda ku Kipelo
4Bu bau fidiswaka na Mpeve Yanlongo, bau kwendaka ku Seleukia, tuka kuna bau sabukaka ku Kipelo.
5Bu bau kumaka ku Salami, bau samunaka mambu ya Nzambi mu banzo ya sambilu ya baYuda; Yoane vandaka bonso nsadisi ya bau.
6Bu bau imene kuluta sanga yamvimba ti ku Pafo, bau monaka nkwa kindoki, ikele mbikudi ya luvunu, muntu ya Yuda, nkumbu ya yandi Balyesu. Bis. 8:9; 19:19
7Yandi vandaka sikamosi na nyadi, Selengio Paulu, nkwa ngangu. Yandi bingaka Banaba ye Sauli, ye sosaka kuwa mambu ya Nzambi.
8Kansi Elima muntu ya kindoki, ikele kutendula ya nkumbu ya yandi, buyaka bau, ye sosaka kuvengumuna nyadi mu lukwikilu.
9Kansi Sauli, ya bingwa Paulu mpe, fulukaka na Mpeve Yanlongo, talaka yandi ti,
10yandi tubaka: Nge ya fuluka na luvunu yonso, ye yiba mutindu yonso, mwana ya diable, ye mbeni ya lunungu yonso, nge tabika ve kuvengumuna banzila ya sungama ya Mfumu ?
11Ntangu yai, tala, diboko ya Mfumu ikele va nge, meso ya nge takufwa, ye nge tamona ntangu ve bilumbu ndambu. Nswalu mbungi ye tombe kubwilaka yandi, yandi zietaka kusosa muntu kutwadisa yandi na diboko. Bis. 9:8; 12:23
12Nyadi kwikilaka bu yandi monaka kisalu yina, yandi yitukaka sambu na malongi ya Mfumu.
Paulu ikele kwenda ku Pamfilia
13Paulu ye bau ya vandaka na yandi sabukaka tuka Pafo, ye kwizaka ku Pelenge mu Pampfilia; kansi Yoane bikaka bau ye vutukaka ku Yelusalemi.
14Bau katukaka na Pelenge ye lutaka ye kumaka ku Antiokia mu Pisidia. Bau kotaka mu nzo ya sambilu mu kilumbu ya luvundu, ye vandaka.
15Bu bau imene kutanga nsiku ye bambikudi, bakuluntu ya nzo ya sambilu fidisaka kwa bau, kutuba: Bampangi, kana beno ikele na mambu ya bombodolo kulonga bantu, longa yo. Bis. 15:21
16Paulu telemaka ye labisaka na diboko, ye tubaka: Bantu ya Isaeli ye beno ya vumina Nzambi, kuwa.
17Nzambi ya bantu yai Isaeli solaka batata ya beto, ye zitisaka bantu bu bau vandaka banzenza mu nsi ya Ngipiti, ye basisaka bau mu diboko ya ngolo. 2 Mose 6:1, 6; 13:14
18Kitezo na mvu makumi iya, yandi vibidilaka bifu ya bau mu nsi ya mpamba. Nk. 9:5, 10
19Bu yandi imene kufwa makanda nsambwadi ya bantu mu nsi ya Kanana, yandi pesaka bau nsi yina difwa, kitezo ya mvu nkama iya ye makumi tanu. 5 Mose 7:1; Yos. 14:2
20Nanima na mambu yai, yandi pesaka bau bamfundisi ti mbikudi Samueli.
21Nanima na yai bau lombaka ntinu. Nzambi pesaka bau Sauli mwana ya Kisi, muntu ya kikanda ya Benjamini, kitezo ya mvu makumi iya. 1 Sam. 8:5; 9:15; 10:1, 21
22Bu yandi imene kukatula yandi, yandi telemisaka Davidi kuvanda ntinu ya bau, yandi tubaka kitemo sambu na yandi mpe, ye tubaka: Mono imene kumona Davidi, mwana ya Isai, muntu ya yangidisa ntima ya mono, yandi tasala luzolo yonso ya mono. 1 Sam. 16:1, 13
23Ya nkuna ya yandi, Nzambi imene kutwala Mvulusi kwa Isaeli, yandi Yesu bonso ya vandaka mu nsilulu. 2 Sam. 7:12; Yes. 11:1; Yel. 23:5; Yeh. 34:23
24Bu Yoane imene kusamuna mbotika ya mpindulu mabanza kwa bantu yonso ya Isaeli, buna Yesu kwizaka. Mat. 3:1; Mal. 1:2; Luk. 3:3; Yoa. 1:23
25Bu Yoane vandaka kumanisa kisalu ya yandi, yandi tubaka: Beno banza mono ikele nani ? Mono ikele yandi ve. Kansi tala, muntu ikele kwiza nanima na mono ya mono lunga ve kukangula nsampatu ya makulu ya yandi, ya Abalahami, ye beno ya vumina
26Bampangi, bana ya kikanda Nzambi, kwa beto mambu ya mpulusu yai ikele kufidiswa. Mat. 10:6; Bis. 3:26
27Bau ya vandaka mu Yelusalemi, ye bakuluntu ya bau, sambu na bau zabaka Yesu ve ye ndinga ya bambikudi, ya bau tangaka kilumbu ya luvundu na lumbu ya luvundu, bau manisaka mambu yina bu bau bedisaka yandi. 1 Kol. 2:8
28Bau monaka mambu ve ya lunga kufwa yandi, kansi bau yuvulaka Pilatu kufwa yandi. Mat. 27:20; Mal. 15:11; Luk. 23:18, 23; Yoa. 19:6
29Bu bau lungisaka mambu yonso ya sonamaka sambu na yandi, bau katulaka yandi na nti ye tulaka yandi mu ndiamu. Mat. 27:59; Mal. 15:46; Luk. 23:53; Yoa. 19:38
30Kansi Nzambi fulukisaka yandi tuka bafwa. Bis. 2:24
31Yandi monikaka bilumbu mingi kwa bau ya kwizaka sikamosi na yandi ku Yelusalemi tuka Ngalili, ntangu yai bau ikele bantemo ya yandi kwa bantu. Mat. 28:16; Mal. 16:6; Luk. 24:1; Yoa. 20:1; 21:1; Bis. 1:3; 10:40; 1 Kol. 15:5
32Beto twala kwa beno nsamu mbote ya nsilulu ya peswaka kwa batata. 1 Mose 22:18; Yes. 7:14; 9:6; Yel. 33:14; Dan. 9:24
33Nzambi manisaka nsilulu yina kwa bana ya beto, bu yandi fulukisaka Yesu; bonso yo ikele kusonama mu Nkunga ya zole: Nge ikele Mwana ya mono, bubu yai mono imene kubuta nge. Nk. 2:7; Eb. 1:5
34Mu mambu ya yandi fulukisaka yandi tuka bafwa, na yandi tavutuka kubola diaka ve, yandi tubaka mpilayai: Mono tapesa nge lusakumunu ya nlongo ye ya kwikama ya Davidi. Yes. 55:3
35Sambu na yandi tuba mu Nkunga yankaka: Nge tabika Nkwa Yanlongo ya nge mona kubola ve. Nk. 16:10
36Kadi Davidi, bu yandi imene kusala lukanu ya Nzambi mu mbandu ya yandi, yandi lalaka tulu, ye yandi zikwaka sikamosi na batata ya yandi, ye yandi monaka kubola.
37Kansi yandi ya Nzambi fulukisaka monaka kubola ve.
38Sambu na yai bampangi, bika beno zaba, yo ikele mu muntu yai, na mvidisilu ya masumu ikele kusamunwa kwa beno. Luk. 24:47; 1 Yoa. 2:12
39Konsonani ya kwikila ikele kununguswa na mambu yonso mu yandi, kansi bau lendaka ve nunguswa mu nsiku ya Mose. Lom. 8:3; 10:4; Ngal. 2:16
40Sambu na yai, dikeba, na mambu yina tabwila beno ve ya ikele kutubwa mu bambikudi:
41Tala, beno ya buya, yituka ye kufwa, kadi mono ikele kusala kisalu mu bilumbu ya beno, kisalu yina beno takwikila yo ve, kana muntu tuba yo kwa beno. Hab. 1:6
42Bu bau basikaka, bau lomba na mambu yai lenda kutubwa kwa bau na kilumbu ya luvundu ya landa mpe.
43Bu bantu ya nzo ya sambilu mwanganaka, baYuda mingi ye bau ya kituka baYuda ya vuminaka Nzambi landaka Paulu ye Banaba, bau tubaka kwa bau ye lombaka bau kukanga ngolo mu nlemvo ya Nzambi.
44Na kilumbu ya luvundu ya landaka bika fioti mbanza yamvimba kutakanaka kuwa mambu ya Nzambi.
45Bu baYuda monaka bibuka, bau fulukaka na kimpala ye buyaka mambu ya Paulu tubaka, ye tubaka mbi sambu na yandi.
46Buna Paulu ye Banaba tubaka na kikesa, kutuba: Yo lunga na mambu ya Nzambi tubwa ntete kwa beno. Kansi sambu na beno imene kubuya yo, ye beno imene kuzenga mambu ya beno mosi lunga ve kubaka moyo ya mvu ya mvu, tala, beto pindula kwa bapaien. 2 Mose 32:21; Yes. 55:5; Mat. 10:6; 21:43; Bis. 3:25
47Kadi Mfumu sikidikisaka beto, kutuba: Mono imene kutula nge bonso mwini kwa bapaien, sambu na kunata mpulusu ti nsuka ya ntoto. Luk. 2:32
48Bu bapaien kuwaka mambu yai, bau yangalalaka ye kembilaka mambu ya Mfumu, bau yonso ya imene kusolwa kuvanda na moyo ya mvu ya mvu, bau kwikilaka. Lom. 8:29
49Mambu ya Mfumu mwanganaka mu nsi yina yamvimba.
50BaYuda telemisaka ntima ya bankento ya luzitu ye ya mawete, ye babakala ya luzitu mu mbanza, telemisaka bau kumonisaka Paulu ye Banaba mpasi ye basisaka bau tuka ntoto ya bau.
51Kansi bau katulaka mfumfuta na makulu ya bau, ye kwendaka ku Ikone. Mal. 6:11; Luk. 9:5; 10:10; Bis. 18:6
52Banlonguki fulukaka na kiese ye Mpeve Yanlongo.
Currently Selected:
Bisalu Ya Bantumwa 13: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
